मरकुस 15

राजपाल पिलातुस के आँगे यीसु

(मत्ती 27:1-2,11-14; लूका 23:1-5; यूहन्ना 18:28-38)

1भिनसार होतय तुरन्तय प्रधान याजक लोग, यहूदी धारमिक अँगुआ लोग, अउर मूसा के बिधान सिखामँइ बाले, अउर महासभा के सगले मनई सलाह कइके यीसु काहीं बँधबाइन, अउर उनहीं लइ जाइके राजपाल पिलातुस के हाँथ म सउँप दिहिन। 2राजपाल पिलातुस यीसु से पूँछिन, “का तूँ यहूदी लोगन के राजा आह्या?” तब यीसु उनहीं जबाब दिहिन, “तूँ खुदय कहते हया!” 3अउर प्रधान याजक लोग यीसु के ऊपर खुब बातन के दोस लगाबत रहे हँय। 4राजपाल पिलातुस यीसु से पुनि पूँछिन, “तूँ काहे कुछू जबाब नहीं देते आह्या, देखा, ईं पंचे तोंहरे ऊपर केतनी बातन के दोस लगाबत हें?” 5यीसु पुनि कुछू जबाब नहीं दिहिन; एसे राजपाल पिलातुस खुब अचरज मानिन।

यीसु काहीं मारि डारँइ के हुकुम

(मत्ती 27:15-26; लूका 23:13-25; यूहन्ना 18:39—19:16)

6राजपाल पिलातुस उआ तेउहार माहीं एकठे कइदी काहीं, जेही उनखे राज के लोग चाहत रहे हँय, उनखे खातिर छोंड़ि देत रहे हँय। 7बरअब्बा नाम के एकठे मनई भीड़ म दंगा फसाद करँइ बाले ऊँ मनइन के साथ जेल माहीं बंद रहा हय, जे कोऊ उआ दंगा माहीं कतल किहिन तय। 8अउर भीड़ के कुछ जने ऊपर जाइके राजपाल पिलातुस से बिनती कइके कहिन, कि जइसन हरेक तेउहार माहीं, अपना हमरे पंचन के खातिर करत रहे हएन, उहयमेर करी। 9राजपाल पिलातुस उनहीं जबाब दिहिन, “का तूँ पंचे चहते हया, कि हम तोंहरे खातिर यहूदी लोगन के राजा काहीं छोंड़ि देई?” 10काहेकि राजपाल इआ जानत रहे हँय, कि प्रधान याजक लोग यीसु काहीं जलन के कारन पकड़ाइन हीं। 11पय प्रधान याजक लोग भीड़ के मनइन के कान भरिन, कि कहा राजपाल पिलातुस बरअब्बा काहीं हमरे पंचन के खातिर छोंड़ि देंय। 12इआ सुनिके राजपाल पिलातुस भीड़ के मनइन से पुनि पूँछिन, “त तूँ पंचे जेही यहूदी लोगन के राजा कहते हया, ओही हम का करी?” 13ऊँ पंचे पुनि चिल्लाने, “ओही क्रूस माहीं चढ़ाय द्या!” 14राजपाल पिलातुस उनसे पुनि कहिन, “काहे, ऊँ कउन अपराध किहिन हीं?” पय ऊँ पंचे अउर चिल्लाँइ लागें, “ओही क्रूस म चढ़ाबा!” 15तब राजपाल पिलातुस भीड़ के मनइन काहीं खुस करँइ के खातिर, बरअब्बा काहीं उनखे खातिर छोंड़ दिहिन, अउर यीसु काहीं चाबुक से मरबाइके, उनहीं पंचन काहीं सउँप दिहिन, कि उनहीं क्रूस माहीं चढ़ाबा जाय।

सिपाहिन के व्दारा यीसु के निरादर

(मत्ती 27:27-31; यूहन्ना 19:2-3)

