Mateo 8
8
Mese towe tamine
1Adami‑ya Yeso tokofawaha, nowati‑ya mai dama mai kamakemaroni.
2Mese towe tohe kaki, Yeso noko‑ya yobati‑kaya waaki, moinise,
“Ayo, haa‑nima ai‑na ai kasomi tiwata, owa kasomi tinofakarini?” Ati nemarine.
3Yeso maki‑ya boyone,
“Onofini, tiwa mese amosawamahi.” Ati ne, ati ene mese amosawamemarine.
4“Owati timitahi. Owa ene tamine mai‑ya tihiyarariyahi. Hiniya Deoso‑ka yama‑bone‑ya mai da‑daa mai‑ya tikahi. Mose‑ka yama hani ati‑nima yama daatiniya, tikitama, tiwa‑ya mai watowahaboneni.” Yeso ati nemarine.
Sodado mai‑ka hidi Yeso ati‑ya nofe
5Kafanaho‑ya Yeso kobone‑ya sodado mai‑ka hidi Yeso‑ya kame, Yeso‑ya hiyare,
6“Yeso, oka hidi amatini. Oka yo‑yose kiyani nafi, ka‑kakone, owa tabaro‑ya kawinene.” Sodado mai‑ka hidi ati nemarine.
7“Hehe, tiwa tabaro‑ya ai towakamahi. Tika yo‑yose onakitamaboneni.” Yeso ati nemarine.
8“Yeso, oka hidi webote amatini. Towe ama·oni. Amosabotebisa amatini. Owa tabaro‑ya tikamakiriyahi. Tiwati yananiya, tiwati ihi oka yo‑yose kitamebonane.
9Oka hidi ati‑nima oteni. Oka sodado owati‑nima mai teni. Fara‑nima tiwati yananiya, oka yo‑yose kitamebonane.” Sodado mai‑ka hidi ati nemarine.
10Ati‑ya Yeso mite, ya‑yaine, mai naha mai‑ya hiyare,
“Owati amosa dai mitahi. Sodado mai‑ka hidi owati‑ya nofi nafine, Yodeo ai toha, owati‑ya dai nofi bi‑bidi neni.
11Neme‑ke ai nafi‑ka hidi kitabote tohawaheya, i‑di Abaraho, i‑di Isaki, i‑di Yako, mai na, mai marinabone, mahi ka‑kaki‑ka mai one toha, mahi to‑toka‑ka mai one toha na, fara Bara mai‑ka tabora dami‑ka mai saweboneni.
12Hibati‑ya Deoso dai‑ya himane, ati‑ya dai tokadabara, marina‑ya dai sawiraboneni. Dai‑ya mai weretowitebone, yama soki‑kaya dai ohinabone, dai komene kitaboneni.” Yeso ati nemarine.
13Sodado mai‑ka hidi‑ya hiyaramatase,
“Sibaraboneni. Tiwa tabaro‑ya tikamahi. Tiwati‑nima yama naboneni. Tika yo‑yose onakitamani.” Yeso ati nemarine.
Sodado mai‑ka hidi hini tabaro‑ya tokome, hika yo‑yose kitame‑ya awematane.
Mai dami‑ya nakitame
14Bedoro‑ka yobe‑ya Yeso tokomakimatane. Bedoro‑ka koma kiyana, hiwe nafe, kawinameteni.
15Yahi Yeso boyohina, kitama, hiwe fawana, mai tafe‑bone‑ya awawahameteni.
16Yama soki yanatoni‑ya madi towe mai sawi‑ka mai mai hiwakama, Yeso ati ene madi towe mai kana, mai kiyana mai‑ya nakitama nemarine.
17Yama hani i‑di Isa·iya hikanahanamete, fara yama hani ati‑nima Yeso ene nemarine.
“Ai kiyana, ai‑ya nakitamebonane.” Isa·iya‑ka yama hani ati nineni.
