यूहन्ना 8

ब्यभिचार करँइ बाली मेहेरिआ काहीं माफी

1जब सगले मनई अपने-अपने घर चलेगें, तब यीसु जैतून नाम के पहार माहीं चलेगें। 2अउर यीसु बड़े सकारे पुनि मन्दिर माहीं आएँ, तब सगले मनई उनखे लघे आइगें; अउर यीसु बइठिके उनहीं उपदेस देंइ लागें। 3उहय समय मूसा के बिधान सिखामँइ बाले अउर फरीसी लोग एकठे मेहेरिआ काहीं, यीसु के लघे लइ आएँ, जउन ब्यभिचार करत पकड़ी गे रही हय, ओही बीच माहीं ठाढ़ कइके यीसु से कहिन। 4“हे गुरू, इआ मेहेरिआ ब्यभिचार करत पकड़ी गे ही। 5बिधान माहीं, मूसा नबी हमहीं इआ हुकुम दिहिन हीं, कि अइसन मेहेरिअन काहीं पथरा मारँइ चाही: पय अपना इआ मेहेरिआ के बारे माहीं का कहित हएन?” 6ऊँ पंचे यीसु काहीं फसामँइ के खातिर इआ बात कहिन तय, जउने उनखे ऊपर दोस लगामँइ के खातिर कउनव बात पामँय, पय यीसु नीचे काहीं मूँड़ कए भुँइ माहीं अँगुरी से लिखँइ लागें। 7काहेकि जब ऊँ पंचे यीसु से पुँछतय रहिगें, तब यीसु सीध ठाढ़ होइके, उनसे कहिन, “तोंहरे पंचन म से जे कोऊ कबहूँ पाप न किहिस होय, उहय पहिले इआ मेहेरिआ काहीं पथरा मारय।” 8अउर पुनि यीसु नीचे काहीं मूँड़ कए भुँइ माहीं अँगुरी से लिखँय लागें। 9पय ऊँ पंचे इआ बात काहीं सुनिके, बड़े से लइके छोट तक एक-एक कइके सगले जन चलेगें, अउर उहाँ यीसु अकेले बचे, अउर उआ मेहेरिआ उहँय बीच माहीं ठाढ़ रहिगे। 10तब यीसु सीध ठाढ़ होइके उआ मेहेरिआ से कहिन, “हे बहिनी, ऊँ पंचे सगले जन कहाँ चलेगें? का कोऊ तोंहईं सजा देंइ के हुकुम नहीं दिहिन?” 11उआ मेहेरिआ कहिस, “हे प्रभू, कोऊ नहीं”: तब यीसु कहिन, “हमहूँ तोंहरे ऊपर सजा के हुकुम नहीं देई; जा, चले जा, अउर पुनि पाप न किहा।”

