മത്തായി 20
20
മുന്തിരി ദോട്ടാത്തില്യ ബേലെക്കാറാര് കദെ
1<<സാമി ആള്‌റാദ് എങ്കാദ് തന്ന് മുന്തിരി ദോട്ടാത്തിലി ബേലെ സെയ്യ, ബെ്ഡ്യാകാലാത്തിലി താനെ ആള് പരാന്ത് പോരവാന്‌ക്ക് സമ. 2അവാ് ഒരു ണാള്‌ക്ക് കൂലി ഒരു ബെ്ള്ളി പണ ബെത്ത് കൊഡുക്കെ എന്ത് സൊല്ലി അവാര്‌ണ ബേലെ സെയ്യ തന്ന് മുന്തിരി ദോട്ടാക്കെ ബ്‌ട്ടാ്.
3ബെ്ഡ്യാലെ ഒമ്പാദ് മണി ഗള്യേക്ക് പോനാ്. അക്കുളെ ലേസ ആള്‌ഗ കഡേക്ക്‌റാഗ ബെ്റ്‌ദെ ണിന്റ് ഇര്‌ക്കാദ്‌ണ കണ്ടാ്. 4അവാര്‌ണ: <ണിമ്മാമ് എന്ന് മുന്തിരി ദോട്ടാക്കെ ബേലേക്ക് പോയിരി. ണിമാക്ക്‌മ് അദ്‌ക്ക് തഗ്‌ന്ത കൂലി തരെ> എന്ത് സൊന്നാ്. 5അക്കുളെ അവാര്‌മ് പോനാര്.
അവാ് പന്നന്റ് മണി ഗള്യേക്ക്‌മ് മൂണ് മണി ഗള്യേക്ക്‌മ് പോയി അദേപാസെ താനെ സെയ്‌ദാ്. 6അദ്‌ക്ക് പ്‌റ അഞ്ച് മണി ഗള്യേക്ക്‌മ് പോയി, ബേ്റെ ലേസ ആള്‌ഗ ബേലെബ്‌ട്ടില്ലാദെ ബെ്റ്‌ദെ ണിന്റിര്‌ക്കാദ്‌ണ കണ്ട്, <ണിമ്മ ബേലെബ്‌ട്ടില്ലാദെ എന്ത്‌ക്ക് ഒരു പൊളുദെ ണിന്റിര്‌ക്കാദ്?> എന്ത് കേ്ട്ടാ്.
7അക്കുളെ അവാര്: <എമാണ ആര്‌മ് ബേലേക്ക് ഒളേക്കാലെ> എന്ത് സൊന്നാര്.
അക്കുളെ അവാ്: <ണിമ്മാമ് എന്ന് മുന്തിരി ദോട്ടാക്കെ ബേലേക്ക് പോയി> എന്ത് സൊന്നാ്.
8അന്ത്യോഡെ ആഗാട്ടി മുന്തിരി ദോട്ടക്കാറാ്, തന്ന് കൂരെ കാര്യഗണ ണോഡി ണഡാത്ത്‌റവാന്‌ക്കെ: <ണീ ബേലെക്കാറാര്‌ണ ഒളേത്ത്, കഡേസിലി ബന്തവാരിലിര്‌ന്ത് മുദ ബന്തവാര് മാട്ട്‌ക്ക് കൂലി കൊഡു> എന്ത് സൊന്നാ്.
