ይዃንስት ወንጌል 3

ፈወነ 3

እየሱስ ኒቈዲመስት ክንሰጘ

1ፈሪሳነ ዊግኒስ ኒቈዲመስ ይሽተው ላው ኣይዅዳነ ኻልቀ እጅር ዊኑ። 2እኒን እጅርድ ኻርዝ እየሱስትል ተር፦ «ክንሰተወ! እደረ ጝጅቅ ኣቐው እጅር ኣየውዝየ እንዛይ ክት ፃቭረቍ ምልክታንድዛት ፃቭጠ ቸለው ላው እጅርም እጀው፤ ኣቓንስቅም ክት እደረቲስ ክንሰተ ኣቕር ተትረጘ ኣርቕነኵን» ዩ።

3እየሱስም፦ «እማን እማን የኵን! እጅር ሊጘት እዅርሺየውዝየ እደረት ምጝግስትድየንት ቓልጠ ቸላውም» ዩ። 4ኒቈዲመስም፦ «እጅር ጊነት ግረ ኣወይ የጝ እዅርሽጠ ቸለውድ? ሊጘት ጝኘት ማፅቲል ጥው እዅርሽጠ ቸልጡመ?» ዩ። 5እየሱስም ዊስ፦ «እማን እማን የኵን! ኣውማው እጅር ኣቚስመ መንፈሲስ እዅርሺየውዝየ እደረት ምጝግስቲል ጥውጠ ቸላውም። 6ስየይስ እዅርሸውድ ሰየ የጝ፤ መንፈሲስ እዅርሸውድ መንፈስ የጝ። 7እንዝ ማጥን፦ ‹ሊጘት እዅርሽትርነ ጥውሸኵ› ያንስቅ ዲንቅሽተ። 8ፊግየ ጝት ሸዊዝጐቅ ጣዘኵ፤ ጝድመድም ወሽረኵ፤ ዊገድ ግን ኣውገይስ ተረጘ፣ ኣውገም ፊርጠጘ ኣርቓርም፤ መንፈሲስ እዅርሸውድም እኒዝጘ የጝ» ዩ። 9ኒቈዲመስም ዊስ፦ «እን ዊገድ ኣወይ የጝ ኣጠ ቸልሸውድ?» ዩ። 10እየሱስም፦ «ክት እስራየላኒዝ ክንሰተ ኣቕር ፅብራ እንዛት ኣርቓርመ? 11እማን እማን የኵን! ኣርቕነውድየንት ዊግትነኵን፤ ቓልነውድየንትም ሚዝርድነኵን፤ ክትን ግን ይናሚዝርነይድ ለምራይርነቅም። 12ያን ዝቨይዝውድየንት ድቋንድ ኣምኒርነውዝየ፣ ሲመይዝውድ ድቋን ኣወሽርን ኣምንትርና? 13ሲመይስ ጊመው#3፡13 ላው ላው ኽፅምትቍ ብራንጥ መፃፋንድ፦ «ሲመይ ፅበው» ይጘኵ። እጅር ዅርትለ ሲመይ ፈው ኣውማው እጅርም እጀው።

14«ሙሴ በራኸይስ ሲቭረድየንት ንየስ ሸው ሲቅለጘ እጅር ዅርም እኒዝጘ ንየስ የው ሲቅልሽጠ ጥውሸኵ።#ዘዅ. 21፡9። 15እንም ጝት ኣምነውድቅ ዘላልምዙ ርዅየ ችጛንስ ማጥን የጝ። 16ጝት ኣምነውድቅ ዘላልምዙ ርዅየ ችጛንስጚ ድዛየጘ እደረ ላው ጭቝ ኣቐው ጝዅርድየንት ዲቍስን ይወነውል ኣሽ፣ ኣልምድየንት ጭቕጘ ቀንኩ። 17እደረ ጝዅርት እፃቐውድ ኣልምድየንት ኲንናንስ ኣዪጝቀ፣ ኣልም ጝዅርት ኣመካይነትዝ ቓዳንስ ማጥን የጝ። 18ጝት ኣምነውድቅ ኲንንሻውም፤ ጝት ኣምናውድ ግን እደረት ላው ጝዅሪዝ ሽዝ ኣምኒየው ኣቓንስቅ ኻትሽ ኲንንሽኩ። 19ፍርድድም እኒን የጝ፦ ብርኻን ኣልሚዝጐ ተሩ፤ እቅ ግን ጝታሰቭድ ጭቓ ዊናንስቅ ብርኻኒስ ሽ ጥመድየንት ቀን። 20ጭቓ ሰቭ ሰራሸው እጅርድቅ ብርኻን ሽክተኵ፤ ጝጭቓ ሰቭድም ጋልፅሽታየጘ ብርኻኒዝጐ ተራውም። 21እማን ኣቐው ዊገድየንት ሰራሸው እጅር ግን ጝሰቭድ እደረት ትዛዚዝ ሚስርትዝ ሰራሽተው ኣቐጘ ግልፅዝ ቓሊሽታንስ ማጥን ብርኻኒዝጐ ተረኵ።»