यीसु संसार के जोति आहीं

12तब यीसु पुनि मनइन से कहिन, “संसार के जोति हमहिन आहेन; जे हमरे पीछे चली उआ अँधिआर माहीं न चली, पय जीबन देंइ बाली जोति पाई।” 13इआ सुनिके फरीसी लोग उनसे कहिन; “अपना आपन गबाही खुदय देइत हएन; अपना के गबाही ठीक नहिं आय।” 14यीसु उनहीं जबाब दिहिन; “अगर हम आपन गबाही खुदय देइत हएन, तऊ हमार गबाही ठीक ही, काहेकि हम जानित हएन, कि हम कहाँ से आएन हय, अउर कहाँ जाब? पय तूँ पंचे नहीं जनते आह्या, कि हम कहाँ से आएन हय, अउर कहाँ जाब। 15तूँ पंचे त मनइन के बनाए नेम के मुताबिक न्याय करते हया; पय हम कोहू के न्याय नहीं करी। 16अउर अगर हम न्याय करबव करी, तऊ हमार न्याय सच्चा होई; काहेकि हम अकेले नहीं, बलकिन हम हएन, अउर हमरे साथ पिता परमातिमा हें, जे हमहीं पठइन हीं। 17अउर मूसा नबी व्दारा दीन तोंहरे बिधान माहीं घलाय लिखा हय, कि दुइ जनेन के गबाही#ब्यब 19:15 मिलिके ठीक होत ही। 18एक त हम खुदय आपन गबाही देइत हएन, अउर दूसर पिता परमातिमा हमरे बारे माहीं गबाही देत हें, जे हमहीं पठइन हीं।” 19तब ऊँ पंचे यीसु से कहिन, “तोंहार पिता कहाँ हें?” यीसु उनहीं जबाब दिहिन, कि “न त तूँ पंचे हमहिन काहीं जनते आह्या, अउर न हमरे पिता काहीं, अगर तूँ पंचे हमहीं जन त्या, त हमरे पिता काहीं घलाय जन त्या।” 20ईं बातन काहीं यीसु मन्दिर माहीं उपदेस देत समय भन्डार घर माहीं कहिन तय, अउर कोऊ उनहीं पकड़ नहीं सकें; काहेकि पकड़े जाँइ, अउर मारे जाँइ के उनखर समय अबे नहीं आबा रहा आय।

अपने बारे माहीं यीसु के बताउब

21यीसु पुनि उनसे कहिन, कि “हम जइत हएन, अउर तूँ पंचे हमहीं ढ़ुँढ़िहा, अउर अपने पापन के माफी पाए बिना मरिहा: जहाँ हम जइत हएन, उहाँ तूँ पंचे नहीं आय सकते आह्या।” 22इआ सुनिके यहूदी धारमिक अँगुआ लोग कहिन, “का ऊँ अपने-आप काहीं खतम कइ लेइहँय, एसे इआमेर कहत हें; कि जहाँ हम जइत हएन, उहाँ तूँ पंचे नहीं आय सकते आह्या?” 23तब यीसु उनसे कहिन, “तूँ पंचे इआ धरती के आह्या, अउर हम स्वरग के आहेन, तूँ पंचे इआ संसार के आह्या, हम इआ संसार के न होंहेन। 24एसे हम तोंहसे इआ कहेन हय, कि तूँ पंचे अपने पापन के माफी पाए बिना मरिहा; काहेकि अगर तूँ पंचे बिसुआस न करिहा, कि हम उहय आहेन, त अपने पापन के माफी पाए बिना मरिहा।” 25तब ऊँ पंचे यीसु से कहिन, “अपना को आहेन?” यीसु उनसे कहिन, “हम#निरग 3:14; यूह 18:5,6 उहय आहेन जउन सुरुआतय से तोंहसे कहत आएन हँय। 26तोंहरे बारे माहीं हमहीं बहुत कुछ कहँय क हय, अउर निरनय करँइ क हय, पय हमहीं पठमँइ बाले सच्चे हँय; अउर जउन कुछू हम उनसे सुनेन हय, उहय संसार के मनइन से कहित हएन।” 27ऊँ पंचे इआ नहीं समझे पाइन, कि हमसे यीसु पिता परमातिमा के बारे माहीं कहत हें। 28तब यीसु उनसे कहिन, “जब तूँ पंचे मनई के लड़िका काहीं क्रूस के खम्भा माहीं चढ़इहा, तब जान जइहा, कि हम उहय आहेन, अउर हम अपने-आप से कुछू नहीं करी, पय जइसन हमार पिता परमातिमा हमहीं सिखाइन हीं, उहयमेर ईं बातन काहीं कहित हएन। 29अउर जे हमहीं पठइन हीं, ऊँ हमरे साथ हें; ऊँ हमहीं अकेले नहीं छोंड़िन; काहेकि हम हमेसा उहय काम करित हएन; जउने काम से ऊँ प्रसन्न होत हें।” 30यीसु जब ईं बातन काहीं कहतय रहे हँय, कि तबहिन खुब जने उनखे ऊपर बिसुआस किहिन।

