ራእዩ ለዮሐንስ 10

ምዕራፍ 10

በእንተ መልአክ አኃዜ መጽሐፍ

1 # 5፥2። ወእምዝ ወረደ ካልእ መልአክ ዐቢይ እምሰማይ ወይትዐጸፍ ደመና ውስተ ርእሱ ወብሩህ ገጹ ከመ ፀሓይ ወእገሪሁ ከመ አዕማደ እሳት። 2ወውስተ እዴሁ ያጸንዕ መጽሐፈ ክሥተ ወኬደ በእግሩ እንተ የማን ውስተ ባሕር ወእንተ ፀጋም ላዕለ ምድር። 3#ኤር. 25፥30፤ ሆሴ. 11፥10። ወጸርሐ በቃል ዐቢይ ከመ አንበሳ ዘይጥሕር ወሶበ ጸርሐ ተናገሩ ሰብዐቱ ነጐድጓድ በበ ቃላቲሆሙ በበይነ ዘሀለዎ ይጸሐፍ። 4#ዳን. 8፥26። ወሰማዕኩ ቃለ ዘይቤሉ ሰብዐቱ ነጐድጓድ ወፈቀድኩ እጽሐፎ ወእምዝ መጽአ ቃል እምሰማይ ዘይብል ኅትም ዘነበቡ ሰብዐቱ ነጐድጓድ ወኢትጽሐፍ። 5#ዘፍ. 14፥22። ወውእቱሰ መልአክ ዘርኢኩ ዘኬደ ውስተ ባሕር ወውስተ ምድር አልዐለ እዴሁ እንተ የማን ውስተ ሰማይ። 6#ዳን. 12፥7፤ መዝ. 145፥5፤ ነህ. 9፥6። ወመሐለ በዘሕያው ለዓለመ ዓለም ዘፈጠረ ሰማየ ወኵሎ ዘውስቴቱ ወምድረ ወኵሎ ዘውስቴታ ወባሕረ ወኵሎ ዘውስቴቱ ወአልቦ እንከ መዋዕል። 7#11፥15። ዘእንበለ መዋዕለ ቃሉ ለሳብዕ መልአክ ዘሀለዎ ይጥቃዕ ወቦቱ የኀልቅ ምስጢሩ ለእግዚአብሔር ዘአሰፈዎሙ ለአግብርቲሁ ወለነቢያቲሁ። 8ወውእቱ ቃል ዘሰማዕኩ እምሰማይ ተናገረ ካዕበ ምስሌየ ወይቤለኒ ሑር ንሥኣ ለእንታክቲ መጽሐፍ ክሥት እንተ ውስተ እዴሁ ለዝክቱ መልአክ ዘኬደ ውስተ ባሕር ወውስተ ምድር። 9#ሕዝ. 3፥1-3። ወሖርኩ ኀበ ውእቱ መልአክ ወእቤሎ ከመ የሀበንያ ለይእቲ መጽሐፍ ወይቤለኒ ንሥኣ ወብልዓ ወለትምረራ ለከርሥከ ወበውስተ አፉከሰ ጥምዕተ ለትኩንከ ከመ መዓር። 10ወነሣእክዋ ለይእቲ መጽሐፍ እምነ እዴሁ ለውእቱ መልአክ ወበላዕክዋ ወኮነተኒ ጥዕምተ በውስተ አፉየ ወሶበ ውኅጥክዋ አምረረታ ለከርሥየ። 11ወይቤለኒ ሀለወከ ካዕበ ትትነበይ ለአሕዛብ ወለሕዝብ ወለበሐውርት ወለነገሥት ብዙኃን።

Currently Selected:

ራእዩ ለዮሐንስ 10: ሐኪግ

Highlight

Copy