Marcos 15
15
Jesús ededꞌapeadꞌa Pilato kĩrãbita
(Mateo 27:1-2, 11-14; Lucas 23:1-5; Juan 18:28-38)
1Diapedꞌa bedꞌeasidꞌa sacerdoterã nokꞌorãta, dewara nokꞌorãta, ũrãgꞌa Moisédꞌe jarabadata, jõma nokꞌorã wagꞌaurãta, mobe Jesús juwua tãjʉ̃ ededꞌape Pilatoa chãbꞌarisidꞌa Roma bidꞌata nokꞌoa.
2Mawũẽ Pilatobara widꞌi mawũãsia: ¿Bʉra Rey judíorãneka?
Mawũãĩ Jesúsbara panaʉ̃ mawũãsia: Ara bʉzha jarabʉrʉa.
3Sacerdoterã nokꞌorãbara ne bio jara ji kꞌopanasia. 4Mawũẽ Pilatobara wakusa widꞌi mawũãsia: ¿Bʉara panaʉ̃ ẽka? Bʉra ne bio jara ji kꞌopanʉã.
5Mawũãsiidꞌu Jesúsbara panaʉ̃ ẽbaera Pilatora kꞌawua ẽã krĩchasia.
Jaradꞌapeadꞌa Jesús beabimarẽã
(Mateo 27:15-31; Lucas 23:13-25; Juan 18:38–19:16)
6Egiptodꞌeba ẽzoadꞌata krĩcha fiesta obada ewade Pilatobara cárceldꞌe bꞌeta abꞌa ẽdrʉbi bꞌasia zhãrãba ẽdrʉbimarẽã jarabʉdata. 7Maʉ̃ne bꞌasia abꞌa Barrabás abadata, awʉrʉrã izhi bawara zhãrã beakuadꞌa bawara cárceldꞌe bꞌʉta nokꞌo bawara zhõnata bꞌasia. 8Kꞌabanata zekuape Pilatoa jarasidꞌa izha okꞌawa bꞌʉ kĩrãkꞌa omarẽã. 9Mawũẽ Pilatobara panaʉ̃ mawũãsia: ¿Marãbara krĩñadeka mʉã ẽnaĩta Rey judíorãneta? 10Pilatobara kꞌawuasia sokꞌazhiruaba izhaa chãbꞌaribʉdata sacerdoterã nokꞌorãbara. 11Sacerdoterã nokꞌorãbara kꞌabanata kꞌobꞌea jarasidꞌa ẽdrʉbiita jaradꞌamarẽã Barrabáta. 12Mawũẽ Pilatobara panaʉ̃ wakusa mawũãsia: ¿Mobera mʉã sãwũã oita krĩñadepe marãba Rey judíorãneã apanʉrã?
13Mawũãĩ ãzhara nemi jĩgua mawũãsidꞌa: Cruzdꞌe kꞌachibirua.
14Mawũãnaĩ Pilatobara mawũãsia: ¿Kꞌãrẽ bia ẽãta osi?
Mawũãĩ ãzhara wuaabʉrʉ nemi jĩgua mawũãsidꞌa: ¡Cruzdꞌe kꞌachibirua!
15Mawũãnaĩ Pilatora zhãrã bawara bia bꞌe krĩñaba ẽnasia Barrabáta, waya Jesúra ubigape chãbꞌarisia cruzdꞌe kꞌachidꞌamarẽã.
16Mawũẽ soldaorãbara Jesús edꞌa edesidꞌa nokꞌo dedꞌa soldaorã tabꞌʉidꞌu, mawũẽ bʉredrʉsidꞌa soldaorã jõmaʉ̃ba. 17Reyba jʉ̃bari kĩrãkꞌa jʉ̃bisidꞌa wua granateta, burudꞌe joatrʉsidꞌa corona jʉ̃kꞌara ʉrʉta pʉrradꞌape. 18Mobe mawũãsidꞌa: Kʉa, judíorã Rey.
19Bakuruba tawe jirpanesia buruma, dau idꞌo jirpanesia, sãkꞌokꞌodꞌe kꞌobꞌe jirpanesia wawiabʉda kĩrãkꞌa. 20Ãzhima sewakꞌau bꞌʉdꞌeba mawũã jirpanape wua granatera wẽãsidꞌa, mobe wua izhidꞌeta jʉ̃bidꞌape edesidꞌa cruzdꞌe kꞌachidꞌaita.
Cruzdꞌe kꞌachi beudꞌa Jesús
(Mateo 27:32-44; Lucas 23:26-43; Juan 19:17-30)
21Maʉ̃ne Cirene pʉwʉrʉdꞌebemata Simónta Alejandroba, Rufoba ãzhi zezeta meã bꞌadꞌata taidꞌe zareadꞌe ataubisidꞌa Jesúsba cruz a wãta.
22Aramaʉ̃ne Jesús edesidꞌa Gólgota abadaidꞌu, maʉ̃ bedꞌeabara jara krĩña bꞌʉa Buru Bꞌʉwʉrʉta. 23Vino oregueata mirraedꞌa poera diasidꞌa puata nagꞌadrʉmarẽã, mawũãmina Jesúsbara do ẽbasia. 24Cruzdꞌe kꞌachidꞌape soldaorãbara izha jʉ̃ bꞌadꞌara ãzhirãĩnu drasidꞌa, maʉ̃nerã sãwũã dradꞌaidꞌebemata osidꞌa kꞌawuadꞌaita sãʉ̃ta edeita abꞌa abꞌaʉba.
