ማ̈ርቆ̈ሳ 14

ፔቲ̇ ማጫ̇ ኣስዶ̈ራ ዬሱ̈ሳ ሺታ̇ ቆቲሳዴ

ማ̈ቶ̈ሳ 26፡2-16፤ ዋ̈ኒ̇ሳ 12፡1-8

1ኣይሁዳንቦ ፋ̈ሲጋኬ ሳልዳ ቂጻ̇ ሙይዝ ባ̈ል#14፡1 ሳልዳ ቂጻ̇ ሙይዝ ባ̈ላ ጋ̈ዚንዳ ኢስሬ̈ላን ጊብጻ ጋዳ̇ ኣይላ ማ̈ቃ̇ር ዎን ጋርታፖ̇ ባርቢባር ኬስኪ̇ኖን ኤልቅ ዎቲዝ ቃሜ̇። ፋ̈ሲጋ ባ̈ል ጋ̈ዚንዳ ጾ̈ሲ̇ ጊብጻ ጋዳ̇ ዎ ኣሳንቦ ኡስ̇ ኣቲና ናኣን ዎይ ዎ ሙታ̇ ሉካ̇ምባራ ፌ ካራ ሾንቺ̇ን ዶሪ ናኢ ሱ̈ባር ዲርኪ̇ኖ ኣ̈ሊን ኣሻ̇ር ኣ̈̇ኖን ኤልቅ ዎቲዝ ቃሜ̇። ቦንቻ̇ንዳብ ናምኢ ቃም ኣቲ̇ንዶ̈ን፥ ቄ̈ስ ኣላቃንኬ ሙ̈ሳ ሂጋ̇ ታማ̈ርሲዛን “ኑ ዎዛ̈ርታር ኢያ ኤ̈̇ ዎኔ?” ጌዪ ዎልዎልኣ ዞሪንቲ̇ ማ̈ቃ̇ሪ፥ 2ማ ጌይርዶሪ “ዎርዣ ጊዳ̇ ዎይሊን ዋቺ̇ ዲንዳካ̇ዮ̈ዲፌ̈ኒ ባ̈ል ቃም ኑ ኢያ ኤ̈ባዳ” ጌይዴ።

3ዬሱ̈ሲ ቢታ̈ና ጌይዝ ቤስ̇ ሹያባሮ ሲሞ̈ና ጌይዝ ና̈ሳ ኣ̈ል ቡና ኡሽካ̇ንዳብ ዶኢንዶ̈ን፥ ፔቲ̇ ማጫ̇ዶ̈ራ ዎይሊን ሚ̈ሺ ኤኪ̇ዝ ና̈ርዶ̈ሳ ጌይዝ ማ̈ታ ዋይባራ ኦ̈ኖ ኮሽ ሺታ̇ ኣልባስጥሮ̈ሳ ጌይዝ ሹችባራ ኦ̈ንቲኖ ቢልቃ̈ጻባር ኩም ኤካ̇ ዬ̈ዴ። ኢናፖ̇ ቢልቃ̈ጺን ዎራ ሺቲ̇ን ኢ ቁማ ጋልዳ ዉልኣዴ።

4ኢና ዎ ኣሳን ጋርታ̇ፖ̇ ፔታ̇ን ፔታ̇ናን ጎይላር ጌዪ “ሺታ̇ ዓ ኣባብ ሜላ̇ ኢ̈ቲ̈ራ? 5ዓይዚ̇ ጼ̈ታ ዲና̈ራብፌ̈ኒ ዎጚ̈ንታ̇ሪ ሚ̈ሻ̇ ዎርባያንብ ኢሚንቲኖኮ ኣ ዎ?” ዪዝ ጋ̈ር ኣሲን ጎይሊዴ።

