Marcos 5

Kĩrãnema bꞌadꞌa Gadara bidꞌata

(Mateo 8:28-34; Lucas 8:26-39)

1Jesús izha jʉrʉkuadꞌa bawara jũẽkuasia do jedꞌea õbꞌʉ kĩrãrẽ Gadara bidꞌarã druaidꞌu. 2Jesús jãbadꞌeba udꞌubꞌaebʉrʉdꞌera beuwãrã wuagꞌaita peña zobꞌeata nʉme maẽba izhima zesia jaiba ũmakĩrã kĩrãnema bꞌʉta. 3Beuwãrã maẽ bꞌʉta miõba jʉ̃ bꞌedꞌa ẽãta cadenabidꞌa jʉ̃ bꞌedꞌa ẽbasia. 4Izhira jʉ̃ma bio jʉ̃ bazhidꞌa cadenaba, mawũãmina cadena izhara tʉdꞌʉzoabi bꞌʉba miõba poeadꞌakꞌa basia. 5Baridua kꞌatumaza ewaridꞌe diamase jʉra nimita, beuwãrã wuagꞌaita peña zobꞌeata nʉmeza nimi basia izhikusa puo mongꞌaraba. 6Wawarauba Jesústa ũdubʉrʉdꞌera wãẽbape sãkꞌokꞌodꞌe kꞌobꞌesia izhi kĩrãbita.

7Izhidꞌeba jaibara nemi jĩgua mawũãsia: ¿Bʉra mʉ ũme kꞌãrẽta sãwũã bꞌʉ Jesús Daizeze Ʉ̃trebema Warra? Daizeze daidꞌu mʉã bʉaa jaraya, mʉta zuburia orãrũã.

8Izhi mawũã bedꞌeaira Jesúsbara mawũãsia: Kꞌãʉ̃nebara ãĩ wãrũã jai.

9Jesúsbara widꞌi mawũãsia: ¿Bʉ trʉ̃rã kꞌaipe?

Mawũãĩ jaibara panaʉ̃ mawũãsia: Mʉ trʉ̃rã Kꞌabana, daira bio baera.

10Biodꞌe zuburia bedꞌeasia ãzhita ãĩ jʉrekua ẽbamarẽã maʉ̃ druadꞌeba. 11Maʉ̃ne mama kꞌatuma kꞌaita bio nekꞌo duanasia chĩnata. 12Mawũẽ jai jõma zuburia bedꞌeabʉdata mawũãsidꞌa: Daira chĩna duanuma zokꞌakuadua dai wãĩta ãzhidꞌe edꞌa.

13Jesúsbara aramaʉ̃ta idaribigasia. Mawũẽ jaira ẽzoape chĩnane edꞌa wãsidꞌa, chĩna duanasita bꞌʉa dos mil. Chĩna doedꞌaa peñane bʉrʉgʉzoa doedꞌa jogꞌakuasia.

14Mawũẽ chĩna akʉ bꞌera wãẽbasidꞌa, mobe maʉ̃ta jarasidꞌa pʉwʉrʉdꞌebidꞌa meãbidꞌa. Mawũẽ akʉdꞌe erbuesia mawũã berabꞌaribʉrʉta. 15Jesúidꞌu zebʉdadꞌera jaiba kĩrãnema bꞌadꞌara ũdusidꞌa, jai kꞌabanata abꞌadꞌata jewedꞌa bꞌʉta wua jʉ̃ bꞌasia kĩrãbape, mawũẽ perakuasia. 16Zhi ũdudꞌapeadꞌabara nebʉrʉsidꞌa sãwũã berabꞌaribʉrʉta jai abꞌadꞌata dewara chĩnarãta. 17Mawũẽ zuburia bedꞌeasidꞌa wãmarẽã ãzhi druadꞌebara.

18Jesús jãbadꞌe bꞌaribʉrʉdꞌera kĩrãnema bꞌadꞌara zuburia bedꞌeasia bꞌabimarẽã izhi ũme. 19Mawũãmina Jesúsbara idaribi ẽbasia, awuarabʉrʉ mawũãsia: Dedꞌaa wãrũã, bʉzhi mebẽrãma wãrũã, mobe jaradua Daizezeba bia zromata obʉrʉta bʉ bꞌebibʉrʉta, bʉ sãwũã sozuburia bꞌidꞌapʉta. 20Mawũãĩ izhira wãpe Decápoli druadꞌe pʉwʉrʉ tabꞌeza jarakꞌasia bia zromata obʉrʉta Jesúsba izhi sãwũã bꞌebibʉrʉta. Mawũẽ jõma sobiasidꞌa.

Jairo kꞌaudꞌebema

(Mateo 9:18-26; Lucas 8:40-56)

21Wakusa chãbʉrʉta Jesús jãbadꞌe ya kĩrãrẽ zebʉrʉdꞌera izhira bʉredrʉsidꞌa kꞌabanaba, mawũẽ izhira chubꞌesia doya. 22Maʉ̃ne zesia de zhi jʉrebada maẽ nokꞌota Jairo abadata, Jesústa ũdui izhi jẽrũ kꞌaita sãkꞌokꞌodꞌe kꞌobꞌepe, 23biodꞌe zuburia bedꞌeabʉrʉta mawũãsia: Mʉ kꞌauta beubodꞌoa, mawũẽ wãda, mobe bʉ juwuata izhi ʉ̃rʉ̃ bꞌʉdua, mawũãrã bꞌepe bꞌaya.

