ഓഗന്നാ് 10
10
ണല്ല മാട്ട്യാന്‌മ് തന്ന് കൊറ്യാഡ്‌ഗാമ്
1<<ണേര്‌മായിമ് ണാന് ണിമാക്കെ സൊല്ലുറെ, കൊറ്യാഡ് പട്ടിദ് ബാസമേലെ പുക്കാദെ ബേ്റെ മേലെ പട്ടിക്കെ പുക്ക്‌റവാ് ത്‌റ്‌ട്ടാന്‌മ് പ്‌ഡിങ്കിപറ്‌ത്ത് എ്ഡ്‌ക്കവാന്‌മ്‌ത്തെ. 2കൊറ്യാഡ് പട്ടിദ് ബാസമേലെ പുക്ക്‌റവാ്ത്തെ കൊറ്യാഡ് മാട്ട്യാ്. 3അവാന്‌ക്ക് കാവക്കാറാ് ബാസണ തുറാന്ത് കൊഡുക്കാ്. തന്ന് കൊറ്യാഡ്‌ഗ മാട്ട്യാന്‌ദ് ജദ്ദാത്തെ എന്ത് ണെപ്പ്‌കെ്ഡേസ്‌ദ്. മാട്ട്യാ് തന്ന് കൊറ്യാഡ്‌ഗണ പേര് സൊല്ലി ഒളേത്ത് ബെ്ള്യെ എ്ഡ്‌ത്ത് പോരാ്. 4അവാ് തന്ന് കൊറ്യാഡ്‌ഗണ ബെ്ള്യെ കഡാത്തിന പ്‌റ അയ്യി കൊറ്യാഡ്‌ഗാക്ക് മുന്നുക്ക് പോരാ്. മാട്ട്യാന്‌ദ് ജദ്ദണ ണെപ്പ്‌കെ്ഡേസ്‌റാദ്‌ണാലെ അവാ് പിന്ന്‌മേലെ കൊറ്യാഡ്‌ഗ പോദ്. 5ആന ബേ്റെ ആള്‌ഗ ജദ്ദ ഉണ്ടാക്കിന അദ് മാട്ട്യാ് ഉണ്ടാക്കിന ജദ്ദ അല്ല എന്ത് ണെപ്പ്‌കെ്ഡേക്കാദ്‌ണാലെ കൊറ്യാഡ്‌ഗ അവാന്‌ദ് പിന്ന്‌മേലെ പോഗാദെ അവാന എക്കി തള്ളി ഓഡി പോവു.>> 6ഈ കദേന ഏസു അവാര്‌ക്ക് സൊന്നാ്. ആനാല്‌മ് അവാ് സൊന്നാദ് എന്തായെന്റ് അവാര്‌ക്ക് തെര്യാലെ.
7ഏസു പിന്നേമ് ഇച്ചെ സൊന്നാ്: <<ണേര്‌മായിമ് ണാന് ണിമാക്കെ സൊല്ലുറെ, ണാന്‌ത്തെ കൊറ്യാഡ്‌ഗ പുക്ക്‌റാദ്‌ക്കുള്ള ബാസ. 8എനാക്ക് മുദ ബന്തവാരൊട്ടുക്ക് ത്‌റ്‌ട്ടാര്‌മ് പ്‌ഡിങ്കിപറ്‌ത്ത് എ്ഡ്‌ത്ത് പോരവാര്‌മ്‌ത്തെ. അദ്‌ണാലെ കൊറ്യാഡ്‌ഗ അവാര്‌ദ് ണായണ കേ്ക്കാലെ. 9ണാന്‌ത്തെ ബാസ. ണാന് എങ്ക ഈ ബാസമേലെ പുക്ക്‌റവാ് ദെങ്കി കഡാക്കുവാ്. അവാ് ഈ ബാസമേലെ ഉള്ളുക്ക്‌മ് പോവാ് ബെ്ള്യേമ് ബരുവാ്. അവാന്‌ക്ക് ണല്ല മേസി കെ്ഡേക്കു. 10ത്‌റ്‌ട്ടാ് ബരാദ്, ത്‌റ്‌ഡ്യാമ് കൊല്ല്യാമ് അളിക്ക്യാമ്‌ത്തെ. ആന ണാന് ബന്താദ് കൊറ്യാഡ്‌ഗളാന ണിമാക്ക് ഉജുറു കെ്ഡേക്ക്യാമ് അയ്യി ഉജുറു ഒരു കൊറെ ഇല്ലാദെ ഒരേപെ്ട്ട് കെ്ഡേക്ക്യാമ്‌ത്തെ. 11ണാന്‌ത്തെ ണല്ല മാട്ട്യാ്. ണല്ല മാട്ട്യാ് കൊറ്യാഡ്‌ഗാക്ക് ബേ്ണ്ടി തന്ന് ഉജുറുണ കൊഡുക്കാ്. 12ആന കൂലിക്ക് മേസ്‌റവാ് കൊറ്യാഡ്‌ക്കാറാന്‌മല്ല മാട്ട്യാന്‌മല്ല. അവാ് സെന്നായി ബരാദ്‌ണ കണ്ട് കൊറ്യാഡ്‌ഗണ എക്കി തള്ളി ഓഡി പോരാ്. സെന്നായി കൊറ്യാഡ്‌ഗണ പ്‌ഡിക്കാമ് സെയ്‌ദ് സിന്തസിദാറ ആക്കാമ് സെയ്‌ദ്. 13അവാ് കൂലിക്ക് മേസ്‌റവാന്‌മ് കൊറ്യാഡ്‌ഗണ പറ്റി ണെനേവില്ലാത്തവാന്‌മ്‌ത്തെ അദ്‌ണാലെ അവാ് ഓഡി പോരാ്.
