ወንጌል ዘሉቃስ 6

ምዕራፍ 6

በእንተ ሰንበት

1 # ዘዳ. 23፥25፤ ማቴ. 12፥1-9፤ ማር. 2፥23-28። ወእምዝ ካዕበ ወፈረ እግዚእ ኢየሱስ እንተ ገራውህ በሰንበት ወመሐዉ አርዳኢሁ ሰዊተ ወሐሰዩ በእደዊሆሙ ወበልዑ። 2#ዘፀ. 1፥9-12። ወይቤልዎሙ ፈሪሳውያን ለምንት ትገብሩ ዘኢይከውን ለገቢር በሰንበት። 3#1ሳሙ. 21፥1-7። ወአውሥአ እግዚእ ኢየሱስ ወይቤሎሙ ኢያንበብክሙኑ ዘገብረ ዳዊት አመ ርኅበ ውእቱሂ ወእለ ምስሌሁ። 4#ዘሌ. 24፥8-9። ዘከመ ቦአ ቤተ እግዚአብሔር ወነሥአ ኅብስተ ቍርባን ዘይሠርዑ ወበልዐ ውእቱኒ ወወሀቦሙ ለእለ ምስሌሁ ዘኢይከውኖሙ ለበሊዕ ዘእንበለ ለካህናት ለባሕቲቶሙ። 5ወይቤሎሙ እግዚኣ ውእቱ ለሰንበት ወልደ ዕጓለ እመሕያው።

በእንተ ዘየብሰት እዴሁ

6 # ማቴ. 12፥9-14፤ ማር. 3፥1-6። ወእምዝ በካልእት ሰንበት ቦአ ምኵራበ ወመሀሮሙ ወሀሎ ብእሲ ዘየብሰት እዴሁ እንተ የማን። 7#14፥1። ወይትዐቀብዎ ጸሐፍት ወፈሪሳውያን ለእመ ይፌውሶ በሰንበት ከመ ይርከቡ ምክንያተ በዘያስተዋድይዎ። 8#5፥22። ወውእቱሰ የአምሮሙ ዘይኄልዩ ወይቤሎ ለውእቱ ብእሲ ዘየብሰት እዴሁ ተንሥእ ወቁም ማእከለ ወተንሥአ ወቆመ። 9ወይቤሎሙ እግዚእ ኢየሱስ እሴአለክሙ ዘይከውን በሰንበት ገቢረ ሠናይኑ አው ገቢረ እከይ አሕይዎ ነፍስኑ ወሚመ ቀቲል። 10#1ነገ. 13፥6። ወአርመሙ ወነጺሮ ኀበ ኵሎሙ በመዐት ይቤሎ ለውእቱ ብእሲ ስፋሕ እዴከ ወሰፍሐ ወሐይወት እዴሁ ወኮነት ከመ ካልእታ። 11ወእሙንቱሰ የአብዱ ፈድፋደ ወተማከሩ በበይናቲሆሙ ዘከመ ይሬስይዎ ለእግዚእ ኢየሱስ።

ዘከመ ኀረዮሙ ለዐሠርቱ ወክልኤቱ ሐዋርያት

12 # ማቴ. 14፥23፤ ማር. 3፥13-19። ወእምዝ ኮነ በውእቱ መዋዕል ዐርገ እግዚእ ኢየሱስ ውስተ ደብር ይጸሊ ወያሌሊ በጸሎት ኀበ እግዚአብሔር ። 13#ማቴ. 10፥1-7። ወጸቢሖ ጸውዖሙ ለአርዳኢሁ ወኀረየ እምውስቴቶሙ ዐሠርተ ወክልኤተ ወሰመዮሙ ሐዋርያተ። 14ስምዖን ዘተሰምየ ጴጥሮስ ወእንድርያስ እኁሁ ወያዕቆብ ወዮሐንስ ወፊልጶስ ወበርተሎሜዎስ። 15ወማቴዎስ ወቶማስ ወያዕቆብ ወልደ እልፍዮስ ወስምዖን ዘይብልዎ ቀናኢ። 16#ዮሐ. 14፥22። ወይሁዳ ዘያዕቆብ ወይሁዳ አስቆሮታዊ ዘዐለዎ ወዘአግብኦ። 17#ማር. 3፥7-10። ወወረደ ምስሌሆሙ ወቆመ በገዳም ርሒብ ወብዙኃን ሰብእ እምአርዳኢሁኒ ወብዙኃን ጥቀ እምሕዝብ ዘእምኵሉ ይሁዳ ወእምኢየሩሳሌም ወእምጰራልያስ ወእምጢሮስ ወሲዶና እለ መጽኡ ይስምዕዎ ወይትፈወሱ እምደዌሆሙ። 18#ማቴ. 4፥25። ወእለሂ አጋንንት እኩያን የሐይዉ። 19ወኵሎሙ አሕዛብ ይፈቅዱ ይግሥሥዎ እስመ ኀይል ይወፅእ እምኔሁ ወያሐይዎሙ ለኵሎሙ።

