Hechos 7

Esteban beadꞌapeadꞌa

1Maʉ̃nerã sacerdote wagꞌauba mawũãsia: ¿Bʉ ʉ̃rʉ̃bemata jarabʉdara wãrĩnuka?

2Mawũãĩ Estebanbara mawũãsia: Mʉ ʉrerã, marã mʉ zeze kĩrãkꞌa bꞌeba mʉ bedꞌeata ũrĩũdua: Daizeze zhi zromata dazhirã zeze Abrahanʉã zhi ũdubisia wadꞌi Mesopotamia druadꞌe bꞌʉdꞌe Harán pʉwʉrʉdꞌe bꞌei nawedꞌa. 3Maʉ̃nerã Daizezebara mawũãsia: Ãĩ wãrũã bʉzhi druadꞌebara, bʉzhi mebẽrã maẽbara. Wãrũã drua mʉã ũdubiima. 4Mawũãĩ Abraham Caldeorã druadꞌebara wãpe bꞌesia Harán pʉwʉrʉdꞌe. Mamaʉ̃bara zhi zeze beubʉrʉdꞌera Daizezebara wesia naʉ̃ druaedꞌa idꞌi marã bꞌe maẽ. 5Mawũãmina dia ẽbasia drua namabema miã jẽrũ ne edau nʉmaĩsidꞌa. Mawũãmina diaita jarabʉrʉta, izhi beudꞌa tẽã zhi warrarãã diaita jarasia, wadꞌi Abraham warrarã ne ẽbasimina. 6Daizezebara Abrahanʉã jarasia zhi warrarã ãĩbemata bꞌeaita awʉrʉ druadꞌe, jarasia nezokꞌata okuadꞌaita, puokua jirpanaĩta cuatrociento año. 7Mawũãmina Daizezebara mawũãsia: Awʉrʉ druadꞌebema mʉã kꞌawua oya mawũã nezokꞌata okuabʉdara. Maʉ̃ tẽã ẽzoape mʉta ibia jara bꞌeaya nama. 8Daizezebara jarasia izhidꞌeta bꞌaira zhũmakĩrã kꞌakua eta kꞌõmarẽã. Maʉ̃ba Abrahambara zhi warra Isaac kꞌakua eta kꞌõsia todꞌata semana abꞌa bꞌʉta. Isaacba abꞌarika osia Jacobota, Jacobobidꞌa abꞌarika osia zhi warrarã doceta, Israel bꞌe zhibarirãta.

9Israel bꞌe zhibarirãbara sokꞌazhiruaba Joséra nendosidꞌa ededꞌamarẽã Egiptoedꞌa. Mawũãmina Daizezera nʉmasia izhi ũme. 10Mawũẽ ẽdrʉbisia ne jõmaʉ̃ zuburiadꞌeba, krĩcha bara bigata bꞌʉsia Faraón Egiptodꞌebema reyma. Maʉ̃bara nokꞌota bꞌʉsia Egipto ʉ̃rʉ̃ izhi dedꞌabema jõmaʉ̃ ʉ̃rʉ̃.

11Maʉ̃ne jarrabata bꞌaesia Egipto drua jõmaʉ̃ne, Canaán drua jõmaʉ̃ne. Mawũẽ nʉmesia kꞌãbãẽã zuburiata. Mawũẽ dazhirã zhibarirã bꞌeadꞌabara ũdudꞌa ẽbasia zhikora. 12Maʉ̃ne Egiptodꞌe trigo bꞌʉta Jacoboba ũrĩbʉrʉdꞌera dazhirã zhibarirã bꞌeadꞌata zokꞌakuasia zhi wãgꞌai bꞌeta. 13Ãzhira wãma ũmene Joséra zhi ũdukꞌawabigasia zhi mebẽrãã. Aramaʉ̃ne Faraónbara kꞌawuasia Joséra sãʉ̃rãta. 14Josébara edadꞌe zokꞌasia zhi zeze Jacobota, jõma zhi mebẽrãta setenta y cinco bꞌʉta. 15Aramaʉ̃ne Jacobo wãsia Egiptoedꞌa, mama beusia. Beukuasia dazhirã zhibarirãsidꞌa. 16Ãzhi beubʉrʉra Siquen pʉwʉrʉedꞌa ededꞌape beuwãrã wuagꞌabada maẽ zobꞌeadꞌe tabꞌʉ panasia, maʉ̃ zobꞌeara Abrahamba Hamor warrarãã ne ʉ̃tʉbari edasia Siquen pʉwʉrʉdꞌe.

