लूका 15

मायताल बेळाता पिटो

(मत्ति १८:१२-१४)

1अनि सबोय टाक्स येतवालोरक अनि दुसरो पापि लोकुरक वने येसुनांग पोल्लोनुंग केन्जान साटि ओना हेरे वासोरिंग मन्दुरक#लूका ५:२९,३० । 2“येसु पापि लोकुरासंग मन्तोर अनि ओरासंग निन्तोर” इदाम परीसिलोकुरक अनि मूसाना नियमतुन करिहवालोरक येसुना बारेते कुळकुळेमायिला लाकतुरक।

3असके येसु ओरकुन उन्दि पिटो वेहतुर: 4“मिया पयकि बोनांगे उन्दि नुर बेळांग मन्तांग अनि उन्दि बेळा मायत आतु ते ओर आपुनांग निन्यानव बेळानुंग वारु पल्लातिगा हरचुन मायताल बेळातुन पुटानावनाह ओर अद बेळातुन पळकसोरिंग मन्दानुर। 5अनि पजा अद बेळातुन कल्यान्तोर, असके ओर पकाय गिरदा आसुन अद बेळातुन आपुना हटातिगा कान्जुन आपुना लोतिगा वास आपुना गोतियाहकुन अनि हेरेगुरेटोरक लोकुरकुन केयसुन डगि किन्तोर। 6अनि ‘नावा मायताल बेळातुन कलियतोना इन्जोर निमाट नावासंग गिरदा किम्ट’ इदाम इन्दानुर। 7अदामे वरोर पापि मानेय परमेस्वरना हेरे वान्तोर ते पस्तेमायाना जरुरि हिले परमेस्वरना मुने येताना योग्य बुतो केवाल नन्यानव लोकुराताल वने गिरदा ओना मारे स्वरगतिगा आन्ता इदाम नना मिकुन वेहान्तोना।”

डबु मायतालता पिटो

8येसु असा उन्दि पिटो वेहतुर, “बोदे उन्दि आळतांग दहा डबुंग मन्तांग अनि अव दहा डबुनिगाडाल उन्दि डबु मायत। असके अद टिवरि पय्टेकिसुन, केय्सुरते हेय्सुन अद डबु पुटानावानह आपुना आपुना मन लावेकिसुन डबुतुन पळकसोरिंग मन्दार। 9अनि पजा अद आळ डबुतुन कल्यांता, असके आपुनांग गोतिकुन केयसुन डगि किस, ‘नावा मायताल डबु नाकुन पुटत इन्जोर नावासंग निमाट गिरदा आम्ट’ इन्जोर इतु। 10इदामे वरोर पापि मानेय आपुना पापताल पस्तेमायाना बेरा परमेस्वरनासंग स्वरगदूतकना मुने ओना बारेते गिरदा आन्ता इदाम नना मिकुन वेहान्तोना।”

