ሃዋ̈ 12

ጴጥሮ̈ሲ ቃሺ ኣ̈ላፖ̇ ታሚ̇ራ̈ታባር ኬስኪ̇ዴ

1ዪና̇ ኢዝ ኬ̈ሊ̇ንባራ ካ̈ታ ሄ̈ሮዶ̈ሲ ፔቲ̇ ፔቲ̇ ኣማ̇ኒኖ ኣሳን ዳስ̇ ኤ̈̇ዴ። 2ዋ̈ኒ̇ሳ ኢሻ ዓይቆ̈ባ ማሻ̇ባር ዎሲዴ። 3ዪና̇ ኢ ኦ̈ሲንዳ ኣይሁዳን ኡፋይሲ̇ኖን ቤቃ̇ሪ ጴጥሮ̈ሳር ጉጃ̇ር ኤ̈ሲዴ። ኢ ኤ̈̇ንቲ̇ኖ̈ዲ ኣይሁዳን ቂጻ̇ ሙይዝ ባ̈ሊን ቦንቺሙታ̇ ዎን ጋርታ̇። 4ጴ̈ጥሮ̈ሳ ኤ̈ሳሪ ቃሺ ኣ̈ል ጌልሲኖፖ̇ ዓኒ ኦይዲ ኦይዲ ዎታ̇ዳራ ማ̈ቃ̇ሪ ና̈ጋምፔ̈ኒ ታጶ ሌሂ ዎታ̇ዳራንቦ ኢያ ኢሚ̇ዴ። ሄሮዶ̈ሲ ኣይሁድ ባ̈ሊን ኣ̈ጌይንዶ̇ ኢያ ዎርዣ ቲ̈ን ፊርዳብ ሺ̈ሻ̇ንዳቦ ቆፓ̇ሪ ዎቲኔ። 5ጴ̈ጥሮ̈ሳ ቃሺ ኣ̈ል ጌልሳር ና̈ጊሙታ̇ ዎ ዎቲናካሬ ኣማ̇ኒዝ ኣሳን ኢ ጊሻ̇ቦ ሚ̈ጛር ጾ̈ሳ̇ ዎሲ̇ሙታ̇ ዎ።

6ሄ̈ሮዶ̈ሲ ጴ̈ጥሮ̈ሳ ዎርዣ ቲ̈ን ሺ̇̈ሻ̇ንዳብ ቆፒ̇ኖ ቃሚ̇ን ጴ̈ጥሮ̈ሲ ናምኢ ካ̈ቲናባር ቃቺ̇ንታሪ ናምኢ ዎታ̇ዳራንቦ ጊዳ̇ ሱርቂ̇ኔ፤ ቃሺ ኣ̈ሊን ና̈ጊዛንሬ ኢና ካሪን ጋልዳ ኤቃ̇ር ዎ። 7ዪኒ̇ባራ ጎዳ ኪ̈ታንቻ̇ ኦ̈ናካር ቆ̈ፓካይዶን ቤንታ̇ሪ ኬ̈ን ጋርሲ̇ን ፎ̈ኢሲዴ። ኢያር ጴ̈ጥሮ̈ሳ ባሪንን ቡ̈ካ̇ር ባርኪ̇ሳሪ “ኣን ኤሊ ዲንዳ̇ቤ!” ጌይዴ። ዪና̇ ኢዝባራ ካ̈ቲናን ኢ ኩሽታፖ̇ ዱ̈ጳ̇ር ኬዲ̇ዴ። 8ኪ̈ታንቻ̇ዳሬ ኢ̈ኮ “ኔ ኣፊሊን ማኣቤ ኔ ጫ̈ሚ̇ንዳር ኣ̈ቤ!” ጌይዴ። ጴ̈ጥሮ̈ሳሬ ኪ̈ቲንቲ̇ኖንዲፌ̈ን ዎቲዴ። ኪ̈ታንቻ̇̈ዳሬ “ኔ ላጻኒን ማኣራ ቴ ዎሂን ዬ̈ቤ” ጌይዴ። 9ኢያር ዲንዳር ኢ ዎሂን ዬ ኤ̈̇ዴ፤ ዪ̈ ዎይ ማ̈ቃ̇ምባራ ጴ̈ጥሮ̈ሲ ኣይባባር ዎቲዛ ኢ̈ክ ማይጺንዶኬ ኪ̈ታንቻ̇ ዎታዚንዳ ኪን ማ̈ቂ̇ኖን ኢ̈ብ ኤሪንታካ̇ዬ። 10ቲ̈ንኬ ጋስኬ ዱማ ዱማ ቤስ̇̇ ኤቃ̇ር ና̈ጊዝ ዛባን ኣ̈ሪ ካታ̇ማ ኬሳ̇ዝ ጎይሚን ጋልዳ ዎ ሲ̈ላ ዪብን ዬሊ̇ዴ። ዪና ዪብንዳ ኣሲ ኦ̈ናክ ኢዞ ዎ̈ሻካ̇ይዶን ዚምዶኣር ፊርቂንታ̇ዴ፤ ኢንታ̇ር ኬስካ̇ሪ ሙቃ̇ ዬ̇ምባ̇ራ ኪ̈ታንቻ̇ ኤሪንታ̇ካ̇ይ ኢ ጋልዳፖ̇ ባዪዴ።