सत्य तोहईं पंचन काहीं अजाद करी

31तब यीसु ऊँ यहूदी लोगन म से जउन उनखे ऊपर बिसुआस किहिन तय, उनसे कहिन, “अगर तूँ पंचे हमरे बचन के पालन करत रइहा, त वास्तव माहीं हमार चेला ठहरिहा। 32अउर तूँ पंचे सत्य काहीं जनिहा, अउर उहय सत्य तोंहईं अजाद करी।” 33ऊँ पंचे यीसु काहीं जबाब दिहिन; कि “हम पंचे त अब्राहम के बंस के आहेन, अउर कबहूँ कोहू के दास नहीं भएन; पुनि अपना काहे कहित हएन, कि तूँ पंचे अजाद होइ जइहा?” 34तब यीसु उनहीं जबाब दिहिन; “हम तोंहसे सही-सही कहित हएन; कि जे कोऊ पाप करत हय, उआ पाप के दास आय। 35अउर दास हमेसा घर माहीं नहीं रहय; पय लड़िका हमेसा घर माहीं रहत हय। 36एसे अगर लड़िका तोहईं अजाद करी, त वास्तव माहीं, तूँ पंचे अजाद होइ जइहा। 37हम जानित हएन, कि तूँ पंचे अब्राहम के बंस के आह्या; तऊ हमरे बचन काहीं हिरदँय से नहीं अपनउते आह्या, एहिन से तूँ पंचे हमहीं मारि डारँय चहते हया। 38हम उहय कहित हएन, जउन अपने पिता के इहाँ देखेन हँय; अउर तूँ पंचे उहय करते हया, जउन अपने पिता से सुने हया।” 39जब ऊँ पंचे यीसु काहीं जबाब दिहिन, “कि हमार पंचन के कुल पिता त अब्राहम आहीं”: तब यीसु उनहीं जबाब दिहिन; “अगर तूँ पंचे अब्राहम के सन्तान होत्या, त अब्राहम कि नाईं काम कर त्या। 40जउन सत्य बचन हम परमातिमा से सुनेन हय, उहय तोंहसे बतायन हय, पय तूँ पंचे हमहीं मारि डारँइ चहते हया। अइसन त अब्राहम कबहूँ नहीं किहिन तय। 41तूँ पंचे अपने पिता कि नाईं काम करते हया”: तब ऊँ पंचे यीसु से कहिन, “हम पंचे ब्यभिचार से नहीं पइदा भएन; हमार पंचन के एकयठे पिता हें, अउर ऊँ आहीं परमातिमा।” 42इआ सुनिके यीसु उनसे कहिन, “अगर वास्तव माहीं परमातिमा तोंहार पिता होतें, त तूँ पंचे हमसे प्रेम रख त्या; काहेकि हम परमातिमय से निकरिके आएन हँय; हम अपने से नहीं आएन, बलकिन उँइन हमहीं पठइन हीं। 43हम जउन कहित हएन, उआ बात काहीं तूँ पंचे काहे नहीं समझे पउते आह्या? एखर कारन इआ हय, कि तूँ पंचे हमरे बातन काहीं सुनते नहिं आह्या। 44काहेकि तूँ पंचे अपने पिता सइतान के सन्तान आह्या। अउर तूँ पंचे अपने पिता के मरजी काहीं पूर करँइ चहते हया। उआ त संसार के सुरुआतय से कतली आय, अउर उआ सत्य के पच्छ कबहूँ नहीं लिहिस। काहेकि ओखे जीबन माहीं सत्य हइअय नहिं आय: अउर झूँठ बोलब ओखर सुभाबय आय; काहेकि उआ हमेसा झूँठ बोलँइ बाला आय, बलकिन झूँठ बोलँइ के सुरुआतय करँइ बाला आय। 45तूँ पंचे हमरे बात के बिसुआस एसे नहीं मनते आह्या, काहेकि हम सही बोलित हएन। 46अउर तोंहरे पंचन म से को हमहीं पापी ठहराय सकत हय? अगर नहीं, त पुनि जब हम सही बात कहित हएन, त हमरे बात के बिसुआस काहे नहीं मनते आह्या? 47जे परमातिमा के जन होत हय, उआ परमातिमा के बातन काहीं सुनिके मानत हय; अउर तूँ पंचे परमातिमा के बचन काहीं एसे नहीं सुनते आह्या, काहेकि तूँ पंचे परमातिमा के जन न होह्या।”