6ዬሱ̈ሲ ኢንታኮ “ዪንቲ̇ ኢዞ ኣባብ ዋዪ̈ራ ኣሺ̇ብቴ! ኢዛ ታ̈ብ ኮሽ ባዝ ኦ̈ኔ። 7ዎርባያን ዎይ ጋላስ ዪንታ̇ባር ዶኢዛ̈ኮታ̇ቦ ዪንቲ ኮዪኖ ጋላስ ኢንታ ማ̈ዳንዳብ ዳንዳኢ̈ሬ። ታ̈ኒ ዎይ ጋላስ ዪንታ̇ባር ዶኣባሴ። 8ኢዛ ፌ ዳንዳኢኖዲፌ̈ኒ ታ̈ብ ዎቲኔ። ቴ ዱ̈ፊምቦ̇ ማ̈ቃምፔ̈ኒ ቲ̈ኒታር ታ̈ና ሺታ̇ ቆቲሲኔ። 9ቴ ዪንታ̇ክ ኪን ጋ̈ሬ ኢዛ ታ̈ብ ዎቲኖ ዪ̈ዲ ሳ̈ዝ ኤ̈ሻ̇ ጋልዳ ዎጛላ ሳባ̇ኪንቲዝ ቤሳ̇ ጋልዳ ዎይ ኢዝ ኦ̈ሳ ቦቲጚንታካ̇ይፌ̈ኒ ሶ̈ሊንቲ̈ሬ።

10ዪኒ̇ፖ ዓኒ ዬሱ̈ሳ ታማ̈ራን ጋርታፖ ፔታ̇ና ዪሁዳ ኣስቆሮ̈ቶዲ ዬሱ̈ሳ ዎሳምፔ̈ን ኣ̈ ኢማ̇ንዳቦ ቄ̈ስ ኣላቃንኮ ሉኪ̇ዴ።

11ኢንታ̇ር ዪኖ̇ ሲስካ̇ር ኡፋይታ̇ሪ “ኑ ኔ̈ብ ሚ̈ሺ̇ ኢማ̇ንዳ” ዪዝ ጋ̈ር ኢ̈ብ ሶ̈ሊዴ። ኢያሬ ዬሱ̈ሳ ኢንታ̈ብ ኣ̈ ኢማ̇ንዳብ ማ̈ቂዝ ጎይ ኮዪ ኤ̈̇ዴ።

ጎዳ ኢራ̈ታ

ማ̈ቶ̈ሳ 26፡17-30፤ ሉቃ̈ሳ 22፡7-23፤ 1 ቆሮ 11፡23-25

12ቂጻ̇ ሙይዝ ባ̈ሊን ቲ̈ኖን ጋላስ ፋ̈ሲጋ ባ̈ላብ ጊ̈ጊሲኖ ዶራ ሹኪ̇ርዶ̈ን ዪና̇ ኢዝ ጋላስ ዬሱ̈ሳ ታማ̈ራን ኢ̈ክ ዬ̈ሪ “ፋ̈ሲጋ ኢራ̈ታ ዎንዳ ኔ̈ብ ጌ̈ዚንን ሞ̈ንዳብ ኮያ̈ራ?” ዪዝ ጋ̈ር ኦይጪ̇ዴ።

13ኢያሬ ፌ ታማ̈ራን ጋርታ̇ፖ̇ ናምኣንኮ “ካታማ ሉኪ̇ብቴ፤ ዋ̈ ኦትባራ ቶ̈ኪ̇ ዬይዝ ኣስ ዪንቲ ዲጚዝዳ፤ ና̈ሳ ዪ ዎሂን ሉኪ̇ብቴ። 14ኢ ጌሊዝ ቤሲ̇ን ጌላሪ ኣ̈ሊን ባ̈ባ̈ኮ ‘ኣስታማ̈ራ̈ዲ ጌዪ፥ ታ̈ኒ ታ ታማ̈ራንባር ዎል ማ̈ቃ̇ራ ፋ̈ሲጋ ኢራ̈ታ ሞ̈ምፔ̈ን ቤሲ̇ ኑ̈ና ቤይሲብቴ̇ ጌይኔ’ ጋ̈ር ኦይጪ̇ብቴ። 15ኢያር ዪንታ̇ ፎ̈ቃ ጋርታ̇ ዪ̈ጺ̇ ጌ̈ዚንኖ ሻክ ቤስ̇ ቤይሲ̈ሬ። ኢና ኑ̈ብ ኢራ̈ታ ጊጊሲብቴ” ጌይዴ።