በእንተ ስብከቱ በውስተ ደብር

20 # ማቴ. 5፥3-10። ወውእቱሰ አንሥአ አዕይንቲሁ ኀበ አርዳኢሁ ወይቤሎሙ ብፁዓን አንትሙ ነዳያን እስመ ለክሙ ይእቲ መንግሥተ እግዚአብሔር። 21#ራእ. 7፥16፤ መዝ. 125፥5-6፤ ኢሳ. 61፥3። ብፁዓን እለ ትርኅቡ ይእዜ እስመ ትጸግቡ ብፁዓን እለ ትበክዩ ይእዜ እስመ ትስሕቁ። 22#ዮሐ. 16፥2፤ 1ጴጥ. 4፥14። ብፁዓን አንትሙ ሶበ ይጸልኡክሙ ሰብእ ወይፈልጡክሙ ወይሰድዱክሙ ወይጼእሉክሙ ወያወፅኡ ለክሙ ስመ እኩየ በእንተ ወልደ ዕጓለ እመሕያው። 23#2ዜና መዋ. 36፥13፤ ማቴ. 23፥34፤ ግብረ ሐዋ. 7፥52። ተፈሥሑ ወተሐሠዩ ይእተ አሚረ ወአንፈርዕጹ እስመ ብዙኅ ዕሴትክሙ በሰማያት እስመ ከማሁ ረሰይዎሙ ለነቢያት አበዊሆሙ። 24#ያዕ. 5፥1-5። ወባሕቱ አሌ ለክሙ አብዕልት እስመ ሰለጥክሙ ትፍሥሕተክሙ። 25#ኢሳ. 5፥22፤ 65፥13፤ ያዕ. 4፥9። አሌ ለክሙ እለ ትጸግቡ ይእዜ እስመ ትርኅቡ አሌ ለክሙ እለ ትስሕቁ ይእዜ እስመ ትበክዩ ወትላሕዉ። 26#ሚክ. 2፥11። አሌ ለክሙ ሶበ ሠናየ ይብሉ ሰብእ ላዕሌክሙ ወይዌድሱክሙ እስመ ከማሁ ረሰይዎሙ ለነቢያተ ሐሰት አበዊሆሙ። 27#ዘፀ. 23፥4። ወለክሙሰ ለእለ ትሰምዑኒ እብለክሙ አፍቅሩ ጸላእተክሙ ወግበሩ ሠናየ ለእለ ይፃረሩክሙ። 28#23፥30፤ ግብረ ሐዋ. 7፥60። ወደኀርዎሙ ለእለ ይረግሙክሙ ወጸልዩ ዲበ እለ ይትዔገሉክሙ። 29ወለዘሂ ጸፍዐከ መልታሕቴከ መጥዎ ካልእታኒ ወለዘኒ ነሥአከ ልብሰከ ክዳነከሂ ኢትክልኦ። 30#ዘዳ. 15፥7-8፤ ሮሜ 12፥20። ለኵሉ ዘሰአለከ ሀብ ወለዘኒ ሄደከ ንዋየከ ኢትትኃሠሦ። 31#ማቴ. 7፥12። ወበከመ ትፈቅዱ ይግበሩ ለክሙ ሰብእ ከማሁ ግበሩ ሎሙ አንትሙኒ። 32ወእመሰ ዳእሙ ዘአፍቀረክሙ አፍቀርክሙ ምንትኑ እንከ ዕሴትክሙ ኃጥኣንሂ ዘሰ ይገብሩ ወዘያፈቅሮሙ ያፈቅሩ። 33ወእመኒ አሠነይክሙ ለእለ ያሤንዩ ለክሙ ምንትኑ እንከ ዕሴትክሙ ኃጥኣንሂ ከማሁሰ ይገብሩ። 34#ዘሌ. 25፥35-37። ወእመኒ ለቃሕክሙ እምኀበ ዘትሴፈዉ ትትፈደዩ እምኔሁ ምንትኑ እንከ ዕሴትክሙ ኃጥኣንሂ ይሌቅሕዎሙ ለኃጥኣን ከመ ይትፈደይዎሙ ዕሩየ። 35ወይእዜኒ አፍቀሩ ጸላእተክሙ ወአሠንዩ ሎሙ ወለቅሑ እንዘ ኢትሴፈዉ ትትፈደዩ ወይከውን ብዙኀ ዕሴትክሙ ወትከውኑ ውሉዶ ለልዑል እስመ ውእቱ ኄር ላዕለ ኄራን ወላዕለ እኩያን። 