Mateo 12
12
Sabado hidi i‑di Yeso amane
1Sabado‑ya Yeso tokemarine. Yeso‑ya oda da‑daba oda sawemaroni. Fadara‑ya oda kariwaha, oda fime, tiriko tati‑ya oda bakakasa, tiriko oda kabamaroni.
2Oda ene‑ya fariseo mai awa, mai yawa, Yeso‑ya mai weena,
“Tika mai da‑daba mai ihi ati kasirani, sabado‑ya yama‑ya mai aninaro.” Mai ati namaroni.
3 # 12:3-4 Deoso‑ka yobe‑ya i‑di Dafi yama‑ya anitere, fimi ihi Deoso‑ka baho‑ya hika mai eyehe kabe, Deoso yawi awirematamonane. Yeso ati yanane,
“Dafi tamine dai kadikaterini? Dafi, hika mai eyehe toke, mai fimi nafemetemoneni.
4Deoso‑ka yobe‑ya Dafi tokiyome, Deoso‑ka baho‑ya idi, baho‑ya mai kabametemoneni. Deoso‑ka baho‑ya mai one kabaterani. Deoso‑ka yama‑bone‑ya mai da‑daa mai hikababisateni.
5Sabado‑ya yama ai aniteramone dai ati na, Deoso‑ka yama hani dai kadikatera awineni. Sabado‑ya Deoso‑ka yama‑bone‑ya mai da‑daa yama‑ya mai anina, mai ihi Deoso ati yawaterene.
6 # 12:6 Yeso hini tamine‑ya hiyare. Yeso amosi nafi, Deoso Bidi amane. Owati dai mitahi. Deoso‑ka yobe amosi bi‑bidi ne, hai‑ta dai‑ya dabe amosi ba‑basi nibisane.
7Deoso ati dai watora,
‘Oka bani‑bona onofi nafira, mai ati soma, mai ihi ya‑yai·obisaboneni.’ Deoso ati nane.
Deoso ati‑ya dai wata‑mani, mai ihi amosa mai‑ya dai weeni awira neni.
8Dai‑ka Ayo neme‑ke sabado hidi amane.” Yeso ati nemarine.
9Yeso hiyari hawa tohe, yananamatase, Deoso‑ya mai hi‑hiyara‑ke yobe‑ya tokiyomemarine.
10Maki yehe moikanamemata itari,
“Yeso hinakitameba awane.” Mai atibodi ati namaroni.
“Yeso, sabado‑ya ai owa ai nakitama, sibakarini?” Mai ati namaroni, Yeso‑ya mai weenabonehe.
11Yeso mai‑ya hiyare,
“Sabado‑ya tika kaneiro hodi‑ya soniriseya, didire awane.
12Bani mai manakone bi‑bidi na, ai manakone nafi bisineni. Sabado‑ya ai owa ai kasoma, ai sibarineni.” Yeso ati nemarine.
13Yehe moikaname‑ya hiyare,
“Tiwa yehe feotokanahi.” Yeso ati ne,
Yehe feotokaname, yehe owa‑nima yehe nawahemarine.
14Yeso ene‑ya fariseo mai awa, mai toka, mai yorotokana, Yeso‑ya mai nanahababone, Yeso tamine‑ya mai ibi hiyarameteni.
Yeso‑ya i‑di Deoso yosene
15Mai ihi‑bone‑ya Yeso wato, toke, nowati‑ya mai dama mai tokomake, mai kiyana mai‑ya Yeso nakitame,
16Mai‑ya hiyare,
“Owa tamine dai kaminariyahi.” Yeso ati nemarine.
17Isa·iya i‑di Deoso ati‑ya mai mi‑mita‑mete mai‑ka owa amane. Isa·iya‑ka yama hani ati‑nima yama nawahani.
18“Oka yo‑yose dai awaho. Okadikemari, onofi nafine. Owati ihi Oka Doni fai‑ya sawibonane. Bara mai‑ya hiyareya,
‘Mai ihi‑nima mai manakone na kobonaboneni.’ Ati nebonane.
