Marcos 12
12
Uvadꞌe trajabadata bia ẽãta bꞌeadꞌa
(Mateo 21:33-46; Lucas 20:9-19)
1Mobebʉrʉ Jesúsbara ne bio jarakꞌa mawũãsia: Ũmakĩrãba uvata upe serrape osia uva bꞌata piabarita. Mobe uva akʉita pãrãsia deta ʉ̃tʉ drasoa, mobe uvadꞌe trajabadaa arrendape wãsia wawara. 2Uva bꞌʉabada ewade nezokꞌata zokꞌasia uvadꞌe trajabadama, uva izhaa diabʉdata jidamarẽã. 3Mawũãmina maʉ̃rãbara jirtopota jirachisidꞌa, aramaʉ̃ne buesidꞌa juwuaawa. 4Wakusa nezokꞌa awʉrʉta ãzhima zokꞌabʉrʉra mongꞌaraba tabꞌari puosidꞌa buruta, mobe ikꞌazhirua jarasidꞌa. 5Wakusa awʉrʉta zokꞌabʉrʉra beasidꞌa. Dewara bio zokꞌabʉrʉra ʉ̃kʉrʉ jirachisidꞌa, ʉ̃kʉrʉ beasidꞌa.
6Wadꞌi abꞌa erubꞌʉta erubꞌasia zhi warra izha kʉãgꞌata. Maʉ̃sidꞌa maʉ̃rãma zokꞌabʉrʉta mawũãsia: Wawiadꞌaya mʉ warrara. 7Mawũãmina uvadꞌe trajabadara ãzhirãĩnu mawũãsidꞌa: Ne zhi zezedꞌera naʉ̃ba jidaya. Mawũẽ beadꞌaya, izha jidaita bꞌʉra aramaʉ̃ne dazhirãba jidadꞌaya. 8Aramaʉ̃ne jirtopota beasidꞌa, mobe ãĩ bꞌaribuesidꞌa uvadꞌebara.
9¿Aramaʉ̃nerã uva zhibaribara sãwũã oipe? Wãpe beakuaya uvadꞌe trajabadara, mobe uva izhidꞌera chãbꞌariya awʉrʉrãã.
10¿Aramaʉ̃ kĩrãkꞌa mʉ seribidꞌa ẽãnebemata zhi bꞌʉmarã marãbara ledꞌakꞌa kĩrãkꞌa duanu ẽka?:
¿Jara bꞌʉ ẽka de obadaba mongꞌara seri ẽãne bꞌʉdꞌapeadꞌara wagꞌauta bꞌesita.
11Daizezeba mawũã osi baera dazhirãma ne bia abꞌʉ ẽka? (Salmos 118:22-23)
12Jida krĩñasidꞌa mawũã ne jarabʉrʉbara ãzhita jarabʉrʉta kꞌawuabʉdaba. Mawũãmina kꞌabanata wawiabʉdaba ãmaẽbʉdata wãsidꞌa.
Rey Romanebemaĩta plata diabadadꞌebema
(Mateo 22:15-22; Lucas 20:20-26)
13Fariseorãta ʉ̃kʉrʉ rey Herode pẽwã bꞌeta ʉ̃kʉrʉ Jesúsma zokꞌasidꞌa wãẽã bedꞌeabidꞌamarẽã. 14Mawũẽ maʉ̃rã zekuape mawũãsidꞌa: Miã Ũrãgꞌabari, daiba kꞌawua bꞌedꞌera bʉara jara bꞌʉa wãrãta, bʉra krĩcha zhãrãneã zhi edebi ẽã bʉara akʉ ẽbaera zhãrãnebemata. Awuarabʉrʉ wãrĩnuta jara bꞌʉa Daizeze ota. ¿Diasia bꞌʉka rey César plata diabadara, o dia bꞌe ẽ? ¿Diadꞌaidꞌe bꞌʉka o diadꞌaidꞌe bꞌʉ ẽ?
15Jesúsbara kꞌawuasia ãzhira sewa bibaʉta kꞌobꞌeta, mawũẽ mawũãsia: ¿Mʉrã kꞌãrẽã wãẽãbidꞌaita kꞌopanʉ? Denario abꞌa mʉma weudua mʉã akʉita.
16Ãzha wedꞌai Jesúsbara mawũãsia: ¿Naʉ̃nerã kꞌai zata nʉmʉ, kꞌai trʉ̃ta bꞌʉ nʉmʉ?
Mawũãĩ ãzhara mawũãsidꞌa: Césardꞌea.
