युहनाल 14

परमेस्वर बाबोना हेरे हन्दाना साटि येसुये हरि मन्तोर।

1येसु असा इतुर, “मिया मन दुःखि आयमाकि। अनि परमेस्वरनिगा विस्वास इरान्तोरिट अनि नावागा वने विस्वास किम्ट। 2अनि नावोर बाबोना लोतिगा मन्दान साटि पकाय जागा मन्ता; जागा हिले आस मनवार ते नना मिकुन वेहच मनेना। नना मिया साटि जागा तयार कियान साटि हन्दिला आतोना। 3अनि नना हन्जुन मिया साटि जागा तयार कियाका ते नना बगा मन्दाका अगा निमाट वने मन्दाना साटि असा वासुन मिकुन आपुनासंग ओयिका। 4नना बगा दान्तोना अद हरितुन निमाट पुन्तोरिट।” 5अनि थोमा ओन इतुर, “हे प्रबु, निमा बगा हन्दिला आतोन इन्जोर माक पुनोम ते हरितुन माक बदाम पुनकोम?” 6अनि येसु ओन इतुर, “हरि अनि खरोय अनि जिवन ननाय आन्दान। अनि नावा सिवायि बोरायि बाबोना हेरे अविला परोर। 7अनि निमाट नाकुन पुन्ज मनेरिट ते नावोर बाबोन वने निमाट पुन्ज मनेरिट। अनि इदेकताल ओन पुन्तोरिट अनि ओन हुळतोरिट वने।”

8अनि फिलिपुस ओन इतुर, “हे प्रबु, बाबोन माकुन तोहचिम, इदे माकुन साटि पकाय गिरदा मन्ता।” 9अनि येसु ओन इतुर, “हे फिलिपुस नना इचोक दियांगताल मियासंग मन्तोना अनि बाताल निमाट नाकुन पुनविट? अनि बोर नाकुन हुळतोर ओर बाबोन हुळतोर! असके बाबोन माकुन तोहचिम इदाम निमा बाक्या इन्तोन? 10अनि नना बाबोनिगा मन्तोना अनि बाबो नावागा मन्तोर इदाम बाताल निमा विस्वास केवि? अनि नना मिकुन इन्तोना इव पोल्लो नावाकेडाल इनोन। मति नावोर बाबो नावागा मन्जुन आपुना बुतो किन्तोर। 11अनि नना बाबोनिगा मन्तोना अनि बाबो नावागा मन्तोर इन्जोर नावा विस्वास किम्ट। आयो ते बुतोता कारणते नावा विस्वास किम्ट। 12अनि नावागा विस्वास इरान्तोर ओर नना बोद बुतो किन्तोना ओदे बुतो ओर वने कियानुर। अनि नना बाबोना हेरे दान्तोना इन्जोर इदेनताल वने हजोर बुतो ओर कियानुर इन्जोर नना मिकुन खरोय खरोय इन्तोना। 13अनि निमाट नावा पोरोयते बारायि आयि तलकिकिट ते मरिना द्वारा बाबोना महिमा प्रगट कियान साटि अदेन नना कियाका। 14अनि नावा पोरोयते निमाट नावाकेडाल बारायि तलकिकिट ते नना अदेन कियाका।”

पवित्र आत्माता वाचा

15येसु असा इतुर, “निमाट नावाताल मया इरान्तोरिट ते नावा आग्यातुन मानेमायकिट। 16अनि नना बाबोन विनन्ति कियाका अनि ओर मिकुन दरोज मियासंग मन्दाना साटि असा वरोर मदत केवालतुन हियानुर, 17अनि ओर खरोयता आत्मा आन्दुर। ओन दुनियातोर लोकुरक स्विकार कियाला परोरक, बाक्याकि इद दुनिया ओन पुनोर अनि हुळोर। ओर मियासंग मन्तोर अनि ओर मियागा मन्दानुर इन्जोर ओन निमाट पुन्तोरिट। 18अनि नना मिकुन अनाथ इरोन आयका; नना मिया हेरे वायका। 19अनि हुळुक बेराता पजा दुनियातोर लोकुरकुन नाकुन दिसोन आयका मति निमाट नाकुन हुळकिट बाक्याकि नना जितो मन्तोना इन्जोर निमाट वने जितो मनकिट। 20अनि नना आपुना बाबोनिगा मन्तोना अनि निमाट नावागा अनि नना मियागा मन्तोना इन्जोर ओद दिया निमाट पुन्किट। 21अनि नावा आग्यातुन येचुन अदेन मानेमान्तोर ओरे नावागा मया इरान्तोर। अनि बोर नावागा मया इरान्तोर ओन नावोर बाबो मया किन्तोर, अनि नना वने ओन मया किस आपुनतुन ओन तोहका।” 22अनि ओर यहुदा इस्करियोति आयो मति दुसरो यहुदा येसुन पुच्चेमातुर, “हे प्रबु, निमा माकुन प्रगट कियाला आतोन मति निमा दुनियाता लोकुरकुन प्रगट केवि इन्जोर बाक्या इन्तोन?” 23अनि येसु ओन उत्तर हितुर, “बोरायि नाकुन मया कियानुर ते ओर नावा पोल्लोतुन मानेमायनुर, अनि नावोर बाबो ओन मया कियानुर अनि माक इवुर ओना हेरे दाकोम अनि ओनासंगे मन्दाकोम। 24अनि नाकुन मया केवोर ओर नावा पोल्लोतुन मानेमायोर, अनि निमाट केन्जान्तोरिट ओद पोल्लो नावा आयो मति नाकुन लोहवाल बाबोना आन्दु।”

25अनि येसु असा इतुर, “नना मियासंग मन्दानपा इव पोल्लोंग मिकुन इतान। 26मति बाबो नावा पोरोयदे लोहानुर ओर मदत केवाल मन्जे पवित्र आत्मा मिकुन सबोय पोल्लोंग करहानुर अनि बारायि आयि नना मिकुन इतोना अव सबोय पोल्लोंग मिकुन आलिहच हियानुर। 27अनि नना मिकुन शान्ति हिस दान्तोना, अनि नना आपुना शान्ति मिकुन हिन्तोना। दुनिया हिन्ता लेहका आयो नना मिकुन हिन्तोना। अनि मिया मन दुःखि आयमाकि अनि वरियमाकि। 28‘नना दान्तोना अनि मिया हेरे असा वायका’ इन्जोर नना मिकुन इतोना ओद पोल्लो निमाट केन्जितोरिट। निमाट नावाताल मया इरस मनेरिट ते नना बाबोना हेरे दान्तोना इन्जोर निमाट गिरदा आस मनेरिट बाक्याकि बाबो नावाताल हजोर मन्तोर। 29अनि इव पोल्लोंग आयार असके निमाट विस्वास कियाकिट इन्जोर नना इदेक इव पोल्लोंग आयना मुने मिकुन इतोना। 30अनि नना इदेक मियासंग असा पोल्लोंग केवोन बाक्याकि इद दुनियातोर राजाल मन्जे सयतान वायिला आतोर ओना नावा पोरो बाताले अदिकार हिले। 31मति नना बाबोन मया किन्तोना अनि बदाम बाबो नाकुन आग्या हितोर अदामे नना किन्तोना इन्जोर दुनियातोर लोकुरक पुनिरक। इदेक तेदाट अनि इगाडाल देटु।”

Currently Selected:

युहनाल 14: fmu

Highlight

Copy