19Mai‑ya weerihi, yawa ihi ati towe toharihi nebonane. Sidadi hawi‑ya ati towe mai himitarebonane.
20Mai kiyana mai‑ya kasomebonane. Mai ohini kita mai‑ya weeterebonane. Mai kitara mai‑ya kasomeya, mai nafi ihi‑nima mai manakone na‑ya daanebonane.
21Oka yo‑yose‑ya Bara mai watoya, mai habi siitonamaraboneni.” Deoso‑ka yama hani ati nineni. Fare ati‑nima yama nawahani.
Yeso tamine‑ya keyehe‑ya mai hirina
22Maki madi towe foya‑ke‑ya mai kakamamaroni, Yeso hinakitamebonaha. Maki noko wadamarihi, ati wadamarihi ne, Yeso ati ene kitame, yama‑ya awamatase, ati yananamatasa nemarine.
23 # 12:23 “Dafi‑ka nodi tohe awane.” Mai ati niya, “Ai‑ka hidi webote tohawahebonane.” Mai atibodi ati neni. Yeso ene‑ya mai awa,
“Ka! Haa‑nima ai ene na, ai awaterani. Dafi‑ka nodi tohe awane.” Mai ati namaroni.
24Mai ati‑ya fariseo mai mita, mai yawa,
“Deoso ene tohi awirane. Madi towe mai‑ka hidi i‑di Beosibo ati ene madi mai one‑ya Yeso kananine.” Mai atibodi ati namaroni.
25Mai atibodi ati‑ya Yeso wato, mai‑ya hiyare,
“Hidi webote, hika mai dama mai ibi bisiniya, hidi webote kiti fawanebonane. Sidadi ohare‑ka mai ibi toka toweya, mai nafi wadamaraboneni. Tabora ohare‑ka mai ibi toka toweya, mai nafi wadamaraboneni.
26Satanasi hini hika mai‑ya kananihi‑mana, kitamare nane.
27Beosibo ene madi towe mai kana·onihemone, dai ati na, dai one madi towe mai‑ya mai kanana, ebeni‑ke ene tohati? Satanasi ene amane, dai ati niya, dai one dai‑ya mai weenaboneni.
28Deoso‑ka Doni ati ene madi towe mai kana·onihe, dai ati na, Deoso ai nafi‑ka hidi kitabote tohawahebona dai‑ya sawine.
29 # 12:29 Ai owa kite, Satanasi tamine amane. Satanasi‑ya Yeso wati hawa toheya, madi towe mai‑ya Yeso kananine. Ai owa kite hini tabaro‑ya wai, yehe honene mai hiyabaterene. Ai owa kite‑ya wati dai toheya, yehe yadihikaneya, yehe honene hiyabatene.
30Owa‑ya mai nofara, owa‑ya mai kakoteni. Owa‑ya mai ati sawira,
‘Yeso‑ya dai sawiriyahi.’ Mai ati teni.
31Owati dai mitahi. Dai ene towe toha, dai ati towe toha na, makobote Deoso ati dai nofawahiya, dai ene manakone Deoso haanamaterebonane. Deoso‑ka Doni‑ya dai weeniya, dai ene manakone fawateraboneni.
32Owa‑ya mai weeniya, makobote owati‑ya mai nofawaha, mai ihi manakone Deoso haanamarebonane. Deoso‑ka Doni‑ya mai weeniya, mai ihi manakone wada, mai manakone fawateraboneni.
33Awa ade amosa boni amosateni. Awa ade towe boni towe tohateni. Awa bono hini ade‑nima boniteni. Ai atibodi amosa, ai ene amosateni. Ai ene‑ya mai awiya, ai atibodi tamine‑ya mai wataboneni.
34Maka yokana‑nima dai nineni. Dai atibodi amosara, dai ene amosateraboneni. Ai atibodi ati‑nima ai ati yanateni.
35Mai atibodi ati towe tohiya, mai ati towe tohaboneni. Mai atibodi ati amosiya, mai ati amosaboneni.
