Lukas 10

Yesus moutus tujuh puluh murid-Nyo

(10:1-12)

1Lopas nian Tuhatn Yesus momilih tujuh puluh murid inyo bukai. Sio moutus sia' duo-duo urakng mondoholu'i Sio ko somuo kota ongko tompat inyo paca'an didataki-Nyo dalapm pojalatan ko kota Yerusalem. 2Sobolupm sia' botula', Sio bopandir, “Lakau inyo honda' dihanyi kotakan luar, apo urakng pakai' mohanyinyo kurakng bondar. Jadi, mintocam ko Tuhatn Allah inyo umputn hasil lakau oca' Sio mongiripan lobih banyaꞌ hulutn pakai' bohanyi hasil lakau-Nyo.#10:2: Kiasan ni'in bomasud, ado cukup banyaꞌ urakng inyo honda' pocayo ko Yesus, apo bayo sodikit urakng pakai' momboritoan mongonaꞌi Sio, Jadi bodoa ko Allah oca' Sio mongiripan lobih banyaꞌ urakng pakai' momboritoan mongonaꞌi Yesus.

3Nah, botula'cam! Aku moutus kaitn ko tongah boko urakng inyo molawatn kito, samo ubo boko ana' domba ko tongah boko bonatakng ganas.

4Jangan mombaba' dompet, tas, sandal ponggonti. Dalapm pojalatan kaitn, jangan mombuakng-buakng watu agatn hala botongga' monyapo huatan bogolaga'.

5Sobolupm kaitn momansu'i boko rumah, borokaticam doholu boko urakng inyo bodiapm di rumah nantai. Pandiran, ‘Kironyo Allah moonji'i sonang-asau dalapm hati, ko somuo koluarga ni'in.’ 6Aman urakng umputn rumah honda' monorima' sonang-asau nantai, Allah bondar-bondar tajahan bulah koluarga nantai sonang-asau. Apo, aman urakng umputn rumah co monorima'nyo, sonang-asau nantai paca'an bobali' ko kaitn.#10:6: Biar pan boko murid ni'in mohadapi urakng inyo monula' sia', sia' totap ado sonang-asau doi' Allah. Apotolagi', boko murid ni'in kinyo gola' mooso gola' momborokati boko urakng inyo sia' bolupm konal, kinyo tohu aman urakng nantai boi' kata'an jahat, obai hal nantai di antaro boko urakng nantai agatn Allah.

7 Sopo aja' inyo monorima' kaitn dalapm rumah, bodiapm di santai ja'am sampai kaitn botula' doi' tompat nantai. Jangan bopindah-pindah doi' rumah ko rumah. Samo sama'an siku' urakng inyo bokorojo bohak monorima' upah, kaitn pan bohak monorima' tanggaian doi' boko urakng watu kaitn momboritoan mongonaꞌi Koraja'an Allah. Apo pua'i ja'am la'apo inyo sia' onju' ko kaitn. 8Di kota mono aja' kaitn ditorima' agatn boi', makatn la'apo aja' inyo tongahan pakai' kaitn. 9Nyamani boko urakng inyo boponyakit di kota nantai. Pandiran ko boko urakng di santai, ‘Ni'innam watunyo Allah monjadi Rajo pakai' kaitn.’#10:9: Masudnyo, Yesus udah datakng ko dunia ni'in, jadi urakng ulih pocayo Sio nantai Rajo Inyo dijanjian Allah. Aman pocayo nantai, botongga' bulah dosa huatan ongkah monuruti Allah am, ongko monuruti Yesus, urakng ulih monjadi koluarga Koraja'an Allah. 10Apo aman kaitn kinyo ditorima' di sobuah kota, botula'cam ko boko jalatn di kota nantai oca' boko urakng ulih bondinga'an. Pandirancam, 11‘Koi tinggalan kota kaitn ni'in, sampai dobu inyo botangkil di kaki koi, koi borosihi! Nian pakai' momporingant'i kaitn tajahan dihukupm Allah obai monula' koi! Apo kotohu'icam ni'in: Allah paca'an monjadi Rajo pakai' kaitn!’#10:11: Boko pomandiran ni'in samo di ayat 9 tontai. Watu ni'in urakng ulih momilih pakai' mongikuti Yesus sobagai Rajo. Apo Yesus pan paca'an datakng agi'. Watu nantai somuo urakng inyo molawatn Korajaan-Nyo paca'an dihukupm. 12Komai Allah mombonasoan kota Sodom agatn api doi' sorugo.#10:12: Kisah kota Sodom ongko Gomora ado di Kojadian 19:1-23. Apo, watu Ari Kiamant, hukupan ko boko urakng inyo monula' kaitn paca'an jouh lobih borat doi' hukupan ko boko urakng jahat di Sodom nantai.”

