Yohanise 18

Yesuusay aykutto

Mat 26:47-56; Mrq 14:43-50; Luq 22:47-53

1Yesuusay yeydi be shidho geede be erusichoshitaara Qedroone shoore semfa bade fotti yaha mixi tofuttese godowa#18:1 mixi tofuttese godo yeydi hiyuttasi zaytey e garafa efutticho mixiti yaha tofutticho gishako. e gello. 2Yaha Yesuusaara e erusichoshitaaray laga wogga bhikkilutticho gisha Yesuusa garsi ingese hine Yuuday ye godo e ericha. 3Hinne Yuuday kahinituse afana maagitaara Farasaxitaaray anso yebitaara kaati tooraxitaara etti e yoodo. Usini kuraaze, toompe, toora miijhe yeysi be kuchiya aytesesa u maaqicha. 4Yesuusani be gara elle abako be ericho gisha usuko uddhi <<Ooni hi worge?>> hidi e oycco. 5Usini <<Nazrataxi Yesuusako nu worge>> hidi u hido. Esini <<Hay tambako>> hidi e hido. Esa aassi ingese yooda Yuuday usaara wolko ee'iya e yecha. 6Yesuusay <<Hay tambako>> hidi hido wogga sekke be geede gara shidhi sahaa u undo. 7Hatteni sekke <<Ooni hi worge?>> hidi e oycco. Usini <<Nazrataxi Yesuusako nu worge>> hidi u hido. 8Esini << <Tambako> hidi hinuse otiko ta yese. Yebo, hi worgesi taa e maaddho geede ha usita dhagguwayte, dhaddi hamuttoose>> hidi e hido. 9Yeydini hiyese e dandadhosi buro <<Taako ne indesesaafa bidzini ta garafa shahutti baado baasso>> yeydi be hidecho katoy ittoro gishako. 10Simoone sungicha Phexhroseni satatay e gara yechoyne e koofiyafa kessi kahinituse afana ade maala maaqe ade gara dendi e oshichi bade washe bursi e datto. Ye maalani Malkooseko e sungicha. 11Yesuusani Phexhrosese <<Ne satata sekke e koofiya gelsuwa. Nuwadey ta gara e yooworonike matese deexho maddha efe taa worgusuwaye?>> hidi e hido.

Yesuusay Haanna buro

12Ye e geede kaati tooraxitini u afana maagani Ayhuda yebitini Yesuusa ayti u tutto. 13Burona Haannako u aando. Haannay ye bera kahinituse afana ade maaqe Qayaafa machiyadeko e maaqicha. 14Ye Qayaafako buro <<Bidzi axi laga gisha hay'esi bisheshako>> yeydi Ayhuda afana maagituse be maxo zeerdechashi.

Phexhrosey zaaddosa

Mat 26:69-70; Mrq 14:66-68; Luq 22:55-57

15Simoone Phexhrosiyara Yesuusay erusicho bidzi fedesaaray Yesuusa geede u aadho. Ye feday kahinituse afana adiyara wola eresa be maaqicho gisha Yesuusaara wolko kahinituse afana ade qeyshi gidda e gello. 16Phexhrosemay wudena qeyshi gasa geede ee'iya e yecha. Ye eruttesesi sumaa kakkichanniyo hanke maaddhi zeerussi Phexhrosey geloronike e mato. 17Sumaa kakkichanni Phexhrose <<Neni ha axi erusichoshitaafa bidzo maaquwannuwa?>> hidi i oycco.

Phexhroseni <<Oo'o, tani usaafa maaquwasso>> hidi e aacunto.

18Yenniya toyyay toyyicho gisha maalitaara yebitaaray tama eessi eedhi u kashicha. Phexhroseni usaara wolko eedhi kashiya e yecha.

Yesuusay Kahinituse afana ade buro

Mat 26:59-66; Mrq 14:55-64; Luq 22:66-71

19Yenniyani kahinituse afana adey Yesuusa esaara yeseesiti gishaara erusiya e yese era gishaara e oycco. 20Yesuusani <<Uddi axi buro tiddhiyanna otiko ta yese. Ayhudaxiti bhikkilutte godo ye esini u Bhikkilo Zawittaani maaqqe Wonto Hayla Zawaani uddi wogga uso erusiko ta yecha, aachiyaanna bidzoni ta erussoy baasso. 21Hinne abasuwa tamba ne oyce? Usuko ta zeerusune siidasita oycuwa. Ta zeerdo zeere usi erako u ere>> hidi e hido.

