ግብረ ሐዋርያት 9

ምዕራፍ 9

ዘከመ ነሥአ ሳውል መጽሐፈ መባሕት

1 # 8፥3። ወሳውልሰ ዓዲሁ ይትቄየም አብያተ ክርስቲያናት ወይቀትሎሙ ለአርዳአ እግዚእነ ወሖረ ኀበ ሊቀ ካህናት። 2ወሰአለ በኀቤሁ መጽሐፈ መባሕት ለሀገረ ደማስቆ ወለመኳርብት ለእመቦ ዘይረክብ በፍኖት ዕደወ ወአንስተ ከመ ያእትዎሙ ኢየሩሳሌም ሙቁሓኒሆሙ። 3#1ቆሮ. 15፥8። ወእንዘ የሐውር ሶበ አልጸቀ ለሀገረ ደማስቆ ግብተ በረቀ መብረቅ እምሰማይ ላዕሌሁ።

ዘከመ ተጸውዐ ሳውል

4ወወድቀ ውስተ ምድር ወሰምዐ ቃለ ዘይቤሎ ሳውል ሳውል ለምንት ትሰድደኒ። 5ወይቤሎ መኑ አንተ እግዚኦ ወይቤሎ አነ ውእቱ ኢየሱስ ናዝራዊ ዘአንተ ትሰድደኒ ይብእሰከ ረጊጽ ውስተ ቀኖት በሊኅ። 6ወእንዘ ይርዕድ ይቤሎ እግዚኦ ምንተኑ ትፈቅድ እግበር አነ ወይቤሎ እግዚእ ተንሥእ ወባእ ሀገረ ወበህየ ይነግሩከ ዘይደልወከ ትግበር። 7ወሰብእሰ እለ ምስሌሁ ቆሙ ያጸምዑ ነገሮ ወአልቦ ዘይሬእዩ። 8ወተንሥአ ሳውል እምድር ወእንዘ ክሡታት አዕይንቲሁ አልቦ ዘይሬኢ ወእንዘ ይመርሕዎ አብእዎ ደማስቆ። 9ወነበረ ህየ ሠሉሰ ዕለተ እንዘ ኢይሬኢ ወኢይበልዕ ወኢይሰቲ።

በእንተ ሐናንያ

10ወሀሎ አሐዱ ብእሲ በሀገረ ደማስቆ ዘእምውስተ አርድእት ዘስሙ ሐናንያ ወአስተርአዮ እግዚእነ በራእይ ወይቤሎ ሐናንያ ወይቤ ነየ እግዚኦ። 11#21፥39። ወይቤሎ እግዚእነ ተንሥእ ወሑር ሰኰተ እንተ ይብልዋ ርትዕት ወኅሥሥ በቤተ ይሁዳ ዘስሙ ሳውል ዘሀገረ ጠርሴስ እስመ ውእቱ ናሁ ይጼሊ። 12ወእንዘ ይጼሊ ሳውል አስተርአዮ ብእሲ በአምሳለ ሐናንያ ቦአ ኀቤሁ ወወደየ እዴሁ ዲቤሁ ከመ ይርአይ። 13ወአውሥአ ሐናንያ ወይቤ እግዚኦ ሰማዕኩ በእንተ ውእቱ ብእሲ በኀበ ብዙኃን ኵሎ ዘይገብር እኩየ ዲበ ቅዱሳኒከ በኢየሩሳሌም። 14#1ቆሮ. 1፥2። ወበዝየኒ አስተበዊሖ በኀበ ሊቀ ካህናት መጽአ ከመ ይሞቅሖሙ ለኵሎሙ እለ ይጼውዑ ስመከ። 15#25፥13፤ ሮሜ 1፥5። ወይቤሎ እግዚእነ ተንሥእ ወሑር እስመ ንዋየ ኅሩየ ረሰይክዎ ሊተ ከመ ይጹር ስምየ በቅድመ አሕዛብ ወነገሥት ወደቂቀ እስራኤል። 16ወአነ አርእዮ መጠነ ሀለዎ ይሕምም በእንተ ስምየ።

በእንተ ድኅነተ ሳውል ወስብከቱ

17ወሶቤሃ ሖረ ሐናንያ ወቦአ ቤቶ ወወደየ እዴሁ ዲቤሁ ወይቤሎ ሳውል እኁየ ፈነወኒ ኀቤከ እግዚእነ ኢየሱስ ክርስቶስ ዘአስተርአየከ በፍኖት እንዘ ትመጽእ ከመ ትርአይ ወይምላእ መንፈስ ቅዱስ ላዕሌከ። 18ወሶቤሃ ተሥዕዐ እምአዕይንቲሁ ከመ ዘሣሬት ወተከሥታ አዕይንቲሁ ወርእየ ሶቤሃ ወተንሥአ ወተጠምቀ። 19ወበልዐ እክለ ወጸንዐ ወነበረ ደማስቆ ኅዳጠ መዋዕለ ምስለ አርድእት። 20ወሰበከ በጊዜሃ በምኵራባት ወመሀረ በእንተ ኢየሱስ ክርስቶስ እንዘ ይብል ውእቱ ወልደ እግዚአብሔር። 21#8፥1፤ 26፥10። ወአንከሩ ኵሎሙ እለ ሰምዑ ወይቤሉ አኮኑ ዝንቱ ዘኮነ ይሰድዶሙ ለእለ ይጼውዑ ዘንተ ስመ በኢየሩሳሌም ወዝየኒ በእንተዝ መጽአ ከመ ይሞቅሖሙ ወይሰዶሙ ኀበ ሊቃነ ካህናት። 22#18፥28። ወሳውልሰ ፈድፋደ ይጸንዖሙ ወይመውኦሙ ለአይሁድ እለ ይነብሩ ደማስቆ ወያበጽሕ ሎሙ ከመ ውእቱ ክርስቶስ።