Yesus moancapm boko urakng di boboropo kota inyo cado pocayo agatn Sio

(10:13-16)

(Mat. 11:20-24)

13 Lalu Yesus moancapm boboropo kota di doerah Galilea. Kato-Nyo, “Allah tajahan mohukupm kaitn di kota Khorazim ongko Betsaida. Aku udah moniant'an kuaso-Ku doi' Allah agatn banyaꞌ mujisat di tongah-tongah kaitn, apo kaitn co pocayo agatn Aku. Kaitn co botongga' bulah dosa ongko co monuruti Allah. Soandainyo, Aku molabuhan boko mujisat nantai di kota Tirus ongko Sidon,#10:13: Khorazim ongko Betsaida nantai boko kota urakng Yahudi di doerah Galilea. Tirus ongko Sidon nantai boko kota urakng bukai Yahudi, inyo dikonal banyaꞌ boko kojahatannyo. pasti boko urakng di su'utn udah manah botongga' bulah dosa. Momakai banggi-pakaian bulikng undu' ongko mongguguran habu di pucu' kopala' sia', monunju'an sia' botongga' bulah dosa nantai. 14Pas Ari Kiamant nononyo, hukupan ko kaitn di Khorazim ongko Betsaida tajahan jouh lobih borat doi' hukupan ko boko urakng di Tirus ongko Sidon nantai. 15Huatan kaitn di kota Kapernaum samo jam. Jangan bopikir kaitn paca'an dihormati. Jangan bopikir kaitn paca'an mansu' sorugo! Kaitn paca'an dibuakan ko noraka, tompat urakng jahat dihukupm somanah-manahnyo!”

16 Lalu Yesus bopandir agi' ko sia' tujuh puluh murid inyo diutus tontai, “Urakng inyo mondingaꞌan kaitn, samo sama'an mondingaꞌan Aku siku'. Urakng inyo monula' kaitn, samo sama'an monula' Aku siku'. Urakng inyo monula' Aku, samo sama'an monula' Allah inyo moutus Aku.”

Kotujuh puluh murid udah bobali'am

(10:17-20)

17 Kotujuh puluh murid nantai botula'. Lopas sia' molabuhan somuo inyo disiuh Yesus, sia' bobali'am agatn hati rindakng. Kato sia' ko Yesus, “Tuhatn, boko roh jahat pan taat watu koi monundukngnyo agatn kuaso Duatn.”