16सिपाही यीसु काहीं किला के भीतर अँगना म लइगें, जऊँ प्रीटोरियुम कहाबत रहा हय, अउर सगली पलटन काहीं बोलाय लाएँ। 17तब सिपाही लोग यीसु काहीं बैगनी रंग के ओन्हा पहिराइन, अउर काँटन काहीं गुँथिके मुकुट बनाइके यीसु के मूँड़े माहीं धरिन, 18अउर इआ कहिके यीसु काहीं नबस्कार करँइ लागें, “हे यहूदी लोगन के राजा नबस्कार!” 19सिपाही लोग यीसु के मूँड़े माहीं सरकन्डा के लाठी मारत रहे हँय, अउर यीसु के ऊपर थूँकत रहे हँय, अउर गोड़न गिरिके यीसु काहीं नबस्कार करत रहिगें। 20अउर जब ऊँ पंचे यीसु के मजाक उड़ाय चुकें, तब उनखर बैगनी रंग के ओन्हा उतरबाइके उनहिन के ओन्हा पहिराय दिहिन; अउर उनहीं क्रूस माहीं चढ़ामँइ के खातिर बहिरे लइगें।

यीसु काहीं क्रूस म चढ़ाउब

(मत्ती 27:32-44; लूका 23:26-43; यूहन्ना 19:17-27)

21सिकन्दर अउर रूफुस के बाप समौन, जउन कुरेन सहर के रहँइ बाला आय, उआ गाँव कइती से चला आबत रहा हय, त ओहिनठे से निकरा; त ऊँ पंचे ओही बेगार माहीं पकड़िन, कि उआ यीसु के क्रूस उठाइके लइ चलय। 22अउर ऊँ पंचे यीसु काहीं गुलगुता नाम के जघा माहीं लइ आएँ, जेखर मतलब हय “खोपड़ी के जघा”। 23उहाँ यीसु काहीं पीरा कम करँइ बाली मुर्र दबाई अंगूर के रस माहीं मिलाइके देंइ लागें, पय यीसु नहीं लिहिन। 24तब ऊँ पंचे यीसु काहीं क्रूस माहीं चढ़ाइन, अउर उनखे ओन्हन के खातिर परची डारिके, कि केही का मिली, आपस माहीं बाँटि लिहिन। 25अउर सकारे नव बजे के करीब ऊँ पंचे यीसु काहीं क्रूस माहीं चढ़ाइन। 26अउर उनखर अरोप-पत्र लिखिके उनखे ऊपर लगाय दीनगा, कि “यहूदी लोगन के राजा।” 27अउर ऊँ पंचे यीसु के साथ दुइठे डँकुअन काहीं एकठे क यीसु के दहिने कइती, अउर दुसरे काहीं बाएँ कइती, क्रूस माहीं चढ़ाइन। 28#यसा 53:12(तब पबित्र सास्त्र के उआ बचन कि यीसु अपराधिन के साथ गिने गें, पूर भा।) 29अउर उआ गइल से जाँइ बाले मूड़ हलाय-हलाइके, अउर इआ कहिके यीसु के बुराई करत रहे हँय, कि “बाह! मन्दिर काहीं गिरामँइ बाले, अउर तीन दिना माहीं बनामँइ बाले, 30क्रूस से उतरिके खुद काहीं बचाय ले।” 31इहइमेर से प्रधान याजक लोग घलाय, मूसा के बिधान सिखामँइ बालेन समेत, आपस माहीं मजाक उड़ाइके कहत रहे हँय, “इआ त दुसरेन काहीं बचाइस, पय खुद काहीं नहीं बचाय सकय, 32इजराइल देस के राजा, मसीह, अब क्रूस से उतरि आबय, कि हम पंचे देखिके बिसुआस करी।” अउर जउन उनखे साथ क्रूस माहीं चढ़ाए गे रहे हँय, ऊँ पंचे घलाय उनखर बुराई करत रहे हँय।

यीसु के प्रान छोंड़ब

(मत्ती 27:45-56; लूका 23:44-49; यूहन्ना 19:28-30)

