ራእዩ ለዮሐንስ 8

ምዕራፍ 8

በእንተ መልአክ ዘነሥአ ማዕጠንተ ወርቅ

1 # ዘካ. 2፥13፤ ዕን. 2፥20። ወሶበ ፈትሐ ሳብዐ ማኅተመ አርመመ ኵሉ ዘበሰማይ ወዘበምድር እስከ መንፈቀ ሰዓት። 2#ማቴ. 24፥31። ወእምዝ ርኢኩ ሰብዓተ መላእክተ እለ ይቀውሙ ቅድመ እግዚአብሔር ወወሀብዎሙ ለእልክቱ መላእክት ሰብዓተ መጣቅዕተ። 3#5፥8። ወመጽአ ካልእ መልአክ ወቆመ ቅድመ ምሥዋዕ ወያጸንዕ ማዕጠንተ ወርቅ ወወሀብዎ ብዙኀ ዕጣናተ ከመ የሀብ ለጸሎተ ኵሎሙ ቅዱሳን በዲበ ምሥዋዕ ዘወርቅ ዘቅድመ መንበሩ። 4#ዘሌ. 16፥12፤ መዝ. 140፥2። ወዐርገ ጢሱ ለውእቱ ዕጣን ምስለ ጸሎቶሙ ለቅዱሳን እምውስተ እዴሁ ለውእቱ መልአክ ቅድመ እግዚአብሔር። 5#ሕዝ. 10፥2። ወነሥአ ውእቱ መልአክ ማዕጠንተ እምኀበ እሳት ዘምሥዋዕ ወአውረደ ውስተ ምድር ወሶበ አውረደ ውስተ ምድር ኮነ ነጐድጓድ ወፀዓዕ ወመብረቅ ወድልቅልቅ። 6ወእልክቱኒ ሰብዐቱ መላእክት እለ ያጸንዑ ሰብዐተ መጣቅዕተ ተደለዉ ከመ ይጥቅዑ ቦሙ። 7#ዘፀ. 9፥23። ወሶበ ጠቅዐ ቀዳማዊ መልአክ ኮነ በረድ ወእሳት ምስለ ደም ድሙር ወወረደ ውስተ ምድር ወውዕየ ሣልስተ እዴሃ ለምድር ወውዕዩ ኵሉ ዕፅ ወሣዕር ወሐመልማል። 8#ኤር. 51፥25፤ ዘፀ. 6፥20-21። ወሶበ ጠቅዐ ካልእ መልአክ ወረደ ውስተ ባሕር እሳት ዐቢይ ዘመጠነ ደብር እንዘ ይነድድ ወኮነ ደመ ሣልስተ እዴሃ ለባሕር። 9#ዘፀ. 7፥19-21። ወሞተ ሣልስተ እዴሁ ለዘሀሎ ውስተ ባሕር ዘተፈጥረ ዘቦ መንፈሰ ሕይወት ወሣልስተ እዴሆን ለአሕማር ማሰና። 10#ኢሳ. 14፥12፤ ዳን. 8፥10፤ ኤር. 9፥15። ወሶበ ጠቅዐ ሣልስ መልአክ ወረደ እምሰማይ ኮከብ ዐቢይ እንዘ ይነድድ ከመ እሳት ወወረደ ውስተ ሣልስተ እዴሆሙ ለአፍላግ ወለአንቅዕተ ማያት። 11ወስሙ ለውእቱ ኮከብ ዕጉሥታር ወኮነ ዕጉሥታረ ሣልስተ እዴሆሙ ለማያት ምስለ ዐውሎ ወብዙኅ ሰብእ ዘሞተ እምነ ምረሮሙ ለማያት። 12#6፥12፤ ዘፀ. 10፥21። ወሶበ ጠቅዐ ራብዕ መልአክ ተቀሥፈት ፀሓይ ወጸልመ ሣልስተ እዴሃ ወሣልስተ እዴሃ ለወርኅ ወሣልስተ እዴሆሙ ለከዋክብት ከመ ኢያብርሁ ወሣልስተ እዴሆሙ ለዕለት ወለሌሊት። 13#14፥6፤ 9፥12፤ 11፥14። ወሰማዕኩ አሐዱ ንስር ይሠርር ማእከለ ሰማይ ወምድር ወይብል በዐቢይ ቃል አሌ ሎሙ አሌ ሎሙ ለእለ ይነብሩ ዲበ ምድር እምነ ዘተርፈ ቃለ መጥቅዖሙ ለሠለስቱ መላእክት እለ ሀለዎሙ ይጥቅዑ።

Currently Selected:

ራእዩ ለዮሐንስ 8: ሐኪግ

Highlight

Copy