36#ማቴ. 5፥45። ወኩኑ መሓርያነ ከመ አቡክሙ ሰማያዊ#ቦ ዘኢይጽሕፍ «ሰማያዊ» መሓሪ ውእቱ። 37#ማቴ. 7፥1-14፤ ሮሜ 14፥9-10። ኢትኰንኑ ወኢትትኴነኑ ኢትግፍዑ ወኢይገፍዑክሙ ኅድጉ ወየኀድጉ ለክሙ። 38#ማቴ. 7፥2፤ ማር. 4፥24። ሀቡ ወይትወሀበክሙ መስፈርተ ሠናየ ንሕኑሐ ወምሉአ ወዝሕዙሐ ይሁቡክሙ ውስተ ሕፅንክሙ ወበመስፈርት ዘሰፈርክሙ ይሰፍሩ ለክሙ። 39#ማቴ. 15፥14። ወመሰለ ሎሙ ወይቤሎሙ ይክልኑ ዕዉር ለዕዉር መሪሖቶ አኮኑ ክልኤሆሙ ይወድቁ ውስተ ግብ። 40#ማቴ. 10፥24-25፤ ዮሐ. 13፥16፤ 15፥20። አልቦ ረድእ ዘየዐቢ እምሊቁ መጠኑ ለኵሉ ይኩን ከመ ሊቁ። 41#ማቴ. 6፥3። ምንተኑ ትኔጽር ሐሠረ ዘውስተ ዐይነ ቢጽከ ወኢትሬኢ ሠርዌ ዘውስተ ዐይንከ። 42ወእፎ ትክል ብሂሎቶ ለቢጽከ ተዐገሥ እኁየ አውፅእ ሐሠረ እምዐይንከ ወአንተሰ ኢትሬኢ ሠርዌ ዘውስተ ዐይንከ ኦ መደልው አውፅእ ቅድመ ሠርዌ እምዐይንከ ወእምዝ ትኔጽር ታውፅእ ሐሠረ እምዐይነ ቢጽከ። 43#ማቴ. 7፥17-18፤ 12፥33። አልቦ ዕፅ ሠናይ ዘይፈሪ ፍሬ እኩየ ወአልቦ ዕፅ እኩይ ዘይፈሪ ፍሬ ሠናየ። 44ወኵሉ ዕፅ እምፍሬሁ ይትዐወቅ ወኢየአርሩ በለሰ እም አሥዋክ ወኢይቀሥሙ አስካለ እምአሜከላ። 45#ማቴ. 12፥34-38። ኄር ብእሲ እምሠናይ መዝገበ ልቡ ያወፅኣ ለሠናይት ወእኩይሰ ብእሲ እምእኩይ መዝገበ ልቡ ያወፅኣ ለእኪት እስመ እምተረፈ ልብ ይነብብ አፍ። 46#ሚል. 1፥7፤ ማቴ. 25፥11-12። ለምንት እንከ ትብሉኒ እግዚኦ እግዚኦ ወኢትገብሩ ዘእቤለክሙ። 47ኵሉ ዘይመጽእ ኀቤየ ወይሰምዐኒ ቃልየ ወይገብሮ አርእየክሙ ዘይመስል። 48#ማቴ. 7፥24-27። ይመስል ብእሴ ጠቢበ ዘሐነጸ ቤቶ ወከረየ ወአዕመቀ ወሣረረ መሠረቶ ዲበ ኰኵሕ ወብዙኃን አፍላግ መጺኦሙ ገፍዕዎ ወኀይዝት ለውእቱ ቤት ወስእኑ አንቀልቅሎቶ እስመ ዲበ ኰኵሕ ተሣረረ። 49ወዘሰ ይሰምዐኒ ቃልየ ወኢይገብሮ ይመስል ብእሴ ዘሐነጸ ቤቶ መልዕልተ ምድር ዘእንበለ መሠረት ወገፍዕዎ ወኀይዝት ወወድቀ ሶቤሃ ወኮነ ድቀቱ ለውእቱ ቤት ዐቢየ።

Currently Selected:

ወንጌል ዘሉቃስ 6: ሐኪግ

Highlight

Copy