33अउर दुपहर बारा बजे से लइके, तीन बजे तक सगले देस माहीं अँधिआर छाबा रहिगा। 34दिन के तीन बजे के करीब यीसु खुब चंडे चिल्लाइके कहिन, “इलोई, इलोई, लमा सबक्तनी?” जेखर मतलब हय “हे हमार परमातिमा, हे हमार परमातिमा अपना हमहीं काहे छोंड़ि दिहेन?” 35जउन मनई उनखे लघे ठाढ़ रहे हँय, उनमा से कुछ जने इआ सुनिके कहिन, “देखा, ईं एलिय्याह नबी काहीं गोहराबत हें।” 36अउर एक जने दउड़िके सोक्खा क लइके सिरका माहीं बोरिस, अउर सरकन्डा के लाठी माहीं धइके यीसु काहीं चुहकाइस, अउर कहिस, “रुकि जा, हम पंचे देखी, एलिय्याह नबी एही क्रूस से उतारँय के खातिर आबत हें, कि नहीं।” 37तब यीसु खुब चन्डे चिल्लाइके प्रान छोंड़ दिहिन। 38अउर मन्दिर के परदा ऊपर से नीचे तक, फाटिके दुइ टुकड़ा होइगा। 39जऊँ सुबेदार यीसु के आँगे ठाढ़ रहा हय, जब उआ यीसु काहीं इआमेर चिल्लाइके प्रान छोंड़त देखिस, त उआ कहिस, “वास्तव माहीं ईं मनई, परमातिमा के लड़िका आहीं!” 40कइयकठे मेहेरिआ घलाय दूरिन से देखत रही हँय: उनमा मगदल गाँव के मरियम, छोटे याकूब अउर योसेस के महतारी मरियम, अउर सलोमी रही हँय। 41जब यीसु गलील प्रदेस म रहे हँय, तबहिनव ईं मेहेरिआ यीसु के पीछे चलत रही हँय, अउर यीसु के सेबा-टहल करत रही हँय; अउर दुसरव खुब मेहेरिआ रही हँय, जउन यीसु के साथ यरूसलेम सहर माहीं आईं तय।

यीसु काहीं गाड़ा जाब

(मत्ती 27:57-61; लूका 23:50-56; यूहन्ना 19:38-42)

42जब साँझ भय, तब एसे कि तइआरी करँइ के दिन रहा हय, जउन पबित्र दिन के एक दिना पहिले होत रहा हय, 43अरमतिया गाँव के रहँइ बाले यूसुफ आएँ, जउन महासभा के सम्मानित सदस्सव रहे हँय, अउर खुदव परमातिमा के राज आमँइ के इन्तजार करत रहे हँय। ऊँ ढाढ़स कइके राजपाल पिलातुस के लघे जाइके यीसु के लहास माँगिन। 44राजपाल पिलातुस अचरज मानिन, कि यीसु एतनी जल्दी मरिगें; अउर अपने सुबेदार काहीं बोलाइके पूँछिन, “का यीसु काहीं मरे कुछ देर होइगे?” 45जब राजपाल पिलातुस अपने सुबेदार से सगला हाल जान लिहिन, तब यीसु के लहास यूसुफ काहीं देबाय दिहिन। 46तब यूसुफ मखमल के एकठे चद्दरा मोल खरीदिन, अउर यीसु के लहास क क्रूस से उतारिके उआ चद्दरा माहीं लपेटिन, अउर एकठे कब्र म, जऊँ पथरा के चट्टान माहीं खोदी गे रही हय, ओहिन म धरिन, अउर कब्र के दुअरा माहीं एकठे खुब बड़ा पथरा ढनगाइके बंद कइ दिहिन। 47अउर मगदल गाँव के मरियम, अउर योसेस के महतारी मरियम देखत रही हँय, कि यीसु काहीं कहाँ धरा ग हय।

Currently Selected:

मरकुस 15: bag

Highlight

Copy