ኻወርየታኒዙ ሰቭ 15

ፈወነ 15

ክርስቲያናን ኣቐቍ ኣኽዛቫኒዝቍዝ እየሩሳልየም ኣቐው ኣኸቨድ

1ላው ላው እቅም ይዅዳስ ኣንፀውክየ ፊርጝ፦ «ወሪትት ኽግድ ኣዘጘ ጊርዝሽቲርነውዝየ ቓዳይርነቅም» ይጛ ምመናንድዛት ክንስጥጘ ኪርም።#ዘሊ. 12፡3፤ ኻወ. 10፡1-43። 2ባውሎስስመ በርናቫስስም እን ዊገይዝቍዝ ጛይ እቂጅቅ ኪርክርሽጛ ኽየው ጐርል ጥው፤ እንዝ ግረ ባውሎስስመ በርናቫስስ ላጥ ላው ላው ኣንፀውክየት ምመናኒጅቅ ኣቕጝ እየሩሳልየም ፊርጝ እን ዊገይዝቍዝ ኻወርየታኒዝመ ምከን ቃወጢዝ ኣልስጥጘ ማጥን ዊስንሹ። 3ጛይም ምከንሸንስ እፃሽጝ ኣኽዛቫን ኣወይጝ እደረ ትጐ ዋጥርጘጘ ድቍጛ ፊንቅየስመ ሰማርየስታዝ ፃቭጝ ፊር፤ እን ጂጘድም ምመናንድዛትቅ ዲስ ሹ። 4እየሩሳልየም ችጛንድም ምመናኒዝመ ኻወርየታኒዝ፣ ምከን ቃወጢዝም ኣቕጝ ለምር፤ ባውሎስታይም እደረ ጛጅቅ ኣቕ ፃቨውድየንትቅ ጂጝዝ። 5ዊገድ ግን ፈሪሳን ዊነቍ ምመናኒስ ላው ላውድ ጕጝ፦ «ኣኽዛቫንድ ጊርዝሽትጥጘ፣ ወሪትት ኽግድም ፋፅምጥጘ ማጥን ኣዝትርነ ጥውሸኵ» ይ።

6ኻወርየታኒዝመ ምከን ቃወጢዝም እን ዊገይዝቍዝ ማኽርሽጥጘ ኣኽቭሽ። 7ኽየው ክርክር ፃቭጘት ግረ ቢጥሮስ ጝታማኽሊስ ጕ እንት ዩ፦ «ይፅን ክታችወ! ኣኽዛቫን ወንጌልዙ ቃልድ ይምቸይስ ወሽጝ ኣምንጥጘ ማጥን እንዝ ሚቅ እደረ ክታማኽሊስ ይት ማርፀጘ ክታቕም ኣርቕርነውድ የጝ። 8እጅርዝ እዘንድየንት ኣርቐው እደረ ጛት ለምረጘ፣ መንፈስ ቅዱስት ይናጭስ ነየጘ ጛጭስም ይወነውዝ ሚዝርዱኩ።#ኻወ. 2፡5፤ 10፡44። 9ጝታእዘንድ እምንትዝ ዊር ሻንስቅ ይናስመ ጛስ ማኽሊስ ወረውረም ቲዚየው። 10ነስየ ይንም ኣነ ይናኣቅልድቅ መውርነ ቸሊነው መውርድየንት ምመናኒዝ ጅውሪል መውስትርነ ውር ቃጥ የጝ እደረት ፊትንትንድርነውድ? 11ይንም ቓድነውድ ጝታጘ ኣደረ እየሱስት ፃገዝ ኣቐጘ ኣምነኵን።»

12ኣይንድም ኽዝቭድ ዝም የው በርናቫስመ ባውሎስስታይ እደረ ኣኽዛቫኒዝ ማኽሊል ጝታናኒዝ ፃቨቍ ታምራኒዝመ ዲንቅሰቍ ዊቂይዝቍዝ ዊግትጛንድ ወሻ ዊኑ። 13ጛይ ዊግትጝ ኻትጘት ግረ ያይቈቭ ጕ ችብር እንት ዩ፦ «ይፅንወ! ወጭጥን! 14እደረ ኣኽዛቫኒስ ጝሽዝ ጭጝሸው ኽዝቭ ማርፃንስ ማጥን ኣወሽ በውርስ ገቭሰጘ ስሙን ኣስርድዝኩ። 15ቈሽም እንት ይሽት ፃፍሸው ነቭያታኒዙ ቃልድ እኒጅቅ ቲስመመኵ፦

16‹ኣደረ እንት የኵ፦ እንዝ ግረ ዋጥርጭር፤

ፋይተው ዳዊትት ጝንድየንትም ተስጭር፤

ፋይረውድየንትም እንደ ገነ ፃግን ችብስጭር።

17እንት ሸውድም ላጥ እቅዝመ

ይሽዝ ጭጝሸቍ ኣኽዛቫንድቅ እደረት ደምዝጥጘ ማጥን የጝ የኵ እኒንትቅ ፃቨው እደረ።

18በውግስ ኪርም እደረት ሰቭድቅ ጝቕምስ ኣርቕሽተው የጝ።›#ኣመፅ. 9፡11-12።

19«እንዝ ማጥን ያን ይጨ በነውድ እደረ ትጐ ዋጥረቍ ኣኽዛቫንድዛት ቺግርዛይነጘ የጝ። 20ኽሽስ፦ ‹ጣወትዝ ኣርክሽተው ዅረ ዅትርነ፣ ሻርሙጥትርነ፣ ጝብርድ ቅብሪጝቀ ኻንቕሽ ከረው እንሰሰይዙ ስየዝመ ብርዝ ዅትርነ› ይን ጛጭስ ፃፍነ ጥውሸኵ።#ዘፀ. 34፡15-17፤ ዘሊ. 17፡10-16፤ 18፡6-23። 21እኒንትቅ ኣዘው ወሪትት ኽግድ ኣቕሽ፣ ኽፅምስ ኪርም ቅዳምሲንቭት ጨቨቅ ኣንቭቭሻ፣ ኻትም ጨቨቅም ሲቭክሻ ዊነው የጝ» ዩ።

