Mateo 14
14
Yowaho Batita‑ya mai nanahaba
1Nasare‑kaya Yeso wine, tamine‑ya mai‑ka hidi i‑di Erodi mite,
2hika yo‑yose mai‑ya hiyare,
“Yowaho tohe awane. Yowaho Batita abe, kitame ene kite toha ne awane.” Erodi ati nematane.
3-4Yowaho Batita namidi‑ya i‑di Erodi ati ene mai tiinakosamaro tamine okaminebonane. I‑di Erodi anidi i‑di Firibi tohe, i‑di Firibi fadi i‑di Erodiasi toha, Erodi anidi fadi‑ya famawahe, fare ene i‑di Yowaho Batita ati yanane,
“Erodi, ayo fadi arabatinahi.” Ati ne, ati damemarine.
I‑di Erodiasi ati ihi Yowaho mano‑ya Erodi sokikase, kadeya‑ya Yowaho‑ya nafoyemarine.
5Yowaho‑ya nanahabebona,
“‘Yowaho Deoso ati‑ya mi‑mita amane.’ Mai ati teni.
Yowaho onahabiya, owa‑ya mai bisinaba awineni.” Erodi atibodi ati nematane.
6Makobote i‑di Erodi‑ka ano kobona, mai yorotokana, i‑di Erodiasi bide atona mai noki‑ya siwana ihi Erodi ya‑yainematane.
7Atona‑ya hiyare,
“Hini yamata‑ya tiwati koboniti? Yama tinofa daa·onaboneni. Keyehe hiri·oterani.” Erodi ati nematane.
8Atona madi‑ya hiyara, madi ati ihi Yowaho Batita tati‑ya atona haana,
“Barato‑ya Yowaho Batita tati foye, owa‑ya daatinahi.” Atona ati nameteni.
9Atona ati‑ya i‑di Erodi mite, yawe, atibodi yama‑ya dike,
“Yowaho Batita nanahabi onofarini. Hini owati tohani.
‘Yama tinofa daa·onabone’ ona,
owati‑ya mai nafi mita, owati‑nima oriya, owa‑ya mai hahakariyahi.” Hidi webote atibodi ati ne,
Sodado mai‑ya yosematane, Yowaho namidi‑ya mai tiinakosabonehe.
10Kadeya‑ya mai toka, Yowaho namidi‑ya mai tiinakosa,
11Yowaho tati barato‑ya foye‑ya sodado kakame, atona‑ya daahine, atona madi‑ya tokoma, Yowaho tati‑ya daatonamameteni.
12Yowaho‑ya mai da‑daba Yowaho abo‑ya mai towakama, abo mai hikamematane. Makobote Yeso‑ya mai toka, Yowaho tamine‑ya mai kaminamaroni.
5.000 mai kana mai‑ya Yeso natafe
13Erodi ati tamine‑ya Yeso mite, mai one awiri‑kaya tokebona, kanawa dori‑ya oda foya, oda towakamamaroni. Yeso toke tamine‑ya mai one dama mita, mai tokobasamakemaroni.
14Oda kobona, oda tokomorosa, mai dama mai‑ya Yeso awe, mai‑ya nofe, mai kiyana mai‑ya nakitamemarine.
15Mahi toke‑ya Yeso‑ya oda da‑daba Yeso‑ya oda hiyara,
“Yeso, mahi toke, yobe wadare‑ya ai naha, mai tiyosehi, mai tabori‑ya mai tokiya, mai tafe‑bone‑ya mai kanikabonehe.” Yeso‑ya oda da‑daba oda ati namaroni.
16“Mai toki awiraboneni. Mai dai natafabisahi.” Yeso ati nemarine.
17“Oda‑ka baho 5 kana, oda‑ka aba mai fama na, ai tefe one wadarani.” Oda ati namaroni.
18“Owa‑ya mai dai kakawahi.” Yeso ati nemarine.
19Yeso ati ene kabihi mese‑ya mai dama mai nahorisamaroni. Baho 5 kana, aba mai fama na, mai‑ya Yeso damakane, neme‑ya tonokomise, Deoso‑ya hiyaremarine. Baho‑ya kebi, oda‑ya baho‑ya daanemarine, mai dami‑ya oda daanabonehe.
20Mai nafi tafa, mai korimanama, baho kote oda teena, hisiri 12 kana kibamaroni.
21Maki 5.000 mai kana, mai fanawi dama, madehe dama na, mai tafamaroni.
Faha baki‑ya Yeso yakane
22Hisiri‑ya baho kote oda teeni hawa toha, Yeso ati ene kanawa‑ya oda foyamamaroni, faha kowani‑kaya oda beretokawami dai tohabonehe. Makobote mai dama hini mai tabori‑kaya mai‑ya yosemarine.
23Mai‑ya hiyari hawa toheya, adami webote‑ya Yeso tokomorosematane, Deoso‑ya hiyarebonaha. Yama soki‑ya Yeso ohari towitakosematane.
24Kanawa‑ya faha bai‑ya oda yakakana, boni ihi faha rike oda‑ya werekanamaroni.
254 ora‑ke, yama wahi yananiya, Yeso kamaki, faha baki‑ya yakanemarine.
26Yeso faha baki‑ya yakane‑ya oda awa, oda kakomehe, oda e‑erina,
“Ai korimari toha awini.” Oda ati namaroni.
27Oda kakomehe, oda‑ya Yeso haane,
“Dai habo kitahi. Fara ama·oni. Dai kakomeheriyahi.” Yeso ati nemarine.
28Bedoro ati yanane,
“Ayo, fara tiwa amani? Owa haatinahi, faha baki‑ya tiwa kobo·onabonehe.” Bedoro ati nemarine.
29“Hehe, tikihi.” Yeso ati nemarine.
Bedoro waamise, faha baki‑ya yakanemarine, Yeso‑ya kobonebonaha.
30Faha rike nemehe‑ya Bedoro awe, kakomehe, habanisi yanane,
“Ayo, owa tikasomahi. Haba·onisariyahi.” Bedoro ati nemarine.
31Yeso yehe‑ya daatowiti, Bedoro‑ya waratone,
“Owati tinofara, hini yamata ihi tiwa kakomeheti?” Yeso ati nemarine.
32Kanawa dori‑ya mai teenama, boni fawanamaroni.
33Yeso ene oda awa, Yeso‑ya oda kahiyara,
“Deoso Bidi yokana amatini.” Oda ati namaroni.
34Kenesare‑kaya oda kobonamaroni.
35Yeso‑ya mai watowamiya, mai tabori dami‑ya mai one kanani toka, Yeso koboni tamine‑ya mai kaminamaroni, mai kiyana mai‑ya mai kakamabonehe.
36Yeso‑ya mai mai hiwakama,
“Yeso, tika bora ifi oda boyonaboneni.” Mai ati na,
Yeso borone‑ya mai boyoniya, mai kitamamaroni.
Currently Selected:
Mateo 14: jaaNT
Highlight
Share
Copy
Want to have your highlights saved across all your devices? Sign up or sign in
