Markus 16

Yesus bobali' hidup

(16:1-8)

(Mat. 28:1-10; Luk. 24:1-12; Yoh. 20:1-10)

1Lopas ari Sabat, Salome, Maria Magdalena, ongko Maria indai Yakobus momboli rorompahan pakai' mominya'i bangkai Yesus. 2Watu ari Minggu, kotakan sunsukng, watu matoari hoyu' moncara', sia' botula' ko pasaran. 3Di tongah jalatn sia' bopandir ko siku'-monyiku', “Sopo am inyo paca'an mombarikan batu ponutup oca' kito ulih mansu' ko dalapm gua pasaran nantai?” 4Sia' bopandir bunyi nantai obai batu nantai kotakan bosar. Apo, watu sia' tuntukng ko pasaran, sia' moniant batu nantai udah tobarikng am. 5Lalu, sia' mansu' ko dalapm pasaran nantai.

Timpu nantai, sia' moniant siku' urakng bujakng inyo momakai jubah putih dudu' di sopia' kanan. Sia' kotakan tokonyant. 6Apo urakng bujakng nantai, bopandir agatn sia', “Jangan gola'! Aku tohu kaitn monggoyapi Yesus, urakng doi' laman Nazaret, inyo udah mati di kayu salib. Sio conyiant di si'itn. Sio udah bobali' hidup! Huncapm, porotian cam tompat bangkai-Nyo inyo diulit'an tontainyo. 7Botula'cam ko boko murid-Nyo ongko ko Petrus. Pandiran ko sia' obai Sio paca'an botula' lobih holu doi' kaitn ko propinsi Galilea. Kaitn paca'an moniant Sio di su'utn samo sama'an inyo udah Sio pandiran ko kaitn komai.”

8Sia' hagar koluar ongko bonggidi'an doi' pasaran nantai obai sia' tokonyant huatan gola'. Sia' kinyo momandiran la'apo pan ko sosopo pan obai gola'.#16:8: Sama'annyo buku Markus inyo asli botongga' di si'itn. Mungkitn io kinyo sampat monjadi'i bukunyo, damo halaman toahir hilakng doi' buku aslinyo, doi' Markus botongga' di si'itn agatn songajo. Timpu buku Markus ditulis ulakng oca' lobih banya' urakng ulih mombaconyo, kobanya'an ponulis mombulah kato toahir inyo panjakng (ayat 9-20). Apo, ado boboropo ponulis inyo mombulah kato toahir inyo panda'.

Ponutup inyo panda'

Boko botina' nantai hagar momadahan somuo posatn urakng bujakng nantai ko Petrus ongko ko boko pokawalannyo. Lopas nantai, Yesus siku' moutus boko murid-Nyo pakai' momboritoan kabar ni'in ko soluruh dunia. Sia' momboritoan Kabar doi' Allah inyo kinyo paca'an kalo hilakng, ia'an kabar obai monsio ulih disolamant'an ongko monorima' hidup inyo kokal.

PONUTUP INYO PANJAKNG

(16:9-20)

Yesus moniant'an diri-Nyo ko Maria Magdalena

(16:9-11)

(Mat. 28:9-10; Yoh. 20:11-18)

9Lopas Yesus udah bobali' hidup, kotakan sunsukng watu ari Minggu nantai, potamo Sio moniant'an diri-Nyo ko Maria Magdalena, inyo kalo Sio tundukng tujuh roh jahat doi' bukakng-tubuhnyo. 10Jadi, Maria Magdalena botula' momandiran kojadian nantai ko boko pokawalan Yesus. Watu nantai, sia' tongahan bulikng-undu' kapikng nangis. 11Maria momadahan ko sia' somuo inyo ditiatnyo, obai Yesus udah bobali' hidup. Apo, pas sia' mondinga' nantai sia' kinyo pocayo.

Yesus moniant'an diri ko koduo murid-Nyo

(16:12-13)

(Luk. 24:13-35)

12Lopas nantai, duo urakng murid Yesus bojalatn ko luar kota Yerusalem nantai. Timpu nantai, Yesus moniant'an diri-Nyo ko sia' dalapm rupo inyo bukai. 13Lalu, koduo murid nantai bobali' momadahan kojadian nantai ko boko murid inyo bukainyo. Apo, sia' totap kinyo pocayo.

Yesus moniant'an diri-Nyo ko boko murid-Nyo ongko moutus sia' pakai' momboritoan Kabar Boi'

(16:14-18)

(Mat. 28:16-20; Luk. 24:36-49; Yoh. 20:19-23; Kis. 1:6-8)

14Koponsuahannyo, Yesus moniant'an diri kosobolas murid-Nyo timpu sia' tongahan makatn. Sio monogur sia' obai hati sia' koras, sia' kinyo pocayo ko boko urakng inyo udah moniant Sio bobali' hidup. 15Lalu Sio bopandir ko sia', “Botula'cam ko soluruh dunia. Boritoancam Kabar Boi' kosomuo urakng. 16Boko urakng inyo kinyo pocayo paca'an di hukupm. Apo, boko urakng inyo pocayo huatan dibaptis paca'an disolamant'an. 17Ni'in boko tando boko urakng inyo pocayo. Sia' paca'an ulih mombulah mujisat sama'an ni'in: Sia' paca'an monundukng roh jahat dalapm damo-Ku. Sia' paca'an bopandir agatn boko baso inyo kinyo kalo sia' polajari. 18Aman sia' moncanggapm ular damo minum racutn, sia' kinyo paca'an dapat bonaso. Aman sia' molota'an jarinyo ko urakng sakit, lalu urakng nantai pan paca'an nyamanam.”

Yesus noi' ko sorugo

(16:19-20)

(Luk. 24:50-53; Kis. 1:9-11)

19Lopas Tuhatn Yesus momandiran nantai ko sia', Sio noi' ko sorugo. Di su'utn Sio dudu' momorintah di tompat inyo tohormat di sopia' kanan Allah. 20Boko murid-Nyo botula' momboritoan Kabar Boi' ko soluruh dunia. Tuhatn Yesus bokorojo dalapm diri sia' oca' sia' ulih mombulah mujisat. Agatn sama'an nantai, Sio mombutian obai inyo diboritoan sia' bondar.

Currently Selected:

Markus 16: TBDS

Highlight

Copy