22ኣይንድ ኻወርየታኒዝመ ምከን ቃወጢዝ እጝቅ ምመናኒጅቅ ኣቕጝ ጝታማኽሊስ ዊትቍ እቅ ማርፅጝ ባውሎስስመ በርናቫስስታጅቅ ፃቭጝ ኣንፀውክየ እፃጥጘ ቲስመም፤ ምመናኒዝ ማኽሊስም ዋንጥ ዊነቍ በርስያን ይሽተው ይዅዳስመ ሲላስስ ማርፅ። 23ደብዳቢም ፃፍጝ ጛጭስ እፃቕ፤ ፃፍሸው ደብዳቢድም እንት የው ዊኑ፦ «ይን ክታፅን ኣነቅ ኻወርየታኒስመ ምከን ቃወጢስ እፃሽተው ደብዳቢ፤ ኣንፀውክየ፣ ሰውርየ፣ ኪልቅየም ፅብርነቅ ኣኽዛቫኒዝ ዊግናን ኣቕርነቅ ይናፅንስ ችጝነ፤ ዳኽነ እኵርኑመ! 24ይን ኣዚነቍ ላው ላው እቅ ይናጊስ ክታጐ ተርጝ ኻውክጛ ክታት ግራ ድውስጘጘ ወሽንኵኑን። 25-26እንዝ ማጥን ዊትቍ እቅ ማርፅን ጝታርዅየሸንት ኣደረ እየሱስ ክርስቶስት ሽዝ ዲቍስጝ ይወቍ ቀንሸቍ ይናፅን ባውሎስስመ በርናቫስስስታጅቅ እፃነ ማጥን ላው እዘንዝ ቲስመምኑን። 27ይን ዊስነውድየንት ጛይም ጝታቃሊዝ ድቍጥጘ ማጥን ይዅዳስመ ሲላስስ እፃቕንኵኑን። 28-29ጣወትዝ ኣርክሽተው ዅረ ዅትርነ፤ ሻርሙጥትርነ፤ ጝብርድ ቅብሪጝቀ ኻንቕሽ ክረው እንሰሰዙ ስየዝመ ብርዝ ዅትርነ፤ እኒዝለ ላየ ፅጐወው መውር መውሳይነጘ ይናስመ መንፈስ ቅዱስስ ፊቅድንኵኑን፤ እንዛይ ኪልክልሸቊስ እክልድርናን ቀሰው የጝ፤ ዳኽነዝ ኣጥን።»

30እድ እፃሸቍድም ኣንፀውክየ ፊር፤ ኽዝቭድም ኣኽቭጝ ደብዳቢድየንት ይው። 31ኽዝቭድም ኣንቭቨት ግረ ደብዳቢስ ችጝሸው ምኽሪዝቍዝ ጭቕጘ ዲስ ዩ። 32ይዅዳስመ ሲላስስም ነቭያታን ዊንጛንስቅ ምመናንድዛት ንቕፀው ምኽርዝ ማኽርጝ ፀናዝ። 33ጝግልም ጛጅቅ እክሰቍ ግርቅ ሳብጥጘት ግረ ምመናንድዛት ሲነቭሽጝ ጛት እፃቐቍ ኻወርየታኒዝጐ ዋጥርጝ ፊር። 34ሲላስ ግን ጝግል እዳጠ በኑ። 35ባውሎስስመ በርናቫስስም ላጥ ንቕፀቍ እቅጅቅ ኣቕጝ ክንስጛ ሲቭክጛም ኣንፀውክየ ጐይ።

ባውሎስስመ በርናቫስስ ቲተቲትጘጘ

36ዊትቍ ግርቅዝ ግረ ባውሎስ በርናቫስት፦ «ዋጥርን እንዝ ሚቅ ኣደረት ቃልድ ድቍነቍ ኻትምጢዝቍ ምመናንድዛት ገቭስነ፤ ኣወይጝ ፅብጘጘም ቓልነ» ዩ። 37በርናቫስም ማርቈስ ይሽተው ይዃንስት ላብጠ ጛጅቅ ፊስጠ በኑ። 38ባውሎስ ግን ጝት ፃይን ፊረነው በኒየውም፤ ምላሰንድም ማርቈስ ብንፍልየስ ጛጊስ ቲት እዳቕ ዊናንስቅ ኣግልግለነውልም ጛጅቅ ፊሪጝቀ እዳቓንስቅ የጝ።#ኻወ. 13፡13። 39እንት ይጛ ኽየው ክርክርል ጥውጛንስቅ ጛስ ጛይ ቲተቲት፤ ኣቓንስቅም በርናቫስ ማርቈስት ፃይ ሚርክቭዝ ተሳፍርሽ ቈብረውስ ትጐ ፊሩ። 40ባውሎስ ግን ሲላስት ማርፁ፤ ባውሎስም ምመናንድዛይ ጝት እደረት ፃገዝ ዲቍስጝ ይውጘት ግረ ጛጊስ ቲት ፊሩ። 41ምመናንድዛትም በርታዛ ሰውርየስመ ኪልቅየስ ፃቭ ዲቁ።

Currently Selected:

ኻወርየታኒዙ ሰቭ 15: ኽምጣኣኪ

Highlight

Copy