ሃዋ̈ 7
7
ኢስጣፋ̈ኖ̈ሲ ሶ̈ሊኖ ሶ̈ላ
1ቄ̈ሳ ኣላቃንቦ ኣላቃ̈ዲ ኢ̈ኮ “ኣሳ̈ ኔ ጋልዳ ሺ̈ሺ̇ኖ ዓ ኪንያ?” ጋ̈ር ኦይጪ̇ዴ̈። 2ኢስጣፋ̈ኖ̈ሳሬ ኢንታኮ “ቴ ኢሺንታንኬ ታ ባ̈ቢንታን! ቴ ጋ̈ዚን ሲስኪ̇ብቴ! ኑ ባ̈ባ̈ ኣብራሃሞ ካ̈ራን ጋዳ̇ ዶኣንዳብ ሉካ̇ናፖ ቲ̈ን ኢ ቢርት ሜሶጶጣ̈ማ ጋዳ̇ ዎዶን ቦንቺንቲ̇ኖ ጾ̈ሳ̇̇ዲ ኢ̈ብ ቤንታ̇ሪ፥ 3‘ኔ ጋዲንዲኬ ኔ ዳባ̇ን ኣሻ̇ራ ቴ ኔ̈ና ቤይሳዝ ጋዲን ጋርታ̇ ሉካ̇ቤ’ ጌይዴ።
4ኢያሬ ካላዳ̈ዋን ጋዳ̇ፖ̇ ኬስካ̇ሪ ካ̈ራን ጋዳ̇ ዶኢዴ። ኢናፖ̇ ኢ ባ̈ባ̈ ዓይቂ̇ኖፖ̇ ዓኒ ጾ̈ሲ ኢያ ኢናፖ̇ ኬሳ̇ሪ ዓት ዪንቲ ዶኣዝ ጋዲን ጋርታ ኤሄይዴ። 5ዪና̇ ኢዛ ጋዲን ጋርታ ሜላ ኣቲ̇ን ቶሂ ኤቂ̇ዝ ቤስ̇ ማ̈ቃምፔ̈ኖ ጋድ ቃጻ̇ር ኢ̈ብ ኢማ̇ካዬ። ዎቲናካሬ ዪና̇ ኢዝ ኬ̈ሊምባራ ኣባካር ናኢ ኢብ ባይዶን ኢ̈ባኬ ኢ ዜርንቦ ጋዲን ኢዞ ዉርሲ ኢማ̇ንዳቦ ጾ̈ሲ ቃ̈ላ ጌሊዴ። 6ማ ጾ̈ሲ ኢ̈ኮ ‘ኔ ዜር ኣሳ ጋዳ̇ ቤ̈ት ማቃ̇ሪ ኢና ኦይዲ ጼ̈ታ ላ̈ይ ኢንታ̇ብ ኣይላ ማ̈ቂ ዋ̈ያ ዋ̈ዪ ዶኢሬ̈። 7ዎቲናካሬ ኢንታ ኣይላ ዎጚኖ ኣሳን ቴ ኢንታ ጋልዳ ፊርዳንዳ፤ ኢናፖ̇ ጋዲን ኢዝ ጋርታፖ̇ ኢንቲ̇ ኬስካ̇ሪ ቤስ̇ ዓንዳ ታ̈ብ ጎሽቲ̈ሬ’ ጋ̈ር ሶ̈ሊኔ። 8ኢናፖ̇ ኣብራሃ̈ማቦ ኣቲናእ ጋራ̇ዚዝ ዎጋ ጾ̈ሲ̇ ኢ̈ብ ኢሚ̇ዴ። ዪዚ ኣብራሃ̈ሚ ፌ ናኣ ዪሳ̈ቃ ዬላሪ ላማካይ ቃምባራ ጋራ̇ዚዴ፤ ዪሳ̈ቃሬ ፌ ናኣ ዓይቆ̈ባ ዬላር ጋራ̇ዚዴ፤ ዓይቆ̈ባሬ ኢስሬ̈ል ዜርን ዎይንቦ ባ̈ባ ማ̈ቂ̇ኖን ታ̈ጶ ናምኣን ጋራ̇ዚዴ።