11ጴ̈ጥሮ̈ሳሬ ኣይባፌኖን ጋርታፖ ባርካሪ “ጎዳ̈ዲ ፌ ኪ̈ታ̇ንቻ̇ ሚሻር ሄሮ̈ዲሳ ኩሽታፕኬ ኣይሁዳን ታ ጋልዳ ዬላ̇ዚን ቤቃ̇ንዳብ ና̈ጊ ዎን ጋልዳፖ̇ ዎይ ታ̈ና ኬሲ̇ኖን ኪንሲ̇ ታ ዓት ኤራዴ” ጌይዴ።

12ዪኖ̇ ኢ ኤሪኖፖ̇ ዓኒ ዎይሊን ኣሳን ሺ̈ቃሪ ዎል ፔታ̇ን ዎ̈ሲ̇ዝ ቤስ̇ ማ̈ርቆ̈ሳ ጌዪ ጼይጊኖ ዋ̈ኒ̇ሳ ኢንዲ̇ን ማ̈ራሚ ኣ̈ል ሉኪ̇ዴ። 13ኢና ዬላ̇ሪ ዛ̈ኖ ካሪን ቆንኪን ሮ̈ዳ ጋ̈ዚን ኢና ኣ̈ሎ ኣሽካራዶ̈ራ ካሪን ቆንኪኖ ኦ̈ናኮ ቤቃ̇ንዳቦ ካሪንኮ ሉካ̇ዴ። 14ጴ̈ጥሮ̈ሳ ቆ̈ ማ̈ቂ̇ኖን ኤራራ ዎይሊን ኡፋይቲ̇ኖኮታ̇ቦ ካሪን ፊርቃካ̇ይዶራ ዎባር ጋስ ማ̈ቃ̇ራ “ጴ̈ጥሮ̈ሲ ካራ ጋልዳ ኤቂ̇ኔ!” ጋ̈ራ ሶ̈ላዴ። 15ኣሳንር ኢዝኮ “ኣ̈ሽ ዣ̈ሽታ̈ራ!” ጌይዴ። ኢዛር ኢያ ማ̈ቂ̇ኖን ማሃር ኮሺንቻር ኢንታ̇ብ ሶ̈ሊን ኢንቲ̇ “ዪዚ ዪ̈ዶኮ ዪ̈ዲ ኢያ ና̈ጊዝ ኢ ኪታ̇ንቻ̇ ዶኢዝዳ” ጌይዴ።