9അച്ചെ അഞ്ച് മണിക്ക് ബന്തവാര് ബന്ത് ഒരൊരു ബെ്ള്ളി പണ ബെത്ത് കെ്ഡേസിനാര്. 10അക്കുളെ മുദ ബന്തവാര് തമാക്ക് മൊത്തന കെ്ഡേക്കു എന്ത് ണെനേത്താര്. ആന അവാര്‌ക്ക്‌മ് ഒരൊരു ബെ്ള്ളി പണ കെ്ഡേത്ത്‌ദ്. 11ഇദ്‌ണ ബാങ്കിനാദ്‌മ് അവാര് മുന്തിരി ദോട്ടക്കാറാന ങ്കൊറുങ്കൊറുത്താര്. 12<കഡേസിലി ബന്തവാര് ഒരു മണി ണേര മാട്ട്‌ത്തെ ബേലെ എ്ഡ്‌ത്താര്. എന്ത്‌ട്ട് ഒരു പൊളുദെ ണഡ് ബെക്കേലി ബേലെ എ്ഡ്‌ത്ത് ഓരാഡിന എമാണാമ് അവാര്‌ണാമ് ഒരേ സമ ആക്കിനേനെ?> എന്ത് സൊന്നാര്.
13അച്ചെ സൊല്ലുഗാട്ടി ദോട്ടക്കാറാ് അവാര്‌ദിലി ഒരുത്താന്‌ക്കെ: <ഈങ്ക് ണോഡ്, ണാന് ണിനാണ ഏമാത്താലെ. ണീ ഒരു ബെ്ള്ളി പണാക്ക് ബേലെ സെയ്യ ഒത്തുപട്ട്‌ത്തെ ബേലേക്ക് ബന്തെ? 14അദ്‌ണാലെ ണിനാക്കുള്ള കൂലിന ബാങ്കി ണീ പോയികൊള്ളു. ണിനാക്കുള്ള കൂലിന പാസെ പ്‌റ ബന്തവാന്‌ക്ക്‌മ് കൊഡുക്കാദ് എന്ന് പിര്യ. 15എന്ന് പണാണ എന്ന് ആസെപഡി സെയ്യ എനാക്ക് ഉരിമെ ഇല്ലേഗ? ണാന് ണല്ലവാ് ആനാദ്‌ണാലെ ണിനാക്ക് എര്‌സാഗ?> എന്ത് സൊന്നാ്.
16അച്ചെ കഡേസിലി ബന്തവാര് മുന്തിനവാര്‌മ് മുന്തുക്ക് ബന്തവാര് കഡേസിമ് ആവാര്.>>
സാരാദ്‌ണ പറ്റിമ് ഉജുറേ്റാദ്‌ണ പറ്റിമ് മൂണാവദ്‌മ് സൊല്ലുറാ്
17ഏസു എര്‌സലേമ്‌ക്കെ പോയി കൊണ്ടിര്‌ക്കാട്ടി, തന്ന് സൊല്ലുപഡി ണഡാക്ക പന്നന്റ് ആള്‌ഗണ ഒച്ചാരി കൂട്ടി എ്ഡ്‌ത്ത് ണില്ലിസി അവാര്‌ക്കെ: 18<<ഇദാ, ഇപ്പ് ണമ്മ എര്‌സലേമ്‌ക്കെ പോരാമ്. അദിലി ബെത്ത് മന്‌സാനായി പ്‌റാന്തവാന എഗുദ പൂസാരി തലെവല കയ്യിക്കേമ് ബേദ ബാത്ത്യല കയ്യിക്കേമ് ഒപ്പഡിക്കുവാര്. അവാര് അവാന കൊല്ല്യ ബിദിത്ത്, 19എഗുദാര് അല്ലാത്ത ജാദിഗാദ് കയ്യിക്ക് ബ്‌ട്ട് കൊഡുക്കുവാര്. അവാര് അവാന ണാണഗെ്ഡ്‌സാമ് സാട്ടെബാറ്‌ക്കെ അഡിത്ത് കുരുസ്‌ക്കെ സേത്തി ആണി അഡിത്ത് കൊല്ലാമ് സെയ്‌വാര്. ആന മൂണാവദ് ണാളെങ്കാട്ടി അവാ് ഉജുറെ്ന്തുവാ്>> എന്ത് സൊന്നാ്.