9“ዓይቆ̈ባ ናኣን ፌ ኢን̇ናኣ ዮ̈ሴ̈ፋ ጋልዳ ቃና̇ኣሪ ጊብጻ ጋዳ̇ ኣይላ ማ̈ቂ̇ ኣታ̇ምፔ̈ን ኢያ ዎጚዴ፤ ዎቲናካር ጾ̈ሲ ኢባር ዎኮታ̇ቦ፥ 10ኢ ጋልዳ ዬይዝ ሜታ ዎይ ጋርታፖ̇ ኢያ ኬሲ̇ዴ። ጊብጻ ካ̈ታ ፋ̈ሮና ቲ̈ን ካንቲ̇ኖ ኣስ ማ̈ቃምፔ̈ኒ ዎቲዴ ማ ኤሪቲር ኢ̈ብ ኢሚ̇ዴ። ዪ̈ቦ ፋ̈ሮኒ ኢያ ጊብጻ ጋዳ̇ኬ ፌ ኣ̈ል ዎ ባዝ ዎይ ጋልዳ ሹ̈ሚዴ።
11“ዪና ኢዝ ኬል̇ባራ ጊብጻ ጋዳ̇ኬ ካና̈ን ጋ̈ዳ̇ ዎይ ጴች ሜታ ጋርታ ቶጚዝ ጋፊ ጌሊዴ። ኑ ባ̈ቢንታንሬ ሙይዝ ባዚ ኢንታ̇ ዪዴ። 12ዓይቆ̈ቢ ጊብጻ ጋዳ̇ ካ ዎን ሲስካ̇ሪ ኑ ባ̈ቢንታን ጊብጻ ጋዳ̇ ሚሺዴ። 13ናምኢ ኢንቲ ሉካ̇ምባራ ዮ̈ሴ̈ፊ ፌ̈ና ፌ ኢሺንታንቦ ኤርሲዴ። ፋ̈ሮናር ዮ̈ሴ̈ፋ ዳባ̇ን ኤሪዴ። 14ዪኒፖ̇ ዓኒ ዮ̈ሴ̈ፊ ፌ ባ̈ባ̈ ዓይቆ̈ባኬ ፌ ዳባን̇ ታብዛ ታጶ ኢሺ̇ን ኣስ ዎይ ካና̈ናፖ̇ ጊብጻ ዬ̈ምፔ̈ን ኪ̈ታር ሚ̈ሺዴ። 15ዪዚ ዓይቆ̈ቢ ጊብጻ ጋዳ̇ ሉኪ̇ዴ፤ ማ ኢያኬ ባ̈ቢ̈ንታን ዎይ ኢና ዶኢ̈ርዶሪ ዓይቂ̇ዴ። 16ኢንታ ኣሃ̇ንሬ ሴ̈ኬ̈ማ ጌይዝ ቤስ̇ ኣብራሃ̈ሚ ፌ ሚ̈ሻ̇ባር ኤ̈ሞር ናኣን ጋልዳፖ̇ ጎሪቦ ጌይ ዎጚኖ ሳ̈ዚን ጋልዳ ኤጛር ዱ̈ኪ̇ዴ።
17“ጾ̈ሲ ኣብራሃ̈ማብ ኢማ̇ንዳ ጋ̈ር ቃ̈ላ ጌሊኖ ኬሊ̇ን ፎቲንታ̇ንዳብ ኡካ̇ምባራ ጊብጻ ጋዳ̇ ዎ ኑ ዎርዣ ዬሊንቲ ዎይሊሙታ̇ ሉኪ̇ዴ። 18ዪኒፖ̇ ዓኒ ዮ̈ሴ̈ፋ ኤርባሶ ሜላ ካ̈ቲ̇ ጊብጻ ጋዲን ጋልዳ ካዉቲዴ። 19ካ̈ታ ዪ̈ዲ ኑ ዎርዣን ጋልዳ ዉጪቲ ዎይሊን ኢንታ̇ ዋ̈ይ ቢርት ዬሊንቲ̇ኖ ኣቂሊ ናኣን ዓይቃ̇ምፔ̈ን ዎልቃባር ‘ዛና ኬሳ̇ር ቶጚብቴ’ ጌይዴ። 20ዪዚ ዪና̇ ኬ̈ሊምባራ ሙ̈ሶ ዬሊንቲ̇ዴ፤ ኢያሬ ዎይሊን ቆይሲዝ ናኢዶር ኢ̈ብ ዓይዚ̇ ኣጋን ማ̈ቂ̇ዝ ዲራስ ፌ ባ̈ባ̈ ኣ̈ል ዶኢዴ። 21ኢናፖ̇ ኢ ዛ̈ና ቶጚንቲኖ ኬል̇ባራ ካ̈ታ ፋ̈ሮ̈ና ናኢን ኢያ ዲጛ ኤካ̇ራ ፌ ናእፌ̈ን ማሃር ዲቻ̇ዴ። 22ሙ̈ሳሬ ጊብጻንኮን ኤርቲን ዎይ ታማ̈ሪዴ። ፌ ሶ̈ሊዝ ሶ̈ላንባርኬ ፌ ኦ̈ሳባራ ዎይሊን ኤሪንቲ̇ኖ ኣስ ማ̈ቂ̇ዴ።