16ናምኢ ዬሱ̈ሳ ታማ̈ራን ኢናፖ̇ ኬስካ̇ር ካታማ ሉካ̇ዚምባራ ዎይ ባዝ ኪን ኢ ጌይኖንዲፌ̈ኒ ማ̈ቂ ቤንቲ̇ን ፋ̈ሲጋ ኢራ̈ታ ኢና ጌ̈ዚንዴ።

17ሳ̈ዚ ቃማ̇ዚምባር ዬሱ̈ሲ ፌ ታማራን ታጶ̇ ናምኣንባር ዎል ማ̈ቃ̇ር ዬይዴ። 18ኢንቲ̇ ዎል ማ̈ቃ̇ር ሌ̈ማታ ጋልዳ ፊ̈ሺ ሙይርዶ̈ሪ ዬሱ̈ሲ ጋ̈ሪ “ቴ ዪንታ̇ክ ኪን ጋ̈ሬ፥ ዓት ዓን ኢራ̈ታ ታባር ዎልኣ ሙይዛን ዪንታ̇ ጋርታፖ ፔታ̇ና ታ̈ና ዓይቃብ ኣ̈ ኢሚ̇̈ሬ” ጌይዴ።

19ኢንታ̇ሬ ኢ ዪኖ̇ ጌይኖ̈ን ጊሽ ሺን̇ ጋ̈ሪ “ፔታ̇ና ታ̈ና ዶ̈ኔ ጌይን፥ ፔታ̇ና̈ዳር ታ̈ና ዶ̈ኔ” ጌይን ዎልዎልኣ ኦይች ኤ̈̇ዴ።

20ዬሱ̈ሳር ኢንታ̇ኮ “ዪ̈ዲ ዪንቲ̇ ታጶ̇ ናምኣን ጋርታ̇ፖ̇ ፔታ̇ና ፌ ኩሺን ታባር ፊልኢሲን ጋርታ̇ ሚሺዛ̈ዳ። 21ታ ኣሳ ናኣ̈ዲ ማ̈ቄ̈ጌንዶ ጾ̈ሳ̇̇ ቃ̈ላ ጋልዳ ጻ̈ፊንቲኖ̈ዲፌ̈ኒ ዓይቃ ኣቲ̇ባ̈ስዶ̈ኒ፥ ታ̈ና ዓይቃብ ኣ̈ ኢሚ̇ዝ ና̈ሳ ኢ ባዚ ኣዬ̇። ና̈ሳ ዪ ዬሊንታካ̇ይ ኣቲ̇ኖኮ ኢ̈ብ ኮሽ̇ዶ̈ን” ጌይዴ።

22ኢንቲ̇ ዎልኣ ሙይርዶሪ ዬሱ̈ሲ ቂጺ̇ን ኤካ̇ሪ ጾ̈ሳ̇̇ ጋላቲኖፖ̇ ዓኒ ሜይሳ̇ሪ ፌ ታማ̈ራንቦ ኢማ̇ሪ “ዓይሺቴ ዓና̇ ታ ኣይሺ̇ንዶ̇” ጌይዴ። 23ኢናፖ̇ ጺዊ̇ን ኤካ̇ሪ ጾ̈ሳ̇̇ ጋላታሪ ኢንታ̇ቦ ኢሚ̇ን፥ ዎይን ኢናፖ̇ ኡሽኪ̇ዴ። 24ኢናፖ̇ ኢንታ̇ኮ “ዓና̇ ዎይሊንንቦ ዉልኢንታ̇ዝ ታ ኦራ ጫ̈ቃ ሱ̈ንዶ” ጌይዴ። 25“ቴ ዪንታ̇ክ ኪን ጋ̈ሬ፥ ታ̈ኒ ኦራ ዎይና ኣ̈ፍ ጪ̈ጪኖን ጾ̈ሳ̇̇ ካ̈ቲቲን ጋርታ̇ ኡሽኪዝ ዲራ̈ስ ዓኒፖ̇ ናምኢን ኡሽካባሴ” ጌይዴ።

