Maroko 7
7
Yodeo mai‑ka idi mai ati tamine
1Yerosare‑ya mai yanana, fariseo mai one toha, Mose‑ka yama hani ati‑ya mai ka‑kamina mai one toha, mai na, mai kamake, Yeso‑kaya mai yorotokanamaroni.
2Yeso‑ya mai da‑daba mai tafabone, mai yahi‑ya mai sorokarira, mai‑ya mai awa, mai ati yanana,
“Mai yahi towe tafineni.” Mai ati namaroni.
3Yodeo ai‑ka idi mai ati ihi mai tafabone, mai yahi‑ya mai sorokariteni. Ai‑ka idi mai ati‑ya fariseo mai tokadabi nafiteni.
4Yama ka‑kanika‑ya mai tokiya, mai wininamiya, mai yahi faha‑ya bokiya, hini mai‑ya mai wisakari mai teni. Mai‑ka keneko, mai‑ka faha wiye, mai‑ka yiwaha na faha‑ya mai korotofiteni. Mai‑ka idi mai ati dama mai ati‑ya mai tokadabateni.
5Fariseo mai toha, Mose‑ka yama hani ati‑ya mai ka‑kamina mai toha, mai na, Yeso‑ya mai hiyaramaroni.
“Hini yamata ihi tiwa‑ya mai da‑daba ai‑ka idi mai ati‑ya mai tokadabarani? Mai yahi towe tafateni.” Mai ati namaroni.
6Yeso mai‑ya hiyare,
“Towe dai amani. Deoso ati‑ya i‑di Isa·iya kamine, dai tamine‑ya hiyare,
‘Owa‑ya mai nofamone mai ati na, owa‑ya mai kahiyara na, hiniya keyehe‑ya mai hirina, owati‑ya mai tokadabarani.
7Mai ati omita, ya‑yai·oni awirini. Owati‑ya mai kaminamone mai ati na, mai one ati‑ya mai kaminabisineni.’ Deoso ati ne, ati‑ya Isa·iya kanahanomatane.
8Deoso ati yokana dai nokotonira, dai‑ka idi mai ati‑ya dai nokotonibisateni.” Yeso ati nemarine.
9Yeso ati yananamatase,
“Ai‑ka idi mai ati dai nofabisa, Deoso ati‑ya dai tokadabarani.
10Deoso ati‑ya i‑di Mose kanahanomatane.
‘Abi, ami, mai na, mai tinofahi. Mai‑ka abi, mai‑ka ami, mai na, mai one‑ya mai weena, —Towe amatini.— Mai ati na, mai abahi.’ Mose‑ka yama hani ati neni.
11-12Deoso ati‑nima dai ati ni awirineni. Haa‑nima yama na dai kanawatoteni.
‘Deoso‑ya oka yama daa·onaboneni.’ Dai ati niya,
‘Mai one‑ya dai daariyahi. Dai‑ka abi, dai‑ka ami, mai na, mai dai kasomariyahi.’ Dai ati teni.
13Deoso ati‑ya dai tokadabara, dai‑ka idi mai ati‑ya dai kanawatobisineni. Haa‑nima dai ene na damateni.” Yeso ati nemarine.
14Fariseo mai‑ya Yeso hiyari hawa toheya, mai dama mai‑ya Yeso haane,
“Owati dai nafi mitahi. Owati dai watohi.
15Ai tefe ene ai towe tohaterani. Ai atibodi towe ene ai towe tohabisateni.
16Owati dai mita, owati dai tokadabahi.” Yeso ati nemarine.
17Yobe doro‑ya Yeso hika mai da‑daba mai eyehe tokiyome, mai dama mai nahokosamaroni. Yeso‑ka fai‑ya mai haanameteni, ai tefe tamine‑ya mai mitabonehe.
18Yeso ati yanane,
“Ka! Hini dai one‑nima dai na, yama‑ya dai watoteraba awineni. Ai tefe ene ai towe tohaterani.” Ati nemarine.