23“ሙ̈ሳቦ ኦይዲ̇ ታ̈ጳ ላ̈ይ ማ̈ቂ̇ንዶ̈ን ኢ ፌ ዳባ̇ን ኢስሬ̈ላ ዜርን ቤቃ̇ንዳቦ ፌ ቡ̈ዳ ጋርታ ቆፒ̇ዴ። 24ኢያሬ ጊብጻ ኣስ ፔታ̇ንዶሪ ኢስሬ̈ላ ዜር ማ̈ቂ̇ኖ ፔቲ̇ ና̈ሳ ጋልዳ ኢ̈ታ ባዝ ኦ̈ምባር ቤቃ̇ሪ ኢያ ማ̈ዳ̇ሪ ጊብጻ ጋዶ̇ ና̈ሳ ቡካ̇ር ዎዴ። 25ኢ ዳባ̇ን ጾ̈ሲ ኢ ኩሽባር ኢንታ̇ ኣይሊቲ ጋርታፖ ኬሳ̇ዚን ኢንቲ ኤሪኖ ኢ̈ክ ማይጺንዶ̈ን ኢንቲ ፌ̈ብ ኤራካ̇ዬ። 26ማ ኢዝ ዎንን ናምኢ ኢስሬ̈ላ ናኣን ዎልኣ ዋምባር ዬላ̇ሪ ኢንታ ዎልኣ ኢጊንዳብ ኮያሪ ኢንታኮ ‘ናኢቶ! ዪንቲ ዎል ዎልኣ ዳብ̇ሽዋ፤ ኣባብ ዎልኣ ዋ̇̈ራ?’ ጌይዴ̈።
27“ፌ ላጋ̇ ቡኪ̇ዛዲ ዓኒ ኢ̈ክ ማ̈ቃ̇ሪ ኢያ ሱጋር ኢ̈ኮ ‘ኔ̈ና ኑ ጋልዳ ፊርዳምፔ̈ን ዳይና ማሃር ሹ̈ማ ኦ̈ኖ? 28ዎይ ኔ ዚና̈ብ ና̈ሳ̈ ጊብጻ ዎኖንዲፌ̈ን ታ̈ና ዎንዳ ኮያ̈ራ?’ ጌይዴ። 29ሙ̈ሳር ዪኖ̇ ሲስካ̇ሪ ቤታር ሚ̈ዳም ጋዳ̇ ሉካ̇ር ዶኢዴ። ኢያር ኢና ዶኢ̈ርዶሪ ናምኢ ኣቲና ናኢ ዬሊዴ።
30“ሙ̈ሶ ኢና ኦይዲ ታጳ ላይ ዶኢኖፖ̇ ዓኒ ፔቲ̇ ጋላስ ሲ̈ና ኢንዲን ላፍ ዎ ባራሂንኮ ሉኪ̇ዴ። ኢና ሻይዳ ጋርታ ኤይቲ̇ዝ ታማ ላን ጋርታ ጾ̈ሳ̇ ኪታ̇ንቻ ኢባር ቤንቲዴ̈። 31ሙ̈ሶ ዪና ቤቃ̇ር ጋራ̇ሚንታሪ ባዚን ኮሺንቺ̇ ቤቃ̇ንዳብ ጌዳ ኡኪ̇ን፥ 32‘ታ̈ኒ ኔ ባ̈ቢንታን ኣብራሃማ፣ ዪሳ̈ቃኬ ዓይቆባ ጾ̈ሴ’ ጋ̈ሪ ጾ̈ሳ̇̇ ሶ̈ሊን ሲስካሪ ኢቺ̇ ኢያ ኤ̈ን ኮት̇ ዎቲ ቤቃ̇ንዳብ ዳንዳኣካ̇ዬ።