26ኢናፖ̇ ማዝሙራ ዬጺ̇ኖፖ̇ ዓኒ ዳብራዛይታ ኢንዲን ጋልዳ ኬስኪ̇ዴ።

ጴ̈ጥሮ̈ሲ ኢያ ካ̈ዳዚን ዬሱ̈ሲ ቲ̈ኒታር ሶ̈ሊዴ

ማ̈ቶ̈ሳ 26፡31-35፤ ሉቃ̈ሳ 22፡31-34፤ ዋ̈ኒ̇ሳ 13፡36-38

27ዬሱ̈ሲ ፌ ታማ̈ራንኮ፥

“ ‘ታ̈ኒ ጋይጫ ናኣ ቡካ̇̈ሬ

ዶራንር ላሊ̇ንቲ̇̈ሬ’ #14፡27 ዛካራ̈ሳ 13፡7

ጋ̈ሪ ጾ̈ሳ̇̇ ቃ̈ላ ጋልዳ ጻ̈ፊንቲኖ̈ዲፌ̈ኒ ዪንቲ ዎይ ታ̈ና ኣሻ̇ር ሉኪ̈ሬ። 28ታ̈ኒ ዓይቃ ጋርታ̇ፖ̇ ዲንዲኖፖ̇ ዓኒ ዪንታ̇ፖ̇ ቲ̈ኒታራ ጋሊላ ሉካ̇̈ሬ” ጌይዴ።

29ጴ̈ጥሮ̈ሲ ኢ̈ኮ “ሜላን ዎይ ኔ̈ና ኣሺ̇ ሉኪ̇ርካሬ ቴ ኔ̈ና ኣባካር ጌይን ኣሻ̇ባሴ” ጌይዴ።

30ዬሱ̈ሳር ኢ̈ኮ “ቴ ኔ̈ክ ኪን ጋ̈ሬ ዓታ̇ብ ቃም ኩቶ ናምኢ ቶህ ኦላ̇ናፖ̇ ቲ̈ን ኔ ታ̈ና ዓይዚ̇ ቶህ ካ̈ዳሬ ጌይዴ። 31ጴ̈ጥሮ̈ሲ ማ “ዓይቃ ማ̈ቂናካሬ ታ ኔባር ዓይቃ̇ርዶኬ ኣባካር ጌይን ቴ ኔ̈ና ኣሻ̇ባሴ” ዪዝ ጋ̈ር ሶ̈ሊዴ። ኢ ታማ̈ራን ዎይ ኢ̈ክ ጴ̈ጥሮ̈ሲ ጌይኖንዲፌ̈ን ጌይዴ። 32ዪኒ̇ፖ ዓኒ ዬሱ̈ሲ ፌ ታማ̈ራንባር ዎል ማ̈ቃ̇ሪ ጌ̈ቴሴማ̈ኒ ጋዝ ቤሲ̇ን ሉኪ̇ዴ። ኢያሬ ኢንታኮ “ቴ ሴካ̇ንዳ ኣ̈̇ር ዎ̈ሳ̇ምባር ዪንቲ ዓይ ዶኢብቴ̇” ጌይዴ። 33ፌባር ጴ̈ጥሮ̈ሳ፣ ዓይቆ̈ባኬ ዋ̈ኒ̇ሳ ኤኪ̇ ሉካ̇ሪ ዎይሊን ሙርሚ ኤ̈̇ዴ። 34ማ̈ቃ̇ር ኢንታኮ “ቴ ሼምፒ̇ንዳ ሙርማባር ዓይቃብ ዬላ̇ዴ። ዪንቲ̇ ዪዚ ዓንዳ ጊሳካ̇ይ ዶኢብቴ̇” ጌይዴ።

