लूका 5

येसु आपुना पहलेटा चेलालोरकुन आचान्तोर

(मत्ति ४:१८-२२; मर १:१६-२०)

1अनि येसु गन्नेसरत#५:१ गलीला नाहार। नाहारता टकातिगा निचमन्दुर असके परमेस्वरना पोल्लो केन्जान साटि ओना हेरे पकाय मानेयक्ना भीळ लागंदु#मत्ति १३:१,२; मर ३:९,१०; ४:१, 2असके ओर नाहारता टकातिगा रन्ड डोंगांग हुळतुर, अनि डिवरोहु ओद डोंगातिगाडाल रयसुन जालिनुंग नोरिला आस मन्दुरक। 3अनि अव डोंगानिगाडाल शिमोना मता उन्दि डोंगातिगा येसु अन्जतुर, अनि डोंगातुन टकातिगाडाल हुचुन लक ओम इन्जोर येसु शिमोनिन विनन्ति कितुर। असके येसु डोंगातिगा उचुन लोकुरा भीळतुन परमेस्वरना पोल्लो वेहिला लाकतुर।

4अनि येसु लोकुरकुन वेहाना मारिहतुर असके ओर शिमोनिन, “डोंगातुन खोल एतिगा ओम, अनि मीनक पयान साटि मियांग जालिनुंग एतिगा वाटाट” इन्जोर इतुर। 5अनि शिमोन येसुन, “हे गुरुजि, माक ते नरका पलिंग मेहनत कितोरोम मति उन्दि गेला मीन वने पयोम, मति निया वेहनाते जालि वाटकान” इन्जोर इतुर#युह २१:३। 6असके शिमोन अनि आपुनोर संगवारि लोकुरक जालितुन एतिगा वाटतुरक, अनि जालितुन पिळिंगतुर ते पकाय मीनक वातुंग अनि जालि हरिला लाकतु#युह २१:६। 7असके ओरक दुसरो डोंगाते मनवालोरकुन मदत साटि इशारा किस केयतुरक अनि ओरक वासुन रन्डासक डोंगा मीनकना भारते मुळिन्दिला लाकतुंग अचोन मीन्कुन निन्दीहच इरतुरक।

8इव सबोय शिमोन पतरास हुळसुन येसुनांग काल्कनिगा अरसुन, “हे प्रबु; नावा हेरेटाल हन, नना पापि मानेय मन्तोना!” इन्जोर इतुर। 9ओरकुन इचोन पकाय मीनक पुटतु इन्जोर पतरस अनि ओनोरक संगेमन्तोरक सबलोरक आश्चरय आतुरक। 10अनि अदामे शमोन पतरसना संगवारक मन्तोरक जबदिनोर मरक याकुब अनि युहन्नाल वने दंगेमातुरक। असके येसु शिमोनिन, “वरियमा; नेटाल निमा मानेयकुन परमेस्वरना हेरे ततवाल आयकि” इदाम इतुर। 11असके शिमोन अनि ओनोर संगवारक डोंगानुंग टका ओदा ततुरक, अनि आपुना सबोय पोल्लोंगतुन हरचुन येसुना परके आतुरक।

येसु कोळि बिमारि मानेयतुन सुदरे किन्तोर

(मत्ति ८:१-४; मर १:४०-४५)

12उन्दि दिया येसु उन्दि सहेरतिगा मन्तोर असके अद सहेरतिगा सबोय मेन्दुलतिगा कोळि बिमारि निन्ज मता वरोर मानेय वातुर। अनि ओर येसुन हुळसुन ओनांग काल्कनिगा अरसुन कय जोळे किसुन, “हे प्रबु, येसु निया इच्चा मन्दार ते नाकुन इद बिमारिताल शुद्धकीया परान्तोन” इन्जोर इतुर। 13अनि येसु कोळि बिमारि मानेयतुन इटतुर अनि, “निमा कोळि बिमारिताल शुद्ध आम इदाम नावा इच्चा मन्ता!” इन्जोर इतुर। अनि ओर कोळिबिमारिताल अचोन बेरा सुदरेमातुर।