22Yesuusay yeydi zeerdo geede yaha ee'iya yecha yebitaafa bidzi <<Kahinituse afana adesuwa yeysi sekke ne mahaane?>> yeydi hissine e anqaa e badho.

23Yesuusani <<Iita ta zeerdesso <Ha esako iita ne zeerdo> hidi hiwwa. Modhe ta zeerdesso hinne ame ta anqaa ne baqe?>> hidi e hido.

24Ye e geede Haannay Yesuusay tufutti yesenikewo kahinituse afana ade maaqe Qayaafako e anso.

Phexhrosey assiwo zaaddosa

Mat 26:71-75; Mrq 14:69-72; Luq 22:58-62

25Yenniya Simoone Phexhrosey eedhi tamaa e kashicha. Fede axitini <<Neni ha esaara yechashe maaquwannu?>> hidi u oycco. Esini <<Oo'o, tani esaara yechashe maaquwasso>> hidi e aacunto. 26Phexhrosey e washe bursechoshi igina maaqe kahinituse afana ade maalitaafa bidzi <<Mixiti tofutte godowa esaara wolko ne yesune niya beedo baanbuwa?>> hidi e hido. 27Phexhroseni sekke assi burokewo aacunto. Yenniyaka lukkali ollo.

Yesuusay Philaxhose buro

Mat 27:1-2,11-14; Mrq 15:1-5; Luq 23:1-5

28Ayhudaxiti Qayaafasofa Yesuusa etti Rooma afana maagaso qeyshi giddaa u hando. Yenniyani sahay haga wontecha. Ayhudaxitini Garo Massalaaka miyese be hicho gisha <<Tuneydofunxhi!>> hidi ye maaga qeyshi giddaa gele u inxhadho. 29Hinne Philaxhosey usuko wude kessi <<Ha axi gara hi uquse luufoy am e maaqicha?>> hidi e oycco.

30Usini <<Ha axi iita hante dheeddako ayti ne buro uqusuwadiko nu yecha>> hidi u hido. 31Philaxhoseni <<Hinuni hinuse etti handi hi wogake e gara yaa'uwayte!>> hidi hido.

Ayhudaxitini afana maagitini <<Nunimay oone garani e hay'oronike nu yaa'uwannike tucuttiko nu yese>> hidi u hido. 32Yeydini e maaddhosi Yesuusay waanidi be hay'enike zeerdecho katoy aaloronikeko.

33Philaxhosey sekke maaddhi qeyshi giddaa gelli Yesuusa hanke beeko xheydi <<Neni Ayhuda kaatuwa?>> hidi e oycco. 34Esini <<Nemba ha esa neekofa taa oyceshani axuwara ta gisha neeko ota?>> hidi e hido.

35Philaxhoseni <<Hinne tani Ayhudaxuwa? Nemba taako garsi indasi ne Ayhudaxitaara kahinituse afana maagitaarako. Am ne hantecha?>> hidi e oycco. 36Yesuusani sekke esuse <<Ta kaatetey ha saha kaatete maaquwasso, ha saha kaatete e maaddhakoma Ayhudaxiti tamba aykuwannikeko ta yebiti usaara darguttaane. Hattema ta kaatetey ha sahase maaquwasso>> hidi e hido.

37Philaxhoseni <<Hinne neni kaatu?>> hidi e hido. Esini <<Tani kaate maaqenike ne zeerdosi aadeko. Ta yeluttosaara ha saha gara ta yoodosaaray aadey aba maaqenike ohesuko. Aade eeheesiti uddiko ta ohesa u siine>> yeydi e hido.

38Philaxhoseni <<Aadey am?>> hidi e oycco. Ye e geede assiwo Ayhudaxituko kessi <<E gara bidzoni bayso degesso baasso. 39Bidzi tufaxe hi Garo Massalaanna hinuse ta birchichonike lossiko hi yecha. Ha e gisha ha Ayhuda kaate birshi ta daforosa eeha hi eehe?>> hidi e oycco. 40Usini be kato keddaysi <<Oo'o, oo'o! Esa maaquwasso, Barbaane birchuwa!>> hidi u hido. Barbaaney fuuloko e maaqicha.

Currently Selected:

Yohanise 18: KilleC

Highlight

Copy