युहनाल 11

लाजरना हायाना

1मरियम अनि अदेना हेलाळ मारताना नार बेथानियादिगा लाजर पोरोयतोर वरोर मानेय बिमारिते मतोर। 2अनि इद मरियम उन्दि बेरा प्रबुना पोरो दयमुर निय दोसुन ओना काल्क आपुना कल्कते उमस मता ओदेय मरियम मता। अदेनोरे तमो लाजर बिमारिते मतोर। 3इन्जोर ओना हेलाळक इदाम पोल्लो येसुन लोहतुंग, “हे प्रबु, हुळा, बोन निमा मया किन्तोन ओर पकाय बिमारिते अरतोर।” 4अनि इद पोल्लोंग केन्जुन येसु इतुर, “इद बिमारि हायान साटि आयो मति परमेस्वरना महिमा आयान साटि मन्ता। इन्जोर इद बिमारिते परमेस्वरना आपुना मरिना महिमा प्रगट आयि।”

5अनि मारता अदेना हेलाळ मरियम अनि लाजरिन येसु मया किन्दुर। 6ते वने बसके लाजर बिमारि मन्तोर इदाम येसु केन्जतुर असके ओर बगा मतोर अगाय रन्ड दियांग असा मतोर। 7असके ओर चेला लोकुरकुन इतुर, “वराट माक असा यहुदि प्रदेशते दाकाट।” 8मति चेला लोकुरक येसुन इतुर, “हे गुरुजि, इदेकेन ते यहुदि अदिकारि लोकुरक निकुन कल्कने हियाना इच्चा किस मतोरक अनि बाताल निमा असा वने अगा दान्तोन?” 9अनि येसु ओरकुन इतुर, “दरोज उन्दि दिया बारा गन्टांग वेळिचि मन्ता बोरायि दियाते ताकिर ते इद दुनियाता वेळिचि हुळान्तोर इन्जोर ओर टेस तिनोर। 10मति बोरायि नरका ताकिर ते नरका वेळिचि हिले आस मन्ता इन्जोर ओर टेस तिन्तोर।” 11अनि ओर असा ओरकुन इतुर, “मावोर गोतियाल लाजर हुन्जतोर, मति नना इदेक ओन तेहिला दान्तोना।” 12असके ओनोर चेलालोरक ओन इतुर, “हे प्रबु ओर हुन्ज मन्दानुर ते ओर सुदरे मायनुर।” 13अनि येसु ते ओना हायानाता बारेते इन्ज मतोर मति ओर हुन्जतोर इदेना बारेते येसु इन्दिला आतोर इन्जोर चेला लोकुरक समजेमातुरक। 14असके येसु, “लाजर हातोर”, इन्जोर येसु ओरकुन साप साप इतुर। 15अनि नना अगा हिलेन आसि इन्जोर मिकुन विस्वास कियान साटि इदेक सन्दि पुटार इन्जोर नना मिया कारणते गिरदा मन्तोना। मति इदेक वराट माक ओना हेरे दाकाट। 16असके “वराट, माक वने येसुनासंग हायान साटि दाकाट” इन्जोर दिदुमुस#११:१६ मन्जे जुळवा तमो पोरोयतोर थोमा आपुना संगे मतोर चेला लोकुरकुन इतुर।