സെവെദി മഗനാര്‌ദ് അവ്വാസിദ് ആസെ
20സെവെദി എങ്കവാന്‌ദ് പെ്ണ്ടച്ചി തന്ന് റണ്ട് മഗനാര്‌ണ കൂട്ടി ഏസു പട്ട്‌ക്കെ പോയി സന്ത് ഊന്റി കുമ്മുഡികൊണ്ട്: <<എനാക്ക് ഒരു ഉവഗാര സെയ്‌ഡൊ>> എന്ത് ഏസുണ ബേ്ണ്ടിന.
21ഏസു അദ്‌ക്ക്: <<ണിനാക്ക് ണാന് എന്ത സെയ്‌ദ് തര്യ?>> എന്ത് കേ്ട്ടാ്.
അക്കുളെ അവ: <<ണീ അദിഗാരത്തോഡെ ആള്യ പോര ണാഡിലി ണീ കുക്കാക്ക പട്ടിലി എന്ന്‌ദ് ഈ റണ്ട് മഗനാരിലി ഒരുത്താന ണിന്ന് ബല സാരിമ് ഒരുത്താന ണിന്ന് ഇ്ഡ സാരിമ് കുക്കാക്ക്യ ബ്‌ഡുഡോമെ>> എന്ത് സൊന്ന.
22അക്കുളെ ഏസു അവാര്‌ക്കെ: <<ണിമ്മ കേ്ക്കാദ് എന്തായെന്റ് ണിമാക്കെ തെര്യ. കജട്ട ഇര്‌ക്ക സെമ്പിലിര്‌ന്ത് ണാന് കുഡിക്ക്യ പോരെ; ണിമാക്ക്‌മ് അദ്‌ണ കുഡിക്ക്യ മുഡ്യുമ?>> എന്ത് കേ്ട്ടാ്.
<<എമാക്ക് മുഡ്യു>> എന്ത് അവാര് സൊന്നാര്.
23ഏസു അവാര്‌ക്ക്: <<സെരി, ണാന് കുഡിക്ക കജട്ട ഇര്‌ക്ക സെമ്പിലിര്‌ന്ത് ണിമ്മ കുഡിക്കുവേര്. ആന എന്ന് ഇ്ഡ സാരിമ് ബല സാരിമ് കുക്കാസ്‌റാദ്‌ക്കുള്ള അദിഗാര എന്ന് കയ്യിലി അല്ല; അദ് എന്ന് അപ്പനാന സാമി ആര്‌ക്ക് കൊഡുക്ക്യ ബെത്ത് ഇര്‌ക്കാനൊ അവാര്‌ക്ക് കെ്ഡേക്കു>> എന്ത് സൊന്നാ്.
24ഏസുദ് സൊല്ലുപഡി ണഡാക്ക ബാക്കി പത്താള് ഇദ്‌ണ കേ്ട്ട് അവാര് തമ്പി റണ്ട്‌ണ മൊനേക്ക്‌പട്ടാര്. 25ആന ഏസു അവാര്‌ണ എല്ലാര്‌ണാമ് അര്‌ഗെ ഒളേത്ത് ബര്‌സി: <<എഗുദാര് അല്ലാത്ത ജാദിഗാക്ക് തലെവല ഇര്‌ക്കാര്. അയ്യി തലെവല തമ്മ് സൊല്ലിലി ആള്‌ഗണ ണഡാത്തുഡൊ എന്ത് ആസെപഡ്‌റാര്. അവാര് തമ്മ് എല്ല അദിഗാരണാമ് ആള്‌ഗാക്ക് കാട്ട്‌റാര് എന്ത്‌മ് ണിമാക്ക് തെര്യുമല്ല? 26ആന ണിമ്മ അവാര്‌ണ പാസെ ആരാക്കില്ലെ. അച്ചെ ണിമ്മ്‌ദ്‌ക്കുള്ളുക്ക് ബെല്ല്യവാ് ആയ ആസെ ബെക്കവാ് എല്ലാര്‌ണാമ് ഓരാഡ്‌റവാ് ആഡൊ. 27ണിമ്മ് കൂട്ടാത്തിലി ആരാറ്റ് ബെല്ല്യവാ് ആയ ആസെപട്ടാക്കി അവാ് ണിമ്മ എല്ലാര്‌ദ്‌മ് പണ്ണ്യക്കാറാ് ആഡൊ. 28മന്‌സാനായി പ്‌റാന്തവാ് ബന്താദ് ആള്‌ഗ അവാന ഓരാഡ്യ അല്ല. അവാ് എത്തിന്യൊ ആള്‌ഗണ ഓരാഡ്യാമ് തന്ന് ഉജുറുണാമ് കൊഡുത്ത് അവാര്‌ണ കാപാറ്റി തിലിപ്പി എ്ഡ്‌ക്ക്യാമ്‌ത്തെ. ണിമ്മാമ് അവാന പാസെ ആയിര്‌ക്കുഡൊ>> എന്ത് സൊന്നാ്.