33“ጎዳ̈ዳር ኢ̈ኮ ‘ኔ ኤቂ̇ኖ ቤሲ̇ን ጌሽ̇ ሳ̈ዝ ማ̈ቂ̇ኖኮታ̇ቦ ኔ ጫ̇̈ሚን ኔ ቶሂን ጋርታ̇ፖ̇ ኬሳ̇ቤ፤ 34ጊብጻ ጋዳ̇ ዎ ቴ ዎርዣ ሜታ ኪን ቴ ቤቂ̇ኔ፤ ኢንቲ ሜቲንታር ዉይሳዝ ዉይሲን ቴ ሲስኪ̇ኔ፤ ዪ̈ኮታ̇ቦ ቴ ኢንታ̇ ኣይሊቲ ጋርታፖ̇ ኬሳ̇ንዳብ ሶ̈ቢኔ፤ ዪዚ ዓይ ዬ̈ቤ! ቴ ኔ̈ና ጊ̈ብጻ ጋዳ̇ ማሃ ሚሻንዳ’ ጌይዴ።
35“ዪዚ ኢስሬ̈ል ዜርን ‘ኣቂሲዝ ኣሲኬ ፋራዲዝ ኣስ ማሂ ኔና ሹ̈ማ ኦኖ?’ ጋ̈ር ሌቂኖንኮ ዓ ሙ̈ሳ ጾ̈ሲ ሻይዳ ጋርታ̇ዶር ቤንቲ̇ኖ ኪታ̇ንቻ̇ ጎይባራ ኢያ ኣስ ኣቂሲዝ ኣስኬ ኣይሊቲ ጋርታፖ̇ ኬሲ̇ዝ ኣስ ማሃሪ ዪንታ̇̇ክ ሚሺኔ። 36ኢ ኢንታ ጊብጻ ጋዳ̇ፖ̇ ቲ̈ናር ኬሲ̇ዴ፤ ጊብጻ ጋዳ̇ ኢናኬ ኤርቲራ ባሃ̈ሪን ጋልዳኬ ማ ኦይዲ ታ̈ጳ ላ̈ይ ባራሃ ጋርታ̇ ጋራ̇ሚሲዝ ባዝኬ ታ̈ሚራታ ማላ̇ን ኦ̈ዴ። 37‘ጾ̈ሳ̇̇̈ዲ ታ̈ና ኬሲ̇ኖ̈ዲፌ̈ኒ ዪንታ̇ ጋርታ̇ፖ̇̈ ሜላ ናቢ ዪንታ̇ቦ ኬሲ̇̈ሬ̈’ ጌዪ ኢስሬ̈ል ዎርዣንቦ ሶ̈ሊኖ ዪ̈ ሙሳ ኢያ። 38ኢ ሲ̈ና ኢንዲን ጋልዳዶ̈ሪ ኢ̈ክ ሶ̈ሊኖ ኪታ̇ንቻ̇ባራ፥ ባራሃ ጋርታ ሺ̈ቂኖ ዎርዣባራ ማ ኑ ባ̈ቢ̈ንታንባር ዎልኣ ዎ ኢያ። ኢ ጾ̈ሳ̇ ጋልዳፖ̇ ኤካ̇ሪ ሼምፓ ኢሚ̇ዝ ቃ̈ላ ኑ̈ብ ሶ̈ሊኖ ዪ ሙ̈ሳ።
39“ኑ ባ̈ቢንታን ኢ̈ያ ኢጺ̇ዶ̇ኬ ኢ̈ብ ኪ̈ቲንታ̇ንዳብ ኮያካ̇ዬ። ጋስ ጊብጻ ማ̈ቂ̇ ሉካ̇ንዳቦ ፌ ቡዳ ጋርታ̇ ቆፒ̇ዴ። 40ኣ̈ሮናኮ ‘ኑ ቲ̈ኒን ዬ̈̇ዝ ጾ̈ስ ኑ̈ብ ኮቻ̇ቤ፤ ጊብጻ ጋዳፖ̇ ቲ̈ናር ኑ̈ና ኬሲ̇ኖ ሙ̈ሳ ኣ ሜታ ኢያ ዬ̈ሊኖኮ ኑ ኤሪባ̈ሴ’ ጌይዴ። 41ዪና̇ ኢዝባራ ኦ̈ጋና ሚሲላ ኮቻ̇ሪ ዪ ሚሲላ̈ቦ ዣ̈ርሻ ሺ̈ሺ̇ዴ፤ ፌ ኩሽባር ኮቺ̇ኖ ባዚንባር ኡፋይቲ̇ ዶ̈ጚዴ። 42ዪኒ̇ቦ ጾ̈ሲ ኢንታ ጋልዳፖ ጎቲ̇ዴ ማ ኣፎ ቤርሳንቦ ጎሽታምፔ̈ን ኢንታ ኣ ኢሚ̇ዴ። ዪ̈ዳሬ ናባን ማጻፋ ጋልዳ፦
‘ኢስሬ̈ሎ ኣሳን!