18Lalu kato Yesus ko sia', “Aku udah moniant Rajo Sitatn jatu' doi' langit sama'an kilat.#10:18: Ado tigo tapsiran pakai' kalimat ni'in. 1) Ni'in borupo kiasan agatn masud kuaso Rajo Sitatn udah mula'i dikalahan. 2) Kalimat ni'in nyata. Yesus moniant nantai watu boko murid monundukng boko roh jahat. Damo 3) Kalimat ni'in nyata. Yesus moniant Rajo Sitatn ditundukng doi' sorugo sobolupm Allah monjadian dunia. 19Dinga'anbo! Aku udah moonji'i kuaso ko kaitn pakai' mongalahan kuaso jahat,#10:19: Lukas monulis dalapm Baso Yunani, kuaso jahat digambaran agatn bonatakng ular ongko kalo. kuaso musuh kito, ia'an pan co nyiant inyo ulih mombonasoan kaitn. 20Apo lobih boi' jangan sangant rindakng obai boko roh jahat monaati kaitn. Ado alasan inyo lobih pontikng pakai' rindakng nantai obai damo kaitn udah totulis di sorugo.”

Yesus rindakng huatan moucap'an sukur ko Allah Bopai

(10:21-24)

(Mat. 11:25-27, 13:16-17)

21Timpu nantai jam, Roh Allah bulah Yesus rindakng. Kato Yesus, “Bopai, Duatn Ponguaso langit ongko bumi. Ado urakng inyo pintar-corodi' ongko bopondidikan. Apo Aku bosukur obai Duatn kinyo monyatoan kobondaran ni'in ko sia'.#10:21: Boko urakng ni'in ubo boko guru inyo ahli dalapm porintah ongko poraturan Allah huatan pomimpitn agama Yahudi doi' kolompok Farisi. Biar pan sia' pintar ongko bopondidikan, sia' kinyo pocayo Yesus nantai Rajo Inyo Dijanjian Allah. Tiat 1 Korintus 1:18-31. Duatn monyatoan kobondaran ni'in ko urakng inyo kinyo pontikng ubo bobia' kocit. Oi, Bopai, caro nantai monyonangan hati Duatn!”

22 Lalu Yesus bopandir ko boko urakng banyaꞌ, “Bopai-Ku udah moonji'i somuo kuaso ongko pongotohuan ko Aku. Conyiant siku' pan inyo bondar-bondar mongonal Ana', solaitn Bopai. Conyiant jam inyo bondar-bondar mongonal Bopai solaitn Ana', huatan boko urakng inyo Ana' nantai pilih pakai' mongonalan Bopai.”

23Jadi nantai, Yesus mongilikng ko boko murid-Nyo. Kato-Nyo husus ko sia' aja', “Kaitn diborokati Allah obai sampat moniant la'apo inyo kaitn tiat watu ni'in. 24Pontiat'ancam ni'in: Banyaꞌ boko nabi ongko boko rajo doi' joman komai honda' moniant somuo inyo kaitn tiat. Sia' honda' mondingaꞌ somuo inyo kaitn dinga'. Apo kinyo bodapat kosompatan nantai obai komai bolupm watunyo.”

Yesus mongajar kito gola' mongasihi agatn porbuatan

(10:25-37)

25Lopas nian siku' urakng guru Agama Yahudi maju pakai' moncubo Yesus. Io botakutn, “Guru, aku gola' molabuhan la'apo oca' ulih monorima' hidup kokal?”

26Timbas Yesus, “La'apo inyo totulis dalapm Buku Poraturan Allah inyo ditulis Musa? La'apo inyo kolai baco di siatn?”

27Urakng nantai monimbas, “Kasihicam sobondar-bondarnyo Tuhatn Allah kolai agatn soponuh hati kolai, soponuh jiwa kolai, somuo kokuatan kolai huatan somuo pikiran kolai,#10:27: Doi' Ulangan 6:5 ongko ‘Kasihicam sosamo kolai ubo kolai mongasihi diri kolai siku'.’ ”#10:27: Doi' buku Imamat 19:18

28“Timbas kolai nantai bondar,” kato Yesus. “Labuhancam nantai, kolaipan tajahan bodapat hidup kokal.”

29Apo guru Agama Yahudi nantai honda' oca' urakng bopikir io nantai urakng inyo boi' ongko hala bondar. Jadi, io botakutn, “Sopo sosamo aku nantai?”

