Maatiyoos 22
22
Rɔmɛ Wɔɔr Waawanoŋkuk
(Luk. 14:15-24)
1Tonuɓa sɛɛga Yeese rɔmɛ kɛkar kɛ, 2"Burɛ dariyoŋk gayi a suumi om sinɔ ijaagi wɔɔr waawana tɔɔn nɛɛkik. 3Nɛ suumi nɛɛkɛ wosɛyɛ ijaageer gɛɛŋk kɛnɔ kurak joop sigɛkan riyɛ sɛɛgik, yakana sɛɛk tonurku kɛ kiirii mɛlɛ. 4Nɛɓa wosɛyɛ ijaageer ɔgɔ kɛkar tonuɓa sɛɛga kɛ, 'In kɛɛɗɛ tonɛɛ joopa sigaagakan riyɛɛk kɛ ŋɔɔlakɔ jeguyatɔk a tɔgi gaaŋk sigɔ goontuŋɔŋk ragadakɔ wɔɔr nɛɛkiŋ ragadɛɛkɔ any baŋɛ in kusɛɛ waawana nɛɛka.'
5"Joop sigɛɓa riyɛ sɛɛgik kɛɛɓa sɛɛge ŋɔɗɔ nɛɛk, nɛɓa rootanɛrki tiriyaaka gɛɛnaak, nɛɓa omaay kɛɛ taawa nɛɛka ma omaay kɛɛ nagada nɛɛka. 6Nɛɓa joop sigɛ dakɛrkik gaamur ijaageer gɛɛŋk, nɛ laaŋoyɛr sɛɛg nɛ ɓokootar sɛɛgiŋ. 7Nɛɓa ŋadi suumi sinɛ nɛ wosɛyɛ amaasiniyɛ gɛɛŋk nɛ kaar ɓokootar joop sigɛɓa ɓokootar ijaageer gɛɛŋkiŋ, ɛ moɗɛ katamɛ nɛŋk.
8"Saadi baŋiya tonuɓa ijaageera gɛɛna kɛ, 'Ragadtan wɔɔr sinɛ waawanoŋk, mayakana agut sinɔkɔ kirɗi gayɛ joop sigɛkɔ riyɛɛk a ɗegeera a sɛɛgik. 9In ŋaarirɛɛ gopana wakasaka, nɔ riyarkɔ joop sigɛ laŋiirik baŋɛ, nɔ kurak, wɔɔra waawanoŋk.' 10Nɛɓa ijaager gɛɛnɛ ŋaartar gopana, nɛ tolɛrk joop sigɛ laŋirk baŋɛ sigɛ mentaanak a sigɛ ŋɛɛwɛk, nɛ enyɛɛrar gode sinɛ bakaanyŋɔŋk waawanoŋk konanɛ.
11"Saaɓa guugunyɗu suumi sinɛ kɛnɔ dɛnɛ konan sigɛkɔ wɔɔrɛɛkik, nɛ dɛnɛ iɗit a omoŋ sinɔ kiiɗɛ abii waawanoŋk, 12nɛ tongeeɗ kɛ, 'Tekaan naakɛ, oolun a guugunykun seena mane kɛɛ abii waawanoŋk ɛk?' Nɛɓa kɛɛ any sinɔ jumur iɗit sinɛk. 13Nɛɓa suumi sinɛ tonu ijaageera gɛɛna kɛ, 'In korkoɗɛɛ arin gɛɛŋk a derak gɛɛŋk, nɔ boŋiirɛɛ nɔ oriirɛɛ nyuugura sinaana ar walasik. Lakɛkɔɔ saadi duri a ɗama ŋedakoŋk.' 14Ɓɔɔka joop sigɛkan riyɛɛkiŋ mayakana teker joop sigɛkan daamɛɛ sɛɛgkiŋ."
