Roka 22
22
Yeso‑ya Yoda daanebona ati ne
1Ka‑kariwa koboni yanatona, fara‑ya baho femeto‑ya ketehera‑ya Yodeo mai kabateni.
2Deoso‑ka yama‑bone‑ya mai da‑daa mai‑ka hidi mai toha, Mose‑ka yama hani ati‑ya mai ka‑kamina mai toha, mai na, Yeso‑ya mai kako kofina, mai dama mai‑ya mai nayofina, mai dama mai noki beheri‑kaya Yeso‑ya mai nanahababone mai atibodi ati nameteni.
3Yeso‑ka mai 12 kana mai‑ka owa i‑di Yoda Isikari·oti atibodi‑ya Satanasi sawiwahene.
4Deoso‑ka yama‑bone‑ya mai da‑daa mai‑ka hidi mai toha, Deoso‑ka yobe‑ka sekorasa mai‑ka hidi mai toha na, mai‑ya Yoda toke, mai‑ya hiyarematane, Yeso‑ya kahabanebonaha.
5Yoda ati‑ya mai mita, mai ya‑yaina,
“Hehe, tika yinero‑ba oda daanaboneni.” Mai ati nameteni.
6“Sibarini, daa·onaboneni.” Yoda ati nematane.
Makobote Yoda toke,
“Mai damamari‑ya Yeso daa·onaboneni.” Yoda atibodi ati nematane.
Bofe‑kaya Yeso marini faina
7Ka‑kariwa yananiya, kaneiro bidi‑ya Yodeo mai tabasiteni. Ka‑kariwa yanana,
8i‑di Bedoro, i‑di Yowaho mai fama mai‑ya Yeso yose,
“Tabora‑ya dai towakiya, ai tefe‑ba dai hawa tohiyahi.” Yeso ati nematane.
9“Ebeni‑kaya ai tefe‑ba oda hawa tohiboneti?” Mai ati nameteni.
10“Tabora‑ya dai kobokaniya, maki owa faha‑ya diwakane‑ya dai awaboneni. Faha diwakane nowati‑ya dai towakamakiyahi.
11Yobe‑ya dai kobokaniya, yobe hidi dai hiyariya,
‘Ebeni‑kaya oka mai da‑daba mai eyehe otafibati? Ai‑ya ka‑kanawato ati nene.’ Dai ati niyahi.
12Hika yobe waari nemehe, neme‑ke kote honita tohe‑ya dai‑ya yofikanebonane. Yobe kote‑ya mesa kaware, fara‑ya ai tefe‑ba dai hawa tohiyahi.” Yeso ati nematane.
13Mai towaka, Yeso ati‑nima yama na‑ya mai awa, ka‑kariwa‑ka yamata‑bone‑ya mai aninameteni.
14Mai ta‑tafa‑ka ora koboneya, Yeso hika yo‑yose mai eyehe mesa‑ya mai nahoriwahameteni.
15Yeso mai‑ya hiyare,
“Owa‑ya mai nakamaki awisariya, dai eyehe ka‑kariwa‑ya otafa, yama amosineni.
16Deoso ai nafi‑ka hidi kitabote tohawahebona koboni awisareya, Ka‑kariwa one‑ya otafamateraboneni. Ka‑kariwa ai abamarabone tamine amani.” Yeso ati nematane.
17Keneko‑ya fino‑ya Yeso damakane, Deoso‑ya hiyare, keneko‑ya mai‑ya daakanematane.
“Dai nafi hifihi.” Yeso ati nematane.
18“Owati dai mitahi. Deoso ai nafi‑ka hidi kitabote tohawahebona yanani awisareya, awa bono fahi ofimateraboneni. Deoso ai nafi‑ka hidi kitabote tohawahe‑ya ofimatasaboneni.” Yeso ati nematane.
19Baho‑ya Yeso damane, Deoso‑ya hiyare, baho‑ya bakanakose, hika mai da‑daba mai‑ya baho‑ya daane, ati yanane,
“Dai kabahi, owa abano tamine‑bone amani. O·ababone, dai manakone onahababoneni. Ka‑kariwa‑ka baho‑ya dai kabiya, owa tamine dai kadikiyahi.” Yeso ati nematane.
20Mai tafi hawa toha, fino‑ya mai‑ya Yeso daakanamatasane.
“Owa emene tamine‑bone amani. Owa emene tokabone, o·ababone, dai ene manakone onahababoneni.
21Owa‑ya dai‑ka owa daanebona, ai tafa ai‑ya dabane.
22Hibati‑ya Deoso ati‑mata‑nima dai‑ka Ayo neme‑ke abebonane. Owa‑ya kahabane‑ka yama manakone wadaboneni. Ka! Hini ene manakone nafibonane.” Yeso ati nematane.
23“Ai owa Yeso‑ya daanebona, ebeni‑ke tohati?” Mai ibi hiyara, mai ati nameteni.