ዪንቲ̇ ኦይዲ ታ̈ጳ ላ̈ይ ኩም ባራሃ ጋርታ
ሜሃ ሹኪ ሙታ̇ ዣ̈ርሻ ሺ̇̈ሺ̇̈ኖ ታ̈ቢያ?
1 43ዪንቲ̇ ጎሽታ̇ንዳብ ዪንታ̇ ኩሽባር ኦ̈ኖ
ሞ̈ሎካ ጌይዝ ማቃ ጾ̈ሳ̇ ዱንካ̈ኒንዲኬ
ሬ̈ፋና ጌይዝ ዪንታ̇ ጾ̈ሳ̇̇ ቤ̈ርሳ ሚሲላ ቶ̈ካ̇ር ዬ̇ዴ።
ዪ̈ኮታ̇ቦ ቴ ዪንታ̇ ባ̈ቢሎናፖ ጌዳ ፊ̈ንስ ዳካ̇ንዳ’ ጋ̈ር ጻ̈ፊንቲ̇ኖ̈ዲፌ̈ኒዬ።
44“ኑ ባ̈ቢንታን ባራሃ ጋርታ ጾ̈ሳ̇̇ ኢንታ̇ባር ዎን ኤርሲዝ ዱንካ̈ኖ ኢንታብ ዎ። ሙ̈ሶ ዪና̇ ዱንካኒን ጾ̈ሲ ኢያ ቤይሲኖንዲፌ̈ንኬ ኪ̈ቲ̇ኖንዲፌ̈ን ኦ̈ዴ። 45-46ኢናፖ̇ ዎሃ ኑ ባ̈ቢንታ̇ን ፌ ባ̈ቢንታ̇ንፖ̇ ዱንካ̈ኒን ኤካ̇ሪ ኢያ̈ሳባር ዎል ማ̈ቃ̇ር ጾ̈ሲ̇ ኢንታ̇ ጋዲን ጋርታ̇ፖ̇̇ ዳኪ̇ ኬሲ̇ኖ ኣይሁድ ባዮ̇ ኣሳን ጋዲን ጋርታ̇ ጌልሲዴ። ዪዚ ዪና̇ ዱንካ̈ኒንዳ ጾ̈ሳ ቲ̈ን ካንቲ̇ኖ ማ ኢ̈ብ ዓይቆባ ጾ̈ሳ̇ቦ ኬ̈ ኬ̈ጻ̇ንዳቦ ጌሺኖ ዳ̈ዊታ ኬል̇ ዬሊ̇ዝ ዲራስ ኢና ዶኣዴ። 47ዎቲናካሪ ጾ̈ሳ̇ቦ ኬ̈ን ኬ̈ጻዲ ሶሎሞ̈ና።
48“ማ̈ቂኔካሬ ዎይፖ ሾ̈ክ ጌይኖ ጾ̈ሳ̇̇̈ዲ ኣሳ ኩሽባር ኬ̈ጺንቲ̇ኖ ኬ̈ ጋርታ ዶ̈ኢባ̈ሴ። ዪ̈ዳሬ ና̈ባ ሶ̈ሊ̈ርዶሪ፦
49‘ኣፎ ሳ̈ዚን ቴ ዶ̈ኢዝ ቤሴ̇፤
ሳ̈ዶ̇ ሳ̈ዚን ቴ ቶሂ ሼምፒ̇ዝ ቤሴ̇፤
ዪዚ ዪንቲ̇ ታ̈ብ ኬ̈ጻ̇ዝ ኬ̈ን ኣፌ̈ኖ ኬ̈?