17Mawũãmina Daizezeba Abraham warrarã drua diaita jaradꞌa ewarita arakꞌaita badꞌera eabasia Egiptodꞌe. 18Maʉ̃ne Egiptodꞌe rey awʉrʉta bꞌesia José ũdukꞌata. 19Maʉ̃ reybara sewasia dazhirãta bꞌeadꞌara, zuburia okuasia dazhirã zhibarirã bꞌeadꞌara, ãzhi wũãwũã zhiwidꞌi toma zareadꞌe kenabꞌaribigasia beumarẽã, aramaʉ̃ne eabadꞌa ẽbamarẽã. 20Maʉ̃ ewade tosidꞌa Moiséra, izhira biga basia Daizezema. Jedꞌekꞌo ũbea akʉ erupanasia dedꞌa zhibarirãbara. 21Maʉ̃ne beumarẽã kenabꞌaribʉdadꞌera Faraón kꞌauba jirabꞌari edape dapũẽsia zhi wau kĩrãkꞌa. 22Mawũẽ Moiséa jõma kꞌawabisidꞌa krĩcha Egipto bidꞌarãnerã. Mawũẽ zhi zroma basia bedꞌeaita kꞌãrẽ oita.

23Cuarenta año babʉrʉdꞌera, sodꞌe zesia akʉdꞌe wãĩta izhi ʉrerã Israel bꞌeta. 24Maʉ̃ne iabꞌa zuburia jirpanʉta ũdui kꞌarebabʉrʉta beasia Egiptodꞌebema. 25Izhara krĩcha bꞌasia izhi ʉrerãba kꞌawua bꞌeta izhidꞌeba Daizezeba ẽzoabigaita. Mawũãmina ãzhara kꞌawua bꞌea ẽbasia. 26Nrũẽma ũdusia israelirã ãzhirãĩnu zhõ bara bꞌʉta, mawũẽ adu-a panamarẽã mawũãsia: ¿Marã awʉrʉ ẽãta panʉta kꞌãrẽã zhiya puo panʉ? 27Mawũãĩ ãzhirãta puo kꞌobꞌʉbara Moiséra edabꞌaripe mawũãsia: ¿Bʉra kꞌaiba nokꞌota bꞌʉsi bedꞌea araa oita dai ʉ̃rʉ̃? 28¿Bʉa mʉrã bea krĩña kꞌobꞌʉka bʉzha nuwuedꞌa beadꞌa kĩrãkꞌa Egiptodꞌebemata? 29Maʉ̃ bedꞌeata ũrĩpe Moiséra merũ wãpe ãĩbemata bꞌesia Madián druadꞌe, mama warrarã ũme basia.

30Cuarenta año berabꞌaribʉrʉdꞌe, ángelta zhi ũdubisia drua drudrua tabꞌʉ maẽ kꞌatuma Sinaí maẽ, maʉ̃nerã zhi ũdubisia bakuru zake eradrʉ nʉmʉne. 31Moiséba ũdui kꞌawua ẽãsia, aramaʉ̃ne bia akʉita orrabʉrʉdꞌera Daizezebara mawũãsia: 32Mʉrã bʉ zhibarirã bꞌeadꞌa Zhibaria, Abraham Zhibaria, Isaac Zhibaria, Jacobo Zhibaria. Mawũãĩ Moiséra ure kꞌobꞌʉba akʉ ẽbasia. 33Maʉ̃ne Daizezebara mawũãsia: Bʉa jẽrũne jʉ̃ bꞌʉra wẽãdua, bʉra mʉ kĩrãbita kꞌobꞌʉba bʉ kꞌobꞌʉ maẽrã egoro bia. 34Mʉãrã wãrãne ũdu bꞌʉa mʉrẽrã zuburia nʉmeta Egiptodꞌe bꞌeta, mʉãrã bꞌia bꞌeta ũrĩ bꞌʉba zebʉrʉa ẽdrʉbigaita. Mawũẽ mʉã bʉta zokꞌaya Egiptoedꞌa.