24Mai‑ka owa ba‑basi ne tamine‑ya mai hiyara, mai ibi weenameteni.
25Yeso mai‑ya hiyare,
“Bara mai‑ka hidi webote mai‑ya mai yoseteni.
‘Mai dama mai‑ya ka‑kasoma ama·oni.’ Mai ati na hiniya mai dama mai‑ya mai yosebisateni.
26Mai‑nima dai riyahi. Mai‑ka hidi dai toha mai‑ya dai yoseriyahi. Mai‑ya dai kasomabisahi.
27Dai‑ka hidi mai one‑ya dai kasomateni. Dai‑ka hidi ama·oni. Hiniya dai‑ya okasomabisani. Owa ene‑nima dai ene nahi.
28Kabani‑ya owa amoni dama, owa‑ya mai weeni kofina, owa‑ya dai dabanasa na, owati‑ya dai nofasa nineni.
29Okobi ati ene dai nafi‑ka hidi kitabote ohawahaboneni. Okobi ene‑nima owa ene nebona, owati ihi
30hidi‑ka kadera amosa‑ya dai nahoreboneni. Isara·eo‑ka nodi mai ihi‑ya dai kadikiya, mai ihi‑nima mai ihi manakone na dai daanaboneni.” Yeso ati nematane.
31Bedoro‑ya Yeso hiyare,
“Simaho, Simaho owati timitahi. Deoso‑ya dai tamine‑ya Satanasi hiyare, dai‑ya keyehebona ati nane. Satanasi‑ya Deoso ati barirene.
32Deoso‑ya tiwa tamine ohiyarani, Deoso ati tinofasa tinabonehe. Owati tikadabamatasiya, mai one tikasomiyahi. Owati‑ya mai tokadabawahaboneni.” Yeso ati nematane.
33“Ayo, ai‑ya mai watikimiya, ai‑ya mai barikaniya, ai‑ya mai nanahabiya, yama sibarini, tiwa‑ya ofamanasa onaboneni.” Bedoro ati nematane.
34 # 22:34 Arakawa haani, ora tamine tohe awane. Hibati‑ya mai‑ka herosa wadare, sidadi webote‑ya maki ohari ora‑ya midikana, yama soki bai‑ya, mahi nokorise‑ya ho‑hori‑ya haana, yama wahi yanatoni‑ya ho‑hori‑ya haanamatasatene. Fara yama wahi yanatoni‑ka ho‑hori tamine toha awini. “Bedoro owati timitahi. Arakawa haani awisareya,
‘Yeso owatorini.’ Tinaboneni.
Tiwati yanani 3 kana boneni.” Yeso ati nematane.
35Yeso mai‑ya hiyare,
“Hibati‑ya dai oyosemaro, yinero dai mookanirihi, yamasi dai weyerihi, sanidariya owa dai weyekarihi, hawi‑ya dai‑ka yama one hasiramete awineni?” Yeso ati nematane.
“Hawi‑ya yama one hasiramaroni.” Mai ati nameteni.
36“Hibayata, dai‑ka yinero tohe, dai‑ka yinero dai mookanihi. Dai‑ka yamasi dai weye nahi. Dai‑ka yima wadara, dai‑ka bora one dai daaniya, yima‑ya dai kanikiyahi.
37Deoso ati‑mata‑nima yama naboneni.
‘—Towe mai‑ka owa amane.— Mai ati naboneni.’ Deoso‑ka yama hani ati na,
owa tamine amani. Ati‑nima yananaboneni.” Yeso ati nematane.
38“Ayo, oda‑ka yima famani.” Mai ati nameteni.
“Hehe, sibarini.” Yeso ati nematane.
Orifera adami‑ya Deoso‑ya Yeso hiyare
39Orifera adami‑ya mai amoteni. Fara‑ya Yeso, hika mai da‑daba mai eyehe tokematane.
40Mai kobona, Yeso ati yanane,
“Deoso‑ya dai hiyarahi, Satanasi ati‑ya dai tokadabarabonehe.” Ati nematane.
41Ahiyata‑ya toke, yobati‑kaya itarise, Deoso‑ya hiyare,
42“Abi, yama towe yananabone, yama kobonabone onofarini. Owati‑nima yama riyahi. Hini tiwati‑nima yama nibisiyahi.” Yeso ati nematane.
43Deoso‑ka yo‑yose neme‑ke fodoki, Yeso‑ya nakitamematane.
44Deoso‑ya Yeso hiyare, atibodi komene kitawahe, tanakori ama‑nima na wami‑ya sonameteni.
45Deoso‑ya Yeso hiyari hawa tohe, kamatase, mai amonameteni. Mai atibodi yawa, mai‑ka nokobisa nafemeteni.
46“Dai amoriyahi. Dai dodafihi. Deoso‑ya dai hiyarahi, Satanasi ati‑ya dai tokadabarabonehe.” Yeso ati nematane.