റണ്ട് കുറുഡാര്‌ക്ക് പാര്‌വെ കൊഡുക്കാ്
29ഏസുമ് തന്ന് സൊല്ലുപഡി ണഡാക്കവാര്‌മ് എരിഗോവിലിര്‌ന്ത് പോഗാട്ടി ബെല്ല്യൊരു കൂട്ട ആള്‌ഗ അവാര്‌ദ് പിന്ന്‌ക്ക് പോനാര്. 30ഏസു ഈ ബയ്യിമേലെ ബന്ത് പോരാ് എന്ത് സേദി കേ്ട്ട്, ബയ്യ്യോരാത്തിലി കുക്കാന്തിര്‌ന്ത റണ്ട് കുറുഡാര്: <<ആണ്ടവാനെ, ദാവീദ്‌ദ് കാല്‌ക്ക് പട്ടവാനെ, എമ്മോഡെ ബേ്റ്‌വായി ബേഡോമെ>> എന്ത് ബെല്ല്യാദ്‌ക്ക് ആലാത്ത് സൊന്നാര്.
31ആള്‌ഗ അവാര്‌ണ: <<മ്‌ണ്ടാദിരിരിമെ>> എന്ത് കെഞ്ച്യെ്ഡ്‌ത്ത് ബ്‌ട്ടാര്. ആന അവാര്: <<ആണ്ടവാനെ, ദാവീദ്‌ദ് കാല്‌ക്ക് പട്ടവാനെ, എമ്മോഡെ സെറ്റെ ബേ്റ്‌വായി ബേഡോമെ!>> എന്ത് ഉള്ളാസ് ആലാത്ത് സൊന്നാര്.
32അക്കുളെ ഏസു അദ്‌ക്കെ ണിന്റാ്. പ്‌റ അവാര്‌ണ ഒളേത്ത്: <<ണാന് ണിമാക്ക് എന്ത സെയ്‌ദ് തരുഡൊ എന്ത് ണിമ്മ ആസെപഡ്‌റേര്?>> എന്ത് കേ്ട്ടാ്.
33അക്കുളെ അവാര്: <<ആണ്ടവാനെ, എമാക്ക് കണ്ണ് പാര്‌വെ കെ്ഡേക്കുഡൊ>> എന്ത് സൊന്നാര്.
34ഏസുക്ക് ബേ്റ്‌വെന്ത് അവാര്‌ദ് കണ്ണ്‌ണ അണ്ണിനാ്. അപ്പ്‌താനെ അവാര്‌ക്ക് കണ്ണ് പാര്‌വെ കെ്ഡേത്ത്‌ദ്. പ്‌റ അവാര്‌മ് ഏസുദ് പിന്ന്‌മേലെ പോനാര്.
Currently Selected:
മത്തായി 20: സാമിദ് സേദി
Highlight
Share
Copy
Want to have your highlights saved across all your devices? Sign up or sign in
New Life Literature
