Lukas 3

Polayatan Yohanes Pombaptis

(3:1-20)

(Mat. 3:1-12; Mrk. 1:1-8; Yoh. 1:19-28)

1Ado Kaisar inyo bodamoan Tiberius, rajo inyo kotakan bokuaso di Roma.#3:1: Pado joman nantai, koraja'an Romawi monguaso'i nogori Israel. Di tohutn ko lima' bolas watu io momorintah, ado boko pojabat di babahnyo inyo momorintah di boko doerah di nogori Israel. Pontius Pilatus monjadi gubernur di doerah Yudea; Herodes momorintah di doerah Galilea, somadikan Herodes damonyo Filipus momorintah di doerah Iturea huatan Trakhonitis. Lisanias momorintah di doerah Abilene. 2Watu nantai pomimpitn boko imam agama urakng Yahudi inyo bokodudu'an kotakng tinggi bodamo Hanas digonti agatn Kayafas.#3:2: Biar pan Hanas udah co monjabat sobagai Imam urakng Yahudi inyo bokodudu'an kotakng tinggi, apo Hanas ija' bosar pongaruhnyo.

Timpu nantai Allah bopandir ko Yohanes, ana' Zakharia. Allah bopandir ko io, watu io tongahan di padakng pasir. 3Huatan Yohanes botula' ko mono-mono di soluruh doerah sungai Yordan ongko monyampaian borito doi' Allah. Yohanes mondongkakng-mondorah, “Botongga'cam bulah dosa oca' monyonangan hati Allah ongko onju'cam diri kaitn dibaptis oca' Allah moamputi dosa kaitn.”

4Kodatakan Yohanes udah manah ditulis dalapm buku nabi Yesaya. Nabi Yesaya monulis mongonaꞌi io inyo tajahan monyiuh urakng mongomboi'i caro hidup sia'. Dinga' ni'in katonyo dalapm buku nantai:

“Ado urakng mondongkakng-mondorah di padakng pasir,

‘Siap'an cam jalatn pakai' Tuhatn. Bujurancam jalatn pakai' Sio.

5Somuo lombakng gola' dilungku, sotiap gunung ongko bukit gola' diratoan.

Bujurancam jalatn inyo pingkakng-pingku'.

Ratoancam jalatn inyo lombakng-lokupan.

6Ongko boko urakng tajahan moniant kosolamant'an inyo datakng doi' Allah.’ ”#3:6: Poumpamoan dalapm ayat 4-6 biaso dipakai pakai' mongatoan obai rajo paca'an datakng. Obai niannam, jalatn gola' diposiap'an oca' rajo ulih bojalatn co nyiant halakan. Agatn gambaran inyo samo dalapm boko ayat ni'in disiuh oca' urakng momposiapan diri huatan mongomboi'i caro hidup oca' Tuhatn ulih datakng, huatan monjadi rajo inyo moatur ongko bokuaso dihidupnyo, jadi urakng nantai disolamant'an doi' hukupan akibat dosa, nononyo lopas mati paca'an moalapi ajab sonsaro somanah-manahnyo di noraka. Tiat Matius 1:21

7Banyaꞌ urakng Yahudi datakng pakai' dibaptis. #3:7: Boko urakng Farisi ongko Saduki kinyo datakng agatn hati inyo sobondar-bondarnyo botongga' bulah dosa huatan monyonangan Allah. Sobondarnyo, sia' kinyo pocayo pomandiran Yohanes. Ongko Yohanes bopandir, “Uai kaitn inyo jahat huatan licik samaꞌan Rajo Sitatn, jangan bopikir kaitn ulih morarian diri doi' hukupan Allah nononyo. 8Jangan jam bopikir dalapm hati: Koi doi' koturutan Abrahapm. Pasti Allah kinyo paca'an mohukupm koi. Ingant: Doi' boko batu ni'in pan Allah ulih bulah koturutan pakai' Abrahapm! Kaitn gola' molabuhan porbuatan inyo bondar pakai' monunju'an obai kaitn bondar-bondar bobali' doi' dosa samaꞌan tontanaman inyo bobuah huatan monunju'an obai nian tontanaman inyo boi'. 9Allah tajahan mohukupm urakng inyo co botongga' bulah dosa huatan co hidup monyonangan Allah. Sio samo ubo urakng inyo udah monjujut kapak pakai' monobakng tontanaman sampai ko akarnyo. Sotiap tontanaman inyo kinyo mohasilan buah inyo boi', paca'an ditobakng ongko dibuakan ko api.”