Yeso‑ya mai waratona
47Yeso hiyareya, mai dama mai kamakemeteni. Yeso‑ka mai 12 kana mai‑ka owa i‑di Yoda dainimaki, Yeso‑ya kakimatane, Yeso‑ya tomanebonaha.
48“Tika Ayo neme‑ke tikahabanabone, owa‑ya tomatineni?” Yeso ati nematane.
49Yeso‑ya mai watabone mai‑ya mai awa, mai ati yanana,
“Ayo, yima‑ya mai oda kaanaribaraniha?” Mai ati nameteni.
50Deoso‑ka yama‑bone‑ya mai da‑daa mai‑ka hidi webote‑ya na‑narifa sawi, Yeso‑ya mai da‑daba mai‑ka owa fai narabo kanika‑ya tarinabasematane.
51“Mai dai arabanahi.” Yeso ati nematane.
Yeso kamaki, maki narabo‑ya boyone, narabo waanamatasematane.
52Deoso‑ka yama‑bone‑ya mai da‑daa mai‑ka hidi mai toha, Deoso‑ka yobe‑ka sekorasa mai‑ka hidi mai toha, Yodeo mai‑ka hidi mai bi‑bidi na mai toha, mai na, mai‑ya hiyare,
“Yima‑ya dai aka, awa‑ya dai aka nineni, owa‑ya dai watabonehe. Yama‑ya mai bo‑boti mai wati‑nima owa‑ya dai watinineni. Yama bo‑boti ohi awirini.
53Hibati‑ya mahi‑nima Deoso‑ka yobe‑ya osawe, owa‑ya dai wataramaroni. Hibayata Deoso dai‑ya ati barire, yama towe‑ka hidi‑ya Deoso ati baririhi nane.” Yeso ati nematane.
54Yeso‑ya mai wata, Deoso‑ka yama‑bone‑ya mai da‑daa mai‑ka hidi webote tabaro‑ya Yeso‑ya mai towakamameteni. Yama yaki‑ya Bedoro yotomatane.
55Yobe fowari barikane doro‑ya yifo‑ya mai afokana, yifo‑ya mai hiwana mai naha, mai‑ya Bedoro sawimakimatane.
56Yobe hidi‑ya na‑narifa one waare, Bedoro‑ya awa, Bedoro‑ya kiina, ati yanana,
“Yeso‑ya mai da‑daba mai‑ka owa amane.” Ati nameteni.
57“Yeso owatorini.” Bedoro ati nematane.
58Makobote Bedoro‑ya mai‑ka owa awe,
“Maki‑ka amatiraniha?” Ati nematane.
“Maki‑ka ohi awirini.” Bedoro ati nematane.
59Ora oharimaki‑ya Bedoro tamine‑ya maki owa hiyare,
“Yeso‑ya sa‑sawi amane. Karireya‑ya mai wi‑wina mai‑ka owa amane.” Ati nematane.
60“Tiwati owatorini.” Bedoro ati nematane.
Bedoro hiyareya, arakawa haanawahematane.
61Yeso kiinawame, Bedoro‑ya kakatome, Yeso ati‑ya Bedoro atibodi watinawame,
“Arakawa haani awisareya,
‘Yeso owatorini.’ Tinaboneni.
Tiwati yanani 3 kana boneni.” Yeso ati ne,
ati‑ya Bedoro atibodi watinawame,
62toke, ohini kitawahematane.
Yeso‑ya mai bisina
63Yeso‑ya sekorasa mai bisina, Yeso‑ya mai hahakanameteni.
64Yeso noko‑ya mai barikana, noko mai batahiri.
“Yama nafi tiwata, ebeni‑ke tiwa‑ya koonisa?” Mai ati nameteni.
65Yeso‑ya mai weeni damamakemeteni.
66Yama wahabisari‑ya mai‑ka hidi mai dama mai yorotokana, Deoso‑ka yama‑bone‑ya mai da‑daa mai‑ka hidi mai sawi, Mose‑ka yama hani ati‑ya mai ka‑kamina mai sawi na, mai ati ihi Yeso‑ya mai kakamameteni. Makobote hidi owa ati yanane,
67“Deoso‑ka Ka‑kadika amatini, tiwati yananahi, oda mitabonehe.” Ati nematane.
“Owati yananiya, owati‑ya dai nofarabone,
68dai haa·oniya, dai ati yanaraboneni.
69Owati dai mitahi. Deoso mano kanika‑ya dai‑ka Ayo neme‑ke itariwahebonane.” Yeso ati nematane.
70“Deoso Bidi amatiraniha?” Mai ati na,
“Hehe, tiwati‑nima, fara ama·oni.” Yeso ati nematane.
71“Ati ai miti hawa tohe, mai one ati ai mitamakiriyahi.” Mai ati nameteni.
Currently Selected:
Roka 22: jaaNT
Highlight
Share
Copy
Want to have your highlights saved across all your devices? Sign up or sign in