35ኢናፖ̇ ጊላ̇ ጌዳ ኣ̈̇ር ሳ̈ዳ ጉጲጛር ዳንዳኢንቲ̇̈ርኮ ሜታ ኬል̇ ዓና̇ ፌ ጋልዳፖ ኣ̈̇ምፔ̇̈ን ዎ̈ሲርዶ̈ሪ፥ 36“ታ ባ̈ባ̈ዶ ዎይ ባዝ ኔ̈ብ ዳንዳኢንቲ̇ዛኮታ̇ቦ ሜቲን ዓኖ̇ ኔ ታ ጋልዳፖ ጎቲ̇ሲሼ። ዪና̇ሬ ኔ ኮያዚንዲፌ̈ን ማ̈ቆ̇ዶኬ ቴ ጌይኖንዲፌ̈ን ማ̈ቃፖ̇” ጌይዴ።

37ኢ ዪኖ̇ ዎ̈ሲ̇ ማ̈ቃ̇ር ዬ̈ምባራ ኢ ታማ̈ራን ሱርስ ኤኪ̇ን ሱርቂ̇ንዶ̈ን ቤቃ̇ሪ ጴ̈ጥሮ̈ሳኮ “ኣ̈ን ሲሞ̈ኖ ኔ ሱርቂ̇ና? ሜላ ኣቲ̇ን ፔቲ̇ ሳኣ̈ታ ሚ̈ጛር ዶኣንዳ̇ብ ኔ̈ና ጋማ? 38ፋታና ጋርታ ጌላካ̇ዮ̈ዲፌ̈ኒ ሚ̈ጛር ዎ̈ሲብቴ። ሚ̈ጛንዳብ ኢና̇ ዪንታ̇ብ ዎዶ̈ን፥ ዪኖ̇ ዪንቲ̇ ዪንታ̇ ዎልቃባር ዎታንዳቦ ጋማ̈ሬ” ጌይዴ።

39ዓታ̇ር ማ̈ቂ̇ ሉካ̇ሪ ዓታር ዎ̈ሲኖ ዎ̈ሲን ኢዞ ማሂ ዎ̈ሲዴ። 40ዓታ̇ር ማ̈ቂ̇ ዬ̈ዚምባራ ሱርሲ ኢንታ̇ ጋሚን ሱርቂ ዎዶ̈ን ኢንታ ዴጚዴ። ኢንቲ̇ ሱርስ ኣ̈ፍባራ ፌ ሶ̈ላዚንዳር ኤሪባ̈ሴ።

41ዓይዚ̇ ማ̈ቃ̇ር ዬ̈ሪ ኢንታኮ ፥“ዓታ̇ር ዪንቲ ሱርቂ̇ኖንዲፌ̈ንኬ ሼምፒኖንዲፌ̈ን ዎ? ዪዚ ዪንታ̇ብ ጊዶ! ታ̈ና ኣሳ ናኣ̈ዳ ናጋራንቻ̇ንብ ኣ̈ ኢሚ̇ዝ ሳኣ̈ቲን ዬሊ̇ኔ። 42ዪዚ ዲንዳ̇ር ዬ̇ብቴ ታ̈ና ኣ̈ ኢሚ̇ዝ ና̈ሳ ዓይ ዬሊ̇ኔ” ጌይዴ።

