ኻወርየታኒዙ ሰቭ 20

ፈወነ 20

ባውሎስ መቀደውንየስመ ግሪክስታጐ ፊረጘ

1ኽምዘድም ኪበጘ ባውሎስ ምመናንድዛት ላው ፃቭ ጭጝስ ማኽር በር ጛት ሲነቭሽ መቀደውንየ ትጐ ፊሩ። 2ፊራንድም ጘጝ ዲቈቍ ኻግራኒዝቍ ምመናንድዛት ኽየው ምኽርዙ ቃልዝ በርታዛ ግሪክ ችጙ። 3ጝግልም ሻቘ ርፍ ሳብጠጘ ሚርክቭዝ ተሳፍርሽ ሰውርየ ትጐ ፊርጠ ኻስቩ፤ ዊገድ ግን ኣይዅዳንድ ጝት ቁጥጘ ኣስልሽጘጘ ወሻንስቅ መቀደውንየቱ ፃቭ ዋጥርጠ ዊስኑ። 4በርየቱ ባጥሩስት ዅር ሱሲባጥሩስ፣ ተሰለቅየትቍ ኣርስጥረኰስስመ ሲኰንዱስስ፣ ደርቭየንቱ ጋይወስ፣ እስየትቍ ትጪቈስስመ ጥረፊመስስ፣ ጢመቲወስም ኣቕጝ እንዛይቅ ባውሎስ ጅቅ ላብጠ ፊር። 5ጛይም ይናበውገ ቀድምጝ ፊርጝ ጢረዋደ ኣቕጝ ይናት ሊሚድ። 6ይን ግን ቅጣ ዀነው በልድ ዲቈት ግረ ፍልብስዩስስ ሚርክቭዝ ተሳፍርሽን ጛይ ፅብጘዊል ጢረዋደ ኣኰ ግርቅዝ ችጝኑን፤ ጝግልም ጛጅቅ ላጝጠ ግርቅ ሳብጥኑን።

ውርጋጠ እፈረ ክርጘይስ ጐጘ

7ሸወጪዙ በወትረ ግርየይዝም ሚ ቈርስነ ላው ኣቕን ኣኽቭሽን ፅብና፣ ባውሎስ ጛምርሲዝ ፊረው ኣቓንስቅ ኣኽቭሸቊዝ ዊግታ ዊኑ፤ ዊግተነውድም ኻረ ግቨር ኣጢስቅ ሊጊሱ። 8ኣኽቭሽን ዊነው ዲቭሪልም ንቕፀቍ መቭራታን ዊን። 9ኣውጣኪስ የነው ላው ውርጋጠ እፈረም ምሽዅቲዝ ዲጊል ጐይ ዝመውራ ዊኑ፤ ባውሎስም ጝዊገድ ሊጊሳንድ እድ እፈረድ ዝመውዝ ጭቕጘ ፅጐውሻንስቅ ሸወትረ ዲቭሪስ ኪርም ጊም ሊቩ፤ እቅም ውጥይጝ ጕይጛንድ ክር ዊኑ። 10ባውሎስም ጊም ጝዲጊል ኣቕ ኣቅቭ በር፦ «ጝፈውጥድ ፊየቍም ኻሚትርነ» ዩ። 11እንዝ ግረ ባውሎስ ዲቭሪል ዋጥር ሚድ ኪል ምመናኒጅቅ ኹ፤ እቂዝም ቅሽጢስቅ ዊግታ ጭ ግረቨዝ ጕ ፊሩ። 12እቅድም እድ ቓደው እፈረድየንት ዳኽነ ኣቑዝ ፊስ፤ እንዝ ማጥንም ጭቕጘ ዲስ ይ።

ባውሎስ እፊሰውንት ምከን ቃወጥድዛት ሲነቭሸጘ

13ይን ግን ባውሎስት ለምርነ ማጥን ቀድምን ሚርክቭዝ ተሳፍርሽን ኣሰን ትጐ ፊርኑን፤ እንት ሽነውድም ባውሎስ ኣሰን ልኰ ጒደነዝ ፃቭ ፊርጠ በን ይናት ሚርክቭዝ ቀድምን ፊርነ ማጥን ኣዛንስቅ የጝ። 14ኣሰንስም ዲምቅሽናንድ ሚርክቭል ጥውን ጝጅቅ ላብጠ ሚሊጢን ፊርኑን። 15ጝኣምርሲዝም ጝጊስ ጕን ሚርክቭዝ ኪዩ የነው ደስየቲዝ በውዝ በዊል ችጝኑን፤ ጛምርሲዝ ቈሽ ጕን ሳሙስ ትጐ ከርኑን፤ ትረጊሊዩም ጭን ጝኣምርሲዝ ሚሊጢን ጥውኑን። 16ባውሎስም እስየ ሳብጣየጘ በን እፊሰውንት ዲቍ ፊርጠ ኻስቩ፤ ምላሰንድም፦ ባለኻምሰ በልድ እየሩሳልየም ግሪጠ በን ደርታንስቅ የጝ።

