मत्ती 17

यीसु के रूप बदलब

(मरकुस 9:2-13; लूका 9:28-36)

1छय दिना के बाद यीसु, पतरस अउर याकूब अउर याकूब के भाई यूहन्ना काहीं, अपने साथ माहीं लिहिन, अउर उनहीं एकठे ऊँच पहार माहीं एकान्त म लइगें। 2अउर उहाँ उनखे अँगुअय यीसु के रूप बदलिगा, अउर उनखर मुँह सुरिज कि नाईं चमकँइ लाग, अउर उनखर ओन्हा उँजिआर कि नाईं उजर होइगा। 3अउर तिनहूँ चेला मूसा नबी, अउर एलिय्याह नबी काहीं यीसु के साथ बातँय करत देखिन। 4इआ देखिके पतरस यीसु से कहिन, कि “हे प्रभू, हमार पंचन के इहाँ रहब निकहा हय। अगर अपना के मरजी होय, त हम पंचे इहाँ तीनठे मड़इआ बनाई, एकठे अपना के खातिर, एकठे मूसा नबी के खातिर, अउर एकठे एलिय्याह नबी के खातिर।” 5पतरस जब इआ कहतय रहे हँय, तबहिनय एकठे उजर बदरी आइके उनहीं पंचन काहीं लुकाय लिहिस, अउर उआ बदरी से इआ बोल सुनान: कि “ईं हमार पियार लड़िका आहीं, इनसे हम खुब प्रसन्न हएन: तूँ पंचे इनखे बातन काहीं मान्या।” 6इआ सुनिके चेला लोग एतना डेराइगें, कि भुँइ माहीं मुँहे के बल गिरिगें। 7तब यीसु उनखे लघे आइके उनहीं छुँइन, अउर कहिन, “उठा, डेरा न।” 8अउर जब ऊँ पंचे आपन आँखी खोलिन, त उनहीं यीसु के अलाबा अउर कोऊ नहीं देखान।

9पहार से नीचे उतरत समय, यीसु उनहीं हुकुम दिहिन, कि “जब तक मनई के लड़िका मरिके जिन्दा न होइ जाय, तब तक जऊँ कुछू तूँ पंचे देखे हया, उआ कोहू से न बताया।” 10अउर ऊँ पंचे यीसु से पूँछिन, कि “मूसा के बिधान सिखामँइ बाले इआ काहे कहत हें, कि मसीह से पहिले एलिय्याह नबी जरूर अइहँय?” 11तब यीसु उनहीं पंचन काहीं जबाब दिहिन, कि “एलिय्याह नबी जरूर अइहँय, अउर मसीह काहीं सोइकार करँइ के खातिर, मनइन काहीं तइआर करिहँय। 12पय हम तोंहसे कहित हएन, कि एलिय्याह त आय चुके हँय, अउर कउनव मनई उनहीं नहीं पहिचानिन; पय जइसन चाहिन उहयमेर उनखे साथ बरताव किहिन। इहइमेर से मनई के लड़िका घलाय उनखे व्दारा सताबा जई।” 13तब उनखर चेला लोग इआ समझिगें, कि यीसु, यूहन्ना बपतिस्मा देंइ बाले के बारे माहीं कहिन हीं।

मिरगी से परेसान लड़िका काहीं यीसु नीक किहिन

14जब यीसु अपने तिनहूँ चेलन के साथ भीड़ के मनइन के लघे पहुँचे, तबहिनय एकठे मनई यीसु के लघे आइके उनखे गोड़न गिरिके कहँइ लाग, 15“हे प्रभू, हमरे लड़िका काहीं मिरगी आबत ही, ओखे ऊपर दया करी! काहेकि ओही बड़ा कस्ट हय; उआ बेर-बेर आगी माहीं, अउर पानी माहीं गिर परत हय। 16अउर हम ओही अपना के चेलन के लघे लइ आएन तय, पय ऊँ पंचे ओही नहीं नीक कए पाइन।” 17तब यीसु उनहीं जबाब दिहिन, “हे परमातिमा के ऊपर बिसुआस न करँइ बाले हठी मनइव, हम कब तक तोंहरे साथ रहब, अउर कब तक तोंहार सहत रहब? उआ लड़िका काहीं हमरे लघे लइ आबा।” 18तब यीसु, बुरी आत्मा काहीं डाँटिन, तबहिनय उआ बुरी आत्मा उआ लड़िका से बहिरे निकरिगे, अउर उआ लड़िका ओतनिनदार नीक होइगा।

19तब चेला लोग एकान्त माहीं यीसु के लघे आइके उनसे पूँछिन; “हम पंचे उआ लड़िका से बुरी आत्मा काहीं, काहे नहीं निकारे पाएन?” 20तब यीसु उनसे कहिन, कि “अपने बिसुआस के कमी के कारन, तूँ पंचे ओही नहीं निकारे पाया। काहेकि हम तोंहसे सही कहित हएन, कि अगर तोंहार बिसुआस राई के दानव के बराबर होई, त तूँ पंचे इआ पहार से कहि देहा, कि ‘इहाँ से सरकिके उहाँ चला जा, त उआ चला जई’, अउर कउनव बात तोंहरे खातिर असम्भव न होई।” 21(पय इआमेर के बुरी आत्मा बिना उपबास प्राथना के नहीं निकरय#17:21 इआ बचन कुछ बाइबल माहीं नहिं आय।।)

अपने मउत के बारे माहीं यीसु के पुनि भबिस्सबानी

(मरकुस 9:30-32; लूका 9:43-45)

22जब यीसु अपने चेलन के साथ गलील प्रदेस माहीं रहे हँय, तब उनसे कहिन, कि “मनई के लड़िका बिरोध करँइ बाले मनइन के हाँथ माहीं पकड़ाबा जई, 23अउर ऊँ पंचे ओही मारि डरिहँय, अउर उआ तिसरे दिना जिन्दा होइ जई।” इआ बात काहीं सुनिके उनखर चेला लोग खुब दुखी होइगें।

मन्दिर के कर देब

24जब ऊँ पंचे कफरनहूम सहर माहीं पहुँचे, तब मन्दिर के कर लेंइ बाले, पतरस के लघे आइके पूँछिन, कि “का तोंहार पंचन के गुरू, मन्दिर के कर नहीं देंय?” 25तब पतरस उनहीं जबाब दिहिन, कि “हाँ, ऊँ देत हें।” जब पतरस घर माहीं आएँ, त यीसु पतरस के इआ बात पूँछँइ से पहिलेन उनसे कहिन, “हे समौन, तूँ का सोचते हया? धरती के राजा चुंगी, इआ कि कर केसे लेत हें? अपने संतानन#17:25 संतानन से- उआ समय माहीं राजा लोग अपने संतानन से कर नहीं लेत रहे आहीं, पय बाहरी मनइन से कर लेत रहे हँय। से इआ कि दुसरे मनइन से?” 26तब पतरस यीसु से कहिन, कि “दुसरे मनइन से।” तब यीसु पतरस से कहिन, कि “त सन्तान बचिगें। 27तऊ, इआ कारन से कि हमरे व्दारा उनहीं ठोकर न लागय, तूँ झील के किनारे जाइके बंसी डारा, अउर जउन मछरी पहिले फँसय, ओही लइ लिहा, अउर जब तूँ ओखर मुँह खोलिहा त तोंहईं एकठे सिक्का मिली, ओही लइके, हमरे अउर अपने कर के खातिर उनहीं दइ दिहा।”

Currently Selected:

मत्ती 17: bag

Highlight

Copy