Yeso‑ka yo‑yose mai tamine 25

I‑di Fesito Baoro ati‑ya mitawahe

1I‑di Fesito kofenado tohawahe, Sesareya‑ya winawahe, amoni fama, amoni oharimaki ne‑ya Yerosare‑ya tokatemakine.

2Yerosare‑ya Deoso‑ka yama‑bone‑ya mai da‑daa mai‑ka hidi mai toha, Yodeo mai‑ka hidi mai toha na, Fesito‑ya mai hiyara,

“Baoro ati kasirone.

3Yerosare‑kaya mai hiwakamaho.” Mai ati na.

“Mai hiwakameya, ai kemoya, ai nanahabebane.” Mai atibodi ati na.

4Mai ati‑ya Fesito mite,

“Baoro Sesareya‑ya winebonane. Owa amoni fa‑famaraba niya, okomakeboneni.

5Owa‑ya dai‑ka hidi mai sawihi. Baoro ati kasiromona dai ati na, aka‑ya mai ati omitabani.” Fesito ati nemonane.

6Yerosare‑ya ai yehe kafama‑nima amoni ne, Sesareya‑ya tokomaki, amoni oharimaki‑ya sodado‑ya yosene, Baoro‑ya Sodado kakamebonaha.

7Baoro kobone, Yodeo Yerosare‑ya mai kama, mai yorotokana, Baoro tamine‑ya mai hiyara,

“Baoro ati kasiro, ene amosare, Mose ati tamine‑ya mai‑ya keyehe‑ya hiri kitine.” Mai ati na.

“Mai ati‑nima Baoro ene tohare awane, yama owato awirini.” Fesito atibodi ati ne.

8Baoro ati yanane,

“Owa ene amosa, Mose ati‑nima oteni. Deoso‑ka yobe bisa·oniterani. Ai nafi‑ka hidi i‑di Sesa tamine‑ya keyehe‑ya hiri·oterani. Owa ene amosabisineni.” Baoro ati nane.

9Yodeo mai‑ya Fesito ya‑yainihibona, Baoro‑ya hiyare,

“Yerosare‑ya ai towakamabone ona, tiwati sibakarini? Yerosare‑ya tiwati omitamatasiya, yama owatowahaba awineni.” Ati nane.

10Baoro ati yanane,

“Homano ama·oni. Homano ai toha, ai ene‑ya Sesa‑ka mai kadikateni. Sesa‑ka amatini. Yodeo mai‑ya owa ene towe tohara tiwatoneni.

11Owa ene towe toha‑mone tina, owa ene owa tinahababone tina, owa tinahabahi. Sibaraboneni. Mai ati‑nima owa ene tohara, fara mai‑ya owa daatiteraboneni. I‑di Sesa‑ya owati tokabisineni.” Baoro ati nane.

12I‑di Fesito hika mai‑ya hiyare,

“Hini yamata‑nima obati?” Ati ne.

Baoro‑ya hiyare,

“Sesa‑ya tiwati toka, tiwa oyosebani.” Fesito ati nane.

Akiriba hika asima‑ya fame‑ya Baoro hiyarane.

13Makobote Sesareya‑ya mai‑ka hidi i‑di Akiriba, hika asima i‑di Berenisi eyehe kobonane, Fesito‑ya hiyarebonaha.

14Sesareya‑ya mai amoni dami‑ya mai‑ka hidi i‑di Akiriba‑ya Baoro tamine‑ya Fesito hiyarawahe,

“Hibati‑ya i‑di Feri wineya, ai sokine wai, Feri seehikani awire, hini ati ene sokikane waasa nane.

15Yerosare‑ya oka, Yodeo owa‑ya mai haanani, Baoro onahababonehe. Deoso‑ka yama‑bone‑ya mai da‑daa mai‑ka hidi mai toha, mai‑ka bote mai toha, mai na, owa‑ya mai haanani.

16Hiniya ai one‑ya ai nanahabaterani. Mai ibi kako kofina, mai ibi hiyara, mai ati‑ya ai mita teni. Mai ati ai mitiya, yama nafi ai watoteni. Homano ai ati teni. Yama nafi‑ya ai wata, mai ihi towe toha, mai aba, mai ihi towe tohara mai abarihi teni.

17Owa‑ya mai sa‑sawi ahi‑ya oda kobona, oda amoni ohari‑ya Baoro‑ya haa·onani, ati omitebonaha.

18Baoro‑ya mai kako kofina, mai ati omita, Baoro ene towe‑mona mai ati na, ene bare‑ta tamine‑ya mai kaminabisa, ene towe yokana tamine mai kamini awirani.

19Hiniya ai owa abe tamine‑ya mai hiyara, mai ibi weenineni. Yeso abe, kitamemona Baoro ati ne, ati ene Baoro‑ya mai kako kofinineni.

20Mai ati owatora, i‑di Baoro‑ya ohiyara,

‘Yerosare‑ya ai tokahi. Tiwa tamine‑ya mai kaminiya, tiwa tamine owatowahaboneni.’ Onani.

21Yerosare‑ya Baoro ati toki nofare, Sesa Akosito‑kaya tokabisebona ati ne. Ati ene Sesa‑kaya oyosebona, sokikane waasa nane.” Fesito ati ne.

22“Fesito, maki ati miti onofini.” Akiriba ati ne.

“Yama wahabisari‑ya ati timitaminebane.” Fesito ati nane.

Akiriba‑ya Baoro hiyarane

23Yama wahabisari‑ya Akiriba Berenisi‑ya fame mai‑ka bora amosabote‑ya mai sakona, yobe webote‑ya mai demenarineni. Sodado mai‑ka hidi, yara bote mai toha na, mai eyehe mai nahoneni. Fesito ati ene i‑di Baoro‑ya mai kakamakineni.

24Akiriba mai‑ya i‑di Fesito hiyare,

“Hidi Akiriba, dai nafi na, owati dai mitahi. Baoro dai awahi. Yodeo mai dama owa‑ya mai weena, Baoro‑ya onahababone mai ati nani. Yerosare‑ya mai wi‑wina mai ati toha, ahi‑kaya mai kama, mai ati toha, mai na, Baoro onahababone mai ati nani.

25Ene sibarene, haa‑nima ai ene na, i‑di Sesa nanahabaterene. Sesa Akosito‑ya tokebona ati ne, Homa‑ya oyosebonane.

26Sokikane Sesa‑ya tokebona, mai ihi towe tamine ai kanahanoteni. Baoro sokikane Sesa‑ya tokebona, hini yamata ihi tamine ai kanahanobati? Tamine owato awire, dai nafi‑ya owakamane, ati dai mitebonaha. Hidi Akiriba, ati timiteya, yama ai kanahano‑ya owataba awineni.

27Sokikane ai yose, mai ihi tamine ai kanahano awiriya, yama ati kasiraboneni.” Fesito ati nemonane.

Currently Selected:

Yeso‑ka yo‑yose mai tamine 25: jaaNT

Highlight

Copy