25Diapedꞌa a las nueve nʉmasia Jesús cruzdꞌe kꞌachisidꞌadꞌera. 26Kꞌãrẽã beadꞌaita bꞌʉ jirabꞌʉta mawũã bꞌasia: Rey judíorãneã. 27Izhi bawara nezrʉgamiãrã ũme cruzdꞌe kꞌachisidꞌa, abꞌa juwua araare, abꞌa juwua ãkꞌaare. 28Aramaʉ̃ne arimaẽ berabꞌarisia zhi bꞌʉmata mawũã bꞌʉta: Kꞌazhirua omiãne edasidꞌa kꞌazhirua omiãrã bawara. 29Arakꞌaita berabꞌaribʉdabara ijura jarabʉdata ãzhira ojĩãwe mawũãsidꞌa: ¡Ʉ̃kʉa! Bʉara Daizeze dera ãrĩpe ewari ũbeadꞌe wakusa pãrãĩta jarasi baera, 30bʉzhikusa ẽdrʉrua, udꞌubꞌaedua cruzdꞌebara.
31Aramaʉ̃ kĩrãkꞌa sacerdoterã nokꞌorãbara, ũrãgꞌa Moisédꞌe jarabadabara ãzhima sewakꞌau bꞌʉdꞌeba ãzhirãĩnu mawũãsidꞌa: Awʉrʉrã kꞌarebape izhikusara zhi kꞌareba bꞌe ẽã. 32Zhãrã Ẽdrʉbita Rey Israeldꞌebʉrʉ udꞌubꞌaeibara cruzdꞌebara, mawũãrã dazhirãbara maʉ̃ta ũdudꞌape ĩjãnaña izhidꞌebemata.
Aramaʉ̃ne izhi bawara cruzdꞌe kꞌachi jirapanʉbidꞌa ijura jarasidꞌa.
33Ʉ̃matipauba drua jõma pãrĩgusia a las tres bayeedꞌa. 34A las tres Jesúsbara nemi jĩgua mawũãsia: Eloi, Eloi, ¿lama sabactani? Maʉ̃ bedꞌeabara mawũãsia: Mʉ Zhibari, mʉ Zhibari, ¿mʉrã kꞌãrẽã kenabꞌaribʉrʉ?
35Ʉ̃kʉrʉ mama kꞌobꞌebara maʉ̃ta ũrĩnape mawũãsidꞌa: Naʉ̃bara trʉ̃ kꞌobꞌʉa Elíata.
36Aramaʉ̃ne abꞌa wãẽbape esponjata vino oregueadꞌe sõmbera edape bakurudꞌe tãjʉ̃pe domarẽã diabʉrʉta mawũãsia: Idaribiudua, akʉdꞌaya Elía zei kꞌawuaita udꞌubꞌaebidꞌe.
37Maʉ̃ne Jesús kꞌãbãẽã bꞌiape beusia. 38Maʉ̃ daucha Daizeze dedꞌa wua eubꞌari jirabꞌʉta dra kꞌõã totosia ʉ̃tʉba edꞌaa. 39Soldaorã nokꞌota Jesús kĩrãbita kꞌobꞌʉba mawũã kꞌãbãẽã bꞌiape beubʉrʉta ũdui mawũãsia: Wãrãne ũmakĩrã naʉ̃ Daizeze Warra basia.
40Wũẽrãrãsidꞌa ʉ̃kʉrʉ duanasia wawarauba akʉ bꞌeta. Maʉ̃rãnebema duanasia María Magdalenata, dewarabema María zhi wau tẽãbema Jacoboba, Joséba ãzhi papata bꞌasia, dewara bꞌasia Salométa. 41Maʉ̃rãbara Jesús Galileadꞌe bꞌasidꞌera pẽwã bꞌeba aribꞌae bꞌeasia. Dewara bio duanasia izhi bawara wãrĩzekuadꞌata Jerusalén pʉwʉrʉedꞌa.
Jesús wuagꞌadꞌapeadꞌa
(Mateo 27:57-61; Lucas 23:50-56; Juan 19:38-42)
42Keubodꞌodꞌera aribꞌae jirpanasia nrũẽma sábadodꞌe ẽnaʉ̃bada ewari baera. 43Mawũẽ José Arimatea pʉwʉrʉdꞌebemata, nokꞌorã wagꞌaurãnebemaba Daizezeta Nokꞌodꞌebemata jʉ̃ã bꞌadꞌata zepe wãnigua edꞌa wãsia Pilatoma. Mobe widꞌisia Jesús kꞌakuata. 44Mawũẽ Pilatobara krĩchasia sãwũã mawũã ĩñabasia beuta. Maʉ̃neba soldaorã nokꞌota trʉ̃pe widꞌisia ya beusi kꞌawuaita. 45Mawũẽ soldaorã nokꞌobara beusita jarabʉrʉba Jesús kꞌakuara diasia Joséa. 46Mawũẽ Josébara burubꞌata edape cruzdꞌebara Jesús ãĩ edape burasia burubꞌaba, mobe edꞌa tabꞌʉsia peñata zobꞌea kꞌorubidꞌa maẽ. Mobe mongꞌara zromaba tapabigasia maʉ̃ zobꞌeadꞌe edꞌa wãbarira. 47Maʉ̃ta María Magdalenaba, dewarabema María José papaba akʉ kꞌopanasia sãma kenabꞌaribʉdata.
Currently Selected:
Marcos 15: cto
Highlight
Share
Copy
Want to have your highlights saved across all your devices? Sign up or sign in
© 2012, Wycliffe Bible Translators, Inc. All rights reserved.