14-15ണാന്‌ത്തെ ണല്ല മാട്ട്യാ്. എനാണ അപ്പനാന സാമിക്ക്‌മ് തെര്യു എനാക്ക് അപ്പനാന സാമിനാമ് തെര്യു. അദേപാസെത്തെ എന്ന് കൊറ്യാഡ്‌ഗണ എനാക്ക്‌മ് തെര്യു. എനാണ എന്ന് കൊറ്യാഡ്‌ഗാക്ക്‌മ് തെര്യു. കൊറ്യാഡ്‌ക്ക് ബേ്ണ്ടി ണാന് എന്ന് ഉജുറുണ കൊഡുക്കെ. 16ഈ പട്ടിക്കുള്ളെ ഇല്ലാത്ത ബേ്റെ കൊറ്യാഡ്‌ഗാമ് എനാക്ക് ഇര്‌ക്ക്‌ദ്. അദ്‌ഗണാമ് എനാക്ക് ഓട്ടി ബരുഡൊ, അയ്യി കൊറ്യാഡ്‌ഗാമ് ണാന് സൊല്ലുറാദ്‌ണ കേ്ക്കു. അച്ചെ അദ്‌ഗാമ് അയ്യി കൊറ്യാഡ്‌ഗാക്കെ എജേന്ത് ഒരു കൂട്ട കൊറ്യാഡ്‌ഗ ആവു. അവാര്‌ക്ക് ഒരു മാട്ട്യാന്‌മ് ഇര്‌ക്കുവാ്. 17എന്ന് ഉജുറുണ മറ്‌ദേമ് കെ്ഡേസ്യ ബേ്ണ്ടി ണാന് എന്ന് ഉജുറുണ കൊഡുക്കാദ്‌ണാലെ അപ്പനാന സാമി എനാണ സീവാ് ബ്‌ഡ്‌റാ്. 18ആര്‌ക്ക്‌മ് എന്ന് ഉജുറുണ എന്നോഡെ ഇര്‌ന്ത് എ്ഡ്‌ത്ത് പോയ മുഡ്യമാട്ട. ആന ണാന് താനെത്തെ എന്ന്‌ദ് ഉജുറുണ കൊഡുക്കാദ്. അച്ചെ ഉജുറുണ കൊഡുക്കാദ്‌ക്കുള്ള അദിഗാര എനാക്ക് ഇര്‌ക്ക്‌ദ്. അദ്‌ണ തിലിപ്പി എ്ഡ്‌ക്ക്യാമ് എനാക്ക് അദിഗാര ഇര്‌ക്ക്‌ദ്. ഇദ്‌ത്തെ ണാന് സെയ്യ ബേ്ണ്ടി എന്ന് അപ്പനാന സാമി എനാക്ക് സൊല്ലിര്‌ക്കാദ്.>>
19ഏസു സൊന്ന ഈ ണായഗണ കേ്ട്ട് പിന്നേമ് എഗുദാര്‌ക്കുള്ളുക്ക് ഒരൊരു കച്ചി ആനാര്. 20അവാര്‌ദിലി എത്തിന്യൊ ആള്‌ഗ: <<അവാന കെ്ട്ടജാദി ണമ്പിര്‌ക്ക്‌ദ്. അവാന്‌ക്ക് പിരാന്ത്. അവാന്‌ദ് ണായണ എന്ത്‌ക്ക് കേ്ക്കാദ്>> എന്ത് സൊന്നാര്.