10Ongko urakng banya' nantai botakutn ko Yohanes, “La'apo inyo gola' koi labuhan pakai' monunju'an obai koi udah botongga' bulah dosa?” 11Yohanes monimbas, “Urakng inyo ado duo lambai' baju, gola' moonji'i solamba'i ko urakng inyo conyiant ado bajunyo.#3:11: Timpu joman nantai, boko urakng kinyo bisi banyaꞌ baju ubo kito watu ni'in. Aman lobih doi' solamba'i baju, udah dianggap bokolobihan. Huatan urakng inyo ado pomakatn, gola' bobagi ko urakng inyo conyiant pomakatnnyo.”

12Boko potugas ponagih pajak pomorintahan Romawi pan datakng ko Yohanes oca' sia' dibaptis. Sia' botakutn, “Guru, la'apo inyo gola' koi labuhan?” 13Yohanes monimbas, “Jangan monagih pajak lobih banyaꞌ doi' apo inyo udah ditontuan pomorintah.”

14Ado jam projurit inyo botakutn, “Niant apo agatn koi? La'apo inyo gola' koi labuhan?” Yohanes monimbas, “Jangan momoso minto duit ko urakng bukai. Jangan bulah boko tuduhan inyo kinyo bondar, oca' mondapat kountukan diri siku'. Jadi cukupancam diri kaitn agatn upah kaitn.”

15Timpu nantai boko urakng monanti kodatakan Rajo Inyo Dijanjian Allah. Jadi sia' somuo mula'i botakutn dalapm hati, Yohanes ninam bai Rajo Inyo Dijanjian Allah nantai. 16Yohanes monimbas, “Aku bukainyo Rajo Inyo Dijanjian Allah. Apo kinyo manah agi' Sio tajahan datakng. Sio lobih bokuaso tangga'i Aku. Monjadi hulutn-Nyo inyo kotakng babah pan, aku co cucu'.#3:16: Timpu joman Yohanes Pombaptis hulutn inyo mombuka' tali sopatu sandal nantai hulutn inyo palikng hina. Aku ongkah mombaptis urakng agatn ara'i. Apo Sio tajahan mombaptis urakng agatn Roh Allah huatan agatn api.#3:16: Ado duo tapsiran. 1) Sio paca'an mombaptis urakng inyo pocayo agatn Roh Allah, huatan urakng bukai agatn hukupan api. DAMO 2) Sio paca'an mombaptis urakng agatn Roh Allah samo ubo api momurnian logapm. 17Sio tajahan monyongkayoan urakng inyo bondar doi' urakng inyo jahat, samo agatn urakng di tompat poiri'an monyongkayoan gandupm agatn johuman pakai' capatn. Gandupm tajahan dikumpulan-Nyo di dalapm jurukng, apo somuo johuman tajahan dicucul-Nyo ko api inyo co tohu buta'.”#3:17: Dalapm kiasan ni'in ‘gandupm’ monggambaran urakng inyo pocayo, ‘jurukng’ monggambaran sorugo, ‘kopu’ monggambaran urakng inyo co pocayo, ongko ‘api’ monggambaran noraka. 18Sama'an niannam Yohanes monosihat'i boko urakng agatn bomacapm caro, pas io momboritoan Kabar Boi'.

19Yohanes pan monogur Herodes, Rajo doerah Galilea, obai Herodes kawitn agatn Herodias, bini somadikannyo. Yohanes monogur io obai somuo kojahatannyo inyo bukai jam. 20Apo Herodes malah monambah kojahatannyo. Io monamoan Yohanes ko dalapm ponjara.

