ግብረ ሐዋርያት 3

ምዕራፍ 3

በእንተ ተኣምር ቀዳሚት ዘኮነት በእደ ሐዋርያት

1ወዐርጉ ምኵራበ ጴጥሮስ ወዮሐንስ ጊዜ ተሱዓት ለጸሎት።

2 # 14፥8። ወሀሎ አሐዱ ብእሲ ዘፅዉስ እገሪሁ ወተወልደ ከማሁ እምከርሠ እሙ ወይጸውርዎ ኵሎ ዕለተ ወያነብርዎ በኆኅተ ምኵራብ እንተ ስማ ኦርያ ከመ ይሰአል ምጽዋተ እምኀበ እለ ይበውኡ ምኵራበ። 3ወርእዮሙ ለጴጥሮስ ወለዮሐንስ ይበውኡ ምኵራበ ወሰአሎሙ የሀብዎ ምጽዋተ። 4ወተመይጥዎ ጴጥሮስ ወዮሐንስ ኀቤሁ ወይቤልዎ ተመየጥ መንገሌነ። 5ወነጸረ ኀቤሆሙ ወተሰፈወ የሀብዎ ምጽዋተ። 6#14፥9-10። ወይቤሎ ጴጥሮስ ወርቅሰ ወብሩር አልብየ ወእምዘብየሰ እሁበከ ናሁ በስሙ ለኢየሱስ ክርስቶስ ናዝራዊ ተንሥእ ወሑር። 7#ማቴ. 8፥15። ወአኀዞ በእዴሁ ዘየማን ወአንሥኦ ወተንሥአ ሶቤሃ ወጸንዐ እገሪሁ ወሐቌሁ። 8#ኢሳ. 35፥6። ወሖረ ምስሌሆሙ እንዘ ይሠግር ወቦአ ምኵራበ ወአእኰተ እግዚአብሔርሃ። 9ወርእይዎ ኵሎሙ ሕዝብ እንዘ የሐውር ወየአኵት እግዚአብሔርሃ። 10ወአእመርዎ ከመ ውእቱ ዘይነብር በኆኅተ ምኵራብ እንተ ስማ ኦርያ ወይስእል ወደንገፁ ወአንከሩ በእንተ ተኣምር ዘኮነ ላዕሌሁ። 11ወእንዘ ይእኅዝዎ ጴጥሮስ ወዮሐንስ ይበውኡ ምኵራበ ሮጹ ኵሉ ሕዝብ ኀቤሆሙ ኀበ ሕዋረ ሰሎሞን ድንጉፃኒሆሙ።

ዘከመ ተናገረ ጴጥሮስ ለሕዝብ

12ወሶበ ርእዮሙ ጴጥሮስ ለሕዝብ ይቤሎሙ አንትሙ ሰብአ እስራኤል ምንተኑ ታነክሩነ ወምንተኑ ትኔጽሩነ ከመ ዘበኀይልነ ገበርናሁ ወከመ ዘበሥልጣንነ ረሰይናሁ አው እምኀበ ነፍሳቲነኑ አሕየውናሁ ለዝንቱ ከመ ይሑር በእገሪሁ አልቦኬ። 13#5፥30። አላ አምላከ አብርሃም ወአምላከ ይስሐቅ ወአምላከ ያዕቆብ አምላከ አበዊነ ሰብሖ ለወልዱ ኢየሱስ ክርስቶስ ዘአንትሙ ዐለውክምዎ ወክሕድክምዎ በቅድመ ገጸ ጲላጦስ ፈቂዶ ውእቱ ያሕይዎ ለክሙ። 14#ማቴ. 27፥20-21። ወአንትሙሰ ክሕድክምዎ ለቅዱስ ወለጻድቅ ወሰአልክሙ ብእሴ ቀታሌ ነፍስ ያሕዩ ለክሙ። 15#2፥23-32፤ ሮሜ 4፥24፤ 8፥11። ወለመልአከ ሕይወትሰ ቀተልክምዎ ወእግዚአብሔር አንሥኦ እሙታን ወንሕነ ኵልነ ሰማዕቱ። 16ከመ በሃይማኖተ ስሙ ለዝ ዘትሬእዩ ወተአምሩ አጽንዖ ወበሃይማኖተ ዚኣሁ ወሀቦ ዘንተ ሕይወተ በቅድሜክሙ። 17ወይእዜኒ አኀውየ አአምር ከመ በኢያእምሮ ገበርክምዎ ለዝ ከመ ገብሩ መላእክቲክሙ። 18ወእግዚአብሔርሰ በከመ አቅደመ ነጊረ በአፈ ኵሎሙ ነቢያት ከመ ይትቀተል ክርስቶስ አብጽሐ ከማሁ። 19#ሉቃ. 2፥38፤ ኢሳ. 35፥10። ወይእዜኒ ነስሑ ወተጠመቁ#ቦ ዘይቤ «ወተመየጡ» ወይደመሰስ ለክሙ ኀጢአትክሙ ወይመጽእ ለክሙ መዋዕለ ሣህል እምቅድመ ገጹ ለእግዚአብሔር። 20#ዳን. 9፥22-27፤ ሮሜ 8፥19። ወይፌንዎ ለክሙ ለኢየሱስ ክርስቶስ ዘአቅደመ ቀቢዐ። 21ዘኪያሁ ይሴፈዉ ሰማያት ወምድር እስከ አመ ያስተራትዕ ኵሎ በከመ ነበበ እግዚአብሔር በአፈ ነቢያቲሁ ቅዱሳን እለ እምዓለም። 22#ዘዳ. 18፥15-18። ሙሴሂ ይቤሎሙ ለአበዊነ «ነቢየ ያነሥእ ለክሙ እግዚአብሔር አምላክነ እምአኀዊክሙ ዘከማየ ወሎቱ ስምዕዎ ኵሎ ዘይቤለክሙ። 23ወኵላ ነፍስ እንተ ኢትሰምዖ ለውእቱ ነቢይ ለትሠረው እምሕዝባ።» 24ወኵሎሙ ነቢያት እለ እምአመ ሳሙኤል ነቢይ ወእለሂ እምድኅሬሁ ነገሩ ወአይድዑ በእንተ እላንቱ መዋዕል። 25#ዘፍ. 12፥3፤ 22፥18። ወአንትሙ ውሉዶሙ ለነቢያት ወውሉደ ሥርዐት ዘሠርዖ እግዚአብሔር ለአበዊነ እስመ ይቤሎ ለአብርሃም «በዘርዕከ ይትባረኩ ኵሎሙ አሕዛበ ምድር።» 26#13፥46። ወለክሙ ቀደመ አንሥኦቶ እግዚአብሔር ለወልዱ ወፈነዎ ይባርክሙ ከመ ትነስሑ ኵልክሙ እምእከይክሙ።

Currently Selected:

ግብረ ሐዋርያት 3: ሐኪግ

Highlight

Copy