14असके येसु ओन चेतेह किस वेहतुर, “नना निकुन सुदरे कितान अदेन बोने वेहमा, मति सान्डे हन्जुन मन्दिरतोर याजकिन निमा शुद्ध आतोन इदाम तोहा। कोळि बिमारिताल निमा शुद्ध आतोन इदाम लोकुरा मुने गावाहि हियान साटि निमा मूसाना नियमता अनुसार बलि हिम#लेव्य १४:१-३२।” 15मति येसुना चमत्कार कितांग पोल्लोनुंग लोकुरक पुन्दिला लाकतुरक, अनि लोकुरा भीळता-भीळ येसुना हेरे परमेस्वरना पोल्लोंग केन्जान साटि अनि सुदरेमायान साटि डंगि आन्दुरक। 16मति येसु सुनसान जागातिगा अलगो हन्जुन प्रार्थना किन्दुर।

येसु लकवा बिमारितुन सुदरे किन्तोर

(मत्ति ९:१-८; मर २:१-१२)

17अनि उन्दि दिया येसु सोबाता पोल्लो लोकुरकुन करिहन्दुर असके गलील प्रदेशतोर अनि यहुदि प्रदेशता सबोय नाटेनोरक अनि येरुसलेम सहेरताल वने वास मतोरक परीसिलोकुरक अनि मूसाना नियमतुन करिहवालोरक वने अगा उच मन्तोरक। सुदरे कियान साटि प्रबुना लाव येसुनासंग मता। 18अनि अद बेरा हुचुक लोकुरक वरोर लकवा बिमारि मानेयतुन कटुलते ताहचुन ततुरक, अनि येसुना हेरे लोपा ओयान साटि उपाय हुळन्दुरक। 19मति लोकुरा गोहडिता माराते लकवा बिमारि मानेयतुन लोपा ओय परोरक आतुरक, असके ओरक लोन पोरो अन्जुन अनि कवलानुंग गुचिचुन अनि बिमारि मानेयतुन कटुलसंगेय येसुना मुने रेहचितुरक। 20ओरा विस्वासतुन हुळसुन येसु लकवा बिमारि मानेयतुन, “हे गोतियाल, निया पापता मापि आत” इन्जोर इतुर।

21असके परीसि लोकुरक अनि मूसाना नियमतुन करिहवालोरक आपुना मन्दे वळकिला लाकतुरक, “परमेस्वरना निन्दा किन्तोर येर बोर आन्दुर? अनि केवल परमेस्वरिन सोळेकिस बोर पापता मापि किया परान्तोर?” 22अनि येसु ओरा मन्दा वळकाना पोल्लोतुन पुतुर अनि ओरकुन, “निमाट आपुहना मन्दे बाक्या पुसकिने पळकान्तोरिट? 23अनि ‘निया पापता मापि आता’ इदाम इन्दाना या ‘तेदा अनि हन वलियला’ इदेनते बोद सुदोय मन्ता” इन्जोर ओरकुन पुच्चेमातुर। 24अनि येसु इतुर, “दरतितिगा पापता मापि हियाना वने नना मानेयतोर मरिन अदिकार मन्ता इन्जोर निमाट पुंट” इदाम इन्जुन येसु लकवा बिमारि मानेयतुन इतुर, “तेदा अनि निया कटुल पयसुन निया लोतिके हन इन्जोर नना निकुन इन्तोना।” 25सान्डे लकवा बिमारि मानेय लोकुरा मुने तेदितुर, अनि ओर बिमार आसुन हुन्ज मन्तोर अद कटुलतुन ताहचुन परमेस्वरना जय-जयकार किसोरिंग आपुना लोतिके हतुर। 26असके सबोय लोकुर दंगेमास परमेस्वरना महिमा किया लाकतुरक अनि पकाय वरियसुन, “नेन्डु माक हजोर चमत्कार हुळतोम” इदाम इन्तोरक।

येसु लेविन आचान्तोर

(मत्ति ९:९-१३; मर २:१३-१७)