ዪሁዳ ኣስቆሮ̈ቶዲ ዬሱ̈ሳ ኤ̈ሲዴ

ማ̈ቶ̈ሳ 26፡47-56፤ ሉቃ̈ሳ 22፡47-53፤ ዋ̈ኒ̇ሳ 18፡3-12

43ዬሱ̈ሲ ቢርት ዪኖ̇ ሶ̈ላዚምባራ ታጶ̇ ናምኣን ጋርታፖ̇ ፔታ̇ና ዪሁዳ ጌይዛ ዬይዴ። ኢባራ ጉፋኬ ማሺ̇ክ ኤ̈̇ኖ ዎይሊን ኣሲ ቄ̈ስ ኣላቃን ጋርታ̇ፖ̇፣ ሙ̈ሳ ሂጋ̇ ታማ̈ርሲዛንፕኬ ጋዳ ጪጛሻን ጋርታ̇ፖ̇ ኪ̈ቲንታ̇ር ዬይዴ። 44ኣ̈ ኢሚ̇ዛ ዪሁዶ ኢንታ̇ኮ “ታ ዓውቺ̇ን ሉካ̇ር ዬርቂ̇ዝ ና̈ሳ ኢያ፤ ዪኒ̇ባር ዪንቲ̇ ሚ̈ጛር ኢያ ኤ̈̇ር ኤኪ̇ ሉኪ̇ብቴ” ጋ̈ሪ ቲ̈ን ማላ̇ ኢንታ̇ብ ኢሚ̇ኔ። 45ኢያር ኤሊ̇ባር ዬ̈ዪ ዬሱ̈ሳክ ኡካ̇ሪ “ኣስታማ̈ራ̈ዶ!” ጋ̈ር ኢያ ዬርቂ̇ዴ። 46ዪኒ̇ባራ ኣሳን ዬሱ̈ሳ ኤ̈̇ዴ። 47ኢና ኤቂ̇ኖ ዬሱ̈ሳባሮን ጋርታፖ̇ ፔታ̇ና ማሺ̇ ኬሳ̇ር ቄ̈ሳን ኣላቃ̈ብ ኣሽካራ ዋይን ቃጺ̇ዴ። 48ዬሱ̈ሲ ኢንታ̇ኮ “ዪንቲ̇ ፋ̈ና̇ ኤ̈̇ዛ̈ዲፌ̈ኒ ማሺ̇ኬ ጉፋክ ኤካ̇ር ታ̈ና ኤ̈̇ንዳብ ዬይና? 49ታ̈ኒ ዎይ ጋላስ ጾ̈ሳ̇̇ ኬ̈ ጋርታ̇ ታማ̈ርሳ ዪንታ̇ባር ዶኣዚምባ̇ራ ታ̈ና ኤ̈ካ̇ይዶ̈ሪ ዓታ̇ቦ ታ̈ና ኤ̈̇ዚንዳ፥ ማጻ̈ፋ ጋልዳ ሚን ጻ̈ፊንቲኖ ጾ̈ሳ̇̇ ቃ̈ላ ፎቲንታምፔ̈ኔ” ጌይዴ። 50ኢ ታማ̈ራን ዎይ ኢያ ኣሻ̇ር ዪዴ። 51ፌ ጋልዳ̇ ላጻና ሙታ̇ ማኢኖ ፔቲ̇ ናኢቲዶ̈ሪ ዬሱ̈ሳ ዎሂን ዬዚምባራ ኣሳን ኢያ ኤ̈̇ን፥ 52ፌ ላጻኒን ኢንታ ኩሽት ኣሻ̇ሪ ካላ̇ ዎጻ̇ር ቡ̈ቲ̇ዴ።

ዬሱ̈ሳ ዳይና ቲ̈ን ኤ̈ጚዴ

ማ̈ቶ̈ሳ 26፡57-68፤ ሉቃ̈ሳ 22፡54-55፥63-71፤ ዋ̈ኒ̇ሳ 18፡13-14፥19-24

53ኣሳን ዬሱ̈ሳ ኤ̈̇ሪ ቄ̈ሳ ኣላቃንቦ ኣላቃ ኣ̈ል ኤኪ̇ ሉኪ̇ዴ። ኢና ቄ̈ስ ኣላቃን፣ ጋዳ ጪጛሻንኬ ሙ̈ሳ ሂጋ̇ ታማርሲዛን ዎይ ሺ̈ቃር ዎ። 54ጴ̈ጥሮ̈ሲ ጎትባር ኢ ዎሂን ዬ̇ ሙታዶ̈ር ቄ̈ሳ ኣላቃንቦ ኣላቃ ኣ̈ል ጌ̈ታ ዬሊ̇ዴ። ኢና ጋሲን ጋርታ̇ ኣሽካራንባር ዎልኣ ዶኣሪ ታማ ካሽኪ ኤ̈̇ዴ።

