ሉቃስት ወንጌል 19

ፈወነ 19

እየሱስ ዘኪወስት ጝን ጥወጘ

1እየሱስም እያሪኰ ኻትመይል ጥው በር ጝዝ ዲቍ ፊራ ዊኑ። 2ጝግልም ጝሽድ ዘኪወስ ይሽተው ላው ኻፍታም እጅር ዊኑ፤ ጘጝ እጅርድ ቀረጥ ቀቨቍዝ ኻልቀ ዊኑ። 3ጘጝም፦ «እየሱስ ኣውየን ኣጢ» ያ ጝት ቓልጠ በና ዊኑ፤ ዊገድ ግን ጝሊግዝድ እጅጝ ዊናንስቅ፣ ኽዝቭድም ጭቕጘ ንቕፀው ዊናንስቅ፣ ቓለነው ቸሊየውም። 4ኣይንድም እየሱስ ዲቈው ጒደነድ ጝጐቱ ዊናንስቅ፣ ኽዝቭድየንት ዲቍ በዊል ውጥያ ፊር ጝት ቓልጠ ማጥን ላው ጥሉሰ ዘፍል ፉ። 5እየሱስም ጝግል ችጛንድ ጝቕልመድ ንየ ጭቅ የው ዘኪወስት ቓል፦ «ዘኪወስ! ንጭ ክጝን ግርቅጨ ጥውሸኵ፤ ዘፊስ ጊም ቃዚ» ዩ። 6ዘኪወስም በውዝ ጊም እየሱስት ጝጝኒል ዲስተዝ ለምሩ።

7ጝግል ዊነቍ እቅድ ግን እኒንት ቓልጛንድ፦ «እን እጅርድ ኽጥያትኘ እጅርዝ ጝንል ኣቭንወ ጥዉወይ» ይጛ ኣጕርምርምጥጘ ኪርም። 8ዘኪወስ ግን ችብር ኣደረ እየሱስት፦ «ኣደረወ! ነስየ ይፃቀው ኻፍቲስቅ ግቨርድ ድኽዝ ይውጭር፤ ኻሽትዝ ቀመው ፅብሽም ሲዘ ኣፅቨ ፃቭ ዊስጭር» ዩ። 9እየሱስም፦ «ንጭ እን ጝኒል ቓድት ኣቑ፤ ምላሰንድም እን እጅርድ ቈሽ ኣቭርኻምት ዅር የጝነ። 10እጅር ዅርም ድዘውድ ደምዝጠ ቓዝጠም የጝ ተረውድ» ዩ።#ማቲ. 18፡11።

ፅቃ ኣገልጋያኒዝ ተከድ

(ማቲ. 25፡14-30)

11እቅድ እኒንት ወሽጛ ሲጝቀ እየሱስ ላው ተከ ድቁ፤ ምላሰንድም ጘጝ እየሩሳልየም ችጝጠ ጓንስቅ፣ እቅ ቈሽ እደረት ምጝግስትየን ነን እልትዝ ኪርምሽቲ ይጝ ዊንጛንስቅ የጝ።#ማቲ. 25፡14-30። 12ኣቓንስቅም እንት ዩ፦ «ላው ሽም እጅር ንግስነ ለምር ተርጠ እክል ኻግር ፊሩ። 13እንዝ ማጥን ጝኣገልጋያኒስ ፅቃድ ጭጝ ጝታይተእጝቅዝቅ ፅቃ ፅቃ ምናን ይው፦ ‹ዋጥር ተጪስቅ እንዛዝ ኒግጥን› ዩ። 14ጝኻግሪዝቍ እቅድ ግን ጝት ቀናቍ ዊንጛንስቅ፦ ‹እን እጅርድ ይናዲጊል ኒግስጠ በናይነቅም› ይጝ ጘጝ ፊረት እግረ እፃ በርስ።