21ആന ബേ്റെ ആള്‌ഗ: <<ഇദ് കെ്ട്ടജാദി ണമ്പിര്‌ക്കവാ് സൊല്ലുറ ണായ ഒന്റുമല്ല, കെ്ട്ടജാദിക്ക് കുറുഡാര്‌ക്ക് കണ്ണ് പാര്‌വെ കൊഡുക്ക്യ മുഡ്യുമ?>> എന്ത് സൊന്നാര്.
എഗുദാര് ഏസുണ ണമ്പ്‌റാദില്ലെ
22അദ്‌ക്ക് പ്‌റ എര്‌സലേമിലി സാമികൂരേന സുത്താപ്പാക്കിനാദ്‌ണ ണെനേക്ക ണോമ്പി സെയ്‌ദിര്‌ന്താര്. അക്കുളെ സളി ഗള്യെ ആയിര്‌ന്ത്‌ദ്. 23സാമികൂരേലിര്‌ക്ക സലോമോന് എങ്ക പാഡിലി ഏസു ണഡാന്ത് കൊണ്ടിര്‌ന്താ്. 24അക്കുളെ എഗുദാര് ഏസുദ് സുറ്റുമ് ബന്ത് ണിന്റ് ഏസുണ: <<ണീ ആര് എന്ത് പ്‌ഡികെ്ഡേക്കാദെ എമ്മ എത്തിനി ണാള് ഇച്ചെ ഇര്‌ക്ക്യ? ണീ ക്‌റ്‌സ്‌ത്ത് ആയിര്‌ന്ത ണേരെ സൊല്ലു>> എന്ത് കേ്ട്ടാര്.
25അക്കുളെ ഏസു അവാര്‌ക്കെ ഇച്ചെ സൊന്നാ്: <<ണാന് ണിമാക്ക് അദ്‌ണ സൊല്ലിര്‌ക്കേനല്ല? ആന ണിമ്മ എനാണ ണമ്പ്‌റാദില്ലെ. എന്ന് അപ്പാ് തന്ത അദിഗാരത്തിലി ണാന് സെയ്‌ര കാര്യഗ ണാന് ആര് എന്ത് കാട്ടി തര്‌ദ്. 26ആന ണിമ്മ എന്ന്‌ദ് കൊറ്യാഡ്‌ഗ അല്ലാത്താദ്‌ണാലെ എനാണ ണിമ്മ ണമ്പ്‌റാദില്ലെ. 27എന്ന് കൊറ്യാഡ്‌ഗ എന്ന്‌ദ് ണായണ കേ്ക്ക്‌ദ്, അയ്യി കൊറ്യാഡ്‌ഗണ എനാക്ക് തെര്യു. അദ്‌ഗ എന്ന് പിന്ന്‌മേലെ ണഡാക്ക്‌ദ്. 28ണാന് അവാര്‌ക്ക് എപ്പേക്ക്‌മ് ഇര്‌ക്ക പെ്ളേപ്പ് കൊഡുക്കെ. അവാര് എപ്പേക്ക്‌മ് അളിന്തെ പോഗമാട്ടാര്. ആര്‌ക്ക്‌മ് അവാര്‌ണ എന്ന് കയ്യിലിര്‌ന്ത് പ്‌ഡിങ്കി എ്ഡ്‌ക്ക്യ മുഡ്യമാട്ട. 29എന്ന് കയ്യിക്ക് അവാര്‌ണ തന്തിര്‌ക്ക എന്ന് അപ്പനാന സാമി എല്ലാര്‌ണ ബ്‌ഡ ബെല്ല്യവാ്ത്തെ. അപ്പനാന സാമിദ് കയ്യിലിര്‌ന്ത് അവാര്‌ണ പ്‌ഡിങ്കി എ്ഡ്‌ക്ക്യ ആര്‌ണാലേമ് മുഡ്യമാട്ട. 30ണാന്‌മ് എന്ന് അപ്പാന്‌മ് ഒന്റുത്തെ.>>
31അക്കുളെ എഗുദാര് ഏസുക്ക് എ്റ്യ പിന്നേമ് കല്ല് എ്ഡ്‌ത്താര്. 32ആന ഏസു അവാര്‌ക്കെ: <<അപ്പനാന സാമി സെയ്യ സൊന്ന എത്തിന്യൊ ണല്ല ണല്ല കാര്യഗ ണാന് ണിമാക്ക് സെയ്‌ദ് കാട്ടിര്‌ക്കെ. അദിലി ഏദ് കാര്യ സെയ്‌ദാദ്‌ക്ക് ണിമ്മ എനാക്ക് കല്ല് എ്റിരാദ്?>> എന്ത് കേ്ട്ടാ്.