55ቄ̈ሳ ኣላቃንኬ ፊርዳ ኣ̈ሎ ኣሳን ዎይ ዬሱ̈ሳ ዎሳንዳቦ ኢ ጋልዳ ማርካ ኮዪ ኤ̈̇ሪ ኣባካር ዲጛካ̇ይ ኣቲ̇ዴ። 56ዎይሊን ኣሲ ኢ ጋልዳ ዎርዳ ማርኪቲንዶ̈ን ኢንታ ሶ̈ላዲ ዎልፔታ̇ን ማ̈ቃካ̇ይ ኣቲ̇ዴ።

57ፔታ̇ን ፔታ̇ናን ዲንዳር ዎርዳ ኢ ጋል ማርኪቲ̈ርዶ̈ሪ፥ 58“ ‘ታ ዓኖ̇ ኣሳ ኩሽባር ኦ̈ኖ ጾ̈ሳ̇̇ ኬ̈ን ዪርዲሳራ ኣሳ ኩሽባር ኬ̈ጺንታካ̇ዮ ኬ̈ ዓይዚ̇ ቃም ጋርታ̇ ኬ̈ጻ̇ንዳ’ ጌይኖን ኑ ሲስኪ̇ኔ” ጌይዴ። 59ኢንቲ̇ ዪ ዎይ ኢ ጋልዳ ማርኪቲንዶ̈ን ኢንታ ሶ̈ሊን ዎል ፔታ̇ን ማ̈ቃካ̇ዬ። 60ቄ̈ሳ ኣላቃንቦ ኣላቃ̈ዲ ዲንዳር ኢንታ ቲ̈ን ኤቃ̇ሪ “ኣሳን ዓን ኔ ጋልዳ ማርኪቲዛ̈ብ ኔ ዎዛር ጋ̈ራ? ሶ̈ላ ማሂዝ ባዝ ኔ̈ብ ባያ̇?” ጋ̈ር ዬሱ̈ሳ ኦይጪ̇ን፥ 61ኢ ኣባካር ኢንታ̇ብ ማልሳ ማሃካ̇ይ ኣቲ̇ዴ።

ቄ̈ሳ ኣላቃንቦ ኣላቃ̈ዲ ዓታ̇ር ማ̈ቃ̇ሪ ዬሱ̈ሳኮ “ኣንጂንቲ̇ኖ ጾ̈ሳ̇̇ ናኣ ክርስቶ̈ስ ኔ̈ና?” ዪዝ ጌዪ ኦይጪ̇ዴ።

62ዬሱ̈ሳር ኢ̈ኮ “ኣ̈ ታ̈ና! ታ̈ኒ ኣሳ ናኣ̈ዲ ዎልቃ̈ማ ጾ̈ሳ̇̇̈ብ ኡሻቻ̇ ጎይ ዶኣዚንዲኬ ኣፋ ሻ̈ራ ጋርሳባር ዬ̈ዚን ዪንቲ ቤቂ̇̈ሬ” ጌይዴ። 63ቄ̈ሳ ኣላቃንቦ ኣላቃ̈ዲ ዛላ̇ባር ፌ ኣፊላ ዳርሳ̇ሪ “ዪዚ ኑ̈ቦ ሜላ ማራካ̇ ኣ ኮዪሲ̈ራ? 64ኢ ቆ̈ሲንዲኮ ዪንቲ ሲስኪ̇ኒ፤ ዪዚ ዪንታ̇ብ ኣ ማይጺ̈ራ?” ጌይን “ኢ̈ብ ዓይቃ ኮሺ̈̇ሬ” ዪዝ ጋ̈ር ዎይ ዎል ፔታ̇ን ሶ̈ሊዴ። 65ኢንታ̇ ጋርታፖ̇ ፔታ̇ን ፔታ̇ናን ኢ ጋል ጩቲ̇ ኤ̈̇ዴ። ኢ ኣ̈ፊን ጫርቃባር ቃቻ̇ሪ ኢያ ቆጺ̇ ሙታ̇ዶ̈ር “ኔ̈ና ቡኪ̇ኖ ኦ̈ናኮ ኤራቤ” ጌይዴ። ኣሽካራንሬ ኢያ ባቂ̇ ሙታ̇ ኤኪ̇ ሉኪ̇ዴ።