30Yesus monimbas agatn polajaran doi' sobuah poumpamoan, “Ado siku' urakng lolaki turutn doi' kota Yerusalem ko kota Yerikho. Di tongah jalatn io disorakng porampok, dirampas boko bando barakng umputnnyo sampai ko banggi-pakaian jam. Io dipantu' sampai honda' matiam, ongko ditinggalan tomolantakng di jalatn agatn boluko-luko.

31Watu nantai siku' urakng imam banso Yahudi bojalatn jam molalu'i jalatn nantai. Watu ditiatnyo urakng nantai, io nyisi ko soborakng jalatn, ongko bojalatn torus. 32Ubo nian jam agatn siku' urakng doi' suku Lewi inyo bojalatn di santai; watu ditiatnyo urakng nantai, io pan minggir ko soborakng jalatn, lalu molajuan pojalatan.

33Apo lopas nantai ado siku' urakng Samaria inyo tongahan bopojalatan, molalu'i jalatn nantai jam. Watu ditiatnyo urakng nantai, io kotakng kasih. 34Ongko dihampikinyo urakng nantai ongko momborosihi boko lukonyo agatn anggur ongko dipaliti agatn minya', lopas nian mongobat boko lukonyo nantai. Lopas nantai, io unjakan urakng nantai ko pucu' koledainyo siku', lalu mombaba'nyo ko sobuah ponginapan ongko morawatnyo di siatn.

35Kohobu'annyo io monguti' duo pingkai' duit pira'. Io moonju'nyo ko umputn ponginapan nantai huatan bopandir, ‘Rawatkucam io ni'in, huatan aman ado boko ungkus bukai, paca'an kubayar nono pas ku bobali'.’”

36 Lopas nian Yesus monjadi'i poumpamoan nantai ongko botakutan ni'in, “Monurut pondapat kolai, doi' kotigo urakng nantai mono inyo udah botindak sobagai sosamo doi' urakng inyo dirampok nantai?”

37Timbas Guru Agama Yahudi nantai, “Urakng inyo udah monulukng urakng nantai.”

“Nah,” kato Yesus, “Dalapm kohidupan kolai pan pulah ubo nantai jam!”

Yesus usi'an ko Maria agatn Marta

(10:38-42)

38Lopas nian Yesus ongko boko murid-Nyo monorusan pojalatan ko kota Yerusalem. Sia' datakng di sobuah laman. Di santai ado siku' urakng botina' bodamoan Marta. Io monorima' Yesus ko dalapm rumahnyo.

39Marta ado somadikan botina'nyo bodamo Maria. Maria hala dudu' dampikng Yesus mondingaꞌan boko ajaran-Nyo. 40Apo Marta kotakng repot obai tolalu banyaꞌ inyo io korojoan pakai' molayati boko tamu' nantai. Ongko, io mohampiki Yesus, kapikng botuta', “Tuhatn, somadikanku nian mombiaran aku bokorojo molayati siku'ku mo. Ubonyo Duatn co tonturian. Siuhbo io nian monulukng aku!”

41Apo Tuhatn Yesus monimbasnyo, “Marta, Marta, kolai kuatir ongko monyusahan diri agatn banyaꞌ hal. 42Apo bayo sobuti' mo inyo bondar-bondar pontikng. Somadikan kolai udah momilih hal inyo toboi' nantai, mondingaꞌan boko ajaran-Ku. Hal nantai kinyo paca'an dikuti' doi' io.”#10:42: Monorima' tamu' agatn ramah sangant pontikng dalapm budaya Yahudi, apo bolajar doi' Yesus jouh lobih pontikng. Tiat Lukas 8:15, 18, 21. Yesus kinyo paca'an momoso Maria molabuhan hal inyo bukai. Yesus honda' Marta mondingaꞌan boko ajaran-Nyo samo sama'an Maria.

Currently Selected:

Lukas 10: TBDS

Highlight

Copy