Yeso‑ka yo‑yose mai tamine 15
15
Yerosare‑ya Bara mai tamine mai hiyarineni
1Yodeya‑ya mai wi‑wina Atioki‑ya mai toka, Kirisito‑ka mai‑ya mai kanawata,
“Mose ati‑nima dai sowiri tati ataro abahi. Dai sowiri tati ataro abi awiriya, Deoso dai‑ya ati somawamaterebonane.” Mai ati namoneni.
2I‑di Baoro, i‑di Banabe mai fama mai‑ya mai weena,
“Yama dai watora, dai ati fawanahi. Yodeo mai toha, mai sowiri tati atori aba sibarihi, Bara mai sowiri tati atori abara sibarihi nineni.” Baoro mai ati na.
“Yama dai watora, Mose ati‑ya mai tokadabara, mai sowiri tati atori‑ya mai nanahabi awiriya, Deoso mai‑ya ati somawami awirebonane.” Yodeya‑ya mai kama, mai ati na,
mai ibi weenademoneni. Mai ibi weena mai ihi Baoro mai‑ya Kirisito‑ka mai yose,
“Baoro, Banabe, Yerosare‑ya dai tokahi. Oda‑ka mai one dai‑ya mai dababone, Yeso‑ka yo‑yose mai toha, Kirisito‑ka bote mai toha na, mai ati dai mitahi. Fai‑ya tamine dai mita, yama ai watowahaboneni.” Kirisito‑ka mai ati namoneni.
3Mai mai hiyose, Fenisiya‑ya mai fiyakana, Samariya‑ya mai fiyakana, mai na, hini mai yakaniya, Bara mai tamine‑ya mai hiyara,
“Yeso ati‑ya Bara mai nofawahineni.” Mai ati na,
Yeso ati‑ya mai no‑nofa Baoro mai ati‑ya mai mita, mai ya‑yainamoneni.
4Yerosare‑ya mai kobona, Kirisito‑ka mai‑ya mai hiyara, Yeso‑ka yo‑yose mai toha, bote mai toha na, mai‑ya mai hiyara,
“Deoso oda‑ya kasome, oda ati ene Yeso ati‑ya Bara mai nofawahineni.” Mai ati na.
5Yeso ati‑ya mai no‑nofa, fariseo mai toha, mai one waamisa,
“Bara Yeso ati‑ya mai nofabone, Mose ati‑nima mai nahi. Mai sowiri tati atori abahi.” Mai ati namoneni.
6Yeso‑ka yo‑yose, bote mai‑ya mai yorotokanineni, Mose ati tamine‑ya mai hiyarabonehe.
7Mai dami hiyari hawa tohiya, Bedoro waamise,
“Soho, owati dai mitahi. Hibati‑ya Deoso owa‑ya yosemarine, Bara mai‑ya Yeso Ati Amosabote ohiyarabonehe. Bara owati‑ya mai mita, Yeso ati‑ya mai nofawaha, mai dai watoneni.
8Ai atibodi‑ya Deoso wato, Yeso ati‑ya mai nofawaha, Deoso‑ka Doni mai‑ya sawi, oda‑ya sawi‑nima mai‑ya sawiwahane.
9Deoso noko‑ka oda‑nima mai na, Yeso ati‑ya mai nofa, mai‑ya ati somawamane.
10I‑di Mose ati‑ya ai‑ka idi mai tokadabara, ati ai tokadabaharire. Hini yamata ihi Bara mai‑ya dai ati bari, Mose ati‑ya mai tokadabara, Deoso‑ka mai toharabone dai ati na, Deoso yawebonane.
11Mose ai manakone‑ya nanahabarihi, manakone ai nanahabarihi ne, ai‑ka Ayo Yeso Kirisito ati‑ya ai nofa, ai manakone aba, Yeso ati‑ya mai nofa, mai manakone abahari teni.” Bedoro ati nemonane.
12Mai ati fawana, Baoro, Banabe mai fama, mai‑ya mai hiyara, Bara mai‑ya mai sawe, Deoso ene kite‑ya mai awa, tamine‑ya mai kaminamoneni.
13Mai ati fawaniya, Tiyako waamise, mai‑ya hiyare,
“Okoyo dai toha, oka soho dai toha na, owati dai mitahi.
14Simaho Bedoro ati dai mita,
‘Hibati‑ya Bara mai‑ya Deoso haane, mai‑ya kayafebonaha.’ Ati ne.
15Fara‑nima yama na‑ya Deoso ati‑ya mai mi‑mita‑mete mai kanahano,
16‘Okomatasiya, Dafi‑ka yobe abe, wama·onamatasaboneni. Yobe abe sone, onawaamisamaboneni.
17Hibati‑ya dai‑ka mai toha, Bara mai toha na, dai okadikamaro, owa ene‑ya dai awa, owa‑ya dai sibanabone, dai nafi‑ka Hidi ohawahaboneni.’ Deoso ati ne.
18Deoso ati‑ya mai mi‑mita‑mete mai hikanahanameteni.
19Owatibodi ati dai mitahi. Yeso ati‑ya Bara mai nofa, Deoso hawine‑ya mai yaka na, mai‑ya ai ati maakariyahi.
20Mai‑ka yama hani‑ba ai kanahanohi.