ጴ̈ጥሮ̈ሲ ዬሱ̈ሳ ካ̈ዲዴ

ማ̈ቶ̈ሳ 26፡69-75፤ ሉቃ̈ሳ 22፡56-62፤ ዋ̈ኒ̇ሳ 18፡15-18፥25-27

66ጴ̈ጥሮ̈ሲ ቄ̈ሳ ኣላቃንቦ ኣላቃ ኣ̈ል ጋሲን ጋርታ̇ ጋርሳ ጎይ ዎዶ̈ን ቄ̈ሳ ኣላቃንቦ ኣላቃ ጋራዳን ጋርታ̇ፖ̇ ፔታ̇ኒን ዬ̈ራ፥ 67ጴ̈ጥሮ̈ሲ ታማ ካሽካ̇ምባር ዲጛራ ኮት ኢያ ቤቃ̇ራ ኢ̈ክ “ኣን ኔ̈ናር ና̈ዝሬ̈ት ዬሱ̈ሳባር ዎ ባያ?” ጋ̈ዴ።

68ጴ̈ጥሮ̈ሲ ኢዝኮ “ኣ̈ሽ ኔ ኣ ጋ̈ርኮ ታ̈ብ ጌሊባ̈ሴ፥ ኔ ጌይዝ ና̈ሳዳር ቴ ኢያ ኤራባሴ” ጌይዴ። ኢ ዪኖ̇ ጋ̈ሪ ዛ̈ና ኬስካ̇ምባራ ኩታ ኦ̈ሊ̇ዴ።

69ኣሲን ኢያ ቤቃ̇ር ኢና ኤቂ̇ኖ ኣሳንቦ “ዓ ና̈ሳ ና̈ዝሬ̈ት ዬሱ̈ባር ዬዛን ጋርታ̇ፖ̇ ፔታ̇ና̈ዳ ባያ!” ጋ̈ር ዓታ̇ር ሶ̈ላዴ። 70ኢ ዓታ̇ር ማሃር “ቴ ኢያ ኤራባሴ” ጌይዴ።

ጊላ̇ ጋምኢኖፖ̇ ዓኒ ኢና ኤቂ̇ኖ ኣሳን ጴ̈ጥሮ̈ሳኮ “ኔ̈ኒ ጋሊላ ኣስ ማ̈ቂ̇ኖኮታ̇ቦ፥ ካኣ ኢንታ ጋርታ̇ፖ̇ ፔታ̇ና ኔ̈ና” ጌይዴ።

71ኢያሬ “ዪንቲ̇ ጌይዝ ና̈ሳ ቴ ኢያ ኤራባሴ” ዪዝ ጌዪ ፌ̈ና ባ̈ዲ ሙታ̇ ጫ̈ቂ̇ ኤ̈ዴ።

72ኢ ዪኖ̇ ጌይኖንዲፌ̈ኒ ኩታ ናምኢን ኦ̈ሊ̇ዴ። ዬሱ̈ሲ ኢ̈ኮ “ኩታ ናምኢ ቶህ ኦ̈ላናፖ̇ ቲ̈ን ኔ ታ̈ና ዓይዚ̇ ቶህ ካ̈ዳ̈ሬ ጌይኖን ኢ̈ክ ኤልቅ ጌይን ዎይሊን ዬ̈ኪ̇ዴ።

Currently Selected:

ማ̈ርቆ̈ሳ 14: ኦጫ̈ቃማ

Highlight

Copy