KOE TOHI A MALAKAI 2
2
1 Oku ne valoki malohi ae kau taulaeiki koeuhi koe nau taefai ki he e nau fuakava, 11 bea koe kakai koeuhi koe tauhi tamabua, 14 bea moe feauaki, 17 bea koeuhi koe taetui.
1BEA koeni, akimoutolu ae kau taulaeiki, koe fekau eni, ma amoutolu. 2Kabau e ikai te mou fanogo, bea kabau e ikai te mou fakatokaga‘i ho mou loto, koeuhi ke fakaogoogolelei‘i a hoku huafa, oku behe e Jihova oe gaahi kau tau, Teu fekau atu mooni ha fakamalaia kiate kimoutolu, bea teu fakamalaia a ho mou gaahi tabuaki: io, kuou fai ni a hono fakamalaia, ka oku ikai ke tokaga ki ai ho mou loto. 3Vakai, teu maumau‘i ho mou inaji, bea teu li ae kinohaa i ho mou mata, io, ae mea kovi mei hoo mou gaahi katoaga mamalu; bea e fetuku akimoutolu fakataha mo ia. 4Bea te mou ilo kuou atu ae fekau ni kiate kimoutolu, koeuhi ke ia Livai a eku fuakava, oku behe e Jihova oe gaahi kau tau. 5Nae fai eku fuakava mo ia, koe mea ki he moui moe melino; bea naaku atu ia ki ai, koeuhi ko ene manavahe, aia naa ne manavahe ai kiate au, bea manavahe ki hoku huafa. 6Nae i hono gutu ae fono oe mooni, bea nae ikai ilo ha mea hala i hono lougutu; naa ma aeva mo au i he melino moe fai totonu, bea naa ne fakatafoki ae toko lahi mei he agahala. 7He oku totonu ke i he lougutu oe taulaeiki ae boto, bea totonu ke nau kumi ae fono mei hono gutu: he koe talafekau ia mei a Jihova oe gaahi kau tau. 8Ka kuo mou he mei he hala; kuo mou fakahumu ae toko lahi i he fono; kuo mou fakalielia‘i ae fuakava a Livai, oku behe e Jihova oe gaahi kau tau. 9Koia kuou gaohi ai akimoutolu ke mou fakalielia mo fākatua i he ao oe kakai kotoabe, o tatau mo hoo mou taefai ki hoku gaahi hala, ka kuo mou fai filifilimanako i he fono.
10Ikai oku tau tamai taha be? ikai koe Otua be taha kuo ne gaohi akitautolu? bea koeha oku tau felavakiaki taki taha ae tagata ki hono tokoua, i he maumau‘i ae fuakava oe tau gaahi tamai? 11Kuo fai kākā a Juta, bea oku ai ae fakalielia oku fai i Isileli, bea mo Jelusalema; he kuo fakalielia‘i e Juta ae maonioni a Jihova, aia oku totonu ene ofa ki ai, bea kuo ne mali moe ofefine oe otua loi. 12E motuhi e Jihova ae tagata oku ne fai eni, ae akonaki, bea mo ia oku ako‘i, mei he gaahi fale fehikitaki o Jekobe, bea mo ia oku atu ae feilaulau kia Jihova oe gaahi kau tau.
13Bea kuo mou toe fai eni, o ufiufi aki ae loimata ae feilaulauaga o Jihova, i he tagi moe kalaga: koia ia oku ikai te ne kei tokaga ki he feilaulau, be te ne ma‘u lelei ia mei ho mou nima. 14Ka naa mo ia, oku mou behe, Koe mea i he ha? Koeuhi koe fakamooni a Jihova kiate koe, bea moe unoho o hoo kei talavou, aia kuo ke fai kākā ki ai: ka koe mooni ko hoo kaumea ia, bea koe unoho ne ke fuakava ki ai. 15Bea ikai nae gaohi ia eia ke taha be? ka nae iate ia be hono toe oe laumalie. Bea koeha oku taha ai? koeuhi ke ai ha hako maonioni. Koia ke mou tokaga ki hoo mou aga, bea oua naa fai kākā e ha taha ki he unoho o ene kei talavou. 16He oku behe e Jihova, koe Otua o Isileli, oku ne fehia ki he tukuage: he oku ai ha taha oku ufiufi aki hono kofu a ene fakamalohi, oku behe e Jihova oe gaahi kau tau: koia, tokaga ki hoo mou aga, ke oua naa mou fai kākā.
17Kuo mou fakafiu‘i a Jihova aki hoo mou gaahi lea. Ka oku mou behe, Kuo mau fakafiu‘i ia i he ha? Oka mou ka behe, Koia kotoabe oku fai kovi oku lelei ia i he ao o Jihova, bea oku ne fiemalie kiate kinautolu: be, Koefe ae Otua oku fakamāu?
Currently Selected:
KOE TOHI A MALAKAI 2: TWB
Highlight
Share
Copy
Want to have your highlights saved across all your devices? Sign up or sign in