Yesus Dibaptis#3:21-22: Yesus kinyo bodosa (2 Korintus 5:21; Ibrani 4:15), jadi co pontikng botongga' bulah dosa huatan monyonangan Allah agatn dibaptis. Apo watu dibaptis Sio molabuhan la'apo inyo dikohonda'i Allah (Matius 3:15). Huatan Sio monyamoan diri agatn boko urakng paca'an disolamant'an-Nyo doi' hukupan somanah-manahnyo. ongko Roh Allah turutn di pucu'-Nyo

(3:21-22)

(Mat. 3:13-17; Mrk. 1:9-11; Yoh. 1:32-34)

21Apo sobolupm Yohanes ditamoan ko dalapm ponjara, banyaꞌ urakng inyo datakng dibaptis. Sama'an nian jam Yesus datakng pakai' dibaptis. Watu Sio tongahan bodoa, langit tobuka', 22huatan Roh Allah turutn kopucu'-Nyo monyorupo'i burukng daro. Ongko kodinga'an saro Allah doi' sorugo momandiran, “Kolai nam Ana'-Ku inyo Ku kasihi. Kolai monyonangan hati-Ku.”

Angki-bayatn Yesus

(3:23-38)

(Mat. 1:1-17)

23Watu Yesus mula'i pogota'an-Nyo, Sio boumur kiro-kiro tigo puluh tohutn. Yesus dikonal boko urakng sobagai ana' Yusuf: Yusuf ana' Eli; 24Eli ana' Matat, Matat ana' Lewi, Lewi ana' Malkhi, Malkhi ana' Yanai, Yanai ana' Yusuf; 25Yusuf ana' Matica, Matica ana' Amos, Amos ana' Nahum, Nahum ana' Hesli, Hesli ana' Nagai; 26Nagai ana' Maat, Maat ana' Matica, Matica ana' Simei, Simei ana' Yosekh, Yosekh ana' Yoda; 27Yoda ana' Yohanan, Yohanan ana' Resa, Resa ana' Zerubabel, Zerubabel ana' Sealtiel, Sealtiel ana' Neri; 28Neri ana' Malkhi, Malkhi ana' Adi, Adi ana' Kosam, Kosam ana' Elmadam, Elmadam ana' Er; 29Er ana' Yesua; Yesua ana' Eliezer, Eliezer ana' Yorim; Yorim ana' Matat, Matat ana' Lewi; 30Lewi ana' Simeon, Simeon ana' Yehuda, Yehuda ana' Yusuf, Yusuf ana' Yonam, Yonam ana' Elyakim; 31Elyakim ana' Melea, Melea ana' Mina, Mina ana' Matata, Matata ana' Natan, Natan ana' Daud; 32Daud ana' Isai, Isai ana' Obed, Obed ana' Boas, Boas ana' Salmon, Salmon ana' Nahason; 33Nahason ana' Aminadab, Aminadab ana' Admin, Admin ana' Arni, Arni ana' Hezron, Hezron ana' Peres, Peres ana' Yehuda; 34Yehuda ana' Yakub, Yakub ana' Ishak, Ishak ana' Abrahapm, Abrahapm ana' Terah, Terah ana' Nahor; 35Nahor ana' Serug, Serug ana' Rehu, Rehu ana' Peleg, Peleg ana' Eber, Eber ana' Salmon; 36Salmon ana' Kenan, Kenan ana' Arpakhsad, Arpakhsad ana' Sem, Sem ana' Nuh, Nuh ana' Lamekh; 37Lamekh ana' Metusalah, Metusalah ana' Henokh, Henokh ana' Yared, Yared ana' Mahalaleel, Mahalaleel ana' Kenan; 38Kenan ana' Enos, Enos ana' Set, Set ana' Adapm inyo dipulah Allah.

Currently Selected:

Lukas 3: TBDS

Highlight

Copy