19Ai tefe nafi sibara tamine‑ya Yeso hiyare,
“Ai atibodi‑ya ai tefe tokaterani. Ai tafiya, ai nabadi‑ya tokabisa, makobote ai miiniya, abateni.
20Mai atibodi towe ihi mai towe tohateni.
21Mai atibodi ati towe ihi yama towe‑ya mai nokotonihe, fana mai dama mai‑ya mai nokotonihi, yama‑ya mai boti, mai one‑ya mai nanahaba, fana one‑ya mai idiwaha, mai teni,
22mai one‑ka yama‑ya mai nokotonihi, yama towe‑ya mai nofa, keyehe‑ya mai hiri, mai siwa, Deoso ati‑ya mai tokadabara,
‘Towe dai amani, amosabotebisa ama·oni.’ Mai ati na,
haa‑nima mai ihi na,
23yama towe‑ya mai atibodi‑ya yanana, mai atibodi ihi mai towe tohateni.” Yeso ati nematane.
Sirofenisiya‑ka fana tamine
24Yeso yananame, Tiro, Sidoho na, yakari‑ya toke, yobe doro‑ya tokiyomematane.
“Owa‑ya mai dami awariyahi.” Atibodi ati ne,
Yeso‑ya mai one awameteni.
25Fana bide‑ya madi towe foye, Yeso tamine‑ya fana mita, kamake, Yeso yowi‑ya yobati‑kaya itarisa, moinisa, itameteni.
26Fana Yodeo tohara, Sirofenisiya‑ka tohabisa, ati yanana,
“Okoto tikasomahi. Madi towe kanatinihi.” Ati nameteni.
27Yeso ati yanane,
“Yodeo oka mai toha, mai‑ka yama nafi hawa tohiya, Bara mai okasomaboneni. Ai‑ka madehe tafe‑ya yomahi‑ya ai daaterani.” Ati nematane.
28Fana ati yananamatasa,
“Ayo, fara amani. Owati timitaharihi. Madehe tafiya, bofe‑ya yama mekori fororona‑ya yomahi mai kabateni.” Ati nameteni.
29“Tiwati amosa ihi okasomini. Tikamahi. Madi towe tikoto‑ya foyamarane.” Yeso ati nematane.
30Fana hika yobe‑ya tokoma, kobotonama, bide kama‑ya homa, madi towe foyamarematane.
Maki Yeso hinakitame
31Tiro‑ya Yeso sawimari, yananame, Sidoho‑ya kariwahe, Dikabori‑kaya kobone, Karireya‑ka faha widi‑ya maatowitimarine.
32Maki narabo hawirihi, ati amosarihi ne, Yeso‑ya mai hiwakame, Yeso‑ya mai hiyara,
“Tiwa yehe‑ya maki boyotinahi.” Mai ati namaroni.
33Mai awiri‑kaya maki‑ya i‑di Yeso towakame, maki narabo hodone‑ya yehe‑ya yorinise, makobote hini yehe‑ya firokase, yehe afe‑ya maki ebene‑ya boyonemarine.
34Yeso neme‑ya tonokomise, hasitone, Yodeo mai ati‑ya ati yanane,
“Efata!” Ati ne, ai ati‑ya,
“Hawi wamahi.” Ati nemarine.
35Hibati‑ya narabo hawirihi, ati amosarihi nemari, amosawame, mai ati‑ya mitawaha, ati amosawaha nemarine.
36“Owa ene dai kaminariyahi.” Yeso ati nemarine.
Ati mai hikadabare, mai‑ya Yeso ati barini dame, hiniya ati kamini mai na‑nafi hinemarine. Tamine mai nafi himitawahemarine.
37Yeso ene‑ya mai awa, mai atibodi yama‑ya kadika, Yeso tamine‑ya mai hiyara,
“Ka! Yeso ene amose hinama, hibati‑ya mai narabi hawiramaro mai narabi hawiwaha, mai ati wadaramaro mai ati wadawahateni.” Mai ati namaroni.
Currently Selected:
Maroko 7: jaaNT
Highlight
Share
Copy
Want to have your highlights saved across all your devices? Sign up or sign in