Kɔɔniyar Joop Paarisik Yeesee Agut Koyi Gibiriyoŋk
(Mar. 12:13-17; Luk. 20:20-26)
15Saadi baŋiya ŋaararɓa joop Paarisik, nɛ kaar waasiɗiigeeɗ gopan sinɔ kaŋirɗi Yeesee waasiyɛɛkɛ gɛɛnɛkik. 16Wosɛyɛrɓa nomtaanak gɛŋk a joop Herodisik agut omoŋ son lak Yeeseek nɛ tonurgeeɗ kɛ, "Rɔɔriytaano, ɗegerii kɛ iin eekerkan a rɔɔriyaakin gopɛ Waakoyotoŋk eekeerɛ. Kɛɛ any sinɔ ijaagin a ɓuriikin a lagiɗin keenyk. Mermenin joop baŋɛ a koɓi omoŋ. 17Gayi a jikon ton tina, pɛgɛdɛ higii nɔ koyɛ gibiri Keesaaraaŋ maŋk ki pɛgɛdɛɛt?"
18Nɛɓa Yeese ɗeger koɓi nɛŋk sinɔ ŋɛɛwɛnŋɔŋk nɛ tonu sɛɛga kɛ, "Iinak joop sigɔ gayar joop sigɔ mentaanaŋɔŋkuk, oolɛɛr a kaŋiirti waasiyɛɛkɛ ɛk? 19Inta yaaŋɛɛ wori sinɛ koyɛ a gibirik." Nɛɓa sɛɛk yaaŋɛrgeeɗ wori nɛɛk. 20Nɛɓa sɛŋk tonu sɛɛga kɛ, "Ege sini dɛnɛɛ worii sineene raŋk tipi wook? Ma sigɛɓa taapɛɛk tiriya wook?"
21Nɛɓa sɛɛk tonurgeeɗ kɛ, "Keesaarik." Tonuɓa sɛɛga Yeese kɛ, "Sisɔ in gaɓɛɛ Keesaarik Keesaara, ma Waakoyotoŋk Waakoyota."
22Saaɓa tiyɛrɗi sinik nɛɓa reemɗi ɓayɛtun gɛŋk nɛ ŋɔɗar nɛ ŋaararŋ.
Palamɗi Joop Saaduukuk A Yeesee Agut ŋaarin Ret Walasak
(Mar. 12:18-27; Luk. 20:27-40)
23Joop Saaduukuk a omoŋ omoŋ sigɛ ŋaadir kɛ kɛɛ iɗit sinɔkoy ŋaarki ret walasak, ɓeny sinaanɛɓak widerkiɓa ɛɛk son lak Yeeseek nɛ kɔɔniyar kɛ, 24"Rɔɔriytaano, tonuɓa Muuse kɛ, 'Ɔkɔn rɛr iɗit omaay makan kiigeeɗ ɓartɛɛt jarti nɛɛkɛ tɔɔnuŋ, nɛ in boŋu manya jarti iɗit sinɛkɔ rɛrkik nɔ tuuke komoy nɛɛk.' 25Lakɛɓa masiikeenak a tula pɛɛy sooy lak eteŋkik nɛɓa sinɛ tuktank boŋu jarti nɛ rɛr makan kiigeeɗ ɓartɛɛt tɔɔn jarti nɛɛkɛ, nɛ manya boŋu jarti nɛɛk. 26Nɛɓɔrɛ pɛɛyeen nɛɛk a jiiteen nɛɛk nɔ mɛlɛɛɗa tula pɛɛya nɛɛka boŋur jarti sinɛ momogunɛɛkɛ nɛ rɛrarŋ. 27Nɛ sɛɛge baŋɛ baŋiya rɛr jarti sinɛŋ. 28Nɛ agut sinɔɓa boŋurɗu sɛɛg baŋɛk waawuy sinaanɛkoy ŋaarkiɗɛɛ ret walasak joope sigaagɛ tula pɛɛyk jartikoy wook?"