17ኣይንድም ሚሊጢን ኣቕ እፊሰውን ትጐ እጅር እፃቕ ምከኒዝቍ ምከን ቃወጥድዛት ጝጐ ጭጝሱ። 18ጛይም ተርጛንድ እንት ዩ፦ «እስየ ተጠው ግርየይስ ኪርም ነኳን ኣሽ ዊትርቅ ክታማኽሊል ኣወይ ዊነጘ ክታቕም ኣርቕርነውድ የጝ። 19ውርም እኳ ኣይዅዳነ ሲረይስ ጐው ሚከረ ለምጣንም፣ ይእርድ ቅብሳ ኣደረት ቃልድ ትኽትነዝ ኣግልግለነውድ በጢቀርም። 20ኣኸቨዝም ኣነ ጝንጥዝ ጝንጥቅ ዋጥርጥራ ክታጭስ ጣቅመውድየንትቅ ክንሱንጚ ውርም እዳዚቀር። 21ኣይዅዳንድም ኣጝነ ኣኽዛቫንድዛይ እጝቅቅ እደረ ትጐ ዋጥርጝ ንስኻ ጥውጛንስመ ይናኣደረ እየሱስ ክርስቶስት ኣምንጛንስ ማጥን ጣጝቅቅስኩን።

22«ነንም ያን ጝግል ችጛንድ ወረጘ ችጝጨት ኣርቒቅሽም፤ እየሩሳልየም ፊጨ ማጥን መንፈስ ቅዱስ ኣዝኩ። 23ኣነጚ ኻትመዝ ኻትመ ዋጥርጥራንድቅ መንፈስ ቅዱስ፦ ‹እፅወዝመ ሚከረዝ ለምርትር› ያ ይቕምስ ድቈኵ። 24ያን ግን ይኣግልግለነዊዝመ ኣደረ እየሱስ ነየው ሰቪዝ ኻትጪስቅ ኣሽ ክጠር ኣቕሽ እኳ ግድ እጀርም፤ ይኣግልግለውትድም እደረት ፃገዙ ወንጌልድ ኣቭዝርሰነው የጝ።#2ጢመ. 4፡7።

25«ነኳን ኣሽ ክታማኽሊል ዋጥርጥራ ክንሳ ዊንኩን፤ ነስየ ግን ይጋፅድ ሊጘት ቓላይርነጘ ኣርቐኵን። 26እንዝ ማጥን ክታማኽሊስ ላይ ኒፍስ እኳ ድዝርሻ ያን ዲቈቅ ኣቐጘ ንጭ ክታት ጣጝቅቅስኩን። 27ምላሰንድም እደረት ፍቃድድ ውርቅ እዳዚጝቀ ክታእጝቅዝቅ ድቍኩን። 28በገዘ ጝብርድ ቅብስ ቓዘይ እደረት ምከንሸንት ሊሚድትርነ ማጥን መንፈስ ቅዱስ ክታት ባባሳን ፃቭ ይምኩ፤ እደስለስ መጝገይዝም ኣነ ክታቕምስ ጣጝቅቅጭጥን። 29ያን ፊጠት ግረ መጝገይዝ ኣርኽርኻቍ ተኵለይዝጘ ጨካኛን እቅ ክታማኽሊል ጡጥጘት ኣርቐኵን። 30ክታማኽሊስ እኳን ላው ላው እቅ ጕጝ ጠማም ክንድጝ ክንስጛ ምመናንድዛት ጝታቕም ትጐ ዊትርጥቍ። 31ኣቓንስቅም ሻቘ ምት ምሉ ይእርድ ቅብሳ ኻር ጊርቅ ክታእጝቅትቅ ማኽረጘ ኻስቭርና ጣጝቅቅጭጥን።

32«ነንም እደረስ፣ ቈሽም ኻንፀነውዝመ ቅዱሳኒዝ ማኽሊል ርስት ዊርስጠ ቸለው ጝፃገይዙ ቃሊዝ ክታት ኽድር ይውኩን። 33ያን ኣውማውቲስም ቍርሽ ዊንም ዊርቀ ዊንም ኣልቨ ማርቕፂቀርም። 34እንዛይ ይናንጣኒዝ ሰራጫ ይቕምትም ኣነ ይፃምጥድዛት ከቫ ዊነጘ ክታቕም ኣርቕርነኵ። 35‹ለምረዊስ ሽ ይወውድ በርክሸው የጝ› የው ኣደረ እየሱስ ዊግተው ቃልድ ኻስቭርና ክታናኒዝ ሰራሽርና ቺግርሸቍድዛት ከቭትርነ ማጥን እጝቅትቅ ይቕም ፃቭ ቓሊስኩን።»

36እንት የው በር ጝታእጝቅጅቅ ኣቕ ግርቨቭሽ ፃልዩ። 37ጛይም እጝቅቅ ጭቕጘ ሊዝጛ ባውሎስት ቕልመድ ጣጥምጝ ፃይጝ እምቝ። 38እጝቂስቅ ጭቕጘ ኻዝንጘውድ ቈሽ፦ «ነስየ ይጋፅድ ሊጘት ቓላይርነቅም» ያንስቅ የጝ፤ ባውሎስትም ሚርክቪል ኣሽ ስቭዝ።

Currently Selected:

ኻወርየታኒዙ ሰቭ 20: ኽምጣኣኪ

Highlight

Copy