Yowaho 13
13
Bofe‑kaya Yeso marini faina
1Yeso bofe‑ya sawimarebona, Badi‑ya tokoma kanibote nebona, hini tamine‑ya watomarine. Bofe‑ya oda wi‑wina Yeso‑ka oda toha, oda‑ya Yeso nofemari, oda‑ya nofi fawaterene. Ka‑kariwa‑ya oda marinabone, oda tafi yanatonamaroni.
2Simaho Isikari·oti bidi i‑di Yoda, Diaboro ati ene Yeso‑ya daanebona, atibodi hawa tohe, mesa‑ya oda nahori hawa tohamaroni.
3“Okobi ati ene yama nafi‑ka hidi ama·oni. Deoso‑ya yana·onamaro, okoma kanibote onaboneni.” Yeso atibodi ati nemarine.
4Oda tafiya, Yeso waamise, bora neme‑ya taninise, towaya‑ya idi, dosi‑ya sokinakimarine.
5Faha wiye‑ya faha‑ya soronise, oda teme‑ya sokone, towaya‑ya oda teme‑ya tamonemarine.
6Simaho Bedoro teme‑ya sokonebona,
“Ayo, owa teme sokotibana?” Bedoro ati ne,
7“Hehe, soko·onaboneni. Owa ene tiwatora, yama one‑ya owa ene tiwatowahaboneni.” Yeso ati nemarine.
8“Owa teme sokotiraboneni.” Bedoro ati ne,
“Tiwa teme soko·oriya, oka tiharaboneni.” Yeso ati nemarine.
9“Se, Ayo, owa teme, owa yehe, owa tati na sokotinahi.” Simaho Bedoro ati nemarine.
10“Ai afini hawa toha, ai‑ka yobe‑ya ai kama, ai teme ai sokokawama, ai afinamarani. Dai atibodi amosi hawa toha, dai‑ka owa atibodi amosi awirane.” Yeso ati nemarine.
11Yoda ene‑bona‑ya wato, fare oda owa atibodi amosi awire tamine‑ya kaminemarine.
12Oda teme‑ya sokoni hawa tohe, bora neme‑ya weyename, hini fori‑kaya toforime,
“Dai teme soko·ona, owa ene dai watoneni?
13Owa‑ya dai ayo nineni. Dai‑ya ka‑kanawato owa‑mone dai ati na, dai ati‑nima oneni.
14Dai‑ya okanawata, dai‑ka Ayo ama·oni. Dai teme soko·oni‑nima dai ibi teme sokoniyahi.
15Owa ene‑nima dai ene niyahi.
16Owati amosabote dai mitahi. Ai‑ka hidi ati kitabise, ai ati kiti bi‑bidi teni. Ai‑ya yose ati kitabise, ai ati kiti bi‑bidi teni.
17Owati dai watoya, dai tokadabiya, dai ya‑yainaboneni.
18Dai nafi tamine ohiyari awirini. Dai‑ya okayawa, dai owatoni. Deoso‑ka yama hani ati‑nima yama naboneni.
‘Owa tefe‑ya ka‑kaba owa‑ya kahabanebonane.’ Yama hani ati nineni.
19Owa‑ya daani awisareya, tamine okamine, owa‑ya daaneya, owa‑ya dai watowahaboneni. Deoso‑ka Ka‑kadika ama·oni, owati dai nofaboneni.
20Owati amosabote dai mitahi. Hiyose ati mai hinofeya, owati‑ya mai nofahariteni. Owati‑ya mai nofiya, owa‑ya yose‑mari ati‑ya mai nofahariteni.” Yeso ati nemarine.
21Hiyari hawa tohe, atibodi a‑arire, ati yananamatase,
“Owati amosabote dai mitahi. Owa‑ya dai‑ka owa daanebonane.” Ati nemarine.
22Yeso ati oda mita, oda ibi noko awa,
“Ka! Ebeni‑ke tohabati? Yeso‑ya daanebonaha.” Oda atibodi ati namaroni.
23Yeso‑ka no‑nofa ama·oni. Yeso yowi‑ya oforemaroni.
24Owa‑ya Simaho Bedoro yehe haane,
“Yeso haatinahi
‘Ebeni‑ke tiwa‑ya daanabati?’ Tinahi.” Bedoro ati nemarine.
25Yeso bako‑kaya oforiwite, Yeso ohiyara,
“Ayo, ebeni‑ke tiwa‑ya daanabati?” Onamaroni.
26“Baho kote daba·okaniya, fare‑ya baho daa·onaboneni.” Yeso ati nemarine.
Baho kote‑ya dabatokane, Simaho Isikari·oti bidi, i‑di Yoda‑ya baho‑ya daanemarine.
27Baho‑ya Yoda waratoneya, atibodi‑ya Satanasi sawiwahemarine.
“Yoda, tiwa ene‑bone toha kanibote nahi.” Yeso ati nemarine.
28Oda sookare Yeso ati oda watoramaroni.
29Yoda oda‑ka yinero‑ya da‑dama ene oda one atibodi yama‑ya dika,
“Oda mariniba‑ka yamata‑ya kanikeba awane. Yamata mai kihara mai‑ka yinero‑bona‑ya daaneba awane.” Oda one atibodi ati namaroni.
30Baho‑ya Yoda damane, tokemarine, yama soki‑ya.
31Yoda nowati‑ya Yeso ati yanane,
“Hibayata dai‑ka Ayo neme‑ke ene amosabote‑ya mai awawahaboneni. Owa ene Deoso‑ya mai kahiyari ba‑basi naboneni.
32Owa ene Deoso‑ya mai kahiyari ba‑basi niya, Okobi ene owa‑ya mai kahiyari ba‑basi nahareboneni. Okobi ene toha kanibote nebonane.
33Oka dao mai‑nima dai na, dai‑ya owa sawi nafimaraboneni. Owa‑ya dai sibanaboneni. Dai‑ka hidi mai ohiyarimaro‑nima dai ohiyarineni. Okomiya, dai tokomaki awiraboneni.
34Owati dai mitahi. Dai ibi nofiyahi. Dai onofi‑nima dai ibi nofiyahi.
35Dai ibi nofiya, oka dai toha dai‑ya mai nafi watowahaboneni.” Yeso ati nemarine.
36“Ayo, ebeni‑kaya tikiboneti?” Simaho Bedoro ati ne,
“Oki‑kaya tikamaki kanibote tini awiraboneni. Yama one‑ya tikamakiteboneni.” Yeso ati nemarine.
37“Ayo owati tokomaki kanibote nineni. Tiwa‑ya okasoma ihi o·abi‑ya yama sibaraboneni.” Bedoro ati nemarine.
38 # 13:38 Arakawa haani, ora tamine tohe awane. Hibati‑ya mai‑ka herosa wadare, sidadi webote‑ya maki ohari ora‑ya midikane, yama soki bai‑ya, mahi nokorise‑ya ho‑hori‑ya haane, yama wahi yanatoni‑ya ho‑hori‑ya haanamatasatene. Fara yama wahi yanatoni‑ka ho‑hori tamine amani. “Owa tikasoma ihi ti·abiya, yama sibarabone tina, owati amosabote timitahi. Arakawa haani awisareya, owa‑ya tiwatoramone tinabone, tiwati yanani 3 kana boneni.” Yeso ati nemarine.
Currently Selected:
Yowaho 13: jaaNT
Highlight
Share
Copy
Want to have your highlights saved across all your devices? Sign up or sign in