17Mawũãnaĩ Jesúsbara panaʉ̃ mawũãsia: Césardꞌera César diaudua, Daizezedꞌera Daizezea diaudua.
Mawũãĩ bia akʉdruasidꞌa izhira.
Beudꞌata piradrʉdꞌaidꞌebema
(Mateo 22:23-33; Lucas 20:27-40)
18Maʉ̃ne saduceorãta zesidꞌa Jesúsma, maʉ̃rãbara jara bꞌea beudꞌara piradrʉ ẽãta, mawũẽ widꞌi mawũãsidꞌa: 19Miã Ũrãgꞌabari, Moisébara bedꞌeata bꞌʉdꞌata mawũãsia: Mebea iabꞌaʉdꞌeta beubʉrʉdꞌe zhi kĩma ãmaẽbʉrʉta warrata ãmaẽ ẽbʉrʉ zhi mebeaba edaibara, aramaʉ̃ne zhi mebea beudꞌata warra barabiya. 20Ewari abꞌa mebẽrãta siete pãĩna bazhia, nabemata miã kꞌãĩpe beusia warra ne ẽã. 21Mawũẽ maʉ̃ wũẽrã zhi tẽãbemaba kꞌãĩpe maʉ̃sidꞌa beubʉrʉba warra ãmaẽ ẽbasia. Abꞌarika berabꞌarisia zhi ũbeasidꞌa. 22Sietera jõma mawũã berabꞌaribʉrʉba miõba warrarã ãmaẽ ẽbasia. Nʉmʉne beusia wũẽrãsidꞌa. 23Kꞌõbe beudꞌata piradrʉbʉdadꞌera, ¿ãzhirãnebemabara sãʉ̃ba izhi wũẽrã baipe mawũã sieteba ãzhi wũẽrã babidꞌapeadꞌara?
24Mawũãnaĩ Jesúsbara panaʉ̃ mawũãsia: Marã wãẽã bꞌeba maʉ̃ẽnabemata zhi bꞌʉmarã sãwũãta kꞌawuadꞌa ẽã, miã Daizeze zareara sãwũãta kꞌawuadꞌa ẽã. 25Beudꞌata piradrʉbʉdadꞌera miã kꞌãĩna ẽã, awuarabʉrʉ ángelerã ʉ̃tre bꞌe kĩrãkꞌa bꞌeaya. 26Mawũãmina beudꞌata piradrʉdꞌaidꞌebema, ¿marãbara Moisé librodꞌera ledꞌakꞌa kĩrãkꞌa bꞌeta Daizezebara ʉrʉta nʉmʉ maẽba Moiséa mawũãsi ẽka?: ¿Mʉrã Abraham Zhibaria, Isaac Zhibaria, Jacobo Zhibaria asi ẽka? 27Aramaʉ̃nerã Daizezera beukuadꞌa Zhibari ẽã, awuarabʉrʉ zokꞌai bꞌe Zhibaria. Mawũẽ marã biodꞌe wãẽã bꞌea.
Zhi zromata bꞌʉa aribꞌaedꞌai bꞌʉta
(Mateo 22:34-40)
28Ũrãgꞌa Moisédꞌe jarabadaba abꞌaʉba Jesús orrasia, saduceorãba widꞌibʉdata bia panaʉ̃bʉrʉta ũrĩpe widꞌi mawũãsia: ¿Sãʉ̃ta zhi zromape Daizezeba aribꞌaemarẽã jara bꞌʉta jõmaʉ̃nebema?
29Mawũãĩ Jesúsbara jarabʉrʉta panaʉ̃ mawũãsia: Jõmaʉ̃nebema zhi zromata Daizezeba aribꞌaemarẽã jara bꞌʉra mawũã bꞌʉa: Israel bꞌebara ũrĩũdua: Nokꞌo Daizezera abꞌa bꞌʉa. 30Nokꞌo Daizezera soidꞌu kʉãgꞌarua, bʉzhi jawureidꞌuba, bʉzhi krĩchaidꞌuba, bʉzhi zareaidꞌuba. 31Maʉ̃ zhi ũmeta dewara mawũã bꞌʉa: Zhãrã kʉãgꞌarua bʉzhi kĩrãkꞌa. Daizezeba aribꞌaemarẽã jara bꞌʉra awʉrʉ audre zhi zroma ne ẽã maʉ̃rã kꞌãñabara.
