ማርቈስት ወንጌል 8

ፈወነ 8

እየሱስ ሲዘ ሽኽ እቅ ታምርዝ ሚግቨጘ

(ማቲ. 15፡32-39)

1ኣይንድም እንደ ገነ ንቕፀው ኽዝቭ ኣኽቭሹ፤ ውረውረ ዀነውም ዊኒየው ኣቓንስቅ ጝክንደጥድዛት ጝጐ ጭጝ፦ 2«እንዛይ እቅድ ይጅቅ ሻቘ ግርቅ ዊንጛንስቅ፣ ዀነውም እጀቍ ኣጛንስቅ ኻዝንስጘኵ። 3እነይጝ ግድርድጘጘ ጝታጝን በርሳን ላው ላውድ እክል ኻግሪስ ተርጛንስቅ ምናልቫች ጒደነይል ዝላቕጝ ሊቭጥቍ» ዩ።

4ጝክንደጥድም፦ «እን በራኸይስ እንቝጠ ኽዝቪዝቅ ኣቐው ሚ ኣዊስ ችጝና?» ይጝ ዊስⶖ። 5እየሱስም፦ «ዋቐ ምጭ ፃይርንኵርኑ?» የው ዋቕሩ፤ ጛይም፦ «ላጝጠ ምጫ» ይⶖ። 6ጘጝም ኽዝቭድ ዝቨይል ጐያንስ ኣዙ፤ ላጝጠ ምጭድዛትም ጒ እደረት ሚዝየንዝ በር ኪል እቂዝ ኣድልጛንስ ማጥን ጝክንደጢዝ ይዉ፤ ጛይም ኽዝቪዝ ኣድልⶖ። 7እኒዝጘም መልቍ ኻዝ ፃይጝ ዊንⶖ፤ ጘጝም ኻዝድዛት በርክ ኣድልጛንስ ኣዙ። 8ኽዝቭድም ዅ እፍቱ፤ እንዝ ግረም ጝክንደጥድ ቲርፈውድየንት ላጝጠ ሚስቫን እቻዝጝ ጕይⶖ። 9ዀቍድም ሲዘ ሽኽ ኣጥጘ እቅ ዊን፤ እየሱስም ኽዝቭድየንት ሲነቭሰት ግረ፣ 10ጝክንደጢጅቅ ታኰዝ ተሳፍርሽ ዳልማኑተ የነው ስፍረይዝጐ ፊሩ።

11ፈሪሳንድም እየሱስ ትጐ ተርጝ ተከራክርሽጥጘ ኪርምⶖ፤ ፊትንጠጘም በንጝ፦ «ሲመይስ ምልክት ቓሊሽ» ይጝ ዋቕር።#ማቲ. 12፡38፤ ሉቃ. 11፡16። 12ጘጝም ጝመንፈሲዝ ጭቕጘ ቃትት፦ «ወረጘ የጝ እን ዅለድ ምልክት በነውድ? እማንዝ የኵን፤ እን ዅለይዝ ውረውረ ምልክት ይውሽታውም» ዩ።#ማቲ. 12፡39፤ ሉቃ. 11፡29። 13ጝጊስም ጛት ጝግል በር እንደ ገነ ታኰዝ ተሳፍርሽ እጂ ከሩ።

ፈሪሳኒዝመ ኺረውድስት ምጨይስ ጣጝቅቅሸነው

(ማቲ. 16፡5-12)

14ጝክንደጥድም ሚ ፃየነው ሚርⶖ፤ ላው ሚዝለ ታኰይል ውረውረቅ ዊኒየውም። 15እየሱስም፦ «ጣጝቅቅጭጥን፤ ፈሪሳነ ምጨይስመ ኺረውድስት ምጨይስ ክታቕምት ሊሚድጥን» የው ኣዙ።#ሉቃ. 12፡1።

16ጛይም ጛስ ጛይ፦ «እንት የውድ ቃል ሚ እጅነቅ ኣናንስቅ የጝ» ይⶖ። 17እየሱስም ጝታኻሰቭድ ኣርቕ፦ «ወረጘ የጝ፦ ‹ሚ እጅነቅ ኣናንስቅ የጝ› ይርን ዊግትርነውድ? ነንም ገነ ኣስክሳይርነቅመ? ልብስ ያይርነቅመ? ዊንስ ክታዘንድመ ዲንድንኩ? 18እልጣን ፃይርን ፅብርና ቓላይርነቅመ? ቀርዝጣንስ ፃይርን ፅብርናⶖ ወሻይርነቅመ? ትዝስ ያይርነቅመ?#የር. 5፡21፤ ኽዝ. 12፡2፤ ማር. 4፡12። 19ኣኰ ምጭድዛት ኣኰ ሽኽ እቂዝ ቈርሳንድ ዋቐ ሚስቫን ቲርፈው ጕይርኑ?» ዩ፤ ጛይም፦ «ፅጭ ሊጘ ሚስቫና» ይⶖ። 20«ላጝጠ ምጭድዛትስ ሲዘ ሽኽዝ ቈርሳንድ ዋቐ ሚስቫን ቲርፈው ጕይርኑ?» ዩ፤ ጛይም፦ «ላጝጠ ሚስቫና» ይⶖ። 21ጘጝም፦ «እደስለ ነኳን ኣሽ ኣስክሳይርነቅም የነትመ?» ዩ።