15«እድ ሽምድየን ግን ንግስነድ ለምር ተረጘ ለምርጘቍ ጊንዝቫኒዝ ዋቐ ኣጠ ቲርፍዝጘጘ ኣርቕጠ በን ጝኣገልጋያንድዛት ጭጝሱ። 16በውረ ኣገልጋይድም ኣልት፦ ‹ኣደረወ! ነይረቍ ፅቃ ምናናኒዝ ኒግጥ እንወ ፅቃ ምናናን ቲርፍዝኩን› ዩ። 17ኣደረድም፦ ‹ኣምንሽትረር ኣገልጋይ ክተ! ቀሰው ፃቭርኵሩ፤ ዊትቍዝ ኣምንሽትራንስቅ ያን ቈሽ ፅቃ ኻትምጥል ይምኩን› ዩ። 18ሊጘትረ ኣገልጋይድም ኣልት፦ ‹ኣደረወ! ነይረቍ ምናናኒዝ ኒግጥ እንወ ኣኰ ምናናን ቲርፍዝኩን› ዩ። 19ኣደረድም፦ ‹ኣምንሽትረር ኣገልጋይ ክተ! ቀሰው ፃቭርኵሩ፤ ዊትቍዝ ኣምንሽትራንስቅ ያን ቈሽ ኣኰ ኻትምጥል ይምኩን› ዩ።

20«ላየ ኣገልጋይድም ኣልት፦ ‹ኣደረወ! ክነይረቍ ክቍርሻንድ ፃርቀዝ ቓጭል እቝርኩን ኣስ። 21ምላሰንድም ክት እቝሪረውድ ፊስረር፣ ፊዚረውድም ኣይርደር ጨካኝ እጅር ኣራንስቅ ጐውጡን› ዩ። 22ኣደረድም፦ ‹እፈ! ጭቓ ኣገልጋይ ክተ! ክቕም ዊግትረው ቃሊዝ ፊርድጭር፤ ያን እቝሪቀውድ ፊሰር፣ ፊዚቀውድ ኣይረር፣ ጨካኝ እጅር ኣቐጘ ኣርቕረውዝየ፦ 23ይጊንዝቫንድ ተጥ ጝታትርፋኒጅቅ ፊስጨ ማጥን ውረ ላጥ ኒግረቍዝ ይዊረር?› ዩ። 24ኣደረድም ጝግል ችብርጝ ዊነቊድዛት፦ ‹ጝቍርሻንድ ጕይርን ፅቃ ቍርሻን ቲርፍዘዊዝ ይውጥን› ዩ። 25ጛይም፦ ‹ኣደረወ! ጘጝ ቃል ፅቃ ቍርሻን ፃይኩ› ይ። 26ኣደረድም፦ ‹ፃየዊዝ ይውሽትጡ፤ እጀዊዝ ግን እድ ፃይ ዊነውድ እኳ ፊስሽትጡ።#ማቲ. 13፡12፤ ማር. 4፡25፤ ሉቃ. 8፡18። 27እዛይ ጝታዲጊል ኒግሳይቀጘ ሽክተውቍ ይፃለታንድ ግን እንል ይበዊል ነስርን ቁጥን› ዩ።» 28እየሱስ እኒን ተከድ ዊግተት ግረ እየሩሳልየም ፋንድ ጝክንደጢዝ በው በዊል ፃጛ ዊኑ።

እየሱስ ኽየው ክቭርዝ እየሩሳልየም ጥወጘ

(ማቲ. 21፡1-11፤ ማር. 11፡1-11፤ ይዃ. 12፡12-19)

29እየሱስም ደቭረ ዘይት ኣበይዝ ጋቢል ችጝሸቍ በተፋግየ ቢታንየ የነቍ ኪቋኒል ችጛንድ ጝክንደጢስ ሊጘድ እንት የው እፃቑ፦ 30«ክታበዊል ችጝሽረይ ኪውሸንትል ፊጥን፤ ጝርግል ችጝርናንድም ገነ ኣውማውቅ ድቃሪነው ድዃር እወል ችጝትርንቅ፤ ጝት እክስርን እንጐ ነስጥን። 31ኣውማው እጅር፦ ‹ውር ፃቭትርነ የጝ እክስርነውድ? የው ዋቕርሽ፦ ‹ኣደረ በናንስቅ የጝ› ይርን ዊስጥን።»