वरोर उळेह केवाल पेकाना पिटो

11अनि असा वने येसु ओरकुन पिटो वेहतुर: “बोरे वरोर मानेयता इवुरक मरक मन्तोरक। 12अनि हुडलोर मरि आपुना बाबोन इतुर, ‘हे बाबा, धनसंपतिगाडाल बोद नावा मन्दार, अदेन नाकुन हिसिम।’ अनि बाबोहाराल आपुना धनसंपतितुन इवुरास मरकुन तुसितुर। 13अनि वलेंग दियांग आयोते ओनोर हुडलोर मरि आपुना सबोय धनसंपतितुन मोमसितुर, अनि अव सबोय डबुनांगसंग लक देशतिके हतुर, अनि ओर होके आपुनांग सबोय डबुनुंग पाप अनि खराब बुतोंग कियानाते मारिहचितुर। 14अनि ओर आपुना सबोय डबुनुंग मारिचिता पजा अद देशतिगा पकाय दुष्काळ आतु, अनि ओर गरिब आतुर। 15अनि अद देशतोर वरोर मानेयना हेरे ओर हन्जुन ओनाताल बुतो तलकतुर, अनि ओर मालकाल ओन आपुना डन्डतिगा पदिंग मेहिला लोहतुर। 16अनि मालकाल ओन पदिंग मेहिला लोहतुर पजा पदिंग तिन्दुंग अव कायानुंग ओर वने तिन्जुन आपुना पोटा निहानाता इच्चा किन्दुर, मति ओन बोरे बातांगे हेवोरक आन्दुरक। 17अनि ओन चेतवात असके ओर आपुनतुन इन्तोर, ‘नावोर बाबोना लोतिगा ते पकाय बुतो केवालोरक नवकोरक जेवन तिन्जुन पकाय जेवन पिसदुंग मति नना इगा करवसुन हायान्तोना! 18अनि नना इदेक इगाडाल तेचुन नावोर बाबोना हेरे दाका अनि हे बाबा नना परमेस्वरना होंग अनि निया होंगते पाप कितोना। 19इदेक नना निया मरि इन्दाना लायेक हिलेन, नाकुन निमा आपुनोर वरोर बुतो केवाल नवकोर लेहका इरा इदाम नना बाबोन इन्का’ इन्जोर इतुर। 20अनि ओर तेचुन आपुना बाबोना हेरे हन्दिला लाकतुर। अनि ओर लके मन्तोर असके ओनोर बाबाल आपुनोर मरिन हुळसुन ओन दया वात, अनि ओनोर बाबो विचोरिंग हन्जुन आपुनोर मरिन टुंडतुर अनि पकाय बुरतुर। 21अनि मरहाराल आपुना बाबोन इदाम इतुर, ‘बाबा, नना परमेस्वरना विरोदते अनि निया विरोदते पाप कितोना। अनि नना निया मरि इन्दाना लायेक हिलेन।’ 22मति ओनोर बाबोहाराल आपुनोर दासतुन इतुर, ‘सान्डे हन्जुन सोबातंग कपळांग तचुन नावोर मरिन करहाट। अनि ओना कयतिगा मुदा अनि काल्कनिगा हरपुह करहाट। 23अनि पोसेकिताल बोकळा पिलातुन तचुन हव्काट माक तिन्जुन गिरदा आयिट। 24बाक्याकि येर नावोर मरि पापते हास मतोर, मति इदेक पापतुन हरचुन, जिवेमातोर; मायस मतोर, इदेक कलिय्तोम’ इदाम इतुर अनि इदाम ओरक पकाय गिरदा आतुरक।”

25“अनि ओनोर हजोर मरि डन्डतिके मतोर। अनि ओर डन्डताल आपुना लोतिके वायिला लाकतुर, अनि लोन हेरे अवतुर असके ओर पाटांग ओयाना, बाजांग नेकहाना अनि येन्दानानुगं केन्जतुर। 26असके ओर वरोर दासतुन केयतुर, ‘मावा लोतिगा बाताल आन्ता?’ इदाम अनि पुच्चेमातुर। 27अनि ओर दास ओन वेहतुर, ‘निया तमो वातोर, निवोर तमो इदेक सुदरेमास सुरक्षित लोन मलस वातोर इन्जोर निया बाबाल उन्दि पालेकिता बोकळा पिलातुन हव्कतुर।’ 28दासना पोल्लोतुन केन्जतुर असके ओर पकाय होंग आतुर, अनि लोन लोपा हन्दिला हुळोर आतुर। असके ओनोर बाबाल वासुन आपुनोर हजोर मरिन मानेह किया लाकतुर। 29ओर आपुना बाबोन इतुर, ‘हुळा! नना इचोक वरसाताल निया सेवा किन्तोना अनि नना निया आग्यातुन बसकेन आयि केन्जान्तोना। मति नना आपुनोरक गोतियासंग गिरदा आयान साटि निमा नाकुन बसकेय उन्दि बोकळा पिलातुन हेवि आति। 30मति निया धनसंपतितुन पाप कियाना ते मारिहचीतुर येर निवोर मरि मलस वातुर असके निमा ओना साटि पोसेकिताल बेहरा बोकळा पिलातुन होवकति!’ 31अनि बाबोहाराल ओन इतुर, ‘हे नोना, निमा नावासंग रोजदिया मन्तोन; अनि बाताल आयि नावा मन्ता, अद सबोय नियाय आन्दु। 32मति येर निवोर तमो पापते हास मतोर, मति इदेक पाप कियाना हरचुन जिवेमातोर, मायस मतोर इदेक ओन कलिय्ताट’ इन्जोर गिरदा आसुन सोबाय मन्दिला पहाजे।”

Currently Selected:

लूका 15: fmu

Highlight

Copy