29Nɛɓa jumur sɛɛga Yeese kɛ, "Babadariŋ agut sinɔ kirɗɔ ɗegerɔɔn Wargatɛ Waakoyotoŋk a ɓaŋkawuka Waakoyotoŋkuk. 30Ŋaarin ret walasak baŋiya ɓɛɛlɛrkoy joop oko wosɛytaanak Waakoyotoŋk dariyoŋk, makoy kir boboŋɗiit ɛkoy kir wawaw. 31Kiirɓa ambabɛɛt sinɛɓa tonu kɔna Waakoyot agut ŋaarin ret walasak kɛ, 32'Eet Waakoyo Abrahamuk, Waakoyo Isiyaakik, Waakoyo Yaykoobuk. Ege Waakoyot Waakoyo bɔdtaanakoŋk, ma moko reteeroŋk."
33Saaɓa joop sigɛ ɓɔɔkaak tiyɛrɗi sinik, nɛɓa reemɗi ɓayɛtun gɛŋk rɔɔriyɔɔn nɛɛkɛŋ.
Sekiyɛ Sigɛ Kaalɗi Baŋɛk
(Mar. 12:28-34; Luk. 10:25-28)
34Tiyɛrɓa joop Paarisik kɛ arikɔnɔ Yeese joop Saaduukuk a dakɛr kɛ many, nɛɓa tolɗi agut omoŋ. 35Nɛɓa sɛɛge iɗit sinɔ ɗeger higi Muuseek a omoŋ, ɗɛyɛ Yeesee paariita nɛ kɔɔniy kɛ, 36"Rɔɔriytaano, higii baŋɛ sekiyɛ sigɛ kaalɗiik won?"
37Nɛɓa sɛŋk tongeeɗ kɛ, "Poru Waakoyo Suumi nook ɓayɛ nook baŋɛ, wɛɛŋa gooŋk baŋɛ, koɓi nook baŋɛ. 38Ege sigi sekiyɛ sigɛ kaalɗi baŋɛk a sinɛ tuktan nɛɛkik. 39Pɛɛyeen nɛɛk gayi a sini, sɛɛn sinɔ tonu kɛ, 'Poru iɗit sinɛ beeɗiir jɔkikentik oko sinɛ poriiɗin ɛɛk nookuk.' 40Higi Muuseek a rɔɔriyɔn joop pɛrkaakoŋkuk baŋɛ, ɛtɛrɗi sekiyɛ sigi pɛɛyk."
Kɔɔniy Yeese Joop Paarisik
(Mar. 12:35-37; Luk. 20:41-44)
41Saaɓa joop Paarisik atukuɗ tolɛɛɗik, nɛɓa Yeese kɔɔniy sɛɛg kɛ, 42"Toniir ɛk agut Keresee? Gayi kɔna a tɔɔn wook?"
Nɛɓa sɛɛk jumurargeeɗ kɛ, "Tɔɔn Daawitik."
43Nɛɓa Yeese tonu sɛɛga kɛ, "Anɛ Daawit riy kɛ Suumi naakɛ ɓaŋkawukaat Wɛɛŋa sigɔ Geetitaanakik agut jikon? Agut sinɔ tongeeɗ kɛ,
44" 'Tonuɓa Waakoyot Suumiya naaka kɛ,
"Beeɗi ɗiɗikakɛ gaanɛk,
nɔ mɛlɛɛɗa nɔkoyna ariiɗa gumaakeer gooŋk ana ɛtɛr korontunɛ derakɛ goonɛ goyse ɗeekik.' "
45Ɔkɔn riy Daawit kɛ Suumiŋ, anɛ Keresee dakɛ a tɔɔn nɛɛk ɛk?"
46Kɛɛɓa iɗit sinɔ oolɛ a jumurgeeɗ any sinɔ omoŋɔŋkuk, maŋk a tukiɗi saaɓak kɛɛ iɗit sinɔ paari kɔɔniyɔɔnak.
Currently Selected:
Maatiyoos 22: KSTM
Highlight
Share
Copy
Want to have your highlights saved across all your devices? Sign up or sign in
