Yeso‑ka yo‑yose mai tamine 17

Tesaronika‑ya Baoro mai‑ya hiyarane

1Afibori‑ka mai tabori‑ya Baoro mai fiyakana, Aboroniya‑ka mai tabori‑ya mai fiyakana na, mai toka, Tesaronika‑ka mai tabori‑ya mai kobona, Tesaronika‑ya Yodeo mai hi‑hiyara‑ke yobe owa tohane.

2Fare yobe‑ya Baoro tokane, mai‑ya hiyarebonaha. Sabado‑ya Yodeo mai hi‑hiyara‑ke yobe‑ya Baoro tokatene. Sabado fama Sabado one ohari na‑ya mai‑ya hiyare, Deoso‑ka yama hani tamine‑ya hiyarane.

3“‘Kirisito mai bisihineya, mai hinahabeya, kitamebonane.’ Deoso‑ka yama hani ati nineni.

Yeso ai‑ka Kirisito tohe, Yeso tamine‑ya dai‑ya ohiyarateni.” Ati ne.

4Baoro ati‑ya Yodeo mai one nofa, Baoro‑ya mai sawimake, Kereko mai dama Baoro ati‑ya mai nofa, mai fanawi hidi toha, Baoro ati‑ya mai nofa na, Baoro, Sira mai fama mai‑ya mai sawimakemoneni.

5Yodeo mai one Baoro ati‑ya mai mita, mai yawa, mai ihi amosara mai tabori‑ya mai toka, mai‑ya mai himana, mai dami yorotokana, Yasoho‑ka yobe‑ya mai toka, mai yakana, mai ati kitineni, Baoro mai‑ya mai watabonehe. Yasoho‑ka yobe‑ya mai kobona, mai tokiyomani, Baoro, Sira mai fama mai‑ya mai watiya, mai‑ya mai daahinabonehe.

6Baoro mai‑ya mai wasira, Yasoho toha, Yeso‑ka mai one toha na, mai‑ya mai waratona, sidadi hidi mai‑ya mai daaneni. Mai ati kita,

“Baoro, Sira mai fama ai tabaro dami‑ya mai toka, mai ihi amosara hinama toha, hibayata ai tabaro‑ya mai koboneni.

7Yasoho‑ka yobe‑ya mai winawaha, ai‑ka hidi webote i‑di Sesa ati‑ya mai nofara, mai‑ka hidi webote oni Yeso tohemona Baoro mai ati teni.” Mai ati namoneni.

8Mai ati‑ya mai nafi mita, mai yawa, mai‑ka hidi mai toha na, mai nafi ati kitawahamoneni.

9Yasoho mai‑ka yinero‑ya sidadi‑ka hidi kayafe, yinero‑ya mai manakone‑ya mai nanahaba, hini mai tabori‑ya mai tokomamoneni.

Bereya‑ya Baoro, Sira mai towaka

10Yama soki‑ya Yeso ati‑ya mai no‑nofa Baoro, Sira mai fama mai‑ya mai yose,

“Bereya‑ya dai towakahi.” Mai ati na.

Mai ati ihi Bereya‑ya mai towaka, mai kobokana, Yodeo mai hi‑hiyara‑ke yobe‑ya mai towakiyomineni, mai‑ya mai hiyarabonehe.

11Tesaronika‑ka mai narabi hawi bi‑bidi na, Bereya‑ka mai narabi hawi ba‑basi na, Baoro ati‑ya mai mita, mahi‑nima Deoso ati‑ya mai kadika, Deoso ati‑nima Baoro ati amane, mai awa, ati mai nofawahamoneni.

12Yodeo mai dama mai toha, Kereko mai‑ka hidi fana mai toha, makidi mai toha na, Yeso ati‑ya mai nofawahamoneni.

13Bereya‑ya Deoso tamine‑ya Baoro kamine, tamine‑ya Tesaronika‑ka Yodeo mai mita, mai yawamatasa, Bereya‑ya mai toka, Baoro tamine‑ya keyehe‑ya mai hirina, mai nafi yorotokana, mai ati kitawahamoneni.

14Yeso ati‑ya mai no‑nofa Baoro‑ya mai yose,

“Faha webote widi‑ya toka kanibote tinahi.” Mai ati na.

Bereya‑ya i‑di Sira, i‑di Timoti mai fama mai demetonakosa, faha webote widi‑ya Baoro tokabisemonane.

15Bereya‑ka mai one Baoro‑ya sawe, Atena‑kaya mai towaka, Atena‑ya mai kobona, Baoro‑ta towitakose, mai winikanamabone, mai‑ya Baoro hiyare,

“Dai kobotokanamiya, i‑di Sira, Timoti mai fama, mai dai yosemiya, mai kakama kanibote niyahi.” Baoro ati nemonane.

