मरकुस 11

येरुसलेमतिगा येसु मसिना विजय आस हन्दाना

(मत्ति २१:१-११; लूका १९:२८-४०; युह १२:१२-१९)

1ओरक येरुसलेमता हेरे, जयतुन मराकना मटा पोरो बेतफायगे अनि बेथानिया पोरोयता नाटेना हेरे अवतुरक असके ओर आपुना रन्ड चेलालोरकुन इदाम इन्ज लोहतुर, 2“मुनेटा नाटेनिगा हन्ट अनि अगा अवतपा बोरे इदेकवनाह अन्जोर उन्दि गदिता पिला दोहता मिकुन पुटार ओद पिलातुन लेहच ताट। 3‘इदाम बाक्या किन्तोरिट?’ मिकुन बोरे पुच्चेमातुर ते ओरकुन इन्ट, ‘प्रबुन इदेना प्रयोजन मन्ता’ इन्जोर वेहा। असके ओर अदेन सान्डेय इगा लोहानुर।” 4ओरक हन्ज अद गदिन बाहरो उन्दि दरवाजाता हेरे चोवकतिगा दोहता पुटत अनि लेहिला लागतुर। 5हेरे मनवालोर लोकुरनिगाडाल हुचुलोर लोकुरक, “इद बाताल कियाला आतोरिट? गदिता पिलातुन बाक्या लेहिला आतोरिट?” इन्जोर पुच्चेमातुरक। 6येसु बदाम इन्ज मतोर अदामे ओरक ओरकुन इतुर असके लोकुरक ओरकुन हन्दा हितुर। 7ओरक गदिता पिलातुन येसुना हेरे ततस पिलाता पोरो आपुना हुचुक सन्दरांग इरतुरक अनि येसु गदि पिलाता पोरो उदितुर। 8असके पकाय लोकुरक आपुना सन्दरांग हरतिगा तारतुर; अनि दुसरो हुचुक लोकुरक डन्डताल मराता कोहक कदियस कदियस हरतिगा फयले कितुरक। 9ओना मुने मुने हन्दुरक अनि परके परके वान्दुरक ओरक पकाय जोर जोरदे,

“‘होशाना!’ प्रबुना पोरोयते वान्तोर ओर धन्य मन्तोर#भज ११८:२५-२६।

10वायिला आता मावोर बाबो दावुदना राज्य धन्य मन्ता, आबारतिगा होशाना!”

इदाम इन्तोर मतोरक। 11ओर येरुसलेम अवस मन्दिरतिगा वातुर अनि सबोयबासा सबोय चिजतुन हुळस बेरा मुलस मता इन्जोर बारा चेलालोकुरासंग बेथानिया नाटेनिगा हतुर।

बिना कायांगवाले अन्जीरता मरा

(मत्ति २१:१८-१९)

12दुसरो दिया ओरक बेथानिया नाटेनिकेडाल पसियतुरक असके ओन करवस्तु। 13ओर लकडाल उन्दि हिरवो अन्जीर मरा हुळस कायांग पुटनुंग इन्जोर अदेना हेरे हतुर, मति आकिंग तासि ओद मरातिगा बाराय पुटो बाक्याकि ओद कायांगना बेरा हिले आस मता। 14इन्जोर ओद मारातुन इतुर, “इगाडाल नियांग कायांग बोरे बसकेय तिनमाकिर” अनि ओनोर चेलालोर इद केन्जदुर।

येरुसलेम मन्दिरताल व्यापार लोकुरकुन पसिहान्तोर

(मत्ति २१:१२-१७; लूका १९:४५-४८; युह २:१३-२२)

15पजा येसु अनि येसुना चेलालोरक येरुसलेमताल वातुरक अनि ओर मन्दिरतिगा हतुरक, अगा बोद लेन-देन कियाला आस मतोरक ओरकुन येसु बाहरो पसिहयाला लागतुर। डबुंग अदला-बदला केवालोरा अनि कबुतर मोमवालोरा चोकी उलटे किसितुर। 16अनि मन्दिरताल बोने बोदे चिज पयस हन्दि-वायिला हेवोर। 17असके पजा ओर उपदेश किस ओरकुन इतुर,

“नावा लोन सबोय जाति साटि प्रार्थनाता लोन इन्दानुर इन्जोर बाताल कोटता हिले?