16ጴ̈ጥሮ̈ሲ ካሪን ቆንካዚን ኣሻካ̇ዬ፤ ኢንታ̇ር ካሪን ፊርቂ ቤቃ̇ሪ ጋራ̇ሚንቲ̇ዴ። 17ኢያሬ ኢንቲ ዚም ዶኣምፔ̈ን ፌ ኩሺንባር ቤይሳሪ፥ ጎዳ ቃሺ ኣ̈ላፖ̇ ዎዛ̈ርታር ኢያ ኬሲ̇ኖኮ ኢንታ̇ብ ሶ̈ሊዴ። ኢናፖ̇ “ባዝ ዪኖ̇ ዓይቆባብኬ ኣማ̇ኒኖ ኣሳንቦ ሶ̈ሊብቴ̇” ጋ̈ሪ ኢናፖ̇ ኬስካ̇ር ሜላ ቤስ̇ ሉኪ̇ዴ። 18ኢዝ ዎንን ጌ̈ሽ ዎታ̇ዳራን “ጴ̈ጥሮ̈ሲ ዎይዲ ጌሌ̇?” ጌዪ ሙታ̇ ኢንታ ጊዳ̇ ጴች ዋ̈ቺ̇ ኬስኪ̇ዴ። 19ሄሮ̈ዲ̈ሳሬ ጴ̈ጥሮ̈ሳ ኮይሲን ዪኖፖ̇ ዓኒ ዛባ ናጊዛን ኮሺንቺ̇ ኦይጪዴ፤ ኢናፖ̇ ዛባን ዎምፔን ኪቲ̇ዴ። ኢናፖ ሄሮ̈ዶሲ ይሁዳፖ̇ ቶ̈ራ ቂሳ̈ራ ሉካ̇ሪ ኢና ዶኢዴ።

ሄሮ̈ዲሳ ዓይቃ

20ሄሮ̈ዶ̈ሲ ጢሮ̈ሳኬ ሲዶ̈ና ካታማ ኣሳንባራ ጎይልዶሪ ኢንቲ ዎልኣ ፔታ̇ን ዬ̈ሪ ኢ ኣ̈ሊን ጋርታ̇ ሹ̈ሚንቲ̇ኖ ቢላስጦሳ ጌይዛ ኢንታ̇ ማ̈ዳ̇ምፔ̈ን ኢያ ጌሻር ኤ̈ኤ ዎታሪ ዎልኣ ማ̈ቃ̇ሪ ካ̈ታ̈ባር ኢጊንታ̇ንዳብ ኦይጪ̇ዴ። ዪና̇ ዎቲኖንዳ̇ ኢንቲ̇ ፊ̈ሺ ዲጛዚንዳ̇ ኢ ጋዲምፖ̇ ማ̈ቂ̇ኖኮታ̇ቦ። 21ኢንቲ̇ ኢጊንታ̇ንዳብ ዎል ሺ̈ቂ̈ሬ ጌይኖ ቃ̈ሚንባር ሄ̈ሮዶ̈ሲ ፌ ካ̈ቲንታ̇ ኣፊሊን ማኣሪ ካ̈ቲ ዶኣዝ ቦንች ኩልሚን ጋልዳ ዶኣሪ ዎርዣቦ ሶ̈ሊዴ። 22ዎርዣ̈ዳሬ “ዪ̈ ጾ̈ሳ̇ ቆ̈ዶኬ ኣሳ ቆ̈ ጊዳካ̇ዬ” ጋ̈ሪ ዉይሲዴ። 23ሄሮዶ̈ሳሬ ጾ̈ሳ̇ቦ ቦንች ኢማ̇ካዮኮታ̇ቦ ጎዳ ኪ̈ታ̇ንቻ̈ዲ ኢያ ኢና ጎይሊን ጉጺንታ̇ር ዓይቂ̇ዴ።

24ጾ̈ሳ̇ ቃ̈ላ̈ዲ ሻኪ̇ ሙታ̇ ሉኪ̇ዴ። 25ባርናባ̈ሳኬ ሳ̈ኦ̈ላክ ዎልኣ ፌ ኪ̈ቲንቲ̇ ሉኪ̇ኖ ኦ̈ሲን ዉርሳ̇ሪ ዬሩሳ̈ላማፖ̇ ኣንጾ̈ካ̇ ማ̈ቂ̇ዴ፤ ማ̈ርቆ̈ሳ ጌዪ ጼይጊኖ ዋ̈ኒ̇ሳ ፌባር ኤኪ̇ ዬይዴ።

Currently Selected:

ሃዋ̈ 12: ኦጫ̈ቃማ

Highlight

Copy