27अनि लकवा बिमारि मानेयतुन सुदरे कितुर पजा येसु अगडाल बाहरो हतुर अनि वरोर लेवि पोरोयतोर टाक्स येतवाल टाक्स येताना आफिसतिगा उदितोर हुळसुन, “निमा नावा परके वास नावा चेला बनेमायकि” इन्जोर येसु ओन इतुर, 28असके ओर आपुना सबोयतुन हरचुन येसुना परके हतुर।

29असके लेवि आपुना लोतिगा येसुन साटि उन्दि हजोर जेवन तयार कितुर; अनि अगा लोकुरा पकाय हजोर भीळ मतोरक अनि ओराकेडाल टाक्स येतवालोरक अनि दुसरो लोकुरक वने जेवेकियान साटि उच मन्तोरक, अनि अगा पकाय लोकुरा जेवन मता। 30असके परीसि अनि मूसाना नियमतुन करिहवालोरक येसुना चेलालोकुरा हेरे हन्जुन, “निमाट ते चुंगि येतवालोरासंग अनि ‘पापिलोरासंग’#५:३० बोर मूसाना नियम पालनकेवोर आयनुरक ओरक पापि मन्तोरक इन्जोर मूसाना नियमतुन करिहवालोरक सोचेकिन्तोरक। बाक्या निन्तोरीट-उन्टोरीट?” इन्जोर शिकायत कितुरक#लूका १५:१,२। 31येसु ओरकुन उत्तर हिन्तोर, “बेस मानेय साटि आयो मति बिमार मानेय साटि डाक्टरना जरुरत मन्ता। 32नना परमेस्वरना मुने येताना योग्य मन्तोना इदाम आपुनास घमन्ड केवालोरकुन साटि आयो मति माक पापि आन्दोम इदाम आपुन विचार केवालोरकुन पस्तेमायाना साटि केयिलाय वातोना।”

उपासता प्रश्न

(मत्ति ९:१४-१७; मर २:१८-२२)

33परीसि अनि मूसाना नियमतुन करिहवालोर येसुन इतुरक, “युहन्नाना चेलालोरक ते बरोबर उपास किन्तोरक, अनि प्रार्थना वने किन्तोरक। अनि इदामे परीसिनोर चेलालोरक वने उपास किन्तोर, मति निया चेलालोरक ते दरोज निन्तोर-उन्तोरक।” 34असके येसु ओर लोकुरकुन इतुर, “बाताल दुलहाल बरातसंग मन्दानुर ते निमाट बरातुन उपास कियापरान्तोरिट बहे? 35मति इदाम उन्दि दिया वायार, अदिया दुलहान बरातिगाडाल अलगो कियानुर, असके ओरक अव दियाने उपास कियानुरक” इन्जोर इतुर।

36अनि येसु उन्दि वेसोळ वने ओर परीसि अनि दरमतुन करिहवालोरकुन वेहतुर: “उन्दि जुनाल सन्दरा हरारते बोरे पुनाल सन्दरा कदिसुन जोळेह केवोर। अदाम कियानुर ते पुनाल सन्दरा हरार, अनि पुनाल सन्दराता भाग जुनालतिगा मिसळे मायो आयार। 37अनि बोरे पुनाल अंगुरता जोमा जुनाल तोलाता जोरातिगा निहोरक। बाक्याकि अदाम कियानुर ते, पुनाल अंगुरता जोमातिगा ग्यास तयारास तोलाता जोरातुन हरिहार, अनि जोमा वांगार अनि तोलाता जोरा वने नाश आयार। 38मति पुनाल अंगुरता जोमातुन केवल पुनाल तोलाता जोरातिगा इरिला पहाजे। 39अनि जुनाल अंगुरता जोमा उन्दानुर ओर मानेय पुनालतुन विचार केवोर आयनुर, बाक्याकि ‘जुनाल अंगुरता जोमा पकाय बेस मन्ता#५:३९ परीसि अनि दरमातुन करिहवाल लोकुरकुन येसुना उपदेश स्विकार कियाना पकाय मुसकिल मन्ता बाक्याकि ओर लोकुरक आपुना परंपरांग अनि रितिरिवाजते संतुष्ट मन्तोरक।’ ” इदामे ओर इन्दानुर।

Currently Selected:

लूका 5: fmu

Highlight

Copy