बुतोंग 5

हनन्याह अनि सफीराता बारेते

1मति हनन्याह पोरोयतोर वरोर मानेय अनि ओना मुत्ते सफीरा ओरक इवुरास आपुना हुडुक डन्डतुन मोमतुरक, 2अनि पुटता डबुंगताल हुचुक डबुंग मुत्तेन मिलेमास आपुना हेरे इरतुर अनि हुचुक डबुंग तचुन येसुना खास चेलाल लोकुरा काल्कना मुने इरसितुर। 3असके पतरस ओन पुच्चेमातुर, “हे हनन्याह! निमा पवित्र आत्माता मुने खोटाल वळकति, आपुना डन्डतुन मोमस पुटता डबुंगताल हुचुक डबुंग आपुना हेरे इरति इन्जोर सयतानतुन निमा आपुना मन्दिगा इदाम बुतो कियालाय बाक्या इदाम सन्दि हिति? 4मोमाना मुने बाताल ओद निया हिले आसि? अनि अदेन निमा मोमसिति असके वने ओद धन बाताल मिया इच्चा अनुसार अदेन उपयोग किया परकि बहे? निमा इदाम खोटाल पोल्लो कियान साटि बाक्या विचार किति? इद खोटाल पोल्लो निमा मानेयतुन आयो मति परमेस्वरतुन वळकतोन।” 5इव पोल्लोंग केन्जतपा हनन्याह जिवा तासिस अडिय अरतुर, अनि सबोय केन्जवालोरकुन पकाय वरे आतु। 6पजा लयोर तेदचुन ओना सकुलि बनेहकितुर अनि ओन बाहरो ओस मिसितुरक।

7लगभग मून्ड गन्टाता पजा हनन्याहना मुत्ते, अगा बाताले आस मता अदेन पुनवाप, लोपा वातु। 8असके पतरस अदेन पुच्चेमातुर: “नाकुन वेहा बाताल निमा ओद डन्ड इचोने डबुते मोमस मन्दिट?” ओद इतु, “इंगो, माक इचोने डबुते मोमस हितोम।” 9पतरस अदेन इतुर, “निमाट इवुरास प्रबुना आत्माता परिक्षा कियान साटि बाक्या उन्दि आतिट? हुळा! नियोर मुजोन मिसवालोरक इदेक वायनुरक, अनि ओर निकुन वने बाहरो ओस अदामे कियानुरक।” 10असके ओद सान्डेय जिवा तासिस ओना मुने अरतु, अनि लयोर लोपा वास अदेन हाता हुळतुरक अनि बाहरो ओस अदेना मुजोना हेरे मिसितुरक। 11मसिलोकुरा सभाता सबोय लोकुरकुन अनि इव पोल्लोनुंग केन्जवालोर सबोय लोकुरकुन पकाय वरे आतु।

येसु मसिना खास चेलालोरक किता अत्भुत बुतोंग

12येसुना खास चेला लोकुरा कयदे पकाय चिन्ह अनि चमत्कारता बुतो लोकुरा नडुम तोहन्दुर अनि ओरक सबोय उन्दि मन आस सुलेयमान राजाना मन्डातिगा#५:१२ सुलेयमाना ओसारेतिगा जमा आन्दुरक। 13पकाय लोकुरक ओरा वाहवा किन्दुरक ते बोरे ओरासंग मिलेमायानाता हिमत केवोर, 14ते वने असा असा पकायि मानेयक अनि आसक प्रबुनिगा विस्वास किस मसिलोकुरा सभातासंग जुळेमासोर मतोरक। 15अनि लोकुरक बिमार लोकुरकुन हरितिगा तच-तच पतरस वायनुर असके ओना दळमि ओरागाडाल बोनागाय अरि इन्जोर कटुल अनि चटयि पोरो हुन्जिहन्दुर: 16इचोने आयो येरुसलेमता हेरेगुरेटा सहेरताल वने पकाय लोकुरक बिमार अनि दुष्टात्मा सतेह कितोरकुन तच-तच जमा किन्दुरक। अनि येसुना खास चेला लोकुरा द्वारा सबोयलोरकुन परमेस्वर सुदरे किन्दुर।

येसुना खास चेलालोरकुन पकायि तकलिप किन्तोरक

17असके हजोर याजक अनि सदुकियाता दलतोर मतोर ओनोर संगवारिह येसुना खास चेला लोकुरा विरोदते पकाय हेवाते आस नितितुरक। 18अनि ओरक येसुना खास चेला लोकुरकुन पयस जेहलतिगा बन्द किसितुरक। 19मति नरका प्रबुनोर वरोर स्वरगदूत जेहलता कवाळ तरियस ओरकुन बाहरो तच, 20“हन्ट, प्रार्थना लोतिगा नितस इद जिवनता पोल्लोंग सबोय लोकुरकुन वेहाट” इन्जोर इतुर। 21ओरक इद केन्जचुन सकार आतपा प्रार्थना लोतिगा हन्जुन उपदेश हियाला लागतुरक। असके हजोर याजक अनि ओनोर संगवारि वास हजोर सभातिगा इस्रायेलतोर सबोय अदिकारि लोरकुन जमा कितुर। अनि येसुना खास चेलालोरकुन तरीर इन्जोर जेहलतिगा लोहतुर। 22मति ओरकुन ततान साटि हतोर, “माक जेहलतुन पकाय चवकसिते बन्द कितोम अनि केपवालोर सयनिक लोकुरकुन बाहरो कवाळतिगा नितितोरक हुळतोम, 23मति कवाळ तरियतोम असके लोपा येसुना खास चेलाल लोरकुन कलियोम आतोम” इदाम ओरक मलस वास वेहतुरक। 24प्रार्थना लोतुन केपवालोर सयनिक लोकुरा अदिकारि अनि मुक्य याजक लोकुरक इद पोल्लो केन्जतुरक असके येसुना खास चेला लोकुरकुन बाताल आतु इन्जोर ओरा बारेते पकाय चिन्ताते अरतुरक। 25अचोय बेरा बोरे वास ओरकुन वेहतुर, “हुळाट, निमाट जेहलतिगा बन्द किस मन्दिट ओरक मानेयक प्रार्थना लोतिगा नितस लोकुरकुन उपदेश हियाला आतोरक!” 26असके प्रार्थना लोतुन केपवालोर सयनिक लोकुरा अदिकारि आपुना सिपायिलोरासंग हन्जुन लोकुरक माकुन कलदे हेमाकिर इदाम ओर लोकुरकुन वरियन्दुर इन्जोर ओरकुन जबरदस्ति केवाय ततुरक।