यीसु अउर अब्राहम

48इआ सुनिके यहूदी लोग यीसु से कहिन; “एहिन से हम पंचे तोंहईं ठीकय आय कहित हएन, कि तूँ सामरी आह्या, अउर तोंहरे भीतर बुरी आत्मा हय।” 49तब यीसु उनहीं जबाब दिहिन, कि “हमरे भीतर बुरी आत्मा नहिं आय; बलकिन हम त अपने पिता के आदर करित हएन, अउर तूँ पंचे हमार निरादर करते हया। 50हम आपन बड़ाई नहीं चाही, पय हाँ, एक जने अइसा हें, जे आपन बड़ाई चाहत हें, अउर उँइन न्याय करत हें। 51हम तोंहसे सही-सही कहित हएन, अगर कउनव मनई हमरे बचन के मुताबिक चली, त उआ अनन्तकाल तक न मरी।” 52तब यहूदी लोग यीसु से कहिन, “अब हम पंचे जान लिहेन हँय, कि तोंहरे भीतर बुरी आत्मा हय: अब्राहम मरिगें अउर परमातिमा के सँदेस बतामँइ बाले घलाय मरिगें, अउर तूँ कहते हया, कि अगर कोऊ हमरे बचन के मुताबिक चली, त उआ अनन्तकाल तक न मरी। 53हमार पंचन के कुल पिता अब्राहम त मरिगें, का तूँ उनसे बड़े हया? अउर परमातिमा के सँदेस बतामँइ बाले घलाय मरिगें, तूँ खुद काहीं का ठहरामँइ चहते हया।” 54तब यीसु उनहीं जबाब दिहिन; “अगर हम खुदय आपन बड़ाई करी, त हमार बड़ाई कुछू न होय, पय हमार बड़ाई करँइ बाले हमार पिता परमातिमा हें, जिनहीं तूँ पंचे कहते हया, कि ऊँ हमार परमातिमा आहीं। 55तूँ पंचे उनहीं नहीं जनते आह्या, पय हम उनहीं जानित हएन; अउर अगर हम कही, कि हम उनहीं नहीं जानी, त हम तोंहरे कि नाईं लबरी बोलँइ बाले ठहरब; काहेकि हम उनहीं जानित हएन, अउर उनखे बचन के मुताबिक चलित हएन। 56तोंहार पंचन के पूरबज अब्राहम, धरती माहीं हमरे आमँइ के दिन देखँइ के आसा माहीं खुब आनन्दित रहे हँय; अउर ऊँ देखिन, अउर आनन्दित भें।” 57यहूदी लोग यीसु से कहिन, “अबे तूँ पचासव बरिस के नहीं भया; तऊ तूँ कहते हया, कि हम अब्राहम काहीं देखेन हँय?” 58तब यीसु उनसे कहिन, “हम तोंहसे सही-सही कहित हएन; अब्राहम के पइदा होंइ से पहिलेव हम रहेन हँय।” 59तब ऊँ पंचे यीसु काहीं मारँइ के खातिर पथरा उठाइन, पय यीसु लुकिके मन्दिर से निकरिके चलेगें।

Currently Selected:

यूहन्ना 8: bag

Highlight

Copy