युहनाल 16

पकाय तकलिपता बेरा वायार निमाट हुशयारिते मन्ट

1येसु असा इतुर, “विस्वासताल भटकेमायमाकिर इन्जोर इव पोल्लोंग नना मिकुन इतोना। 2अनि ओरक मिकुन समाज मन्दिरताल बाहरो टन्डसिनुरक, मिकुन हव्कस वाटनुरक, ओरक नना परमेस्वरना सेवा किन्तोना इन्जोर समजेमास मिकुन हव्काना बेरा वायिला आता। 3अनि ओरक बाबोन पुनोरक अनि नाकुन वने पुनोरक इन्जोर ओरक इदाम कियानुरक। 4मति ओद बेरा वायार असके नना अद पोल्लो मिकुन इतोना इन्जोर निमाट अलहान साटि इद मिकुन वेहान्तोना। इव पोल्लो नना मुनेय मिकुन इनोन बाक्याकि नना मियासंग मतोना।”

5येसु असा इतुर, “मति इदेक नना आपुनतुन लोहवालना हेरे दान्तोना; मति मियागडाल बोरे ‘निमा बगा दान्तोन?’ इन्जोर नाकुन पुच्चेमायोर। 6मति नना इव पोल्लोंग मिकुन इतोना इन्जोर मिया मन पकाय दुःखि आतु। 7ते वने नना मिकुन उन्दि खरोय पोल्लो इन्तोना, नावा हन्दाना मिया साटि सोबाय मन्ता। बाक्याकि नना हनोन आयका ते ओर मदत केवाल मिया हेरे वायोर आयनुर मति नना दाका ते नना ओन मिया हेरे लोहका। 8अनि ओर वासुन दुनियाता पापता बारेते अनि परमेस्वर साटि बाताल सोबाय मन्ता अद पोल्लोता बारेते अनि दुनियातोर लोकुरकुन परमेस्वर न्याय कियानुर इन्जोर समजेह किस हियानुर। 9अनि ओरक नावागा विस्वास केवोर इन्जोर पापता बारेते#युह ७:७; ८:२४; बुतोंग २:३८; २ पत ३:९; 10अनि नना बाबोना हेरे दान्तोना अनि निमाट नाकुन असा हुळवि आयकिट इन्जोर परमेस्वरना मुने येताना योग्य बुतोंगता बारेते#मत्ति ५:२०; युह ९:४१; रोमि ५:१७; 11अनि इद दुनियातोर राजाल मन्जे सयतानुन दन्ड पुटार#युह १२:३१-३२; युह २:१४; लूका १०:१८; १ युह ३:८ इन्जोर परमेस्वरना वायवाल न्यायता बारेते वने समजेहकिस हियानुर#१६:११ अनि सयताना न्याय आतु इन्जोर बोर लोकुरक आपुना मन्दुन मलिहिच येसुना पोरो विस्वास केवोर आयनुर ते ओरकुन सयताना लेहका नरकतिगा हन्दाना दन्ड पुटार इदाम पवित्र आत्मा लोकुरकुन करिहिन्ता। ।”

12अनि येसु असा इतुर, “नाक मिकुन पकाय पोल्लोंग वेहाना मन्ता मति इदेक निमाट अदेन सहनकिया परविट। 13मति बसके परमेस्वरना बारेता खरोयतुन तोहवाल अर्थ परमेस्वरना आत्मा वायनुर असके मिकुन सबोय खरोयता हरि वेहानुर। अनि ओर आपुनिकेडाल बारायि वळकोर आयनुर मति ओर मिकुन परमेस्वरनिकेडाल बाताल केन्जानुर ओदे वळकानुर। अनि वायवांग पोल्लोंग मिकुन वेहानुर। 14अनि ओर नावांग पोल्लोतिगाडाल येचुन मिकुन वेहानुर इन्जोर ओर नावा आदर#१६:१४ महिमा कियानुर। 15अनि बाराय आयि बाबोना मन्ता अदु सबोय नावा आन्दु इन्जोर ओर नावांग पोल्लोतिगाडाल येचुन मिकुन वेहानुर इन्जोर नना इतान।”

