ዋ̈ኒ̇ሳ 16
16
1“ታ̈ኒ ዓና ዎይ ዪንታ̇ብ ሶ̈ሊኖንዳ ዪንቲ̇ ዪንታ̇ ኣማ̇ኒን ጋልዳፖ̇ ጋስ ማ̈ቃካ̇ዮ̈ዲፌ̈ኒዬ። 2ኣሳን ኣይሁዳ ዎ̈ሳ ኬ̈ ጋርታ̇ፖ̇ ዪንታ̇ ዳኪ̇ ኬሲ̇̈ሬ። ማ ዪኒፖ̇ ኣ̈ር ዪንታ̇ ዎዝ ኣሲ ዎይ ፌ̈ና ጾ̈ሳ̇̇̈ቦ ኦ̈ዝ ኣስፌ̈ን ፋይዲንቲ̇ዝ ኬሊ̇ ዬይሬ። 3ዪኖ̇ ዎይ ኢንቲ̇ ዎታዚንዳ ኢንቲ̇ ቴ ባ̈ባ̈ዳር ማ̈ቂ̇ን ታ̈ና ኤራካ̇ዮኮታ̇ቦ። 4ቴ ዪንታ̇ብ ቲ̈ኒታር ዓኖ̇ ሶ̈ሊኖንዳ ዪና̇ ማ̈ቃ̇ዝ ኬሊ̇ን ዬሌ̇ጌይን ቴ ዪንታ̇ብ ሶ̈ሊኖን ዪንቲ̇ ኤልቅ ዎታምፔ̈ኔ። ቴ ዪኖ̇ ዎይ ቲ̈ኒታር ዪንታ̇ብ ሶ̈ላካ̇ዮንዳ̇ ቴ ዪንታ̇ባር ዎኮታ̇ቦ።”
ጌ̈ሻ̇ ኣያ̇ና ኦ̈ሳ
5“ዪዚ ዓት ታ̈ኒ ታ̈ና ኪ̈ቲ̇ ሚሺኖ̈ኮ ሉካ̇̈ሬ፤ ማ̈ቂናካሬ ዪንታ̇ ጋርታ̇ፖ̇ ኦ̈ናካሬ ታ̈ና ‘ኔ ዎይ ሉካ̇̈ራ’ ጋ̈ር ኦይጪ̇ዝ ኣሲ ባዬ። 6ዓት ዪኖ̇ ቴ ዪንታ̇ብ ሶ̈ሊኖኮታ̇ቦ ዪንታ̇ ቡ̈ዳ ጋርታ̇ ዪንቲ̇ ዎይሊን ሙዲዲኔ። 7ዎቲናካር ቴ ዪንታ̇ብ ኪን ጋ̈ሬ፥ ቴ ሉካ̇ዚንዳ̇ ዪንታ̇ብ ኮሼ̇። ቴ ሉካ̇ካይ ኣቴጌይን ዪንታ̇ ሚንዛ ዪንታ̇ክ ዬ̈ባሴ፤ ቴ ሉኬ̇ጌይን ኢያ ዪንታ̇ብ ሚሻንዳ̇። 8ኢ ዬ̈ሪ ኣላሚን ጋልዳ ዎ ኣሳን ናጋራ ጎይ፥ ጺሊ̇ቲ ጎይኬ ጾ̈ሳ̇̇ ፊርዲን ጎይ ኢንታ̇ብ ዎ ኢ̈ቲኖ ቆፊን ፋላ̇ ጋልዳ ኬሳ̇ር ኢንታ̇ ቤይሲ̈ሬ። 9ኢ ናጋራ ጎይ ሶ̈ላዚንዳ̇፥ ኢንቲ̇ ታ̈ና ኣማ̇ኒባሶኮታ̇ቦ፥ 10ጺሊ̇ቲ ጎይ ሶ̈ላዚንዳ̇፥ ታ̈ኒ ቴ ባ̈ባ̈ኮ ሉካ̇ዚምቤኬ ዓኒፖ̇ ጌዳ ዪንቲ̇ ታ̈ና ቤቂ̇ባ̈ሶንኮታ̇ቦ። 11ፊርዳ̇ ጎይ ሶ̈ላዚንዳ፥ ዓና ኣላሚን ላ̈#16፡11 ዓና̇ ኣላሚን ላ̈ ጌይኖ̈ዲ ሴ̈ጣና ጋልዳ ጾ̈ሲ̇ ፊርዲ̇ኖኮታ̇ቦ።