36Ai nafi ene‑ya Deoso kadikeya, ai ati towe manakone‑ya daanebonane.
37Dai ati‑nima dai ati manakone wada, dai ati amosa hinama tohiya, dai sibaraboneni. Dai ati towe toha, wara hirini‑ya dai saweboneni.” Yeso ati nemarine.
Yona tamine‑ya Yeso hiyare
38Mose‑ka yama hani ati‑ya mai ka‑kamina mai toha, fariseo mai toha na, mai ati yanana,
“Naki, Deoso‑ka tihamone tina, neme‑ya tiwa ene kitabote oda awaboneni.” Mai ati namaroni.
39Mai‑ya hiyare,
“Towe dai amani. Deoso ati dai tokadabara, hiniya owa ene kitabote dai awabone dai ati na, dai ati‑nima oteraboneni. Yama dai awabone dai ati na, i‑di Yona ene‑mata‑nima yama na dai awabisahi.
40Hibati‑ya aba doro‑ya i‑di Yona foye, mahi, yama soki na 3 kane‑ya aba doro‑ya foye, aba saahinamematane. Fare‑nima onabone, hodi‑ya ofoyabone, mahi 3 kane‑ya okitamaboneni. Dai‑ka Ayo neme‑ke ama·oni.” Yeso ati nemarine.
41“Ai nafi ene‑ya Deoso kadikeya, Ninifa‑ya mai wi‑wina‑mete dai‑ya mai weenaboneni, owati‑ya dai nofararo. Ninifa‑ya mai wi‑wina i‑di Yona ati‑ya mai mita, mai ihi‑maro‑nima mai ihi namarameteni. Yona kiti bi‑bidi nemata, dai‑ya da‑daba kiti nafibisane. Owa ene dai nofara dai ene towe manakone nafeboneni.
42Ai nafi ene‑ya Deoso kadikeya, bato‑kaya mai wi‑wina‑mete mai‑ka hidi fana dai‑ya weenaboneni. Hibati‑ya Saromaho hasineya, yama yaki‑ya kakemeteni, Saromaho ati‑ya mitabonehe. Saromaho yama‑ya wato bi‑bidi nematane. Dai‑ya da‑daba yama‑ya watobisane.
43Madi towe ai owa‑ya sawimari, tokawahe, tabora one‑ya sibane, tabora one‑ya wasi awire,
44hini‑ya hiyare,
‘Hibati‑ya osawimaro‑kaya wini·onamaboneni.’ Madi towe ati ne,
fa‑fai‑ya kamatase, hibati‑ya sawimari‑ke doro honita tohe, madi towe sawire‑ya awe, doro amosawame‑ya awa ne,
45tokomatase, hika mai one 7 kana mai‑ya himanane, mai towe ba‑basi naro. Hini sa‑sawi‑kaya mai nafi sawiwahaboneni. Ai owa kiyani nafiwahebonane. Fara‑nima dai komene nafiwahaboneni.” Yeso ati nemarine.
Mariya, bidi mai eyehe koboneni
46Yeso mai‑ya hiyareya, sohori mai eyehe madi kobonamaroni, Yeso‑ya mai hiyarabonehe.
47“Yeso, tika ami, tika soho mai eyehe kobonani, tiwa‑ya mai hiyarabonehe. Yobe fowari‑ya mai nahani.” Mai‑ka owa ati nemarine.
48“Ebeni‑ka oka soho mai toha, ebeni‑ka okomi tohaniti? Oka soho mai dama, okomi mai damateni.” Yeso ati nemarine.
49Yeso‑ya oda da‑daba, oda‑ya yofikane,
“Okomi, oka soho dai nineni.
50Okobi neme‑ke ati‑nima mai niya, okomi mai toha, oka soho mai toha, oka asima mai toha, mai nineni.” Yeso ati nemarine.
Currently Selected:
Mateo 12: jaaNT
Highlight
Share
Copy
Want to have your highlights saved across all your devices? Sign up or sign in