असा जिवेमायाना अनि जिवन येसुये मन्तोर।

17लाजरतुन बिजगुडितिगा इरतुर ते ओन इदेक नालुंग दियांग आतांग इन्जोर अगा अवतपा येसु पुतुर। 18अनि बेथनियाह सहेर येरुसलेमता हेरे उन्दि कोस#११:१८ उन्दि कोस मून्ड किलोमिटर मन्ता। लक मता। 19अनि पकाय येहुदि लोकुरक मारता अनि मरियमना हेरे अवेहनोर तमो हातुर इन्जोर अवेहकुन दिर हियान साटि वास मतोरक। 20मारता येसु वायनुर इदाम केन्जतु असके ओन मिलेमायिला हतु मति मरियम लोने उदस मता। 21अनि मारता येसुन इतु, “हे प्रबु निमा इगा मन्ज मनेन ते, नावोर तमो हायोर आस मनेर। 22अनि बारायि आयि निमा परमेस्वरनिकेडाल तलकिकि ते, परमेस्वर निकुन हियानुर इन्जोर इदेक वने नना पुन्तोना।” 23अनि येसु अदेन इतुर, “नियोर तमो असा जिवे मायनुर।” 24अनि मारता इतु, “आकरि न्यायता दिया ओर असा जिवे मायनुर” इन्जोर नना पुन्तोना। 25अनि “असा जिवे मायाना अनि जिवन ननाय आन्दान। बोरायि नावागा विस्वास किन्तोर ओर हायानुर ते वने जिवेमायनुर। 26अनि जिवित मन्जुन नावागा विस्वास किन्तोर ओर बसकेय हायोर आयनुर। बाताल निमा इद पोल्लोतिगा विस्वास किन्तोन?” इन्जोर येसु अदेन इतुर। 27अनि मारता येसुन इतु, “इंगो! हे प्रबु, इद दुनियाते वायवाल मन्तोर ओर परमेस्वरनोर मरि मसिहा निमाय आन्दि इन्जोर नना विस्वास किन्तोना।”

येसु किलतुर

28अनि इदाम इन्जुन मारता हतु, अनि आपुना हेलाळ मरियमिन केयसुन हुस्तोय इतु, “गुरु इगाय मन्तोर अनि निकुन केयिला आतोर।” 29अनि मरियम इद पोल्लो केन्जुन अद सान्डे तेदचुन ओना हेरे वातु। 30अनि येसु इदेक वने नाटेनिगा अववाय बगा मारता ओन मिलेमास मता अदे जागातिगा ओर मतोर। 31असके अदेनासंग लोन मन्जुन अदेन दिर हिसोर मतोरक ओर यहुदिलोकुरक मरियम सान्डे तेदचुन बाहरो हता इद हुळसुन मरियम बिजगुडितिगा किलिला दान्ता इन्जोर समजेमातुरक अनि अदेना परके हतुरक। 32बसके मरियम येसु मतोर अगा अवतु असके ओन हुळता बराबर ओना काल्क अरतु अनि इतु, “हे प्रबु निमा इगा मन्ज मनेन ते नावोर तमो हायोर आस मनेर।” 33येसु अदेन अनि अदेना संग वातोर यहुदिलोकुरकुन किलानपा हुळतुर असके ओर आत्माते पकाय दुःखि आतुर, 34अनि येसु ओरकुन इतुर, “निमाट ओन बगा इरतोरिट?” अनि ओरक ओन इतुर, “हे प्रबु दया हुळकि।” 35अनि येसु किलतुर। 36असके येहुदि लोकुरक इन्दिला लागतुरक, “हुळाट ओर ओन बचोन मया किन्दुर।” 37मति ओरागडाल दुसरो हुचुक लोकुरक, “बाताल येर वरोर आन्दराल मानेयना कोन्डानुंग सुदरे कितुर येर ओर मानेयतुन वने हायानाताल पिसिहिस मनेर” इन्जोर इतुर।

येसु लाजरिन असा जिवे किहिन्तोर

38अनि येसु मन्दे पकाय दुःखि आस बिजगुडितिगा वातुर, अद उन्दि पान्जा मता। अनि अदेना पोरो उन्दि कलदुन मुच मतोर। 39अनि येसु इतुर, “कलदुन गुचहाट।” अनि ओर हातोर मानेयना हेलाळ मारता ओर इतुर, “हे प्रबु, अगडाल ते इदेक दोयिंगता बाक्याकि ओर हातुर ते इदेक नालुंग दियांग आतांग।” 40अनि येसु अदेन इतुर, “निमा विस्वास कियाकि ते परमेस्वरना महिमातुन हुळकि इन्जोर नना निकुन इनोन बहे।” 41असके ओरक अद कलदुन गुचिहतुरक अनि येसु पोरो हुळसुन इतुर, “हे बाबो निमा नावा केन्जतोन इन्जोर नना निया धन्यवाद किन्तोना। 42अनि निमा दरोज नावा केन्जान्तोन इन्जोर नना पुन्दान, मति निमा नाकुन लोहतोन इदाम नावा हेरे मन्ता इद भीळ विस्वास केविर इन्जोर ओरा कारणते नना इन्तोना।” 43अनि इदाम इन्जुन ओर “हे लाजर पसिस वाय” इन्जोर हजोर लेंगदे इतुर। 44अनि हातोर मानेय बिजगुडिताल बाहरो वातुर अनि ओना कयक काल्क कपडाते दोहच मता अनि चेहरा वने उन्दि टावेलते मुच मता। अनि येसु ओरकुन इतुर, “ओन लेहाट अनि हन्दिला हिम्ट।”

