प्रेरितों के काम 23
23
1पौलुस ल महासभा जनै एकटक लगै के देखि, अर बोलि, “हे विश्वासी भयों मिल, आज तक परमेश्वर कु सच्चा मन बट्टी अपड़ो जीवन बसर कैरी।” 2पौलुस ल जु बोलि, उ सूंणि के हनन्याह महायाजक ल, वे तैं जु वेका संमणी खड़ा छा, वेका मुक पर थप्पड़ मरणे की आज्ञा दींनि। 3पौलुस ल वेको बोलि, “हे पाखंडी परमेश्वर त्वे तैं मरलो। तू व्यवस्था का अनुसार मेरू न्याय कनु कु बैठी छै, अर फिर क्य व्यवस्था का खिलाफ मि तैं मरणै कि आज्ञा भि दींणि छै?”#23:3 यहे. 13:10-15 4उ आदिम जु नजदीक मा खड़ा हुयां छा, ऊंल पूछि, “क्य तु परमेश्वर का महायाजक की बेजती कनी छै ?” 5पौलुस ल बोलि, “हे विश्वासी भयों मि यु नि जंणदु कि यु महायाजक च। किलैकि परमेश्वर का वचन मा लिख्युं च,
कि तु अपड़ा लुखुं का प्रधान तैं गलत नि बोलि”#23:5 निर्ग. 22:28
6जब पौलुस ल देखि, कि कुछ सदूकी अर कुछ फरीसी आदिम उख छा, महासभा मा पुकारी के बोलि, “हे विश्वासी भयों, मि फरीसी अर फरीसियों कु वंश को छों, मेरी जांच इलै हूंणी च, किलैकि मेरी आस च की पिता परमेश्वर मुरयां लुखुं तैं फिर ज्यून्दो करलो।” 7जब वेल या बात बोलि फरीसियों अर सदूकियों मा झगड़ा हूंण लगि गै; अर सभा मा फुट पोड़ी गै। 8किलैकि सदूकी लोग यु विश्वास करदा छा कि लोग मुरणा का बाद ज्यून्दा नि होला, अर न स्वर्गदूत अर न दुष्टात्मा छिनी; पर फरीसी लोग यूं सभि बातों पर विश्वास करदा छा। 9तब भौत बड़ो घपरौल हवे गै अर मूसा की व्यवस्था तैं सिखांण वलो का कुछ शिक्षकों ल, जु फरीसी छा, उठि के यु बोलि के बहस कन लगि गैनी, “हम यु आदिम मा कुई भि बुरै नि पांणा छा; अर दुष्टात्मा या स्वर्गदूत ल वे बट्टी बात कैरी त फिर क्य?” 10जब उख भौत घपरौल हवे अर रोमी पलटण का सेनापति तैं डौर लगि गै कि उ पौलुस का टुकड़ा-टुकड़ा नि कैरी द्यां, सिपै का झुंडों तैं आज्ञा दींनि कि उतरी के सभा का लुखुं का बीच बट्टी पौलुस तैं जबरदस्ती निकली, अर किलै मा ली आवा। 11वीं रात प्रभु यीशु ल पौलुस का संमणी खड़ो हवे के बोलि, “हे पौलुस, हिम्मत रख; किलैकि जन तिल यरूशलेम शहर मा मेरी गव्है दींनि, उन ही त्वे तैं रोम शहर मा भि गव्है दींण होली।”
पौलुस की हत्या कु षड्यंत्र
12जब दिन हवे, त कुछ यहूदी लुखुं ल साजिश रचि अर सौं खै कि जब तक उ पौलुस तैं जान से नि मारि दयूला तब तक उ कुछ नि खाला अर न कुछ प्याला। 13जौं ल या सौं खै उ चालिस से भि जादा लोग छा। 14ऊंल प्रधान याजक अर दाना-सयाणों मा ऐ के बोलि, “हमारी सौं खै च कि जब तक हम पौलुस तैं मारि नि दयूला, तब तक हम कुछ भि नि खौला। 15इलै अब तुम अर महासभा मिली के पलटण का सेनापति तैं समझावा, कि पौलुस तैं तुम मा लौनु माना कि तुम वेका बारा मा ठिक-ठिक जांच-पड़ताल कन चंदींनि हम वेका पौंछण से पैली ही बट्टा मा पौलुस तैं मरूणु कु तैयार राला।” 16पर जब पौलुस का भंणजा ल सूंणि कि यहूदी लोग पौलुस तैं मरणै की योजना बनांणा च, त किला मा जै के पौलुस तैं संदेश दींनि। 17पौलुस ल सुबदारों मा बट्टी एक तैं अफ म बुलै के बोलि, “यु जवान तैं पलटण का सेनापति मा लिजा यु वे बट्टी कुछ बुल्ण चांणु च।” 