35Maʉ̃ne maʉ̃ Moiséra Israelitarãbara seribidꞌa ẽãba mawũã bazhidꞌa: ¿Bʉra kꞌaiba nokꞌota bꞌʉsi bedꞌeata araa oira? Mawũã jaradꞌapeadꞌatrʉ Daizezebara nokꞌota zokꞌasia ángel zareadꞌeba ãzhi ẽdrʉbigamarẽã, maʉ̃ ángel zhi ũdubisia bakuru zake nʉmʉne. 36Moisébara Egipto druadꞌe ũdudꞌakꞌata bio okuape jʉre edesia, ũdudꞌakꞌata osia Pusa Purrudꞌebidꞌa, drua drudrua tabꞌʉ maẽbidꞌa okuasia cuarenta año. 37Maʉ̃ Moisébara Israelirãã mawũãsia: Nokꞌo marã Zhibaribara marã ʉredꞌebemata izha bedꞌeata jarabibarita piradrʉbiya mʉ kĩrãkꞌa. Maʉ̃ bedꞌeara ũrĩũdua. 38Maʉ̃ Moiséra Israel bꞌe bawara bꞌasia drua drudrua tabꞌʉ maẽ, maʉ̃nerã kꞌatuma Sinaí maẽ ángelba jarabʉrʉta jarasia dazhirã zhibarirã bꞌeadꞌaa, aramaʉ̃ne sãwũã bꞌeaidꞌebema bedꞌeata jidasia dazhirãã diaita.

39Mawũãmina dazhirã zhibarirã bꞌeadꞌabara aribꞌae krĩñana ẽbasia, awuarabʉrʉ izhira seribidꞌa ẽbasia. Aramaʉ̃ne sodꞌebara wakusa wã krĩñasidꞌa Egiptoedꞌa. 40Mawũẽ Aarónʉã mawũãsidꞌa: Daiba ne zhi zromane edadꞌaita daia odedꞌekarua daita jʉre edemarẽã. Jari Moiséra dai Egipto druadꞌeba jʉrewedꞌara kꞌawuadꞌa ẽã sãwũã berabꞌaribʉrʉra. 41Aramaʉ̃ne pakꞌa zake zata odꞌape maʉ̃ĩta ne beasidꞌa zhi zromane edabʉdata. Mawũã ãzhi juwuaba o edadꞌape fiesta o bꞌʉsridꞌasidꞌa. 42Mawũẽ Daizezera ãĩ wãsia ãzhi maẽbara. Aramaʉ̃ne idaribisia bãjãne chĩdau jizoa nʉmʉta zhi zromane edadꞌamarẽã. Maʉ̃ẽnabemata zhi bꞌʉmata Daizezeba bedꞌeata jarabibarirã librodꞌe mawũã bꞌʉa:

¿Drua drudrua tabꞌʉ maẽ cuarenta año bꞌeasidꞌera mʉĩtara ne beasidꞌakꞌa marã Israel bꞌebara?

43Awuarabʉrʉ wua deta atausidꞌa Moloc zhi zromane erubꞌedꞌeta. Chĩdau zadꞌe odꞌapeadꞌata atausidꞌa marãne Refán zhi zromane erubꞌeta. Marãbara mazha okuadꞌapeadꞌata zhi zromane erubꞌea. Maʉ̃ kꞌarea mʉãrã zuburiadꞌe edebigaya Babilonia druadꞌeba wuawuaa. (Amós 5:25-27)

