ወንጌል ዘማቴዎስ 8
8
ምዕራፍ 8
ዘከመ አንጽሖ እግዚእ ኢየሱስ ለዘለምጽ
1ወእንዘ ይወርድ እምደብር ተለውዎ ሰብእ ብዙኃን። 2#ማር. 1፥40-44፤ ሉቃ. 5፥12-14። ወናሁ መጽአ አሐዱ ብእሲ ዘለምጽ ወቀርበ ኀቤሁ ወሰገደ ሎቱ እንዘ ይብል እግዚኦ እመሰ ፈቀድከ ትክል አንጽሖትየ። 3ወሰፍሐ እዴሁ ወገሠሦ ወይቤሎ እፈቅድ ንጻሕ ወነጽሐ እምለምጹ በጊዜሃ። 4#9፥30፤ ማር. 7፥36፤ ዘሌ. 14፥2። ወይቤሎ እግዚእ ኢየሱስ ዑቅ ኢትንግር ወኢለመኑሂ ወባሕቱ ሑር ወአፍትን ርእሰከ ለካህን ወአብእ መባአከ በእንተ ዘነጻሕከ በከመ አዘዘ ሙሴ ከመ ይኩን ስምዐ ላዕሌሆሙ።
ዘከመ ፈወሶ እግዚእ ኢየሱስ ለወልደ መስፍን
5 #
ሉቃ. 7፥1-10። ወበዊኦ ቅፍርናሆም መጽአ ኀቤሁ መስፍነ ምእት። 6ወይቤሎ እግዚኦ ብቍዐኒ ድዉይ ወልድየ ወይሰክብ ውስተ ቤት ወመፃጕዕ ወጥቀ ጽዑር። 7ወይቤሎ እግዚእ ኢየሱስ ነየ እመጽእ አነ ወእፌውሶ። 8ወአውሥአ ሐቤ ምእት ወይቤ እግዚኦ ኢይደልወኒ ከመ አንተ ትባእ ታሕተ ጠፈረ ቤትየ ዳእሙ አዝዝ በቃልከ ወየሐዩ ወልድየ። 9እስመ አነሂ ብእሲ መኰንን አነ ወብየ ሐራ ዘእኴንን ወእብሎ ለዝ ሑር ወየሐውር ወለካልኡኒ ነዓ ወይመጽእ ወለገብርየኒ ግበር ከመዝ ወይገብር። 10#15፥28። ወሰሚዖ እግዚእ ኢየሱስ አንከረ ወተመዪጦ#ቦ ዘኢይጽሕፍ «ወተመዪጦ» ይቤሎሙ ለእለ ይተልውዎ አማን እብለክሙ ኢረከብኩ ከመዝ ዘየአምን በውስተ ኵሉ እስራኤል። 11#ኢሳ. 49፥12። ወባሕቱ እብለክሙ ብዙኃን ይመጽኡ እምሥራቅ ወእምዕራብ ወይረፍቁ ውስተ ሕፅነ አብርሃም ይስሐቅ ወያዕቆብ በመንግሥተ ሰማያት። 12#22፥13፤ 24፥51፤ 25፥30፤ ሉቃ. 12፥28-29። ወለውሉደ መንግሥትሰ ያወፅእዎሙ ውስተ ጸናፌ ጽልመት ኀበ ሀሎ ብካይ ወሐቅየ ስነን። 13#ዮሐ. 4፥47-54። ወይቤሎ እግዚእ ኢየሱስ ለውእቱ ሐቤ ምእት ሑርኬ ወበከመ ተአመንከ ይኩንከ ወሐይወ ወልዱ በይእቲ ሰዓት ወገቢኦ መስፍን ውስተ ቤቱ ረከቦ ለቍልዔሁ ሐዪዎ።
በእንተ ሐማተ ጴጥሮስ
14 #
ማር. 1፥29-32፤ ሉቃ. 4፥38-40። ወበዊኦ እግዚእ ኢየሱስ ቤቶ ለጴጥሮስ ረከባ ለሐማተ ጴጥሮስ እንዘ ትሰክብ ወትፈፅን። 15ወገሠሣ ወአኀዛ እዴሃ ወኀደጋ ፈፀንታ ወተንሥአት ወተልእከቶሙ።
በእንተ እለ ሐይዉ እምብዙኅ ደዌ
16ወምሴተ ከዊኖ አምጽኡ ኀቤሁ ብዙኃነ እለ አጋንንት ወአውፅኦሙ ለመናፍስት በቃሉ ወፈወሰ ኵሎ ድዉያነ። 17#ኢሳ. 53፥4። ከመ ይትፈጸም ቃለ ኢሳይያስ ነቢይ ዘይቤ «ውእቱ ነሥአ ደዌነ ወጾረ ሕማመነ።» 18ወሶበ ርእየ እግዚእ ኢየሱስ ብዙኃነ ሰብአ ዘተለውዎ አዘዘ ከመ ይሑሩ ማዕዶተ ባሕር።