27इदाम ओरक येसुना खास चेलालोरकुन तचुन हजोर सभाता मुने निपिहतुर, असके हजोर याजक ओरकुन, 28“ओर येसुना पोरोयते उपदेश हेमाट इन्जोर माक कटोर आदेस हिस मतोरोम ते वने पुरा येरुसलेमतुन निमाट आपुना उपदेशते निहतोरिट अनि ओर मानेयना हायाना गुन्हा मावागा तताना निमाट इच्चा किन्तोरिट#मत्ति २७:२५#५:२८ ओर मानयेना नतुर मावागा तताना इच्चा किन्तोरिट।” इन्जोर इतुर। 29असके पतरस अनि येसुना दुसरो खास चेला लोकुरक हजोर याजकिन इदाम उत्तर हितुर: “मानेयना आग्याताल विळस माक परमेस्वरना आग्याता पालन जरुर कियाला पहाजे। 30निमाट कुरुस पोरो अन्जहिस हव्कस मन्दिट ओर येसुन मावोर आजि-दादिलोरा परमेस्वर असा जिवेहकितुर; 31इस्रायेल लोरकुन पस्तेमायाना अनि पापतुन मापि केविर इन्जोर परमेस्वर ओनेय प्रबु अनि पिसिहवाल आस ठहरे किस आपुना तिन्दान कयबासा उपिहतुर#५:३१ परमेस्वरना तिन्दान कयबासा उपिहतुर मन्जे परमेस्वरना सबोयि अदिकार येसुन हितुर।। 32इव पोल्लोता माक अनि परमेस्वर आपुना आग्यातुन मानेमान्तोर ओरकुन हिता पवित्र आत्मा वने गवाह मन्तोर।”

33इद केन्जचुन हजोर सभातुन पकाय होंग आस ओरकुन हव्काना इच्चा कितुर। 34मति मूसाना नियमतुन करिहवाल सबोय लोकुरक मानवाले मतोर गमालियेल पोरोयतोर वरोर परीसि मानेय ओर सभातिगा नितस येसुना चेला लोकुरकुन हुडुक बेरा साटि बाहरो ओयाना आग्या हितुर। 35अनि ओर असा ओरकुन इतुर, “हे इस्रायेलोरक, निमाट बाताले येरक मानेयकनासंग कियाना इच्चा किन्तोरिट, ते सोबाय विचार किस किम्ट। 36बाक्याकि इव दियाता पहले थियुदास पोरोयतोर वरोर मानेय नना वने बोरे आन्दान इदाम इन्ज तेदितुर, अनि नालुंग नुहकना हेरे लोकुरक ओनासंग मिलेमातुर; मति ओन हव्कतुरक अनि बचोक लोकुरक ओन मानेमान्दुरक ओरक सबोय हिके-होके आस नाश आतुरक। 37ओना पजा गलीलितोर यहुदाल जनगणनाता दियाते प्रगट आतुर अनि हुचुलोर लोकुरकुन आपुना बासा कितुर, ओन वने हव्कतुरक अनि बचोक लोकुरक ओन मानेमान्दुरक ओर सबोय लोकुरक हिके-होके आतुरक। 38इन्जोर येरक मानेयकताल लके मन्ट अनि येरक मानेयकुन ओरा बुतो साटि तासिम बाक्याकि येरा इद योजना या इद बुतो मानेयनिकेडाल मन्ता ते ओद बुतो आपुनास नाश आयार; 39मति ओद परमेस्वरनिकेडाल मन्दार ते अदेन निमाट नाश किया परविट अनि निमाट परमेस्वरतुन विरोद केवालोरक इदाम ठहरे मायकिट!” इन्जोर इन्तोर।

40असके ओरक ओना पोल्लो मानेमातुरक; अनि येसुना खास चेलालोरकुन केयस हाहितुरक अनि येसुना पोरोयते असा बोवे पोल्लोंग केमाट इन्जोर आदेस हिस तासितुरक। 41असके माक येसुना पोरोयते अपमान आयान साटि योग्य ठहरे मातोम इन्जोर ओरक गिरदा आस यहुदि लोकुरा हजोर सभाता मुनेटाल हतुरक। 42असा ओरक दरोज प्रार्थना लोतिगा अनि लोहक लोहक हन्जुन उपदेश कियाना अनि येसुये मसि आन्दुर इद सुसमाचार वेहाना रोमोर आतुरक।

Currently Selected:

बुतोंग 5: fmu

Highlight

Copy