በተሰይደስ ቓደው ኻርቨድ

22በተሰይደ ትጐም ተር፤ ጝግል ችጘጘም እቅ ላው ኻርቨ እጅር እየሱስ ትጐ ነስጝ ጝናኒዝ ዳቓንስ ማጥን ጨው። 23እየሱስም ኻርቨይዝ ናንድ ፃይ ኪዊስ ፊሱ፤ እጅሪዝ እልጣኒልም ትፍ የው ጝናንጣንድ እጅሪዝ እልጣኒል እቝር፦ «ወረጘ ቓልደኵ?» የው ዋቕሩ።

24ኻርቨድም ጭቅ የው ቓል፦ «እቅድ ዘፋኒዝጘ ተጝቀሳቅሽትጛንድ ቓለኵና» ዩ። 25እየሱስም እንደ ገነ ጝናንጣንድ እጅሪዝ እልጣኒል እቝሩ፤ ኣይንድም እጅሪዝ እልጣንድ ቢት፤ እጝቅትቅም ዊር ሸው ቓሉ። 26ጝጊስም እየሱስ እጅርድየንት፦ «ኪዊዝጐ ጥውተ፤ [ኣውማውስም ድቍተ፤]» የው ድቍ ጝጝን ሲነቭሱ።

ቢጥሮስት እምንቲዝመ ሚዝርነይዝ

(ማቲ. 16፡13-20፤ ሉቃ. 9፡18-21)

27እየሱስም ጝክንደጢጅቅ ኣቕ ፊልበውስ ቂሳርየት ጅልወይል ፅበቍ ኪቊዝጐ ፊሩ፤ ጒደነይል ፅብጛⶖም ጝክንደጥድዛት፦ «እቅ ይት ኣው ይጛ?» የው ዋቕሩ። 28ጛይም፦ «ጣምቀተ ይዃንስ የጝ የቍ እኵⶖ፤ ላጥድ ይልያስ የጝ ይጘኵ፤ ላጥድ ቈሽ ነቭያታኒስ ላውድ የጝ ይጘኳ» ይጝ ድቍⶖ።#ማር. 6፡14-15፤ ሉቃ. 9፡7-8። 29ጘጝም፦ «ክትንሰ ይት ኣው ይርና?» የው ዋቕሩ፤ ቢጥሮስም፦ «ክት ክርስቶስ የጝ» ዩ።#ይዃ. 6፡68-69።

30እየሱስም ጝማጥን ኣውማውስቅ ድቋይጘጘ ጛት ጣጝቅቅሱ።

እየሱስ ጝክርጘይዝቍዝ በውርስ ዊግተጘ

(ማቲ. 16፡21-28፤ ሉቃ. 9፡22-27)

31ጝጊስም እጅር ዅር ኽየው ሚከረ ለምረጠጘ ሽመቅሊዝ፣ ካኽነጣነ ኻልቅጢዝ፣ ወሪትት ኽግ ክንሰጢዝም ነቅሽጠጘ፣ ቍውሽትጠጘ፣ ሻቘ ግርቅዝ ግረ ክርጘይስ ጐው ኣቐጘ ጝክንደጢዝ ክንስጠ ኪርሙ። 32ጘጝም እኒንት ግልፅዝ ድቁ፤ ኣይንድም ቢጥሮስ እየሱስት ጝለ ፊስ ጋስፅጠ ኪርሙ። 33እየሱስ ግን ዘወር የው ክንደጥድዛት ቓላⶖ ቢጥሮስት፦ «ሲይጣን ክተ! ይእግርገይስ ፊጥ! ክት እጅርዝ ኻሰቭድየንትጚ እደረት ኽሳቭድ ኻስቫርም» የው ጋስፁ።

34እንዝ ግረም ኽዝቭድየንት ጝክንደጢጅቅ ጝጐ ጭጝ እንት ዩ፦ «ይት ቲክንጠ በነው ፅብሽ ጝቕምት ኻዲነ፤ ጝሚስቅልድም መውር ይት ቲክነ።#ማቲ. 10፡38፤ ሉቃ. 14፡27። 35ጝኒቭስሸንት ቓዝጠ በነውድቅ ጝርት ድስጡ፤ ይቍዝመ ወንጌልዝቍዝ የው ጝኒቭስሸንት ድሰውድቅ ግን ጝርት ቓዝጡ።#ማቲ. 10፡39፤ ሉቃ. 17፡33፤ ይዃ. 12፡25። 36እጅር ኣልሚዙ ኻፍትድቅ ችጛን ጝኒቭስሸንት ግን ቓዚየውዝየ ጝጭስ ውር ጣቅምጡ? 37ዊንስ እጅር ጝኒቭስሸንት ማጥን ኪፍለው ወየድ ወረጘ የጝ? 38እኒን ክኻዲ ኽጥያትኘም ኣቐው ዅለይዝ በዊል ይቍዝ፣ ይቃሊዝቍዝም ኣይቭተውድቅ፣ እጅር ዅር ጚርት ክቭሪዝ ቅዱሳን መላካኒጅቅ ኣቕ ተራንድ ጝቍዝ ኣይቭትጡ።»

Currently Selected:

ማርቈስት ወንጌል 8: ኽምጣኣኪ

Highlight

Copy