24Mawũãĩ Jesús izhi ũme wãbʉrʉdꞌera kꞌabanata kꞌaidꞌu wãbʉdaba pẽũsua wãbisidꞌa. 25Maʉ̃ne wũẽrã abꞌa waba kꞌaya bꞌʉta doce año bata bꞌasia. 26Biodꞌe zuburiabisidꞌa zhãrã bibabadata bioba. Zhãrã jʉrʉkua bꞌʉdꞌe izha erubꞌadꞌara jõma gastabʉrʉdꞌera miã kꞌãrẽta kꞌareba ẽbasia, awuarabʉrʉ wuaabʉrʉ idrʉa wãsia. 27Jesús jarabʉdata ũrĩbʉrʉdꞌera kꞌabanane edꞌa ãbʉdeba orrape tõbꞌarisia Jesús wuata. 28Maʉ̃nerã izhikusa mawũãsia: Bari izhi wuata tõbꞌaribʉrʉba mʉrã bꞌeya. 29Aramaʉ̃ta wa ze nʉmʉrã poasia. Mawũẽ kꞌawuasia kꞌakuara bꞌebʉrʉta mawũã kꞌaya bꞌadꞌara.

30Maʉ̃ne Jesúsbara izhi bitabaiba kꞌawuasia zhãrã bꞌeidꞌebema zareata ãĩ wãbʉrʉta izhi maẽba, mawũẽ kꞌabanama pʉrʉwape mawũãsia: ¿Kꞌaiba tõbꞌarisi mʉ wuara?

31Mawũãĩ izha jʉrʉkuadꞌabara mawũãsidꞌa: Akʉdua kꞌabanaba bʉra sãwũã pẽũsua wãbidꞌata, maʉ̃ta bʉara ¿mʉrã kꞌaiba tõbꞌarisi abʉrʉka?

32Mawũãsidꞌaidꞌu Jesúsbara ari pʉrʉwa akʉkua nʉmasia kꞌawuai kꞌarea kꞌaiba tõbꞌaridꞌata. 33Mawũẽ wũẽrã peraba pidꞌidꞌia kꞌobꞌʉta, izhi sãwũã dogꞌota kꞌawua kꞌobꞌʉba zepe izhi kĩrãbita sãkꞌokꞌodꞌe kꞌobꞌepe jarasia wãrãta.

34Mawũẽ Jesúsbara mawũãsia: Wũẽrã, bʉra bʉzhi soidꞌu kꞌobꞌʉba bꞌebʉrʉa. Adu-a wãrũã, bꞌe bꞌidꞌa bʉ kꞌaya bꞌadꞌara.

35Jesús wadꞌi bedꞌea kꞌobꞌʉdꞌe zhãrã ʉ̃kʉrʉ zesidꞌa de zhi jʉrebada maẽ nokꞌo dedꞌauba, mobe mawũãsidꞌa: Bʉ kꞌaura beudogꞌoa, ¿mawũẽ kꞌãrẽã miãsẽã bedꞌea nʉmaĩpe Miã Ũrãgꞌabaria?

36Mawũãmina Jesúsbara mawũãbʉdata ũrĩpe de zhi jʉrebada maẽ nokꞌoa mawũãsia: Sopuarãrũã, awuarabʉrʉ soidꞌu kꞌobꞌadua.

37Mobe kꞌaidꞌu wãbiga ẽbasia miõta, awuarabʉrʉ wãbigasia Pedrota, Jacobota, Juan Jacobo mebeata. 38Aramaʉ̃ne de zhi jʉrebada maẽ nokꞌota bꞌʉ dedꞌa zebʉrʉdꞌera ũdusia bꞌʉgadrʉ biodꞌe aubꞌari jẽga nʉmeta. 39Edꞌa wãpe mawũãsia: ¿Kꞌãrẽã kꞌãwũã bꞌʉgadrʉ jẽga duanu? Wũẽrã zakera beu ẽã, awuarabʉrʉ kꞌãĩ bꞌʉa.

40Mawũãĩ sewakꞌau bꞌʉa asidꞌa. Mawũãmina izhara jõma ãĩ wãbigape bari wũẽrã zake zezeta zhi papata edebʉrʉta, izha jʉrʉkuadꞌata ũbea izhi bawara kꞌopanʉta edebʉrʉta edꞌa wãsia wũẽrã zake beu tabꞌʉ maẽ. 41Mobe wũẽrã zakera juwuadꞌe jidape mawũãsia: ¡Talita cumi! Maʉ̃ bedꞌeabara mawũãsia: Wũẽrã zake, mʉã bʉaa jaraya piradrʉrua.

42Aramaʉ̃ta wũẽrã zakera piradrʉpe tebadꞌewasia doce año bꞌʉta. Mawũẽ zhãrã kꞌobꞌera kꞌãbãẽã perakuasia. 43Maʉ̃nerã Jesúsbara zarea jarakꞌasia maʉ̃ta miõã kꞌawuabidꞌa ẽbamarẽã, mobe jarasia zhiko diadꞌamarẽã wũẽrã zakera.

Currently Selected:

Marcos 5: cto

Highlight

Copy