በእንተ ምክረ አይሁድ ላዕለ ሳውል

23ወእምድኅረ ብዙኅ መዋዕል ተማከሩ አይሁድ ይቅትልዎ ለሳውል። 24ወአእመሮሙ ሳውል ምክሮሙ ዘይፈቅዱ ይግበሩ ላዕሌሁ ወየዐቅቡ አናቅጸ ሀገር መዓልተ ወሌሊተ ከመ ይቅትልዎ።

በእንተ ሑረቱ ኢየሩሳሌም

25 # 2ቆሮ. 11፥32-33። ወነሥእዎ አርድእት ሌሊተ ወአውረድዎ በአስፈሬድ እንተ ተድባበ ቅጽር። 26#ገላ. 1፥17። ወበጺሖ ሳውል ኢየሩሳሌም ኀሠሦሙ ለአርድእት ይትራከቦሙ ወፈርህዎ ኵሎሙ ወኢአምንዎ ከመ ኮነ ረድኦ ለእግዚእነ።

ዘከመ ነሥኦ በርናባስ ለሳውል

27ወነሥኦ በርናባስ ወወሰዶ ኀበ ሐዋርያት ወነገሮሙ ዘከመ አስተርአዮ እግዚእነ በፍኖት ወዘከመ ተናገሮ ወዘከመ መሀረ በስሙ ለኢየሱስ በደማስቆ። 28ወነበረ ይበውእ ወይወፅእ ምስሌሆሙ በኢየሩሳሌም ወይሜህር ክሡተ በስሙ ለእግዚእነ ኢየሱስ። 29ወይትዋቀሦሙ ለአረሚ ወፈቀዱ ካዕበ እሙንቱ ይቅትልዎ።

በእንተ ተፈንዎቱ ለሳውል ጠርሲስ

30 # 11፥25። ወአእሚሮሙ ቢጹ አውረድዎ ቂሳርያ ወእምዝ ፈነውዎ ጠርሴስ። 31ወነበራ ኵሎን አብያተ ክርስቲያናት ዘይሁዳ ወሰማርያ ወገሊላ በሰላም ወተሐንጻ ወሖራ በፍርሃተ እግዚአብሔር ወበዝኁ ሕዝብ በትምህርተ መንፈስ ቅዱስ።

በእንተ አንሶስዎቱ ለጴጥሮስ

32ወእምዝ አንሶሰወ ጴጥሮስ በኀበ ኵሎሙ ቅዱሳን እለ ይነብሩ ልዳ። 33ወረከበ በህየ ብእሴ ዘስሙ ኤንያ ወሰመንቱ ዓመቱ ሎቱ እምዘ ደወየ ወሰከበ ውስተ ዐራት እስመ ውእቱ መፃጕዕ። 34ወይቤሎ ጴጥሮስ ኤንያ ተሣሀለከ ያሕዩከ ኢየሱስ ክርስቶስ ተንሥእ ወንሣእ ዐራተከ#ቦ ዘይቤ «ወስፋሕ ዐራተከ» ወተንሥአ ሶቤሃ ወነሥአ ዐራቶ። 35ወርእይዎ ኵሎሙ እለ ይነብሩ ልዳ ወሳሮና ወተመይጡ ኀበ እግዚእነ።

በእንተ ጣቢታ

36ወበሀገረ ኢዮጴ ሀለወት አሐቲ ረድእት እንተ ስማ ጣቢታ ዘበትርጓሜሁ ይብልዋ ዶርቃስ ወይጠል ብሂል ወብዙኀ ምግባረ ሠናየ ትገብር ወትሁብ ምጽዋተ። 37ወውእተ አሚረ ሞተት ደዊያ ወኀፀብዋ በድና ወአስከብዋ ውስተ ጽርሕ። 38ወቅሩብ ሀገረ ልዳ ለኢዮጴ ወሰሚዖሙ አርድእት ከመ ሀሎ ጴጥሮስ ህየ ለአኩ ኀቤሁ ክልኤተ ዕደወ ያስተብቍዕዎ ኢይትሀከይ በጺሖቶሙ። 39ወተንሥአ ጴጥሮስ ወሖረ ምስሌሆሙ ወበጺሖ አዕረግዎ ጽርሐ ወመጽኣ ኀቤሁ ኵሎን ዕቤራት ወቆማ ቅድሜሁ ወአኀዛ ይብክያሃ ወአርአያሁ አልባሰ ወክዳናተ ዘአረዘቶን ዶርቃስ እንዘ ሀለወት ውስተ ሕይወት። 40#ማር. 5፥41፤ ሉቃ. 7፥14። ወሰደደ ጴጥሮስ ኵሎ ወሰገደ ወጸለየ ወተመይጠ መንገለ በድና ወይቤላ ጣቢታ ተንሥኢ ወከሠተት አዕይንቲሃ ወሶቤሃ ርእየቶ ለጴጥሮስ ወነበረት። 41ወመጠዋ እዴሁ ወአንሥኣ ወጸውዖሙ ለቅዱሳንሂ ወለዕቤራትሂ ወአወፈያ ኪያሃ ሕያውታ። 42ወሰምዑ ኵሉ ኢዮጴ ወአምኑ ብዙኃን በእግዚእነ። 43ወነበረ ጴጥሮስ ብዙኀ መዋዕለ በሀገረ ኢዮጴ ወኀደረ ውስተ ቤተ ስምዖን ሰፋዪ።

Currently Selected:

ግብረ ሐዋርያት 9: ሐኪግ

Highlight

Copy