लूका 24

येसुना असा जिवे मायाना

(मत्ति २८:१-१०; मर १६:१-८; युह २०:१-१०)

1अनि हपताता पहले दिया मन्जे इतवार दिया सकारिंग अव आसक सुगन्द चिजकने बनेहकिता नियतुन पयसुन अव येसुना गुडिता हेरे वातुंग। 2अनि अव आसक गुडिता पान्जा लोपा हन्दाना दरवाजतिगा उन्दि हजोर कलदे मुच मतोरक अद कलदुन गुचिताल हुळतुंग, 3अनि अव येसुना गुडिता पान्जा लोपा हतुंग, मति प्रबु येसुना मुरदातुन कल्योंग आतुंग। 4अदेना बारेते अव घबराय लाकतुंग असके हुरहाय मान्जतांग कपळांग करतोरक इवुर मानेयक अव आसकना हेरे वासुन नितितुरक। 5अनि अव आसक पकाय वरियतुंग अनि अडिय मुंगुचुन मन्तांग असके ओर इवुर मानेयक अव आसकुन इतुरक, “निमाट जिवोत मानेयतुन हातोरागा बाक्या पळकान्तोरिट? 6ओर इगा हिलेर, मति ओर जिवे मासुन तेदितोर#मत्ति १६:२१; १७:२२,२३; २०:१८,१९; मर ८:३१; ९:३१; १०:३३,३४; लूका ९:२२; १८:३१-३३ ! 7ओर गलील प्रदेशते मतोर असके मिकुन बाताल वेहच मतोर: ‘मानेयतोर मरिन पापिलोकुरा कयदे पयपिचियानुर, अनि कुरुस पोरो अन्जीहचुन हव्कानुर अनि ओर मून्ड दियाने असा जिवे मासुन तेदाना जरुरि मन्ता’ इदाम ओर वेहच मतोर अद पोल्लो निमाट आल्हाट” इन्जोर इतुरक। 8असके अव आसक येसु मुनेय वेहच मतोर अद पोल्लोनुंग अलिहितुंग।

9अनि अव गुडिताल मल्स वातुंग अनि येसुनोरक अकरा खास चेलालोरकुन अनि असा सबोयलोरकुन इव सबोय पोल्लोनुंग वेहतुंग। 10येसुना गुडितिके हन्जुन येसुना खास चेलालोरकुन अव पोल्लोंग वेहन्दुंग, अव आसक इव आन्दुंग, मरियम मगदलीनी, योहन्ना अनि याकुबना अवहारि मरियम, अनि अवेहनासंग दुसरो आसक वने असा मन्दुंग। 11मति आसकनांग वेहतांग पोल्लोंग येसुना खास चेला लोकुरकुन उन्दि वेसोळ लेहका लाकतु, अनि अव वेहतांग पोल्लोतिगा ओरक विस्वास केवोर आतुरक। 12मति पतरास सान्डे तेचुन येसुना गुडितिके हुळान साटि विचोरिंग हतुर, अनि येसुना गुडिता पान्जातिगा मुरसुन हन्जुन हुळतुर ते केवल येसुना हुरियस मतोर ओद कपळांग दिसतुंग, अनि अगा आता पोल्लोंगतिगा ओर चक्केमासुन आपुना लोतिके हतुर।

इम्मावुस नाटेना हरिते येसु अनि चेलालोरक

(मर १६:१२-१३)

13अनि अदेदिया येसुना परके हनवालोरा पयकि इवुरजन इम्मावुस पोरोयदा उन्दि नाटेने हन्दिला आस मन्दुरक अनि अद नार येरुसलेमतिगाडाल अकरा किलोमिटर लक मता। 14येसुन कुरुस पोरो अन्जिहच हव्कतुरक अव पोल्लोनुंग ओरक एकमेका वळकसोरिंग हन्दिला आस मन्दुरक। 15अनि ओरक एकमेका वळकिला आस मन्दुरक अनि एकमेका पुच्चेमान्दुर असके येसु वने ओरा हेरे हन्जुन ओरासंग मिले मातुर; 16मति ओरक येसुन पुन्दिला परोरक आतुरक इदाम परमेस्वर ओरांग कोन्डानुंग नजर बन्दि कितुर।

