መልእክተ ጴጥሮስ 1 2
2
ምዕራፍ 2
በእንተ አሰስሎ እከይ
1 #
ሮሜ 12፥9፤ 1ቆሮ. 14፥20። አሰስልዋ እንከ እምኔክሙ ለኵላ እከይ ወለኵላ ሕብል ወለናፍቆ ወለተሓምዮ ወለተቃንኦ። 2#ማቴ. 18፥3፤ ዕብ. 5፥12-13። ወኩኑ ከመ እለ ይእዜ ተወልዱ ሕፃናት ወአፍቅሩ ሐሊበ ነባቤ ዘአልቦቱ ቱስሕት ከመ ቦቱ ትልሀቁ ለድኂን። 3#መዝ. 33፥8። ወናሁ ጥዕምክሙ ከመ ኄር እግዚአብሔር ወኀቤሁ ምግባኢክሙ። 4#መዝ. 117፥22። ወይእቲ እብን እንተ በኀበ ሰብእ ምንንት ወበኀበ እግዚአብሔርሰ ኅሪት ወክብርት። 5#ሮሜ 12፥1፤ ኢሳ. 66፥24፤ ሆሴ. 14፥5፤ ኤፌ. 2፥21። ወአንትሙኒ ጽንዑ ከመ እብን መንፈሳዊ ወኩኑ ታቦተ መንፈሳዌ ለክህነት ቅድስት ወንጽሕት ከመ ታቅርቡ ወታዕርጉ መሥዋዕተ መንፈሳዌ ዘይሰጠወክሙ እግዚአብሔር በእደዊሁ ለኢየሱስ ክርስቶስ። 6#ኢሳ. 28፥16። እስመ ከመዝ ጽሑፍ «ናሁ እሠይም ውስተ ጽዮን እብነ ማዕዘንት ኅሪተ ወክብርተ ወዘአምነ ባቲ ኢይትኀፈር።» 7#ማቴ. 21፥42። ለክሙ ውእቱ ክብር ለእለ ተአምኑ ወለእለሰ ይክሕዱ «እብን እንተ መነንዋ ነደቅት ይእቲ ኮነት ውስተ ርእሰ ማዕዘንት።» 8#ኢሳ. 8፥14፤ ሮሜ 9፥33፤ ሉቃ. 2፥34። ውእቱኬ እብነ ዕቅፍት ወእብነ ካሕድ ለእለ ይትዐቀፉ በቃሉ ወይክሕድዎ ለዘቦቱ ተፈጥሩ። 9#ዘፀ. 19፥5-6፤ ኢሳ. 9፥2፤ 43፥20-21፤ ዘዳ. 4፥20፤ 7፥6፤ 14፥2፤ ቲቶ 2፥14፤ ራእ. 20፥6። ወአንትሙሰ ፍጥረት ኅሩያን ወታቦት ለንጉሥ ወሕዝብ ንጹሕ ወሕዝብ ዘይትሜካሕ ከመ ትንግሩ ሠናይቶ ለዘጸውዐክሙ እምጽልመት ውስተ ብርሃነ ስብሐቲሁ። 10#ሆሴ. 2፥1-23፤ ሮሜ 9፥25። እንዘ ቀዲሙ ኢኮንክሙ ሕዝቦ ይእዜሰ ሕዝበ እግዚአብሔር አንትሙ እንዘ ቀዲሙ ኢኮንክሙ ምሁራነ ይእዜሰ መሀረክሙ። 11#መዝ. 39፥12። ኦ አኀውየ ፍቁራን እስእለክሙ ብቍዑኒ ከመ ፈላሲ ወከመ ነግድ ወከመ ድኩም ታርሕቅዋ ለፍትወተ ሥጋክሙ እንተ ትጸብኣ ለነፍስክሙ። 12#ማቴ. 5፥16። ወግዕዝክሙኒ በማእከለ አሕዛብ ሠናየ ለይኩን ከመ ኢይርከቡ በዘየሐምዩክሙ ከመ ገባሬ እኪት ወሠናየ ምግባሪክሙ ይርአዩ ወይሰብሕዎ ለእግዚአብሔር ከመ ይትመየጦሙ። 