Atena‑ya Baoro wine

16Atena‑ya Baoro wine, Sira, Timoti mai‑ya nimane. Atena‑ka mai‑ka deoso bara mai dama, mai‑ya i‑di Baoro awe, yawemonane. Mai‑ka deoso yokana tohi awire, deoso yati wamani hinama tohani.

17Mahi‑nima Deoso yokana tamine‑ya mai‑ya hiyaranadi, mai‑ka tabora bai‑ya mai yorotokana, mai‑ya hiyare, Sabado‑ya Yodeo mai toha, Deoso ati‑ya mai no‑nofa mai toha na, Deoso‑ya Yodeo mai hi‑hiyara‑ke yobe‑ya mai yorotokana, mai‑ya hiyaremonane.

18Ebekoriyo mai toha, Esitoiko mai toha na, Baoro‑ya mai hiyara, Deoso tamine‑ya mai ibi hiyara,

“Baoro yama‑ya watore, hini yamata‑nima ati nati?” Mai one ati na.

“Mai one‑ka deoso tamine‑ya hiyare awane.” Mai one ati na.

Yeso abe, kitame ene ai kitamaharebone tamine‑ya Baoro hiyarane. Ai kitamabone tamine‑ya mai mita, yama‑ya mai watorani.

19“Are·obako‑ya ai tokomahi. Tiwati oda mitaboneni.” Mai ati na.

Baoro‑ya mai towakama,

“Tiwati oda mitatera, oda mitawahaboneni.

20Haa‑nima mai ati na, oda mitatera, tiwati oda mita, oda mitamatasiya, oda watowahaba awineni.” Mai ati na.

21Atena‑ka mai toha, Atena‑ya mai one wi‑wina yama anini‑ya mai nofara,

“Hiniya mai ati ai mitiya, yama ai watowahaboneni.” Mai ati na.

Yama bara tamine‑ya mai hiyaranaditeni.

22Are·obako‑ya mai naha, mai noki‑ya Baoro waamise, mai‑ya hiyare,

“Owati dai mitahi, deoso mai dama mai dai nofa,

23Dai tabaro‑ya yaka·ona, dai‑ka deoso yati wamani‑ya kii·ona, yati wamani one‑ya oawani. Yati wamani one‑ya yama hani okadika,

‘Deoso owa oni oda watorani.’ Yama hani ati nani.

Fara amani. Deoso oni dai watore, tamine ohiyarawahineni. Hibati‑ya hika yama‑bone dai daana, tamine‑ya dai watowahaboneni.

24Hibati‑ya yama nafi‑ya Deoso wama, wami‑ya wama, neme‑ya wama nematane. Yama nafi‑ka hidi tohe, yobe‑ya ai wamana‑ya winaterene.

25Ai‑ka yama‑ya kayafaterene. Yama nafi Deoso‑ka toha, Deoso ai‑ya wamane ene ai nafi hasi, Deoso ene yama nafi tohani.

26Ai ohari‑ya wamanemata, makobote hika nodi ai toha ai dodamawaha, bofe nafi‑nima ai nawaawaha, ai wini‑bone‑ya wato, ai tabaro‑bone‑ya hawa tonihi nematane. Dai tamine Deoso hiyare,

27‘Owa‑ya mai sibana, owa‑ya mai wasiya, owati‑ya mai nofiya, owa‑ya mai watowahaboneni.’ Ati ne, ai yakari‑ya tohane.

28Deoso ene ai hasina, ai toka, ai winateni. Deoso awire‑mana, ai hasira neni, ai aba neni.

‘Deoso bidi ai amani.’ Dai owa ati ne.

Fara amani. Deoso bidi ai amani.

29Deoso bidi ai toha, ai‑ka Abi oro wamani toharihi, barata wamani toharihi, yati wamani toharihi tene. Ai‑ka Abi ai wamaterene.

30Hibati‑ya Deoso yokana ai watore, ai‑ya weeni awire, hibayata ai watowahe,

‘Hibati‑ya dai ene towe tohamaro, dai‑ya dai kaminahi.’ Deoso ati nane.

31Yeso ai ene‑ya kadikebona‑ke mahi‑ya Deoso wato, hibati‑ya Yeso‑ya kadikemata, Deoso ati‑mata‑nima yama nabone ai wato, Yeso‑ya nakitamebona ati nemata, Yeso‑ya nakitamane.” Baoro ati nemonane.

32Yeso abe kitame, tamine‑ya mai mita, Baoro‑ya mai one hahakana,

“Mahi owa‑ya tiwati oda mitamatasaboneni.” Mai one ati na.

33Mai ati ihi Baoro tokome,

34Baoro ati‑ya mai nofa, Baoro‑ya mai sawi, Are·obako‑ka mai‑ka owa i‑di Dionisiyo toha, fana i‑di Damari toha, mai one fa‑famaraba na toha, Baoro‑ya mai sawi, Yeso ati‑ya mai nofawahani.

Currently Selected:

Yeso‑ka yo‑yose mai tamine 17: jaaNT

Highlight

Copy