18इलै सुबदार पौलुस का भणजा तैं सिपैयूं का झुण्ड का सेनापति का संमणी लिजै के बोलि, “बंधि पौलुस ल मि तैं बुलै के पूछि कि, यु जवान आदिम तैं त्वे मा लौ किलैकि उ त्वे बट्टी कुछ बुल्ण चांणु च।” 19पलटण का सेनापति ल वेको हथ पकड़ी अर अलग मा लिजै के वेमा पूछि, “तुम मि बट्टी क्य बुल्ण चांणि छै ?” 20वेल बोलि, “यहूदी अगुवों इन जाल-साझी करीं च कि त्वे बट्टी बिनती कैरी के कि, पौलुस तैं भोल महासभा का बीच मा लै, किलैकि माना उ वेका बारा ठिक-ठिक जांच-पड़ताल कन चांणा छा। 21पर कृपा कैरी के ऊंकी ईं बिनती का तरपां ध्यान नि द्ये, किलैकि ऊंमा बट्टी चालिस से भि जादा आदिम पौलुस तैं मरणै ताक मा छिनी जौं का कि इन सौं खयां छिन कि जब तक उ पौलुस तैं जान से नि मारि दयूला तब तक हम कुछ भि नि खौला-प्यूला अर तेरु जवाब को इन्तजार कना छिनी।” 22तब पलटण का सेनापति ल वे जवान तैं इन समझै के भेजि दींनि, “कै मा नि बोलि कि तिल मि तैं यु बात बतै।”
पौलुस तैं कैसरिया कु भिजै जांण
23तब सेनापति ल सुबदारों मा बट्टी द्वी लुखुं तैं बुलै के बोलि, “आज राती नौं बजि तक कैसरिया शहर जांणु कु द्वी सौ सिपै, सत्तर घुड़सवार अर द्वी सौ भाला वला तैयार रखिनि। 24अर पौलुस की सवारी कु घोड़ा तैयार रखा कि वे तैं फेलिक्स राज्यपाल मा सूखी शान्ति बचै के पौंछये जौं।” 25फिर वेल इन्दरी छिट्टी भि लिखीं;
26महाप्रतापी फेलिक्स राज्यपाल को क्लौदियुस लूसियास की तरपां बट्टी प्रणाम लिखणु छो। 27यहूदियों यु आदिम तैं पकड़ी के मरण वला छा, पर जब मि तैं मालुम हवे कि यु रोमी च, तब पलटण का द्वारा छुड़ै के वे तैं लै के औं। 28अर इन जनणु कु, कि उ वे पर भंगार किलै लगांणा छिनी, मि पौलुस तैं ऊंकी महासभा मा ली ग्यों। 29तब मि तैं मालुम हवे गै, कि उ ऊंका यहूदी व्यवस्था कि बातों का बारा मा वे पर भंगार लगांणा छिनी, पर मरै जांण या बंधे जांण लैक वे पर कुई भि भंगार नि च। 30अर अब मि तैं बतैये गै, कि उ यु आदिम तैं मरण चांणा छिनी, इलै मिल वे तुरंत त्वे मा भेजि दींनि, अर उन यहूदियों तैं जौला वे पर भंगार लग्युं च आज्ञा दींनि, कि तेरु संमणी वे पर भंगार लगौनु।
31वीं राती ही सिपैयूं तैं दिये गै आदेशों तैं पूरो कैरी; उ पौलुस तैं यरूशलेम शहर बट्टी ली गैनी अर वे तैं अन्तिपत्रिस शहर मा लैनी। 32हैंका दिन सिपै घुड़सवरों तैं पौलुस का दगड़ी कैसरिया नगर जांणु कु छोड़ी के अपड़ा किला यरूशलेम शहर कु लौटि गैनी। 33ऊंल कैसरिया नगर मा पौंछि के राज्यपाल तैं चिट्ठी दींनि; अर पौलुस तैं भि वेका संमणी खड़ो कैरी। 34राज्यपाल ल पैढ़ी के पूछि, “तू कै प्रदेश को च अर जब वे तैं पता लगि कि यु किलिकिया प्रदेश को च ?” 35तब वेको बोलि, “जब तेरु दुश्मन भि आला, त मि तेरु मुकदमा करुलु।” अर वेल पौलुस तैं राजा हेरोदेस का किला मा, पहरा मा रखणै की आज्ञा दींनि।
Currently Selected:
प्रेरितों के काम 23: GHMNT
Highlight
Share
Copy
Want to have your highlights saved across all your devices? Sign up or sign in
Garhwali New Testament(गढवली नयो नियम), 2020 by The Love Fellowship is licensed under a Creative Commons Attribution-ShareAlike 4.0 International License.