17अनि येसु ओरकुन पुच्चेमातुर, “निमाट ताकसोर एकमेका वळकिला आतोरिट इद बाताल पोल्लो आन्दु?” अनि ओर उदास आसुन नितितुरक। 18अनि येसु ओरकुन पुच्चेमातुर, अदेन केन्जुन ओरा पयकि क्लियोपास पोरोयतोर वरोर इतुर, “इव दियांगते माक वळकान्तोरोम इव पोल्लोता बारेते येरुसलेम सेहेरतिगा बांग निमा वरोरे पुन्वोर मानेय मन्तोन।” 19अनि येसु ओरकुन, “बाताल पोल्लो?” इन्जोर पुच्चेमातुर। ओरक येसुन, “परमेस्वर अनि सबोय लोकुरा मुने बुतो अनि पोल्लोता लावदे परमेस्वरना वरोर हजोर पोल्लो वेहवाल मतोर येसु नासरिना बारेते इन्जोर इतुरक। 20अनि मावोर मुक्या याजक लोकुरक अनि यहुदि लोकुरा मुक्या लोकुरक येसुन पयतुर अनि ओन हव्कान साटि आग्या हिस ओन कुरुस पोरो अन्जहिच हव्कतुरक; 21माक ते येरे इस्रयेल लोकुरकुन लेहचियानुर इन्जोर आशा मता। इचोने आयो ओना बारेते इव सबोय पोल्लोंग आतुंग इदेक मून्ड दियांग आतांग। 22अनि मावा पयकि हुचुक आसक नेन्डे बिरबरिंग बिच गुडितिगा हन्जुन 23येसुना मुरदातुन बिच गुडिना पान्जातिगा कल्योंग आसुन मलस वास अव स्वरगदूतकुन दिसतुंग अनि येसु जिवेमातोर इदाम स्वरगदूतक अवेहकुन वेहतुंग इन्जोर वेहचुन माकुन दंगेहकिहितुंग। 24असके मावासंग मतोरक हुचुलोरक लोकुरक बिजगुडिता पान्जातिगा हन्जुन आस्क बदाम वेहच मन्तांग अदामे येसुना मुरदा पान्जातिगा हिले इदाम हुळतुरक; मति येसुन हुळोरक आतुरक।”

25असके येसु ओरकुन इतुर, “परमेस्वरना पोल्लो वेहवालोरक वेहता पोल्लोतिगा विस्वास केवोरक हे मुर्ख लोकुरक! 26मसिहाल इद सबोय पकाय तकलिपतुन सहेमासुन ताहचुन हजोर सन्मान कलियसुन आपुना महिमातिगा हन्दिला पहाजे” इन्जोर इतुर। 27असके येसु मूसा अनि दुसरो सबोय परमेस्वरना वेहवालोरक निकेडाल अनि पवित्र पुस्तकतिगाडाल आपुना बारेते कोटताल पोल्लोतांग अर्थानुंग ओरकुन समजे किसितुर।

28अचोन बेरा येरक हन्दिला आस मन्दुरक अद इम्मावुस नाटेना हेरे अवतुरक, अनि ओर मुने असा दान्तोर इदाम ओरकुन तोहनाप कितुर। 29मति ओरक, “मावासंग मन बाक्याकि इदेक पकाय बेरा हता, मुलिला आता” इदाम इन्जुन येसुन रोके कितुरक। असके येसु ओरासंग मन्दान साटि लोपा हतुर। 30असके येसु ओरासंग जेवेकियाला उदितुर अनि येसु हारितुन येचुन परमेस्वरना धन्यवाद किस हारितुन किळिचुन ओरकुन हिया लाकतुर। 31असके परमेस्वर ओरकुन पुनाहकिन कितुर, अनि सान्डे ओर येसुये मन्तोर इदाम ओरकुन समजेमातुर, असके येसु ओरा हेरेटाल मायतुर। 32“ओर मावासंग हरतिगा वळसोर पवित्र पुस्तकता अर्थतुन माकुन समजे किन्दुर ते मावा मन्दे पकाय हिम्मात वातु बहे” इन्जोर ओरक एकमेका इन्दा लाकतुरक।

33असके ओरक अदेय बेरा तेचुन येरुसलेम सेहेरतिगा मलस हतुरक। 34अनि “प्रबु खरोय हातोरिगाडाल असा जिवेमातोर! अनि शिमोनिन दिसतुर” इन्जोर उन्दि जागा डगि आस वळकिला लाकतोर येसुनोरक अकरा चेलालोरकुन अनि ओनोरक गोतियाकुन कलियतुरक। 35असके ओरक इवुर हरतिगा घडेमातांग पोल्लोंग अनि येसु हारितुन किरहिला आस मन्दुर असके ओरक येसुन बदाम समजेमातुरक इव सबोय पोल्लोनुंग येरकुन वेहचितुरक।