13#ሮሜ 13፥1-5፤ ቲቶ 3፥1። አትሕቱ ርእሰክሙ ለኵሉ ፍጥረተ ዕጓለ እመሕያው በእንተ እግዚአብሔር ወለንጉሥኒ እስመ ኵሉ ሎቱ። 14ወለመኳንንትኒ እስመ ውእቱ ይፌንዎሙ ከመ ይኰንንዎሙ ለእለ ይገብርዋ ለእኪት ወያእኵትዎሙ ለእለ ይገብርዋ ለሠናይት። 15#3፥16። እስመ ከመዝ ውእቱ ፈቃዱ ለእግዚአብሔር ከመ በሠናይ ምግባሪክሙ ትእስሩ አፉሆሙ ለአብዳን ሰብእ እለ ኢየአምርዎ ለእግዚአብሔር። 16ወኩኑ ከመ አግዓዝያን ወአኮ ከመ እለ ቦሙ ጌጋይ ዘእኩይ ወአንትሙሰ ከመ አግብርተ እግዚአብሔር። 17#ሮሜ 12፥10፤ ማቴ. 2፥22። ኵሎ አክብሩ ወቢጸክሙኒ አፍቅሩ ወለእግዚአብሔርኒ ፍርህዎ ወለንጉሥኒ አክብርዎ። 18#ኤፌ. 6፥5፤ ቲቶ 2፥9። ወአንትሙኒ ነባሪ ተኰነኑ ለአጋእዝቲክሙ እንዘ ትፈርሁ ወአኮ ዳእሙ ለኄራን ወለመሓርያን አላ ለእኩያንኒ። 19እስመ ጸጋ እግዚአብሔር ትትወሀብ ለዘበእንተ ሠናይ ምግባሩ ይትዔገሣ ለኀዘን እንዘ የሐምም በግፍዕ። 20#3፥14-17፤ 4፥14፤ ማቴ. 5፥10። ወምንትኑመ ይእቲ አኰቴትክሙ እመ እንዘ ትኤብሱ ትትዔገሡ መቅሠፍተክሙ አላ እንዘ ሠናየ ትገብሩ እመ ተዐገሥክሙ ግፍዐክሙ ዛቲ ይእቲ አኰቴትክሙ በኀበ እግዚአብሔር። 21#ማቴ. 16፥24። እስመ በእንተ ዝንቱ ተጸዋዕክሙ እስመ ክርስቶስኒ በእንቲኣክሙ ሐመ ይኅድግ ለክሙ ማዕተቦ ከመ ትትልዉ አሠረ ዚኣሁ። 22#ኢሳ. 53፥9፤ ዮሐ. 8፥46። በከመ ውእቱ ኢገብረ ኀጢአተ ወኢተረክበ ሐሰት ውስተ አፉሁ። 23#ኢሳ. 53፥6። እንዘ ይጼእልዎ ኢጸአለ ወእንዘ ያሐምምዎ ኢተቀየመ አላ አግብአ ለዘይኴንን ጽድቀ። 24#ኢሳ. 53፥5፤ ሮሜ 6፥11፤ 1ዮሐ. 3፥5። ወበእንተ ኀጣውኢነ ውእቱ ተሰቅለ ዲበ ዕፅ በሥጋሁ ከመ ያውፅአነ እምኀጣውኢነ ወበጽድቁ ያሕይወነ እስመ በቍስለ ዚኣሁ ሐየውክሙ ቍስለክሙ እንዘ ከመ አባግዕ ትሳኰዩ። 25#5፥4፤ ሕዝ. 34፥5፤ ዮሐ. 3፥12። ወይእዜኒ ግብኡ ኀበ ኖላዊክሙ ወዐቃቢሃ ለነፍስክሙ።
Currently Selected:
መልእክተ ጴጥሮስ 1 2: ሐኪግ
Highlight
Share
Copy
Want to have your highlights saved across all your devices? Sign up or sign in