येसुन हव्काना योजना

(मत्ति २६:१-५; मर १४:१,२; लूका २२:१,२)

45मरियमना हेरे वास मतोरक ओर यहुदिलोकुरकनिकेडाल पकाय लोकुरक लाजरिन असा जिवे कियाना ओद चमत्कारता बुतो हुळस येसुनिगा विस्वास कितुरक। 46मति ओरागडाल हुचुक लोकुरक परीसि लोकुरा हेरे हन्जुन येसुना बुतोता पोल्लो वेहतुरक। 47असके मुक्याल याजक अनि परीसिलोरक यहुदि लोकुरा हजोर सभा केयतुरक अनि “माक बारायि कियाला परोम? येर मानेय ते पकाय चमत्कारता बुतो कियाला आतोर। 48अनि माक येन इदामे कियाला हियाकाट ते सबोय लोकुरक ओर मसिहा आन्दुर इन्जोर विस्वास कियानुरक। अनि रोमि लोकुरक वासुन मावा मन्दिरतुन अनि मावा देशतोर लोकुरकुन हिके होके कियानुर” इदाम इतुर। 49असके ओरागडाल कायिफा पोरोयतोर वरोर मानेय ओद वरसातोर महायाजक मतोर। ओर ओरकुन इतुर, “निमाट बाताले पुनविट! 50अनि मावा देशतोर सबोय लोकुरा नाश रोमि सरकारता कयदे आयाना बदला लोकुरक साटि वरोर मानेयना हायाना मावा साटि सोबाय मन्ता इन्जोर निमाट समजेमायिला पहाजे।” 51अनि इद पोल्लो ओर आपुना मन्दिगडाल इनोर मति ओर ओद वरसातोर महायाजक मतोर इन्जोर सबोय यहुदिलोकुरक साटि येसु हायिलाय पहाजे इन्जोर ओना द्वारा परमेस्वरना पोल्लो वेहतुर। 52अनि केवल यहुदिलोकुरक साटि आयो मति सबोय दुनियातिगा परमेस्वरनिगा विस्वास केवालोरक मन्तोरक ओर सबोयलोरकुन उन्दि कियान साटि ओर हायवाल मन्तोर। 53अनि अदे दियाताल ओरक ओन हव्काना साटि योजना कियाला लागतुरक।

54इन्जोर येसु अद बेराताल यहुदियातिगा खुलम खुला वलियोर मति ओनोर चेलानासंग इफरायिम पोरोयता उन्दि नार हन्जुन अगा मन्दिला लागतुर। अनि ओद नार वारु पल्लाता हेरे मता।

55यहुदियाता पसहा पोरोयता हनुम हेरे मता इन्जोर पकाय लोकुरक आपुना रितिता अनुसार शुद्धि कियान साटि पसहा हनुमता मुने आपुना नाटिनाल येरुसलेमतिगा हतुरक। 56अनि आकरिते ओरक येसुन पळकिला लागतुरक अनि “निमाट बाताल विचार कियाला आतोरिट? बाताल ओर इद हनुमते वायोर आयनुर?” इन्जोर मन्दिरतिगा निचुन आपसते इन्दिला लाकतुरक। 57असके मुक्याल याचक अनि परीसि लोकुरक वने येसुन पयान साटि बोरायि ओन बगा मन्तोर पुनिर ते वेहिर इन्जोर आग्या हिस मतोरक।

Currently Selected:

युहनाल 11: fmu

Highlight

Copy