येसु चेलालोरा मुने दिसान्तोर

(मत्ति २८:१६-२०; मर १६:१४-१८; युह २०:१९-२३; बुतोंग १:६-८)

36अनि ओरक इव पोल्लोंग वळकिला आस मन्दुरक असके अगा येसु ओरा नडुम वासुन नितितुर अनि ओरकुन इतुर, “मिकुन शान्ति पुटि।” 37मति ओरक पकाय वरियस दचकेमातुरक अनि बोदे भुततुन हुळान्तोरोम इदाम ओरक समजेमातुरक। 38अनि येसु ओरकुन इतुर, “निमाट बाक्या वरयान्तोरिट? मिया मन्दे बाक्या सन्देह किन्तोरिट? 39इद नना येसुये इन्तोनान इन्जोर नावांग केयक काल्कनिगा किलांग कोहकस मतोर तानांग चिनानुंग हुळसुन सम्जेकिम्ट, अनि नाकुन इटस हुळाट; बाक्याकि नावागा हुळाना लेहका भुततुन पळेकांग हवि हिलेंग आतांग।” 40इदाम इन्जुन येसु ओरकुन आपुनांग कय कालकुन तोहतुर। 41असके ओर गिरदाताते विस्वास वायो आस दंगेमायिला लाकतुरक असके येसु ओरकुन पुच्चेमातुर, “तिन्दान साटि मियागा बाताल मन्ता बहे?” 42अनि ओरक येसुन बोळस्ताल मीन्दा तुकळे तिन्दा हितुरक, 43अनि येसु मीन्दा तुकळेतुन येतितुर अनि ओरा मुने तितुर।

44अनि हुचुक दियाना पजा येसु ओरकुन इतुर, “परमेस्वर मूसान हिताल नियमतिगा अनि परमेस्वरना पोल्लो वेहवालोरा पुस्तकतिगा अनि भजन संहिता पुस्तकतिगा नावा बारेते कोटताल मन्ता अव सबोय पोल्लोंग जरुर पुरा आयिंग पहाजे इन्जोर नना मियासंग मन्जुन मिकुन वेहच मतोना बहे।” 45अनि येसु पवित्र पुस्तकतुन समजेमायान साटि ओरकुन मदत कितुर, 46अनि येसु ओरकुन इतुर, “मसिहाल पकाय तकलिप सहेनकिस हायनुर, मति मून्ड दियाने असा जिवेमायनुर, 47अनि येसु मसिना पोरोयदे लोकुरकला मन्दुन परमेस्वरनिके मलस ततान साटि पापताल मुक्ति हियाना इद सन्देश्तुन येरुसलेम सहेरतिगाडाल सुरुकिस सबोय जातितोरक लोकुरकनिगा वेहिला पहाजे इन्जोर पवित्र पुस्तकतिगा कोटताल मन्ता। 48अनि इव सबोय पोल्लोनांग निमाट गवाह मन्तोरिट। 49अनि नावोर बाबाल पवित्र आत्मा हियाना वाचा हितोर; नना अदेन मिया हेरे सान्डे लोहका अनि निमाट ते परमेस्वरताल लाव येतानावनाह इद सहेरतिगाय मन्ट#बुतोंग १:४।”

येसुना स्वरगारोहण

(मर १६:१९,२०; बुतोंग १:९-११)

50असके येसु ओरकुन येरुसलेम सेहेरता बाहरो बेथानिया#२४:५० इद सहेर येरुसलेम सहेरताल मून्ड किलोमीटर लक जेयतुन मटातिगा मता। नाटेनिके ओतुर अनि आपुनांग केयकुन ताहचुन ओरकुन आशिष कितुर#बुतोंग १:९-११। 51अनि येसु ओरकुन आशिष किन्दुर असके परमेस्वर ओरा हेरेटाल येसुन पोरो स्वरगतिके ताहतुर। 52असके चेलालोरक येसुन आरादना कितुर अनि पकाय गिरदा आसोरिंग येरुसलेम सेहेरतिगा मल्स वातुरक। 53अनि ओरक परमेस्वरना स्तुति किसोर रोजदिया मन्दिरतिगा मन्दिलाकतुरक।

Currently Selected:

लूका 24: fmu

Highlight

Copy