32Mobebʉrʉ ũrãgꞌa Moisédꞌe jarabaribara mawũãsia: Miã Ũrãgꞌabari, bʉa wãrĩnuta jarabʉrʉ kĩrãkꞌa Daizezera abꞌa bꞌʉta awʉrʉ izhi kĩrãkꞌara ne ẽã. 33Mawũã Daizezeta soidꞌu kʉãgꞌaira, dazhi jawureidꞌuba, dazhi zareaidꞌuba kʉãgꞌaira, zhãrã dazhi kĩrãkꞌa kʉãgꞌaira audre biga nendʉwʉrʉta bio Daizezeita bai kꞌãñabara.
34Mawũã krĩchadꞌe panaʉ̃bʉrʉba Jesúsbara mawũãsia: Bʉra Daizezeta Nokꞌodꞌebemane babodꞌoa.
Aramaʉ̃ne miõba wueta kꞌãrẽ widꞌidꞌa ẽbasia.
¿Kꞌaidꞌeba uru zhãrã Ẽdrʉbira?
(Mateo 22:41-46; Lucas 20:41-44)
35Daizeze dedꞌa ewara maẽ Jesús miã ũrãgꞌa mawũãsia: ¿Ũrãgꞌa Moisédꞌe jarabadabara jara panʉka zhãrã Ẽdrʉbira rey Davidꞌeba uruta? 36Davidbara Jawurebiadꞌeba mawũãsia:
Daizezebara mʉ Nokꞌoa mawũãsia: Mʉ juwua araare jewedꞌarua, bʉ jura bꞌeta jõma mʉã bʉ jẽrũ edre bꞌʉyeedꞌa. (Salmos 110:1)
37Davidba mawũã izhi Nokꞌoa adꞌara, ¿sãwũã bari kꞌãwũta izhidꞌeba uruta bꞌaipe? Kꞌabanabara Jesús bedꞌeara ũrĩ bꞌeasia ũrĩ krĩña.
Ũrãgꞌa Moisédꞌe jarabadadꞌebema
(Mateo 23:1-36; Lucas 11:37-54; 20:45-47)
38Jesús miã ũrãgꞌa nʉmʉnerã mawũãsia: Kĩrãkuita bꞌeaudua ũrãgꞌa Moisédꞌe jarabada kꞌarea, zhi zromane tebaita wua eidꞌu drasoa jʉ̃ teba krĩñadea, ãzhi wawia saludꞌaita krĩñadea pʉwʉrʉdꞌe kꞌabana maẽrã. 39Nokꞌorãta jewedꞌabari maẽ jewedꞌa krĩñadea de zhi jʉrebadata nʉme maẽrã, nokꞌorãta jewedꞌabari maẽ jewedꞌa krĩñadea nekꞌodꞌe trʉ̃bʉdadꞌera. 40Deta wũẽrãrã pẽdrarãneta jãrĩ bꞌea, mobe zhãrãma bia nʉmaĩta dããrã zhiwidꞌibada. Maʉ̃neba maʉ̃rã Daizezebara audre pua kꞌawua oya.
Ofrenda diadꞌa wũẽrã pẽdraba
(Lucas 21:1-4)
41Ofrenda edꞌa kenabꞌaribada maẽ kĩrãbita Jesús jewedꞌa kꞌobꞌʉdꞌe, akʉ kꞌobꞌasia zhãrãba plata edꞌa kenabꞌari kꞌopanʉta. Bara bꞌebidꞌa bioba plata bio edꞌa kenabꞌari kꞌopanasia. 42Maʉ̃ne wũẽrã pẽdrata zuburia bꞌʉta zepe moneda zakerãta ũme edꞌa kenabꞌarisia bio vale ẽãta. 43Mawũẽ Jesúsbara izha jʉrʉkuadꞌata trʉ̃pe mawũãsia: Mʉã wãrĩnu marãã jaraya, naʉ̃ wũẽrã pẽdrata zuburia bꞌʉbara jõmaʉ̃ kꞌãñabara plata audre edꞌa kenabꞌaribʉrʉa. 44Wuaabemabara edꞌa kenabꞌaribʉda plata audꞌubemata, mawũãmina naʉ̃ wũẽrãbara zuburia bꞌʉdꞌe jõma edꞌa kenabꞌaribʉrʉa izhi nekꞌoita erubꞌadꞌata.
Currently Selected:
Marcos 12: cto
Highlight
Share
Copy
Want to have your highlights saved across all your devices? Sign up or sign in
© 2012, Wycliffe Bible Translators, Inc. All rights reserved.