मति निमाट इदेन डाकुलोरा पान्जा बनेहकितोरिट?#यश ५६:७; यिर ७:११”

18इद केन्जुन मुक्य याजक अनि मूसाना नियमतुन करिहवालोरक येसुना नाश कियाना सन्दि हुळिला लागतुरक बाक्याकि सबोय लोकुरक ओना उपदेशते दंगे मान्दुरक इन्जोर ओरक ओन वरियन्दुरक। 19बेरा मुलतपा येसु अनि ओनोरक चेलालोरक सहेरताल बाहरो हतुरक।

विस्वासता बारेते वतिता अन्जीर मराना द्वारे करहान्तोर

(मत्ति २१:२०-२२)

20पजा पोळद पसियाना पहारात ओरक होकेडाल हन्दुरक असके ओरक ओद अन्जीरता मरातुन हिरकवनाह वतिता हुळतुरक। 21पतरसतुन ओद पोलो आटवन वात, “हे गुरु हुळा, इद अन्जीर मरा इदेन निमा सराप हिस मतोन ओद वतिता बहे” इन्जोर ओर येसुन इतुर। 22येसु ओन उत्तर हितुर, “परमेस्वरनिगा विस्वास इराट। 23बोरायि आपुना मन्दे विस्वास किस बाताल नना इन्तोना ओद पोल्लो खरोय आयार इन्जोर विस्वास किस इद मटातुन ‘निमा कसेमाम अनि समुद्रतिगा अरा’ इन्जोर इनिर ते अदामे आयार इन्जोर नना मिकुन खरोय इन्तोना#मत्ति १७:२०; १ कुरि १३:२ । 24इन्जोर बाताल आयि निमाट प्रार्थनातिगा तलकाट असके मिया तलकाना पोल्लो मिकुन पुटत इन्जोर विस्वास किस प्रार्थना कियाकिट ते ओद मिकुन पुटार इन्जोर नना मिकुन इन्तोना। 25अनि मिवोर स्वरगिय बाबाल वने मिया पाप मापि केविर इन्जोर निमाट प्रार्थना किन्तोरिट असके मिया मन्दे बोनायसंग बाताले विरोद मन्ता ते ओन मापि किम्ट। 26अनि निमा माप केवि आयकि ते स्वरगतिगा मन्तोर मिवोर बाबो वने मिया पापता माप केवो आयनुर#मत्ति ६:१४-१५ ।”

येसुना अदिकारतिगा प्रश्न

(मत्ति २१:२३-२७; लूका २०:१-८)

27ओरक असा येरुसलेमतिगा वातुर अनि ओर प्रार्थना लोतिगा वलियन्दुर ते मुक्य याचक, मूसाना नियमतुन करिहवालोरक अनि यहुदि अदिकारि लोकुरक ओना हेरे वास इदाम पुच्चेमातुरक। 28“निमा इद बुतो बोद अदिकारते किन्तोन? अनि निकुन इद बुतो कियाना साटि बोर अदिकार हितोर?” 29येसु ओरकुन इतुर, “नना वने उन्दि पोलो पुच्चेमायिका, नाकुन उत्तर हियाकिट ते नना इद बुतो बोद अदिकारते किन्तोना इन्जोर नना वने मिकुन वेहका। 30बपतिस्मा हियान साटि युहन्नान अदिकार बाताल परमेस्वर हितुर या मानेय हितुर बहे? नाकुन उत्तर हिम्ट!” 31असके ओरक आपसते बहस किया लागतुरक, “परमेस्वर अदिकार हितुर इदाम माक इन्काट ते ‘पजा निमाट युहन्नान बाक्या विस्वास केविट’ इन्जोर ओर इन्दानुर। 32अनि मानेयनिकेडाल इदाम माक इन्काट ते सबोय लोकुरक युहन्नान परमेस्वरना खरोय पोल्लो वेहवाल इदाम पुन्दुर” इन्जोर ओर लोकुरकुन वरियतुरक। 33आकरिते ओरक येसुन उत्तर हितुर, “माक पुनोम”, येसु वने ओरकुन इतुर, “इद बुतो बोद अदिकारते कितोना इन्जोर नना वने मिकुन वेहोन।”

Currently Selected:

मरकुस 11: fmu

Highlight

Copy