ቴ ሼምፓ̇ዝ ቤሲ̇ን ዎኒ̇ፌ̈ኖ ቤሳ̇? ጌይሬ ጎዳ̈ዲ።
50ዓ ዎይ ኦ̈ኖ ታ̈ና ባያ?’ ጋ̈ሪ ሶ̈ሊኔ።
51“ዪንቲ ቡዳ ዛቢሳን፥ ዋ̈ይ ሲስኪ̇ባ̈ሶ ኣሳን! ዪንታ̇̇ር ዪንታ̇ ባ̈ቢንታንፌ̈ን ዎይ ጋላስ ጌ̈ሻ ኣያ̇ና ኢጺ̈̇ሬ! 52ዪንታ̇ ባ̈ቢንታን ዳካካ̇ዮ ናቢ ዎ? ሜላ ኣቲ̇ን ‘ጺላ̇ ዬይሬ’ ጋ̈ሪ ቲ̈ኒታር ሶ̈ሊኖ ናባንር ዎ̈ኔ፤ ዪንታ̇̇ሬ ኢያ ዓይቃብ ዓ ኢሚ̇ዴ ማ ዎ̈ዴ። 53ጾ̈ሳ̇̇ ሂጊ̇ን ዪንታ̇̇ብ ጾ̈ሳ̇̇ ኪታ̇ንቻ ጎይባራ ኢሚንቲ̇ንዶ̈ን ዪንቲ̇ ኢዞ ና̈ጋካ̇ይ ኣቲ̇ዴ” ጌይዴ።
ኣሳን ኢስጣፋ̈ኖ̈ሲ ሹችባር ቆጺ̇ ዎዴ
54ኣይሁድ ፊርድ ኣ̈ሎ ኣሳን ዪኖ̇ ሲስካ̇ሪ ጴች ጎይሊ ፌ̈ና ዓርጪ̇ዴ። 55ዪኒ̇ባራ ኢስጣፋ̈ኖ̈ሲ ጌ̈ሻ̇ ኣያ̇ናባር ኩማሪ ፉዳ ኣፋ ኮት̇ ዎቲ ቤቃ̇ምባ̇ራ ጾ̈ሳ̇ ቦንቻ̇ ቤቂ̇ዴ። ማ ዬሱ̈ሲ ጾ̈ሳ̇ቦ ኡሻች ጎይ ኤቂ̇ንዶ̈ን ኢያ ቤቃ̇ሪ፤ 56“ዓዲሽ ቤቂ̇ብቴ! ኣፎ ሳ̈ዚ ፊርቂንቲን ኣሳ ናኣ̈ዲ ጾ̈ሳ̇ቦ ኡሻች ጎይ ኤቂ̇ኖ ቤቃሬ” ጌይዴ።
57ዪና̇ ኢዝባራ ኣሳን ፌ ዋይን ኤ̈̇ር ፌ ቆ̈ ሾ̈ክ ዎታር ጴች ዉይሲሙታ̇ዶ̈ሪ ኢ ዎ ቤሲን ዎል ፔታ̇ን ዎጻ̇ር ሉኪ̇ዴ። 58ኢያ ኤ̇ሪ ካታሚንፖ ቡጊድ ኬሳ̇ሪ ሹችባር ቆ ኤ̈̇ዴ̈። ዪኖ̇ ዎታምባ̇ራ ኢና ዎ ኢ ጋልዳ ማርኪ̇ቲኖ ኣሳን ፌ ኣፊላን ናሳ ሳ̈ኦላ ጌይዛ ናኢቲ ላ̈ፍ ጋዲ̇ዴ።
59ኣሳን ኢስጣፋ̈ኖ̈ሳ ቆጻ̇ምባራ ኢ “ጎዳ̇ ዬሱ̈ሶ! ቴ ሼምፒ̇ን ኔ̈ክ ኤካ̇ቤ!” ጋ̈ሪ ዎ̈ሲ̇ዴ። 60ኢናፖ̇ ዓኒ ቡቂንታር “ጎዳ̈ዶ! ዓና̇ ናጋሪን ኔ ኢንታ ጋልዳ ፋይዳፔ̇! ጋ̈ር ጴች ዉይሲዴ፤ ዪኖ ጌይኖፖ̇ ዓኒ ኢ ካሲን ኬስካ̇ዴ።
Currently Selected:
ሃዋ̈ 7: ኦጫ̈ቃማ
Highlight
Share
Copy
Want to have your highlights saved across all your devices? Sign up or sign in