በእንተ እለ ተስእልዎ ከመ ይትልውዎ
19 #
ሉቃ. 9፥57። ወመጽአ ኀቤሁ አሐዱ ጸሓፊ ወይቤሎ ሊቅ እትሉከኑ ኀበ ሖርከ። 20#ሉቃ. 9፥58፤ 2ቆሮ. 8፥9። ወይቤሎ እግዚእ ኢየሱስ ለቈናጽልኒ ግበብ ቦሙ ወለአዕዋፈ ሰማይኒ ምጽላል ቦሙ ወለወልደ ዕጓለ እመሕያውሰ አልቦቱ ኀበ ያሰምክ ርእሶ። 21#1ነገ. 19፥20። ወይቤሎ ካልእ እምአርዳኢሁ እግዚኦ አብሐኒ ቅድመ እሑር ወእቅብሮ ለአቡየ። 22#1ጢሞ. 5፥6። ወይቤሎ እግዚእ ኢየሱስ አንተሰ ትልወኒ ወኅድጎሙ ለምዉታን ይቅብሩ ምዉታኒሆሙ።
ዘከመ ገሠጸ ባሕረ
23ወዐሪጎ ውስተ ሐመር ተለውዎ አርዳኢሁ። 24#ማር. 4፥38-41። ወናሁ ዐቢይ ድልቅልቅ ኮነ በውስተ ባሕር እስከ ሶበ ይደፍኖ ለሐመር ማዕበለ ባሕር ወውእቱሰ ይነውም። 25#14፥30። ወቀርቡ አርዳኢሁ ወአንቅህዎ ወይቤልዎ እግዚኦ አድኅነነ ከመ ኢንሙት። 26#17፥19-20። ወይቤሎሙ ምንት ያፈርሀክሙ አንትሙ ሕጹጻነ ሃይማኖት ወተንሢኦ ገሠጾሙ ለነፋሳትኒ ወለማዕበለ ባሕር ወኮነ ዐቢይ ዛኅን። 27#መዝ. 64፥7፤ 106፥25-30። ወአንከሩ ሰብእ ወይቤሉ መኑ እንጋ ውእቱ ዝንቱ ዘይትኤዘዙ ሎቱ ባሕርኒ ወነፋሳትኒ።
በእንተ እለ አጋንንት
28 #
ማር. 5፥1-17። ወበጺሖ ማዕዶተ ብሔረ ጌርጌሴኖን ተቀበልዎ ክልኤቱ እለ አጋንንት ወፂኦሙ እመቃብራት ወእኩያን ጥቀ እሙንቱ ወኢያበውሑ መኑሂ ይኅልፍ እንተ ይእቲ ፍኖት። 29#ሉቃ. 4፥41፤ 2ጴጥ. 2፥4። ወሶበ ርእይዎ ጸርሑ እንዘ ይብሉ ምንት ብነ ምስሌከ ኢየሱስ ወልደ እግዚአብሔር ሕያው#ቦ ዘኢይጽሕፍ «ሕያው» መጻእከኑ ዝየሂ ትስድደነ ወትሣቅየነ ዘእንበለ ይብጻሕ ጊዜሁ። 30#ዘሌ. 11፥7። ወቦ ህየ መራዕየ አሕርው ብዙኅ ይትረዐዩ ርኁቀ እምኔሆሙ። 31#ማር. 5፥9-13። ወአስተብቍዕዎ እሙንቱ አጋንንት ወይቤልዎ እመሰ ታወፅአነ ፈንወነ ከመ ንባእ ዲበ መራዕየ አሕርው። 32ወይቤሎሙ ሑሩ ወወፂኦሙ ሖሩ ወቦኡ ውስተ አሕርው ወአብዱ#ቦ ዘኢይጽሕፍ «ወአብዱ» ኵሉ መራዕየ አሕርው ወሮጹ ወጸድፉ ውስተ ባሕር ወሞቱ ውስተ ማይ። 33ወጐዩ ኖሎት ወአተዉ ሀገረ ወዜነዉ ለሰብእ ኵሎ ዘኮነ ወበእንተ እለ አጋንንትሂ።#ቦ ዘኢይጽሕፍ «ወበእንተ እለ አጋንንትሂ» 34#ኢዮብ 21፥14፤ ግብረ ሐዋ. 16፥39። ወናሁ ወፅኡ ኵሉ እለ ውስተ ሀገር ይትቀበልዎ ለእግዚእ ኢየሱስ ወሶበ ርእይዎ አስተብቍዕዎ ይኅልፍ እምደወሎሙ።
Currently Selected:
ወንጌል ዘማቴዎስ 8: ሐኪግ
Highlight
Share
Copy
Want to have your highlights saved across all your devices? Sign up or sign in