44Dazhirã zhibarirã bꞌeadꞌabara Daizeze deta wua omata erubꞌeasia, maʉ̃nebara kꞌawua bꞌeasia Daizezera ãzhi bawara bꞌʉta. Mawũã erubꞌeasia drua drudrua tabꞌʉ maẽ. Maʉ̃ Daizezeba jaradꞌadꞌe bꞌʉta Moiséa jarasia omarẽã izha ũdubidꞌa zadꞌe. 45Maʉ̃ta dazhirã zhibarirã bꞌeadꞌa warrarãba jidadꞌape Josué bawarauba wesidꞌa drua awʉrʉrãneta kꞌabꞌaribʉdama. Maʉ̃ awʉrʉrã Daizezebara dazhirã zhibarirã kĩrãbitaubara ãĩ jʉrekuasia. Deta wua omarã bꞌasia David bꞌadꞌa ewariidꞌu. 46Daizezema Davira bia nʉmasia, Davidbara izhi Daizezeita de oita widꞌisia mama izhita ibia jaradꞌamarẽã Jacobo warrarãnebemaba. 47Mawũãmina Salomónba osia Daizeze dera. 48Mawũã osia Ʉ̃trebema zhãrãba odꞌa dedꞌa bꞌʉ ẽmina. Maʉ̃ẽnabemata izha bedꞌeata jarabibaridꞌeba mawũãsia:

49Ʉ̃trera mʉ jewedꞌabaria, druara mʉ jẽrũ bꞌʉbaria. ¿Mawũẽ kꞌãrẽ deta odꞌaipe mʉĩtara? Maʉ̃ta jarabʉrʉa mʉta Nokꞌoba. ¿O sãwũã baipe mʉ ẽnaʉ̃ bꞌaira?

50¿Mʉãrã maʉ̃ jõma mʉzhi juwuaba osi ẽka? (Isaías 66:1-20)

51Mawũãnata jarape Estebanbara mawũãsia:

¡Marã kʉwʉrʉ zarea bꞌea! ¡Marãbara Daizeze bedꞌeara sodꞌebara aribꞌaedꞌa ẽã, ũrĩna ẽã! Marãbara Jawurebiaba jara bꞌʉra jipadꞌe aribꞌaedꞌa ẽã, mawũẽ mazhi zhibarirã bꞌeadꞌa kĩrãkꞌa bꞌea marãsidꞌa. 52¿Daizezeba bedꞌeata jarabibarita bꞌeadꞌara zuburia odꞌaita pẽwã bꞌeasi ẽka marã zhibarirãbara? Ãzhara beasidꞌa Jesucristo zeita nawedꞌa jarabʉdara, marãbara izhira chãbꞌaridꞌape beabisidꞌa. 53Marãbara Moisé ũrãgꞌara ángeldꞌeba jidasidꞌamina aribꞌaedꞌa ẽã.

54Maʉ̃ta ũrĩnape kidꞌa kꞌõsesea sodꞌeba kĩrũsidꞌa izhi ʉ̃rʉ̃. 55Maʉ̃ne Estebanba Jawurebiadꞌeba ʉ̃taa akʉbʉrʉdꞌe Daizeze ʉ̃nata ũdubʉrʉdꞌera, ũdusia Jesús kꞌobꞌʉta Daizeze juwua araare. 56Mawũẽ mawũãsia: Mʉãrã ũdu kꞌobꞌʉa bãjã ewa nʉmʉta, ũdu kꞌobꞌʉa Beubari Bape bꞌadꞌara kꞌobꞌʉta Daizeze juwua araare.

57Mawũãĩ bꞌia ãzhi kʉwʉrʉ ãna jidadꞌape Esteban orraedasidꞌa. 58Pʉwʉrʉdꞌebara ãĩ ededꞌape mongꞌaraba tabꞌari jidasidꞌa, sewa nebʉrʉ ji kꞌobꞌebara ãzha wua ãnebꞌari bꞌera wẽãnape kũrã jẽrũ kꞌaita bꞌʉsidꞌa akʉmarẽã, maʉ̃ Saulo basia.

59Mongꞌaraba tabꞌari jirtopodꞌe Estebanbara zhiwidꞌi mawũãsia: Nokꞌo Jesús, jidarua mʉ jawurera. 60Mobe sãkꞌokꞌodꞌe kꞌobꞌepe nemi jĩgua mawũãsia: Nokꞌó, naʉ̃rãta bedꞌea bara bꞌeabirãrũã kꞌãwũã kꞌazhiruata obʉda kꞌarea.

Mawũãpe beusia.

Currently Selected:

Hechos 7: cto

Highlight

Copy