33അക്കുളെ എഗുദാര് ഏസുക്ക്: <<ണീ സെയ്‌ദ ഏദാറ്റ് ഒരു ണല്ല കാര്യഗണാലെ അല്ല, സാമിന കുറ്റ സൊല്ലുറാദ്‌ണാലെത്തെ എമ്മ ണിനാണ കല്ല് എ്റിരാദ്. എന്ത്‌ക്കെന്റ ണീ ബെ്റ് ഒരു മന്‌സാനായിര്‌ന്ത് ഗൂഡി ണീ ണിനാണ താനെ സാമി എന്ത് സൊല്ലുറെ>> എന്ത് സൊന്നാര്.
34അദ്‌ക്ക് ഏസു അവാര്‌ക്ക് ഇച്ചെ സൊന്നാ്: << <ണിമ്മ സാമിഗാത്തെ എന്ത് ണാന് സൊന്നെ>#സാമി പാട്ട് ബുക്ക് 82:6 എന്ത് മേസെ ണിമാക്ക് ബെത്ത സട്ടാത്തിലി എ്ള്‌ദിര്‌ക്ക്‌ദല്ല? 35സാമി സൊല്ലുസുലാക്ക സത്ത്യാത്തെ എന്ത് ണമാക്ക് തെര്യു. സാമിദ് സേദി കെ്ഡേസിനവാര്‌ണ സാമിഗ എന്ത് സാമി ഒളേത്തിര്‌ക്കാ്. 36അച്ചാനാക്കി സാമി തനാക്ക് ബേ്ണ്ടി അലാക്ക പ്‌റ്‌ത്ത് ഉലഗാക്ക് സൊല്ലിബ്‌ട്ടിര്‌ക്ക എനാണ <ണാന് സാമിമഗാ്> എന്ത് ണാന് സൊല്ലുറാദ്‌ണാലെ <ണീ സാമിന കുറ്റ സൊല്ലുറെ> എന്ത് ണിമ്മ സൊല്ലുറാദ് എന്ത്‌ക്ക്? 37എന്ന് അപ്പനാന സാമി സെയ്‌ര ബേലെന ണാന് സെയ്യാദിര്‌ക്കദാനാക്കി ണിമ്മ എനാണ ണമ്പ ബേ്ഡ. 38ആന അയ്യി കാര്യഗണ ണാന് സെയ്‌രദാനാക്കി ണിമ്മ എനാണ ണമ്പാദെ പോനാല്‌മ് ണാന് സെയ്‌ര കാര്യഗണ ണമ്പിരി. അച്ചെ ണമ്പ്‌റദാനാക്കി അപ്പനാന സാമി എന്നോഡേമ് ണാന് അപ്പനാന സാമ്യോഡേമ് ഇര്‌ക്കെ എന്ത് ണിമാക്ക് ഒറേപ്പായിമ് തെര്യു.>> 39അക്കുളെ എഗുദാര് ഏസുണ പിന്നേമ് പ്‌ഡിക്ക്യ ഓരാഡിനാര്. ആന അവാ് അവാര്‌ക്ക് പ്‌ഡികെ്ഡേക്കാദെ ബെജിക്കി കഡാന്താ്.
40പ്‌റ ഏസു ഓറ്‌ദ്ദാ് ബാനിക്ക് അയ്യേ്ട്ടി കഡാന്ത് ഓഗന്നാ് ണേരാത്തിലി തണ്ണിക്കെ മുളുഗിസിര്‌ന്ത പട്ട്‌ക്കെ പോയി എജ്ജി അദിലി തങ്കിനാ്. 41എത്തിന്യൊ ആള്‌ഗ ഏസു പട്ട്‌ക്ക് പോയി: <<ഓഗന്നാ് അദിസ്യമാന അഡ്യാള ഒന്റുമ് സെയ്യാലെ. ആന ഓഗന്നാ് ഇവാന പറ്റി സൊന്നാദെല്ല ണേര്‌ത്തെ>> എന്ത് സൊന്നാര്. 42അദിലി എത്തിന്യൊ ആള്‌ഗ ഏസുണ ണമ്പിനാര്.
Currently Selected:
ഓഗന്നാ് 10: സാമിദ് സേദി
Highlight
Share
Copy
Want to have your highlights saved across all your devices? Sign up or sign in
New Life Literature