‘Mai‑ka deoso bare‑ka bani‑bona mai daahine‑ya dai kabarihi, mai fanawi one‑ya dai aharihi, bani emene abare eme dai kabarihi nahi.’ Ai‑ka yama hani ati naboneni.
21Deoso ati i‑di Mose hikanahanomata, sabado hinama‑ya Deoso‑ya mai hi‑hiyara‑ke yobe‑ya mai hikadike, ati‑ya mai dami mitateni.” Tiyako ati nemonane.
Bara mai‑ka yama hani‑bone‑ya mai kanahana
22Yeso‑ka yo‑yose mai toha, Yeso‑ka bote mai toha, Yeso ati‑ya mai no‑nofa mai toha, mai na, mai ibi hiyara,
“Ai‑ka mai one ai yosehi, Baoro, Banabe mai fama, mai‑ya mai dabiya, Atioki‑ya mai tokabonehe. Ai‑ka webote mai fama, i‑di Yoda Basaba, i‑di Sira ne, mai ai yosehi.” Mai ati na.
23Atioki‑ya mai wi‑wina mai‑ka yama hani‑bone‑ya mai kanahano,
“Atioki‑ya dai wi‑wina, Siriya‑ya dai wi‑wina, Sirisiya‑ya dai wi‑wina, dai na, dai‑ka yama hani‑bone‑ya. Yeso‑ka yo‑yose oda toha, oda‑ka bote mai toha na, dai‑ka yama hani‑bone oda kanahanoneni. Hibati‑ya Bara‑ta dai tohamaro, hibayata oda‑ka soho dai tohawahineni.
24Oda tabaro‑ya mai sa‑sawi dai tabaro‑ya mai toka, keyehe‑ya mai hirina, mai ati ihi dai atibodi komamoneni. Mai oda yose awiraroni.
25Fara ihi oda‑ka yokana mai oda kadikani, dai tabaro‑ya mai tokabonehe. Oda‑ka soho i‑di Baoro, i‑di Banabe, mai fama, mai‑ya mai saweboneni.
26Hini mai‑ya mai nofara, ai‑ka Hidi i‑di Yeso Kirisito ati‑ya mai nofabisa, ati mai hiwakamebonane. Mai abi yanatonamaro, mai oda nofi nafine.
27Oda ati ene i‑di Yoda i‑di Sira mai fama, dai tabaro‑ya mai towakaboneni, oda‑ka yama hani ati‑nima dai‑ya mai hiyaraboneni.
28Haa‑nima dai niya, sibaraboneni. Deoso‑ka Doni ati toha, oda ati toha nineni.
29Mai‑ka deoso bare‑ka bani‑ya dai kabarihi, ama dai kabarihi, bani emene abare eme dai kabarihi, mai fanawi one dai aharihi nahi. Oda ati‑nima dai niya, dai sibaraboneni. Feye amani.” Yama hani ati nineni.
30Yama hani‑ya mai damakana, mai towakama, Atioki‑ya mai kobokana, Kirisito‑ka mai nafi yorotokana, mai‑ya yama hani‑ya mai daanineni.
31Yama hani‑ya mai kadika, mai ya‑yaina,
“Yama hani ati sibarini. Oda ya‑yainineni.” Mai ati namoneni.
32Yoda, Sira mai fama Deoso ati‑ya mai mi‑mita mai toha, Kirisito‑ka mai‑ya mai hiyara, mai ati ihi mai ya‑yaina, mai habi kitawahamoneni.
33Mai amoni damara, Yerosare‑ya mai wininamabone,
“Dai‑ya mai yoseni dai tokomahi. Oda ya‑yainawahani.” Kirisito‑ka mai ati namoneni.
34Sira‑ta towitakose,
35Atioki‑ya Baoro, Banabe mai wina, mai dami eyehe, ai‑ka Ayo ati‑ya mai kamina, mai‑ya mai kanawatamoneni.
I‑di Baoro i‑di Banabe mai famamara
36Makobote Banabe‑ya Baoro hiyare,
“Hima, hibati‑ya ai towakimaro‑ka tabora‑ya ai towakamatasahi. Mai ai hiyaramaro ai‑ka soho mai tohawaha, mai ati ai mitabani.” Baoro ati ne.
37“Hehe, ai towaka, ai‑ya Yowaho Maroko dabaho.” Banabe ati ne.
38“Yowaho Maroko ai‑ya dabarebonane. Hibati‑ya ai‑ya sawi, Banafiriya‑ya wininame, ai‑ya kasomaremarine.” Baoro ati ne.
39Yowaho Maroko ene mai ibi weena, mai famamara, i‑di Banabe i‑di Maroko‑ya fame, Sibe‑ya mai towakamoneni.
40Baoro i‑di Sira‑ya haanane, mai towakamabonehe.
“Deoso dai‑ya sawine.” Kirisito‑ka mai ati namoneni.
41Siriya‑ya mai towaka, Sirisiya‑kaya mai towakawaha, Kirisito‑ka mai‑ya mai hiyara, mai habi kitawahani.
Currently Selected:
Yeso‑ka yo‑yose mai tamine 15: jaaNT
Highlight
Share
Copy
Want to have your highlights saved across all your devices? Sign up or sign in