12“ቢርት ቴ ዪንታ̇ብ ዎይሊን ሶ̈ሊዝ ባዚ ዎ፤ ቴ ዓት ዪንታ̇ብ ሶ̈ሌጌዪን ዪንቲ̇ ቦቲጛካ̇ይ ዎይ ዪንታ̇ ቡ̈ዳ ጋርታ̇ ጋዳ̇ንዳብ ዪንታ̇ ዴ̈ጻ̇̈ሬ። 13ዎቲናካሬ ጾ̈ሳ̇̇ ኪንባር ኢ ኦ̈ናኮ ኢ̈ኮን ኤሪሲዝ ኣያ̇ና ዬ̈ዬጌዪንዶ ኢ ኪን ጎይ ዎይ ዪንታ̇ ቲ̈ኒሬ። ኢ ሶ̈ላዚንዳ ፌ ሲስኪ̇ኖ ባዚንዶዶኬ ፌ ጋልዳፖ̇ ኬሲ̇ ሶ̈ሊባሴ፤ ኢ ቢርት ቲ̈ን ዬይዝ ባዝ ዪንታ̇ብ ሶ̈ሊ̈ሬ። 14ታ̈ፖ̇ ኤካ̇ሪ ዪንታ̇ብ ሶ̈ሊዛኮታ̇ቦ ታ̈ና ቦንቺ̇̈ሬ። 15ቴ ባ̈ባ ባዝ ማ̈ቂኖን ዎይ ቴ ባዜ፤ ዪዚ ዪኒ̇ኮታ̇ቦ ታ̈ኒ ‘ኢ ታ̈ፖ̇ ኤካ̇ር ዪንታ̇ብ ሶ̈ሊሬ’ ጋ̈ር ቴ ዪንታ̇ብ ሶ̈ሊኖንዳ̇።
16“ጊላ̇ ቃማ̇ፖ̇ ዎሃ ዪንቲ ታ̈ና ቤቂባ̈ሴ፤ ማ ጊላ̇ ቃማ̇ፖ̇ ዎሃ ታ̈ና ቤቂ̇̈ሬ” ጌይዴ።
ዬሱ̈ሳ ታማ̈ራን ዚቃንታ̇ ሙዲዲኖን ዓት ኡፋይቲ̇̈ሬ
17ኢ ታማ̈ራን ጋርታፖ̇ ፔታ̇ን ፔታ̇ናን ዎልዎልኣ “ ‘ጊላ̇ ቃማ̇ፖ̇ ዎሃ ዪንቲ̇ ታ̈ና ቤቂ̇ባ̈ሴ፤ ማ ጊላ̇ ቃማ̇ፖ̇ ዎሃ ታና ቤቂ̈̇ሬ’፥ ማ ‘ቴ ቴ ባ̈ባ̈ኮ ሉካ̇̈ሬ’ ዪና̇ ኢ ጋ̈ዚን ኣብዛ?” ጌይዴ። 18“ዪዚ ዪና̇ ‘ጊላ̇ ቃማ̇ፖ̇ ዎሃ’ ጌይኖ ባዚን ኣብዛ? ኢ ሶ̈ላዝ ባዚንዳር ኑ̈ብ ጌላባሴ” ጋ̈ሪ ማሂ ማሂ ዎልዎልኣ ኦይጪ̇ዴ።
19ዬሱ̈ሳሬ ኢንቲ̇ ኢያ ኦይጫ̇ንዳብ ኮዪኖን ኤራሪ ኢንታ̇ኮ “ዪንቲ̇ ዎልዎልኣ ኦይጫ̇ዚንዳ̇ ቴ ዪንታ̇ኮ ‘ጊላ̇ ቃማ̇ፖ̇ ዎሃ ዪንቲ̇ ታ̈ና ቤቂዝዳ፤ ማ ጊላ̇ ቃማ̇ፖ̇ ዎሃ ታ̈ና ቤቂ̇ባ̈ሴ’ ጌይኖንኮቲ̇ያ? 20ቴ ዪንታ̇ብ ኪን ሶ̈ላ̈ሬ፥ ኣላሚን ጋልዳ ዎ ኣሳን ኡፋይታ̇ምባራ ዪንቲ̇ ዬ̈ኪ̈ሬ ማ ሙዲዲ̈ሬ፤ ዪንቲ̇ ሙዲዲ̈ርዶ̈ን ዪንታ̇ ሙዲዲንዳ̇ ኡፋይስ ላ̈ሚንታ̇̈ሬ። 21ማጮ̇ ዎዳ ኣታ̇ራ ዬላ ቃሚ̇ ኡኬ̇ጌይንዶ̇ ‘ቴ ዎዛ̈ርታ̇ርዶኔ’ ጋ̈ራ ቲ̈ራ̈ሬ፤ ዬሊኖፖ̇ ዓኒ ናኢ ኣላሚን ዓኒ ጋልዳ ዬሊንቲ̇ኖኮታ̇ቦ ኡፋይታ̇ራ ኢዛ ቲ̈ን ጫና̇ቂንቲ̇ኖን ዎይ ቦቲጛ̈ሬ። 22ዪንታ̇ሬ ዪና̇ ኢዝፌ̈ን ዓት ሙዲዲ̈ርዶ̈ን ማ̈ቃ̇ር ቴ ዪንታ̇ ቤቂ̇ዛኮታ̇ቦ ዪንቲ̇ ኡፋይቲ̇̈ሬ፥ ዪንታ̇ ኡፋይሲ̇ንዳሬ ዪንታ̇ ጋልዳፖ̇ ኦ̈ናካር ኤኪ̇ዝ ኣሲ ባዬ̇። 23ዪና̇ ኢዝ ቃሚ̇ንባራ ዪንቲ̇ ቴ ጋልዳ̇ፖ̇ ኣባካር ጌሺባ̈ሴ። ቴ ዪንታ̇ክ ኪን ጋ̈ሬ፥ ቴ ባ̈ባ̈ዲ ዪንቲ̇ ቴ ሱ̈ምባር ጌሻዝ ባዚን ዎይ ዪንታ̇ብ ኢሚ̇̈ሬ። 24ዪንቲ̇ ዓኖ̇ ዬላ̇ር ቴ ሱምባራ ኣባካር ጌሻካ̇ዬ። ጌሺብቴ̇ ዪንቲ̇ ኤኪ̇̈ሬ፤ ዪንታ̇ ኡፋይሲንዳ̇ሬ ፎቲ ማ̈ቃ̈ሬ።