ጣምቀተ ይዃንስ እየሱስት ማጥን ሚዝርደጘ

22እንዝ ግረ እየሱስ ጝክንደጢጅቅ ይዅዳ ኻግሪዝጐ ፊሩ፤ ጝግል ኣቕም ጣምቃ ጛጅቅ ዊቱ ግርየ ጐዩ። 23ኣይንድ ይዃንስ ሳልየምት ጋቢል ኺነውን የነው ስፍረይል ንቕፀው ኣቘ ዊናንስቅ ጝግል ኣቕ ጣምቃ ዊኑ፤ እቅም ጝጐ ፊርጛ ጣምቅሽጛ ዊን። 24እንም ኣቐውድ ይዃንስ ገነ እፁሺጝቀ የጝ።#ማቲ. 14፡3፤ ማር. 6፡17፤ ሉቃ. 3፡19-20።

25ኣይንድ ይዃንስት ክንደጢዝመ ኣይዅዳኒዝ#3፡25 ላው ላው ትርጕማንድ፦ «ላው ላው ኣይዅዳን» ይጘኵ። ማኽሊል ዊር የነው ስረቲዝቍዝ ክርክር ጉ። 26ይዃንስት ክንደጥድም ጝጐ ኣልትጝ፦ «ክንሰተወ! ዮርዳኖስት እጂል ክጅቅ ዊነውድ፣ ክትም ጝማጥን ሚዝርድረው እጅርድ እንወ ጘጝም ጣምቀኵ፤ እጅር እጝቅም ጝጐ ፊረኵ» ይ። 27ይዃንስም እንት ዩ፦ «እደረቲስ ችጚየውዝየ ኣውማው እጅር ውረውረቅ ለምርጠ ቸላውም። 28‹ያን ክርስቶስ#3፡28 ዊንም፦ «መሲኽ» ኣይቀርም፤ ዊገድ ግን ጝበዊል እፃጭኩን› የር ዊግጠጘ ክታቕም ይሚዝረጫን የጝ።#ይዃ. 1፡20። 29ስሪት ፃየውድ ኣስን የጝ፤ ኣስኒዝ ጋቢል ችብር ወሸው መዘድ ግን ኣስኒዙ ድመድ ወሻንድ ጭቕጘ ዲስ የኵ፤ እኒን ዲስተድ ይውድ የጝ፤ ጘጝም ነን ኻትሽኩ። 30ጘጝ ንየስ ይጠ ያን ግን ዝጥቅ ይጨ ጥውሸኵ።

31«ኒየይስ ተረውድ እጝቂስቅ ኒየቱ የጝ፤ ዝቨይዝውድ ኣቓንድ ዝቨይዙ የጝ፤ ዝቨዙ ዊገድየንትም ዊግተኵ፤ ሲመይስ ተረውድ እጝቂስቅ ኒየ የጝ። 32ጘጝ፦ ቓለውድየንት፣ ወሸውድየንትም ሚዝርደኵ፤ ዊገድ ግን ጝሚዝርነይድ ለምረውም እጀው። 33ጝሚዝርነይድየንት ለምረው እጅር፣ እደረ እማንተው ኣቐጘ ደደደድሰኵ። 34እደረ ጝመንፈስድ ሚክሪጝቀ ይወው ኣቓንስቅ እደረቲስ እፃሸውድ እደረት ቃልድየንት ዊግተኵ። 35ኣይር ጝዅርት ቀነኵ፤ እጝቅትቅም ጝጭስ ዲቍስ ይውኩ።#ማቲ. 11፡27፤ ሉቃ. 10፡22። 36ዅርት ኣምነውድቅ ዘላልምዙ ርዅየ ችጝኩ፤ ዅርት ኣምናውድ ግን እደረት ቍጠድ ጝዲጊል ፅብጡጚ ርዅየ ቓላውም።»

Currently Selected:

ይዃንስት ወንጌል 3: ኽምጣኣኪ

Highlight

Copy