ራእዩ ለዮሐንስ 4

ምዕራፍ 4

በእንተ መንበር ወአርባዕቱ እንስሳ

1 # 1፥10። ወእምድኅረ ዝንቱ ርኢኩ ኆኅተ ርኁተ ውስተ ሰማይ ወቀዳማየ ቃለ ሰማዕኩ ከመ ቃለ መጥቅዕ ይትናገር ምስሌየ ወይቤለኒ ዕርግ ዝየ ወአነ አርእየከ ዘሀለወ ይኩን እምድኅረ ዝንቱ። 2#ሕዝ. 1፥26፤ ኢሳ. 6፥1። ወበጊዜሃ ኮንኩ በመንፈስ ወናሁ ርኢኩ#ቦ ዘኢይጽሕፍ «ርኢኩ» መንበር ውስተ ሰማይ ይንበር። 3ወዘዲቤሁ ይነብር ይመስል ኅብሩ ከመ ዕንቈ ኢያሰጲድ ወሰርዲኖ ወካህናት እለ ዐውዱ ለውእቱ መንበር ይመስል ኅብሮሙ ከመ መረግድ። 4#ኢሳ. 24፥23። ወበዐውዱ ለውእቱ መንበር ዕሥራ ወአርባዕቱ መናብርት ወዲበ ውእቶን መናብርት ይነብሩ ዕሥራ ወአርባዕቱ ሊቃናት ወይለብሱ ጸዓድወ አልባሰ ወዲበ አርእስቲሆሙ አክሊላት ዘወርቅ። 5#8፥5፤ 11፥19፤ 16፥18፤ ዘካ. 4፥2። ወእምነ ውእቱ መንበር ይወፅእ መብረቅ ወፀዓዕ ወነጐድጓድ ወቅድሜሁ ለውእቱ መንበር የኀትዉ ሰብዑ መኃትው ዘውእቱ መንፈስ ቅዱስ ዘእግዚአብሔር። 6#ሕዝ. 1፥5። ወቅድሜሁ ለውእቱ መንበር ባሕር ከመ እንተ በረድ ወእምገበዋቲሁ ለውእቱ መንበር አርባዕቱ እንስሳሁ ወምሉኣን እሙንቱ አዕይንተ እምቅድም ወእምድኅር። 7#ሕዝ. 1፥10፤ 10፥14። ወቀዳማዊ ይመስል ከመ አንበሳ ወካልኡ ይመስል ከመ ላሕም ወሣልሱ ይመስል ከመ ገጸ ዕጓለ እመሕያው ወራብዑ ይመስል ከመ ንስር ዘይሠርር። 8#ኢሳ. 6፥3። ወለእሉ አርባዕቱ እንስሳሁ ለለአሐዱ አሐዱ እምኔሆሙ በበስድስቱ ክነፊሆሙ ወእንተ ኵለንታሆሙ ምሉኣን እሙንቱ አዕይንተ ወአልቦሙ ዕረፍት መዐልተ ወሌሊተ እንዘ ይብሉ ቅዱስ ቅዱስ ቅዱስ እግዚአብሔር አምላከ አማልክት ዘሀሎ ወይሄሉ። 9#ዳን. 4፥34። ወሶበ ከመዝ ይብሉ እልክቱ እንስሳሁ ወይሁቡ ስብሐተ ወክብረ ወአኰቴተ ለዝክቱ ዘይነብር ዲበ መንበር ዘሕያው ለዓለመ ዓለም። 10#5፥14። ወይሰግዱ ሎቱ ቅድሜሁ ለዝክቱ ዘይነብር ዲበ መንበር እልክቱ ዕሥራ ወአርባዕቱ ሊቃናት ለዝክቱ ዘሕያው ለዓለመ ዓለም ወያወርዱ#ቦ ዘይቤ «ወይወስዱ» አክሊላቲሆሙ ቅድመ መንበሩ። 11#5፥9፤ 10፥6፤ 7፥10-12፤ 11፥17፤ 15፥3-4፤ ዘፍ. 1፥1። ወይብልዎ ለከ ይደሉ እግዚኦ አምላክነ ስብሐት ወክብር ወኀይል እስመ አንተ ፈጠርከ ኵሎ ወበፈቃደ ዚኣከ ይሄሉ ኵሉ ዘተፈጥረ።

Currently Selected:

ራእዩ ለዮሐንስ 4: ሐኪግ

Highlight

Copy