दुःख गिरदाताते बदलेमायार

16अनि येसु इतुर, “हुडुक बेराता पजा निमाट नाकुन हुळवि आयकिट अनि हुडुक बेराता पजा असा नाकुन हुळकिट।” 17असके ओनोर चेला लोकुरकनिकेडाल हुचुलोरक, “ ‘हुडुक बेराता पजा निमाट नाकुन हुळवि आयकिट अनि हुडुक बेराता पजा असा नाकुन हुळकिट, अनि नना बाबोना हेरे दान्तोना’, इन्जोर येर माकुन इन्तोर अदेना अर्थ बाताल मन्ता” इन्जोर ओरक वरोन दुसरोनासंग इतुरक। 18अनि ओरक असा इतुरक, “इद ‘हुडुक बेराता पजा’ इदाना अर्थ बाताल आन्दु? अनि ओर बाताल इन्तोर इदाम माक पुनोम।” 19अनि ओरक नाकुन पुच्चेमायाना इच्चा मन्ता इन्जोर पुन्जुन येसु ओरकुन इतुर, “बाताल निमाट आपसते ‘हुडुक बेराता पजा निमाट नाकुन हुळवि आयकिट अनि हुडुक बेराता पजा असा नाकुन हुळकिट’ इन्जोर नना वेहता पोल्लोता बारेते बाक्या पुच्चेमान्तोरिट? 20निमाट किलकिट अनि पकाय दुःख कियाकिट इन्जोर नना मिकुन खरोय खरोय इन्तोना मति दुनिया गिरदा कियार। अनि मिकुन दुःख आयार मति मिया दुःख गिरदा आस बदलेमायार। 21अनि पेकाल जनम आयानाता नोमुर सुरु आयानपा अदेना बेरा अवता इन्जोर अदेन पकाय दुःख वान्ता। मति बसके अद पेकान जनम हिन्ता असके पजा ओद गिरदा किन्ता बाक्याकि वरोर मानेय इद दुनियातिगा जनम आतुर इन्जोर ओद नोमुरता बारेते आटवन केवो। 22अदाम लेहका मिकुन वने इदेक दुःख मन्ता, मति नना मिकुन असा मिलेमायका अनि मिया मन्दुन पकाय गिरदा आयार, अनि मिया गिरदातुन बोरायि मियागडाल उन्चुन ओयोर आयनुरक। 23अनि ओद दिया निमाट नाकुन बारायि पुच्चेमायविट आयकिट। अनि बाबोनिकेडाल बारायि नावा पोरोयते तलकिकिट ते ओद मिकुन हियानुर इन्जोर नना मिकुन खरोय खरोय इन्तोना। 24अनि इदेकवनाह निमाट नावा पोरोयते बारायि तलकविट; तलकाट ते मिया गिरदा पुरा आयार अचोन मिकुन पुटार।”

सयतानतुन येसु नाश कियानुर

25येसु असा इतुर, “नना इव पोल्लोंग मिकुन उदाहरनते इतोना, मति नना मिकुन असा उदाहरनते वेहोन आस बाबोना बारेते साप साप मिकुन वेहाना बेरा वायार। 26अनि ओद दिया निमाट नावा पोरोयते तलकिकिट। अनि नना मिया साटि बाबोन विनन्ति कियाका इन्जोर नना इनोन। 27बाबो आपुने मिकुन मया किन्तोर बाक्याकि निमाट नाकुन मया किन्तोरिट अनि नना बाबोनिकेडाल वातोना इन्जोर विस्वास कितोरिट। 28अनि नना बाबोनिगडाल इद दुनियाते वातोना; अनि असा नना इद दुनियातुन तासिस बाबोना हेरे दान्तोना।” 29असके चेलालोरक इतुरक, “हुळा इदेक ते निमा बोदायि उदाहरनते इनवायि साप इन्दिला आतोन। 30अनि निमा सबोय पुन्तोन अनि बोरायि निकुन बाताले पुच्चेमायाना जरुरि हिले इन्जोर इदेक माक पुतोम। इदेनते निमा परमेस्वरनिगाडाल वातोन इन्जोर माक विस्वास किन्तोरोम।” 31अनि इद केन्जुन येसु ओरकुन इतुर, “बाताल निमाट इदेक विस्वास किन्तोरिट? 32निमाट सबोय हिके होके आसुन आप आपुना हरिते ताकसुन नाकुन वरोने इराना बेरा वायार इदेक वाता, मति बाबो नावासंग मन्तोर इन्जोर नना वरोरे आयो। 33अनि मिकुन नावागा शान्ति पुटि इन्जोर नना इव पोल्लोंग मिकुन इतोना। अनि दुनियातिगा मिकुन तकलिप आन्ता मति हिमत किम्ट बाक्याकि नना दुनियातुन जिकतोना।”

Currently Selected:

युहनाल 16: fmu

Highlight

Copy