32እፃሸቍድም ፊርጝ እጝቅትቅ ልክ እየሱስ ድቈጘ ችጝ። 33እወልድ እክስጛንድም ወንድ፦ «ውር ፃቭትርነ የጝ እክስርነውድ?» ይጝ ዋቕር። 34ጛይም፦ «ኣደረስ በንዛንስቅ የጝ» ይጝ ዊስ። 35እወልድየንትም እየሱስትል ነስ። ጝታፃርቅጥድም እወሊዝ ዲጊል ጒዝጕዝጝ እየሱስት ድቃስ። 36እየሱስም ፊራንድ እቅድ ጝበው በዊል ዲቍጛ ጝታኣልብድ ጒደነይል ወፃጛ ዊን።

37እየሩሳልየም ኻትመይል ጥውጠ ጣቅራንድም ደቭረ ዘይት ኣበይዝ ቍልቍለድ ጊማ ዊኑ፤ ኣይንድ ጝት ቲክንጛ ዊነቍ እቅድቅ ጘጝ ፃቨቍ ታምራንድዛትቅ ቓልጛንስቅ ዲስተዝ ክርጛ፣ ጝታድመድ ኣጒስ ሽጝ እደረት ሚዝየንዝጛ ዊን። 38«እደረት ሽዝ ተረው ንጕስ በርክሸው የጝ፤ ሲመይስ ዲግተ፣ ክብርም ኣርያም ፅበው እደረስ ኣነ» ይጛ ዊን።#መዝ. 118፡26።

39ኽዝቪዝ ማኽሊል ዊነቍ ላው ላው ፈሪሳንድ ግን፦ «እፈ ክንሰተወ! ክክንደጥድዛት ዝም ሽ» ይ። 40ጘጝም፦ «ጛይ ዝም ይጝሽም እኳ ቕርጝድ ቓፅጥቍ የኵን» ዩ።

እየሱስ እየሩሳልየምት ማጥን ሊዘጘ

41እየሱስም እየሩሳልየም ችጛንድ ኻትመየንት ቓል እንት ያ ሊዙ፦ 42«ክዲግተድየንት ነሰው ዊገድየንት ውረ ንጭ ክት ኣርቕር ዊንዳንፈ! ነን ግን ክእልጣኒስ ሲውርሽኩ። 43ክፃለታንድ ኻፅር ኻፅርጝ ክጅልወድ ኪብጝ እንዝም እድዝም ክት ጨጝቅዝጘው ግርየ ተርጡ። 44ክስመ ክኣቒል ፀበቍ ክቝሪዝም ብጢጅቅ ዲብልቅጥቍ፤ ክስፍረይስ ፋይሪጝቀ እዳቐው ቕርጘ ዊናውም፤ እንቅ ኣቐውድ እደረ ክት ገቭስጠ በነው ግርየድየንት ኣርቐነው ብራንስቅ የጝ።»

እየሱስ መቅደስ ጝኒል ኣቕጝ ኣርይደቍድዛት ጅግዘጘ

(ማቲ. 21፡12-17፤ ማር. 11፡15-19፤ ይዃ. 2፡13-22)

45እንዝ ግረ እየሱስ መቅደስ ጝኒል ጥው ጝግል ኣቕጝ ኣርይድቍድዛት ጅግዝጠ ኪርሙ። 46እንት የውም ዊግቱ፦ « ‹ይጝንድ ፀለውትዙ ጝን ኣጡ› ይሽት ፃፍሽኩ፤ ክትን ግን ቓፅጝዙ ጋ ፃቭርኑ» ዩ።#እሳ. 56፡7፤ የር. 7፡11።

47ግሪ ጨቨቅም መቅደሲል ክንሳ ዊኑ፤ ካኽነጣነ ኻልቅጢዝመ ወሪትት ኽግ ክንሰጢዝ፣ ላጥ ኽዝቪዝ ሽመቅልድም ኣቕጝ፣ ጝት ቁጥጘ ደምዝጛ ዊን።#ሉቃ. 21፡37። 48ዊገድ ግን ኽዝቭድ እየሱስት ወሽጠ ጝእዘንድ ሲቅልሽ ዊናንስቅ ፃቨነው ገቨ ብ።

Currently Selected:

ሉቃስት ወንጌል 19: ኽምጣኣኪ

Highlight

Copy