Yeso‑ya mai ati dababone
18Yeso nowati‑ya mai dama mai tokomakemaroni. Yeso mai‑ya awe, hika mai da‑daba mai‑ya himanemarine, kowani‑kaya mai eyehe tokebonaha.
19Mose‑ka yama hani ati‑ya mai ka‑kamina mai‑ka owa kamaki, Yeso‑ya hiyare,
“Yeso, oda‑ya ka‑kanawato amatini. Tikamiya, tiwa‑ya osaweboneni.” Ati nemarine.
20“Bani mai one tabori hodi‑ya toha, bani mai afe wada mai bori tohateni. Owa‑ta owa tabaro wadarani.” Yeso ati nemarine.
21Yeso‑ya mai sawe mai‑ka owa ati yanane,
“Ayo, okobi abeya, hika yama kote okayafiya, tiwa‑ya osawiwahaboneni.” Ati nemarine.
22“Abi‑ka yama hini tohiya, owa‑ya tisawibisahi. Abi abeya, owati‑ya mai nofara abi‑ka yama‑ya mai kayafabisiya, yama sibaraboneni.” Yeso ati nemarine.
Yeso ati ene yama hakikini fawana
23Yeso‑ya mai da‑daba, kanawa‑ya Yeso eyehe mai foyawahamaroni.
24Wara webote kowani‑kaya mai berekawahabone, faha bai‑ya mai yakakaniya, boni kita kake, faha rike nafe ihi, kanawa boki yanatonameteni. Yeso amone, forimatane.
25Yeso‑ya mai mowakana,
“Ayo, ai tikasomahi. Ai abi bonehe.” Mai ati nameteni.
26“Hini yamata ihi dai kakomehe? Owa ene hibati‑ya dai awateni. Owa dai wato awirini?” Yeso ati nematane.
Yeso waamise, boni‑ya wee, faha‑ya wee ne, boni fawa, faha rike fawa nameteni.
27“Ebeni‑ke tohati? Ai‑nima Yeso ni awire, kitabotebisa amane. Yeso ati‑ya boni mita, fawa, faha rike fai ati‑ya mita, fawa nineni.” Mai ati nameteni.
Madi towe mai‑ya sawi, Yeso mai‑ya kasome
28Wara webote kowani‑kaya mai kobonameteni, Kadara mai‑ka wami‑ya. Mai aba mai tame‑ya mai fama mai kasawe, mai kakemeteni. Madi towe mai sawi‑ka mai hama, mai ihi hawi‑ya mai one tokomarameteni.
29“Yeso, Deoso Bidi amatini. Oda arabatinahi. Yama one‑ya oda‑ya saritikanabone tinamaro, hibayata mahi koboni awisare, oda bisitiriyahi.” Madi towe mai ati nameteni.
30Yama yaki‑ya boroko mai dama mai tafameteni.
31“Yeso, maki mai‑ya oda sawimaterabone tina, boroko mai‑ya oda‑ya tiyosebisahi.” Madi towe mai ati na,
32“Sibarini, boroko mai‑ya dai foyahi.” Yeso ati ne,
boroko mai‑ya madi towe mai tokiyoma, boroko mai kanani tokofawaha, wami kote wadara‑ya mai nafi toka, mai boka, mai nafi abameteni.
33Boroko mai‑ya mai na‑nawada, sidadi‑ya mai kanani tokoma, Yeso ene‑ya mai kamina, madi towe mai sawi‑ka mai tamine‑ya mai kaminahari, mai nameteni.
34Sidadi‑ya mai wi‑wina, Yeso tamine‑ya mai mita, mai nafi tokomakemeteni, Yeso‑ya mai awabonehe. Yeso‑ya mai awa, Yeso‑ya mai yosemeteni, yama one‑kaya tokebonaha.
Currently Selected:
Mateo 8: jaaNT
Highlight
Share
Copy
Want to have your highlights saved across all your devices? Sign up or sign in