25“ዓኖ̇ ዬሊ̇ዝ ዲራ̈ስ ቴ ዪንታ̇ብ ሚሳ̇̈ሊባር ሶ̈ላዴ። ዓኒ̇ፖ̇ ጌዳ ታ̈ኒ ሚሳ̇̈ሊባር ሶ̈ላባሶ ኬሊ̇ ዬይሬ፤ ቴ ባ̈ባ̈ ባዝ ፋል̇ ዪንታ̇ብ ሶ̈ላ̈ሬ። 26ዪና̇ ኢዝ ቃሚ̇ንባራ ዪንቲ ቴ ሱምባር ጌሺ̈ሬ፤ ታ̈ኒ ዪንታ̇ ጊሻቦ ቴ ባ̈ባ̈ ጌሻንዳ̇ ጋ̈ባሴ። 27ኣባ ጌይን ቴ ባ̈ባ̈ ፌ ቆማ̇ብ ዪንታ̇ ካ̈ሬ። ኢ ዪንታ̇ ካዚንዳ̇ሬ ዪንቲ̇ ታ̈ና ካዚንኮታ̇ብኬ ቴ ጾ̈ሳ̇̇ ቲ̈ናፖ̇ ዬይኖን ዪንቲ ኣማ̇ኒኖኮታ̇ቦ። 28ታ̈ኒ ቴ ባ̈ባ̈ ቲ̈ናፖ̇ ዓና̇ ኣላሚን ጋልዳ̇ ዬይኔ። ዓት ዓና̇ ኣላሚን ኣሻ̇ራ ማ̈ቃ̇ ቴ ባ̈ባ̈ኮ ሉካ̇̈ሬ” ጌይዴ።
29ኢናፖ̇ ኢ ታማ̈ራ̈ን ኢ̈ኮ “ኔ ዓት ሚሳሊባር ጊዳካ̇ይዶ̈ን ፋል̇ ሶ̈ላዴ። 30ዓት ኔ ዎይ ባዝ ኤራዚንዲ̇ኬ ኦ̈ናካር ኣባክ ኔ̈ና ኦይጫ̇ንዳብ ኮሺ̇ባ̈ሶን ኑ ኤሪኔ፤ ዪኒ̇ባራ ኔ̈ኒ ጾ̈ሳ̇̇ ቲ̈ናፖ̇ ዬይኖን ኑ ኣማ̇ኒ̈ሬ” ጌይዴ።
31ዬሱ̈ሲ ኢንታ̇ኮ “ዓት ዪንቲ̇ ኣማ̇ኒኔ! 32ማ̈ቂ̇ናካሬ ዪንቲ̇ ላ̈ሊ̇ንታ̇ር ዎይ ዪንታ̇ ኣ̈ል ዪንታ̇ ኣ̈ል ሉካ̇ር ታ̈ና ሙታ̇ ኣሺ̇ዝ ኬሊ̇ ዬይሬ፤ ኬል̇ ኢዛር ዓት ዓኖ̇። ዎቲናካር ቴ ቴ ቆማ̇ብ ኣታ̇ባሴ፤ ታ ባ̈ባ̈ ታባር ዎ። 33ዪኖ̇ ቴ ዪንታ̇ብ ሶ̈ሊኖንዳ̇ ዪንቲ̇ ታባር ዶኤጌይን ሳሪቲ ዪንታ̇ብ ዶኣምፔ̈ኔ። ዪንቲ̇ ኣላሚን ጋልዳ ዎምባራ ሜታ ዪንታ̇ብ ዎ፤ ዎቲናካሬ ዓይዞ ኢ̈ጫ̇ፒ̇ቴ! ታ̈ኒ ኣላሚን ጋሚኔ” ጌይዴ።
Currently Selected:
ዋ̈ኒ̇ሳ 16: ኦጫ̈ቃማ
Highlight
Share
Copy
Want to have your highlights saved across all your devices? Sign up or sign in
